A pi ake 1
1
Yiif Tedu le a regte
1O koor es Tewofiil, mi o mat layaam no safe eetaand es ke Yeesu a ferna o fi, a jangnin fop, xotitna no mberaandoong naa,#Lik 1:1-4 2boo neen Roog a yoɗun na asamaan, cinj ye ta cooxna apootar we ta jil’ina bargal ke ten na pexey Yiif Tedu le. 3Cinj ye Yeesu a xonna, a cooxa a den xa anddiloor xa mayu ndax ta feedin a den ee oxe ñoowaa. A feeñooxooga a den boo a pe qarɓeen nahik, a layaa a den kaa jofna no Maat ne Roog. 4Bes, a soƥ ta reer fa den, a maƭooxa a den ee:
«Ba nu ngoƭ a Yeerusaleem, ndaa fat nu cung ke Faap fee a regitna, too um yegnin a nuun.#Lik 24:49 5Mee ndax Saŋ, foofi a batiise’toogu, ndaa nuun koy, ndeer mene fo a pe a mayeer, xan nu mbatiise’tel Yiif Tedu le.»#Mace 3:11; Mark 1:8; Lik 3:16; Saŋ 1:33
Yeesu a ŋaaya na asamaan
6Maaga, apootar waa mbokatoor’ina fa Yeesu a laamtaan ee:
«O Yaal oxe, ndax no camaane kene o sinjatinkaa maat ne Isra’el?»
7Yeesu a doona a den ee:
«Refee yee nuun mbaru o and camaane ke fo baxtu ke Faap fee a geennitna sañ-sañ um. 8Kaa koy, xan nu ndaaw doole, yaa Yiif Tedu le a fudooxkaa took nuun, too xan nu ndef seede es, layaa kaa jofna na mi kam Yeerusaleem, kam o jegel olaa Yudee fop, kam saax laa Samari, boo no cat adna.»#Mace 28:19; Mark 16:15; Lik 24:47-48; Saŋ 20:21
9Cinj yaa Yeesu a layna kaaga, a dalfooxa o yoɗoox na kid den, too ye da ƭeetan, eel a singaan.#Mark 16:19; Lik 24:50-51
10Yaa da ndefna maaga, a ndaxaaƴooxan ta retaa, goor ɗik waa ndokooxna tikoorik tan a mbeeñooxa a den, 11a lay a den ee:
«Ndi nuun Gaagalile we, xar taxu nu ngeenoox ƭeetaa na asamaan? Yeesu feene yoɗeena a ndeer nuun, a ret na asamaan, ne nu nga’tuuna ta yoɗel, neene o mat a nomtoortiidkaa.»
Oxe rondandna a Yudaa
12Maaga, apootar we a nomtooxiida Yeerusaleem, a inoortiid no joong olaa xoyoogeena o Joong ole no taxar oliiw kaa, reeƭna paam Yeerusaleem. O koƭel um#1:12 o koƭel um Ke ci’it’eena o ñaaƴel na bes fee na ñootnax ale a reeƭa ngap kilomeet leng. a fodir’a fo ke ci’teena o ñaaƴel na bes fee na ñootnax ale. 13Yaa da mbadiidna, a ŋaaya no taax-took naa maa da mer’ina o mbokatoortaa. A ndeeƭa: Piyeer, Saŋ, Saak, Andare, Filip, Tomaa, Bartelemi, Mace, Saak fee o ƥiy Alfe, Simoŋ oxe na xoxtaa saax um fa Yudaa fee o ƥiy Saak.#Mace 10:2-4; Mark 3:16-19; Lik 6:14-16 14Den fop kaa mbog’u xeeñ leng, a ngen na qeƭ. A jeg’a itam rew leng-leng nen a Mari fee ya Yeesu fo xa teɓ axe Yeesu.
15Na pe akaaga, Piyeer a inooxa a ndeer no fog olaa. Waa mbokatoor’ina a ndeeƭa ngap wiin teemeed fo wiin qarɓeen ƭik. Maaga, Piyeer a laya a den ee:
16«Nuun fog es, Yiif Tedu le a yegnita no don Dawid kam a Pind a Tedu ke no kaa farna na Yudaa fee adooxan’ina waa ndam’ina a Yeesu, too fa lay feene a wara o fadnoox. 17Yudaa o leng na in a reeƭu, too a jeg’a a las no calel ke in.
18O koor oxeene a janga xaaliis fee ta rabid’eena na bakaad fee ta fi’’ina, a jiktin o qol. Cinj kaaga, a yena, a adin xoox um, cer um a ƭeg a ndeer, laaw um fop a ƥaxooxiid tafil.#Mace 27:3-8 19Waa ngen’ina Yeerusaleem fop a yega ke xew’ina, too a taxa da nqoyaa o qol oleene no ɗelem den Hakeldama, kaa tekit ee ‹o qol fo’oy›.
20Neene mat a bindte no safe le na Kim a tedu ke:
‹Sam ngenand um a fes a pec,
too ba o leng a genat teen.›
A binde itam ee:
‹Fat o lakas a rondandin.›#Kt 69:25; 109:8
21Neene boog, fat i njil o koor o leng a ndeer no we yoonoogna fa in na jamaane faa o Yaal oxe Yeesu a refaa fa in, 22no kaa xotitna yaa Saŋ a batiise’uuna boo a koom alaa ta yoɗteena a ndeer in, yaam a wara o jeg oxaa refna fa in nen o seede xaa na laytaa a qontax ale ten.»#Mace 3:16; Mark 1:9; 16:19; Lik 3:21; 24:51
23Maaga, a njila goor ɗik: Oxe moolan’eena Yoseef, too a xoyoogel Barsaba, a lastiteel Yustus fo xaa ne’eena Macaas. 24Cinj kaaga, den fop a nqeɗa yee:
«O Yaal oxe, wo fee andna a qeeñ ake no wiin we fop, lali a in o leng oxe jiloona no ɗik weeke, 25ndax ta rondand a Yudaa na seek um ale refna calel apootar kene ta xaƴna, soo a xaad me ta jegeena.»
26A mbanjanga, too a yena took Macaas fee fokat’ateena no apootar xarɓaxay fo apootar o leng oxaa.
Селектирано:
A pi ake 1: SRR23
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Copyright © 2015-2023 by Eglise luthérienne du Sénégal