A pi ake 2
2
Yiif Tedu le a fudooxiida
1Yaa bes faa na Pantekot faa a fadiidna, gimu we fop kaa mbokatoor’u o mbiñ o leng.#Paɗ 23:15-21; Cang 16:9-11 2Ndak fo ndak, fangax a inoortiida na asamaan, a saxit nen nqeñ maak naa na wuuɗaa, too a mayƭanda mbind naa da moof’ina fop. 3Maaga, a ƭelem akaa nandna nen a aal fiɗel a mbeeñooxa a den, a nqaajoox, soo a ndoonoox took o kiin oo kiin na den. 4Den fop a maya fo Yiif Tedu le, too a ndalfooxa o layaa lak lakas kaa Yiif le a ci’na a den.
5Maaga, a jeg’a Yaawuur waa ngar’ina Yeerusaleem, yaam a mbaɗooxiid a Roog. A inoor’a no qeet lakas ke na adna fee fop. 6No fangax laaga jeg’ina koy, wiin mayu a mbokatoora, too a njaaxiɗ yaam oxuu refna a nanooga lak xoox um a layeel. 7Den fop kaa njaaxiɗ’u, a njeg o mbet. A layrooga yee:
«Ndax wiin weeke fop na layaa ndefee Gaagalile? 8Nam oxuu refna na in boog a waagu o nanrit fa den, da layaa na lak fee i numna? 9In ndefu wiin we Part fo we Medi fo we Elam, we ngenna Mesopotami fa Yudee fa Kapados fa Pont fa Asi, 10we ngenna Firigi fa Pamfili fa Misira fo no jegel ole Libi dendna fa Kireen fo we inoortiid’ina Rom. 11A jega itam Yaawuur fo we tuub’ina na ƭat ale no Yaawuur we, wiin we Keret fo we ngenna Arabi, too in fop kaa i nanaa a den da yegnitaa a pi a maak ake Roog, oxuu refna na lak xoox um.»
12Den fop kaa njaaxiɗ’u, too and’ee ke da mbarna o nqalaat. Kaa layroogu yee:
«Ndi xar keeke a tektu?»
13Kaa koy, lakas we kaa ñawle’oogu a den, a layaa yee:
«Kaa mbay fa biiñ boo nep.»
Waare fee Piyeer na Pantekot faa
14Maaga, Piyeer a inooxa fo apootar xarɓaxay fo leng lakas we, too a faambir fa den, a lay faan laa fo o ñuxur o maak ee:
«Nuun wiin we Yudee fo nuun we ngarna Yeerusaleem fop, ngela andyo kene! Mbetyo nof nuun nan-giloox fa lay es! 15Wiin weeke mbayee ne nu mboogtuuna. Njeeƈ-tanqin ne soom oo. 16Kaa koy, kaa ref ke Roog a layna, a reefandin no tuleer Yowel ee:
17‹No ñaal palakaand ke, xam fudniid Yiif le mi took no wiin we fop,
xa ƥiy xa koor axe nuun fo xa ƥiy xa tew axe nuun xan a njo’tanaxam.
xa pes axe nuun a nga’aa, a mbeeñooxeel,
soo nogoy we nuun a ƭaaɗaa.#Yow 3:1-5
18Ii, no ñaal kaaga xam fudniid Yiif es took no we na mbaɗooxaxam, goor fo rew,
too xan a njo’tanaxam.
19Xam lalit comlaand took-ee-took, na asamaan fee,
fo xa anddiloor a lanq, took lanq ke,
ta ref po’oy fo fiɗel fo fo suun olaa fi’na a eel.
20Boo ñaal maak mayu o ndam ne no Yaal oxe a helko fo garaa,
xan njeeƈ ne a suptoox o niɓaan,
soo o nqool onqe a suptoox fo’oy.
21A koom, oxuu ƴufginoorna gon le no Yaal oxe, xan a muc.›
22Nuun wiin we Isra’el, nan-gilooxyo ke um layiidaa a nuun. Yeesu o Naanasaret oxe a reeƭa o kiin oxaa andoona yee Roog feeñlun mbaambir nuun. Roog fa xoox um koy, a fi’a a pi katil fo comlaand fo xa anddiloor na pexey o kiin oxeene, ne nu andtuuna nuun fa qoox nuun. 23O kiin oxeene, kaa nu ƥoxotel o ten no ke Roog a heboox’ina. Keene koy, Roog kaa yuuɓ’un yaaga. Nu ndengaan na teex, ndax nu mbarnoorin na xa ƥay axe no we ndefeerna Yaawuur.#Mace 27:35; Mark 15:24; Lik 23:33; Saŋ 19:18 24Kaa koy, Roog a xontooxnooraan, too a muclin na xa ƭomel axe fa nqon a ataa, yaam fa nqon waag’iran o jeng na sañ-sañ um.#Mace 28:5-6; Mark 16:6; Lik 24:5 25Dawid sax a lay’a kaa farna no ten ee:
‹Kaam jasnooraa fo Yaal oxe kili,
too oxey no saax es o ñamaak, yaam ndik um tolof.#Kt 16:8-11
26Ten taxu xeeñ es a may fo o ɗaay,
um laltan fo a ƭelem es.
Xan cer es a ñootnoox fo yaakaar,
27yaam xaƴkiro o laaw es ta mooc kam jaaniif,
too xaƴkiraamo, mi fee o Tedu xe wo, cer es a mbottik na semb.
28Andnooraxamo a ƭat ale na ɓisaa no ñoow ole,
too xan o ɗaaynooraam mbaambir of.›
29Fog es, waagaam o lay a nuun booru no kaa farna no taan in Dawid ee a xona, a gasel, too a mboy um oxey a ndeer in boo ndiik. 30O tuleer a reeƭu, too a and’a yee Roog a reg’aan na taaƥ ee xan a moofin o leng no fo ndaan um took gamb no maad le ten.#Kt 132:11; 2Sam 7:12-13 31Keene kaa ref a qontax ale no Muumucil oxe regteena, ta ga’’ina yaaga fadiidafulee, too a yegnitin ye ta layna yee:
‹Xaƴkaand a mooc kam jaaniif,
too cer um mbotkee na semb.›
32Yeesu feene, Roog xontooxnoorun, too in fop seede i ndefu itam. 33Roog a yoɗaan fo a ñamaak um, ta daawit na Faap fee Yiif Tedu le regit’eena. Yeesu a fudniidaan, ne nu nga’tan fo ne nu nantan. 34Yaam a woora mat ee Dawid mosee o ŋaay na asamaan, ndaa ten fa xoox um a laya yee:
‹O Yaal oxe a laya o Yaal oxe mi yee:
Moofi na ñamaak es,#Kt 110:1
35boo yaa fi’uuma fañ we wo me o dakaa.›
36Fat xeet fee Isra’el fop a and a paax ee Roog fi’u a Yeesu feene nu ndengna na kurwaa, ta ref o Yaal oxe fo o Muumucil oxe regteena.»
37Yaa da nanna fa lay faaga, cer den a ñaaƴa, too a laya a Piyeer fo apootar lakas waa yee:
«Fog we, xar i mbaru o mbi?»
38Piyeer a doona a den ee:
«Mbesyo pakaad nuun a cinj, too oxuu refna fat a batiise’el no gon Yeesu Kiristaa, ndax pakaad um a mbaasanel, ta daaw Yiif Tedu le Roog a ci’taa. 39Yaam a tegit ale, nuun njegun, nuun fo xa ƥiy nuun. We o Yaal oxe Roog in a xoykaa fop itam too a ngoƭ, a mboga teen.»
40Maaga, Piyeer a saƭakina a den fo fa lay fa lakas fa mayu, too a maƭoox a den ee:
«Njaɓyo muc no wiin faaxeer we ndiiki.»
41We njaɓ’ina fa lay um fop a mbatiise’e, too a koom daalbe we a ƥaatoox’a ngap wiin cuni tadik. 42Kaa ndamoogu a cangin ale no apootar we, a mbog o liir, a ndeeraa a cu’ax ale no Yaal oxe, soo a nqeɗaa.
Mbokatax eetaand ne no gimu we
43Oxuu refna kaa saɗar’atu yaam comlaand ke fo xa anddiloor axe apootar we a mbi’oogna. 44We ngimna fop kaa mbokatoor’u o mbiñ o leng, a mbog fop.#4:32-35 45Kaa njikooxoogu xa qol den fo kalal den, a nqaajran, oxuu refna fo ne soxla um a fodna. 46Bes fuu refna, kaa mbokatooroogu no Mbind Roog ne, a mbogaa mbuuru ne kam pind ke, a ñaamaa fo o mbeq fo xeeñ yelefu, 47a simataa a Roog, too a ngidman paam xeet fee fop. Maaga, bes fuu refna o Yaal oxe a ɓaatooga no fog ole no gimu we waa mucna.
Селектирано:
A pi ake 2: SRR23
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Copyright © 2015-2023 by Eglise luthérienne du Sénégal