Mberaand 18
18
Roog a rega a Abraham o ƥiy o ngoor
1O Yaal oxe a feeñooxa a Abraham no kariñ kaa Mamre, a soƥ ta moof paam ndokand ne no ƭiif um njoloor o mbuc. Neeke a feeñoorit’un. 2Abraham a yoɗa a kid um, soo a ga goor daduk waa ngoƭ’eeruuna. Yaa ta ga’na a den, a inoora no ndokand ne no ƭiif ne ten, a ƴuf a xetook a den. A gunga a lanq,#Heb 13:2 3soo a lay ee:
«O Yaal oxe, a soƥangaa yee daawaam yirmande of, ba o joon o paɗ of suuraa. 4Ngela cungyo foofi a ɓisiidel, nu ƥoganel a caf nuun. Ñootnooxafulyo yoora ndaxar neeke. 5Xam ret ɓisiid ñaamel ndax nu ndif’oorin. Cinj kaaga, nu mbaaga o suur a ƭat nuun. Neene, nu ndeefkee me no tag nuun na kasaara.»
A ndoonaan ee:
«Iyo! Fi’teen ne layoona.»
6Abraham a ñofa o yaang no ƭiif naa ten maa Saara, a layin ee:
«Ñofi eed fo o eedir ole xa eed xa tadaq mbiɗel, o xiiwin, fi’an a den xa kaf.»
7A ñofa o ret no siir olaa, a dam o xeel o giñu, a cooxin o tag um ta ñofin o jaw. 8A xotahina fo neew fo fo sis fo a tegeƴ ake no xeel ole njaweena soo a diƈanin a den. Ten fa xoox um koy a moofa paam den yoora ndaxar ne, soo da ñaam. 9Maaga a laamtaan ee:
«Taa Saara fee o teef?»
A doona a den ee:
«Oxaay kam ƭiif naa!»
10O leng na den a laya yee:
«Mbaan na waxtu feeke deŋ, xam nomtooxiid me wo, too xam soƥ Saara fee o teef a jeg o ƥiy o ngoor.»
Saara koy, kaa fod’u no ndokand ne no ƭiif ne ten reeƭna cinj ne Abraham, a nan-gilooxaa.#Rom 9:9 11Abraham fa Saara koy kaa nogoy’u lool, ten taxu Saara yaakaar’atee o jeg o ƥiy. 12Saara a jala taa kam um, a lay ee: «Waagaam o nogoy boo nand neeke, o kor es itam a nogoy! Ndax xam moofat felakinooxaa?»#1Piy 3:6 13Maaga, o Yaal oxe a laya a Abraham ee:
«Xar taxu Saara a jalaa, a lay ee ndax no ndigil waagataam o jeg o ƥiy mi feeke nogoyna boo ƴut? 14Ndax a jega kaa xoxna o Yaal oxe. Xam nomtooxiid meen na waxtu feeke mbaan, too xam soƥ Saara a jeg o ƥiy o ngoor.»#Lik 1:37
15Saara a xaña yaam diid, a lay ee:
«Jaliim de!»
O Yaal oxe a doonaan ee:
«Jalaa kañ!»
16Goor waa a inooxa ndax da suur. A njagna farna fa Sodoom, soo Abraham a welit a den. 17Maaga, o Yaal oxe a laya yee:
«Ndax kaam ɗasinkaa a Abraham ke um fi’kaa? 18Xan Abraham a ref o taan no xeet fa maak fa njegu doole, too qeet ke no lanq ke fop no ten a mbarke’itkeel. 19Feek kaam jil a Abraham, ndax ta hebil xa ƥeem fo wiin mbind um da ngayaa a ƭat ale no Yaal oxe, a ndeefaa a ƭat fo o cofel, xam fadnanin a tegit ake fi’ananuuma.»
20O Yaal oxe a laya a Abraham ee:
«Ƭomatax ne took Sodoom fa Gomoor a ɗoma tigi, too bakaad den a magna lool! 21Ten taxu xam ɗeetik boo and ndax kaa da mbesoor deŋ nen fangax le fadiidna boo me mi. A reftangee neene xam and.»
22Goor waa a ndeta, a nqot farna fa Sodoom, Abraham o mat a maad o geenoox mbaambir no Yaal oxe. 23Abraham a matiida, soo a lay ee:
«Ndax xan o saŋkandoor o cofu fo o soxodu xe? 24Xeƈa a waaga o jeg jofu qarɓeen ƥetik kam teeru faa. Ndax xan o saŋik a den itam, fañ o waasan teeru fee yaam jofu qarɓeen ƥetik we ndefna maaga? 25Fi’kiro kaaga koy! Doonkiro o cofu xe leng kut ke doonoona o soxodu xe, soo warnoor o cofu xe fo o soxodu xe jaf leng. Wo fee na hate’aa we no lanq ke, ndax fesoorkiro fo o cofel?»
26O Yaal oxe a doonaan ee:
«Um soƥangaa kam Sodoom jofu qarɓeen ƥetik, xam waasan teeru faa fop yaam den.»
27Abraham a layaan ee:
«Ga’angi, fo ut fo ndaw rek refum soo fi neeke layaa fo o Yaal oxe. 28A waaga o ref ee xan ɓetuk a yaqan ta fad qarɓeen ƥetik, ndax ɓetuk waaga xan a tax o saŋik teeru faa fop?»
O Yaal oxe a doonaan ee:
«Um soƥangaa maaga jofu qarɓeen nahik fo jofu ɓetuk, saŋikkinum.»
29Abraham a ɓaata o lay ee:
«A waaga o ref ee jofu qarɓeen nahik soom ndefu maaga.»
O Yaal oxe doonaan ee: «Yaaga, fi’kiim a den paaxeer leng yaam jofu qarɓeen nahik waaga.»
30Abraham a layahina yee:
«O Yaal oxe, ngela ba o fuux yaa ɓaatuuma o lay! A waaga o ref ee jofu qarɓeen tadik waay maaga.»
O Yaal oxe doonaan ee:
«Fi’kiim dara yaa soƥuuma maaga jofu qarɓeen tadik.»
31Abraham a layahina yee:
«O Yaal oxe, boo ndiik de waasanaam! Xeƈa jofu qarɓeen ƭik waay maaga.»
O Yaal oxe a doonaan ee:
«Yaaga, saŋikkinum yaam jofu qarɓeen ƭik waaga.»
32Abraham a laya yee:
«O Yaal oxe, ngela ba o fuux! Jaf leeke soom um laykataa. Xeƈa jofu xarɓaxay soom owaay maaga.»
O Yaal oxe a doonaan ee:
«Yaaga saŋikkinum yaam jofu xarɓaxay waaga.»
33Ye o Yaal oxe a layna fa Abraham boo a ƴut, a reta, soo Abraham a nomtoox no mbind um.
Селектирано:
Mberaand 18: SRR23
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Copyright © 2015-2023 by Eglise luthérienne du Sénégal