Mberaand 21
21
O rimel ole Isaak
1O Yaal oxe a wetandooxa ke ta reg’ina a Saara, a fi’antin o ten ne ta layit’uuna. 2Saara a roka o fud, soo a ñoot o ƥiy o ngoor na waxtu fee ta hapeena ne Roog a layit’uuna. A soƥa koy Abraham a nogoy tigi.#Heb 11:11 3Abraham a ne’a o ƥiy onqeene Saara a riman’uuna Isaak.#21:3 Isaak ɗeeti 17:19. 4Abraham a xuca a Isaak fee o ƥeem ye ta jegna bes fa ndakooxiidu, ne Roog a heblit’uuna o ten.#17:12; Pi 7:8 5Abraham a reeƭa na xa kiid teemeed um yaa Isaak fee o ƥeem a rimeena. 6Maaga, Saara a laya yee:
«Ey! Roog a fi’anaxam kaa um muuƴooraa, too oxuu yeguuna xan a jalaxam.» 7A doona teen ee: «An waag’u o gimnoor a Abraham ee xan Saara a numin o ƥiy? Yaag oo toox de, ke ta nogoyna nogoy fop oo rimanaanum o ƥiy o ngoor.»
Abraham a raxa a Agaar fa Isma’el
8O ndeɓandoong onqe a maaka soo a roɓnel. Abraham a fi’a a put a maak a koom alaa Isaak a roɓneena.
9Saara a ga’a o ƥiy o ngoor onqe Agaar fee o Miimisira xe a rim’ina fa Abraham ta xaadnooxaa a Isaak. 10Saara a laya a Abraham ee:
«Raxi o ceefeer oxene fo o ƥeem, yaam o ƥiy onqe no ceefeer oxene lasirkee lam ne fa Isaak fee o ƥees.»#Gal 4:29-30
11Fa lay faaga a feƭar’a a Abraham tigi, yaam Isma’el oo o ƥeem a reeƭu. 12Kaa koy, Roog a laya a Abraham ee:
«Baa keene a feƭarong yaam o goor ole fo o ceefeer of. Kuu Saara a xeɗoonga, fat o ci’in o ten, yaam o kurcala of ŋaƈit na Isaak a sutoorkaa.#Rom 9:7; Heb 11:18 13Xam fi itam o ƥiy o ngoor onqe no ceefeer of a ref o taan no xeet fa maak, yaam na wo a faqaqooru.»
14Abraham a inooxa ƥiiɓ teel, a xot puuru fo mboxos, a cooxin a Agaar ta gadooxin. A cooxaan itam o goor ole, soo a raxin. Agaar a reta, a mo’ik kam a koƥ-a-ƥor alaa Beer-Seeba. 15Ye foofi le kam mboxos ne a fagna, Agaar a moofna o goor ole no mbafid, 16soo a ret, a moof koƭu a jasnoor fo ten ee yaam waagee muk o ɗeetaa o goor ole ta xonaa. A moofa boog, a jasnoor fo ten soo a ref no loolaa. 17Roog a nana xa buuq axe no goor ole. Malaaka fee no Yaal oxe a foda na asamaan, a xoy a Agaar, a layin ee:
«Agaar xar oo? Ba o saɗar dara, yaam Roog a nana xa buuq axe no goor ole meene ta refna sax. 18Inooxi, xot o goor ole, damin o ɓay, yaam xam fi xeet fa maak a faqaqoor no ten.»
19Roog a weta a kid ake Agaar soo ta ga a ngas foofi, a reta a ƴeew mboxos ne, soo a ci o goor ole ta yer.
20Roog a reeƭa fo o goor ole, ta maak, a refat o kiin o baane’u kam a koƥ-a-ƥor ale, a ref itam o qaaxaƴ a qali. 21Na koƥ-a-ƥor alaa Paaraan a gen’u, soo ya um a waaƭanin o tew o Miimisira.
Ngiɓoor ne Abraham fa Abimelek
22Na jamaane faaga, Abimelek a yoona fa Pikol fee o aa-adax no xiixire we ten, soo a lay a Abraham ee:
«Roog oxey fa wo no fop ke o fi’aa.#26:26 23Ndiiki koy, daaɓooxi meeke no gon Roog ee naxkiraamo, naxkiro xa ƥees mbaat xa taan es, too xan o paaxel of a ref no saax leeke refiidoona o gataakoon, ne o paaxel ole mi a refitna fa wo.»
24Abraham a doonaan ee:
«Daaɓooxaanum!»
25Kaa koy a xasana a Abimelek yaam a ngas foofi laa faɗ we Abimelek a njaɓit’ina no ten. 26Abimelek a doonaan ee:
«Andiim oxaa fi’na kaaga de, yegniraamo o ten, too mi fa xoox es mexey sogan o yeg xaye.»
27Maaga, Abraham a ci’a a Abimelek a ked fo qoox, soo den ɗik fop da ngiɓoor. 28Abraham a dalfooxa o say fo mbaal ɓetuu ƭik. 29Abimelek a laamta a Abraham ee:
«Fo mbaal ɓetuu ƭik neeke sayoona koy, xar a tektu?»
30Abraham a doonaan ee:
«Jaɓi um cooxong a den, ndax ta ref seede yee mi o mat waqu a ngas ale.»
31Ten taxu o mbiñ onqaaga a ne’el Beer-Seeba#21:31 Beer-Seeba kaa tekit «a ngas a taaƥ», mbaat «a ngas no ɓetuu ɗik»., yaam maaga a ndaaɓoorit’u den ɗik fop.
32Neene a ngiɓoortu boog kam Beer-Seeba. Cinj kaaga, Abimelek a inooxa, ten fa Pikol fee o aa-adax no xiixire we ten, soo a nomtoox no saax laa no Fiifilista waa. 33Abraham a jimba purndu kam Beer-Seeba. A ƴufginoora gon le no Yaal oxe Roog fee na refkaa boo faw. 34Abraham a reeƭa o gataakoon boo miñu kam saax le no Fiifilista we.
Селектирано:
Mberaand 21: SRR23
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Copyright © 2015-2023 by Eglise luthérienne du Sénégal