Mberaand 22
22
Roog a hebla a Abraham ta sadaxit a Isaak
1Cinj kaaga, Roog a ɗeetlooxa a Abraham, a layin ee: «Abraham!»
Abraham a doonin ee:
«Oow!»#Heb 11:17-19 2Roog a layaan ee: «Jangi o ƥiy o leng kut onqe jegoona, Isaak fee fexoona fex, o ret no saax laa Moriya ɓoxotin maaga, nen sadax fa ndoxel took o leng na xa coong axe um lalkang.»#2Clr 3:1
3Abraham a inooxa ƥiiɓ teel, a humin o faam um, soo a yoon fo dag ɗik fa Isaak fee o ƥeem. A seɓa xa cuuƭ axaa ta doxitna sadax fee, soo a xot a ƭat ndax ta ret no mbiñ onqe Roog a lay’uuna. 4No ñaal ndadkandeer naa, Abraham a yoɗa a kid um, soo a ƴook o mbiñ onqe koƭu. 5Maaga, Abraham a laya dag we ten ee:
«Cungyo a in mene fo o faam ole, soo mi fo o goor ole i mbaɗook a Roog maana. Cinj kaaga, xan i nomtooxiid me nuun.»
6Abraham a janga xa cuuƭ axe na ndoxitkeel sadax fee, a roxondin a Isaak fee o ƥeem, a saq japil fee fo fiɗel le. Den ɗik fop a nqota a ƭat. 7Maaga, Isaak a laya a Abraham fee faap um ee:
«Ndi baa!»
Ta doonin ee:
«Oow!»
Isaak a layin ee:
«Mi de kaam ga i saq xa cuuƭ fo keƥandir, ndaa taa mbaal ne na sadaxitkeel?»
8Abraham a doonaan ee:
«O ƥees, Roog na waaƭankaa a xoox um mbaal ne na sadax fa ndoxel fee.»
Den ɗik fop a ndefa no ñaaƴaa. 9Ye da mbadiidna no mbiñ onqe Roog a layuuna, Abraham a fi’a o sadaxand, soo a doon xa cuuƭ axe took fee. Cinj kaaga, a dura a Isaak fee o ƥeem, soo a doonin took xa cuuƭ axe no sadaxand ole.#Saak 2:21 10Abraham a letna o ɓay um, a xot japil fee, ndax ta xiris o ƥeem. 11Maaga, malaaka no Yaal oxe a foda na asamaan, a xoy a Abraham, a layin ee:
«Abraham! Abraham oow!»
Abraham ee:
«Oow!»
12Malaaka fee a layaan ee: «Ba o ɓay of a fad no goor ole, too ba o fi’in dara! Ndiiki koy andaam tigi yee saɗaraa a Roog, too xañiraamo o ƥeef o leng kut onqe jegoona.»
13Abraham a wiƈaqilooxa, soo a ga a cinj um suk mbaal laa xa can axe a njomna kam ngol. Abraham a reta, a xot suk mbaal le, a ɓoxotin nen sadax fa ndoxel na seek no ƥeem. 14Abraham a ne’a o mbiñ onqaaga Yahwe-Yiree#22:14 Yahwe-Yiree kaa tekit «pexey no ɓay no Yaal oxe».. Ten taxu ta layeel boo xaye yee: «Xan pexey a jeg no joong ole no Yaal oxe.»
15Malaaka fee no Yaal oxe a foda na asamaan, a xoy a Abraham jaf ɗikandeer,
16a layin ee: «Mi o Yaal oxe, mexe daaɓoortan a xoox es ee: Feek fi’aa keene too xañiraamo o ƥiy o leng kut onqe jegoona,#Heb 6:13-14 17xam barke’ong, mayƭand xa taan of, da mayit nen xa qoor axe na asamaan fo nen pep lanq na ƥeeraamb o maag. Xa taan of na mbugko maadooxa took fañ den.#Heb 11:12 18Qeet ke no lanq ke fop no xaa faqaqoorna na wo a mbarke’itkeel, yaam kaa o nananaam.»#Pi 3:25
19Abraham a nomtooxiida me no dag we ten, soo da yoon, a nqaad Beer-Seeba, yaam maaga Abraham a genoogu.
20Yaa kaaga a faafna, Abraham a yegne yee Milka fee o tew no ndeɓ um Nakoor a rima fa Nakoor 21a Uus fee taaw um, Buus fee reefna took um, Kemu’el fee faap Araam, 22Kesed, Haso, Pildas, Yidlaf fa Betwel. 23Betwel feene rimu a Rebeka. Weene ndefu xa ƥiy ɓetaa tadaq axe Milka a rimna fa Nakoor fee o ndeɓ Abraham. 24Nakoor a jeg’a itam fo ngeƈ-a-salma ne ten ne’’eena Rewma a Tebax, Gaxam, Taxas fa Maaka.
Селектирано:
Mberaand 22: SRR23
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Copyright © 2015-2023 by Eglise luthérienne du Sénégal