Saŋ 16
16
1«Kaam yegin a nuun keene, ndax ndefkee na nuun a panq. 2Xan nu ndaxel no pind a qeƭ ke. Xan a jeg sax jamaane faa we na mbaraa a nuun, a mboogkaa yee kaa mbaɗoortan a Roog. 3O nanangaa da mbi’an koy, kaa andee a Faap fee, andiraam. 4Layaam a nuun keene, ndax boo ta jegna nu mbetandoox ee yegin’aanum a nuun.»
Calel ke no Yiif Tedu le
«Layinum a nuun no mberaand naa, yaam ne reeƭuuma fa nuun. 5Ndiiki koy, mexe waajaa o nomtoox maa no xe luliidaxama, too o leng na nuun laamtiraam me um jofaa. 6Naqad oxe lifa xa cok nuun, yaam ke yegnuuma a nuun. 7Ndigil kak layum a nuun toox: Ke moƴna na nuun, um ret, yaam um retangee, o Yaayaal oxe garkee me nuun. Um retangaa koy, xam lultiidin a nuun. 8Boo ta garna, xan a andnoor adna fee yee na bakaad a ndefu, a lal a den o cofel, a diƈ mbaambir den hate: 9Xan a lal a den ee a mbakaada, yaam ngimee na mi, 10a lal a den o cofel, yaam mexey retaa na Faap faa, too nu nga’katiraam, 11a lal a den hate, yaam o maad adna feeke a hate’e boo a ƴut.
12A jega mayu kaa buguuma o lay a nuun, ndaa nu ngatliran ndiiki. 13Kaa koy, yaa Yiif le Roog saqna ndigil ne a garkaa, xan a ɗox a nuun no ndigil ne fop, yaam layitkee a xoox um, ndaa ke ta nanna rek, too xan a yegin a nuun kaa fadiidafuleerna. 14Xan a ɓoxotaam o ndam, yaam na mi a bugko naqtaa, a yegnan a nuun. 15Ke Faap fee a jegna fop, mi jegun. Ten taxu, um lay ee na mi a bugko naqtaa, a yegnan a nuun.»
Naqad fee na suptooxkaa o ɗaay
16«Ke nu nga’kaxam maykatee dara. Cinj kaaga, ɓaatinkee dara nu nga’ahinaam.»
17Leng-leng no daalbe we a layra yee:
«A laya a in ee: ‹Ke nu nga’kaxam maykatee dara. Cinj kaaga, ɓaatinkee dara nu nga’ahinaam.› A doona teen ee: ‹Yaam na Faap fee um retaa.› Xar keene a tektu tekit?» 18Kaa laamtoogu boog ee: «Xar ɓaatinkee dara a tektu? I andee ke ta ne’aa.»
19Yaa Yeesu a andna yee kaa mbaajan o laamit, a laya a den ee:
«Xar taxu nu laamtiraa ke layuuma yee: ‹Ɓaatinkee dara, nu nga’katiraam, cinj kaaga, ɓaatinkee dara, nu ndakooxaam o nga›? 20No ndigil, no ndigil, mexe layaa a nuun ee: Xan nu loolaa, mbaɗooxaa, adna fee a mbi’in baneex. Kaam ee xan nu ndef na naqad, ndaa koy leng a jega: Xan naqad feene a suptoox o ɗaay. 21O tew a naagangaa o gaajooxaa, kaa ɗomeel lool, ndaa boo andoona yee a muca, wetandooxkatee dara no ƭomel ole, yaam o ɗaay ole ta jegna no ƥeem. 22Nuun itam, nuun wey na naqad, ndaa xan i ndakoox o nga’ir, too a koom nu may fo o ɗaay. O ɗaay olaaga koy, o leng waagkiran o suqit na nuun.
23A koom nu laamitkatiraam dara. No ndigil, no ndigil, mexe layaa a nuun ee: Nu nqeɗangaa a Faap fee tig no gon es, xan a ci’in a nuun. 24Boo ndiik nu nqeɗtee gon es. Nqeɗyo, too xan nu ci’el, ndax o ɗaay nuun a ñak sik.»
Mi hupu adna fee doole
25«Kaam naxoox a nuun keene, ndaa ndiiki um layataa a qool qac kaa jofna na Faap fee, waas a naxax. 26Layiim a nuun ee mi na bugko xeɗanaa a nuun. A koom xan nu mbaag o nqeɗ a Faap fee no gon es. 27Faap fee fa xoox um kaa fex a nuun, yaam ne nu mbexaxama, ngim ee na Roog inoorum. 28Kaam inoor na Faap fee, gar na adna, ndiiki, um nar o sutoox na adna fee, ret maa na Faap faa.»
29Daalbe we ten a layaan ee:
«Ndiiki de, fa lay fee wo a xoola qac. Laytatiro a naxax a leng. 30I andata yee andaa fop, too soxla’iro o kiin a laamtong. Ten taxu itam, i ngima yee na Roog inooro.»
31Yeesu a doona a den ee:
«Ndax nu ngima ndiiki? 32Waxtu fee oxuu refna na nuun a retankaa a xoox um, oxe garaa, too a fadiida sax. Xan nu nqaƴaam, ndaa yoqkiim koƭong, yaam Faap fee, oxe fa mi. 33Kaam lay a nuun keene, ndax nu njegit jam na mi. Xan nu njeg coono maak na adna fee, ndaa koy saƭakinooxyo, yaam mi gartu adna fee took.»
Селектирано:
Saŋ 16: SRR23
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
Copyright © 2015-2023 by Eglise luthérienne du Sénégal