Ma-thi-ơ 5
5
Dôm Phôl siam
(Lu-ka 6:20-23)
1Tuk ƀôh tapôr bôl ralô, Pô Yê-su tagôk cơk. Tuk Bhô dok dala, dôm anưk xêh mưrai jek. 2Bhô pơh panôic tathit pato laic:
3“Phôl ka dôm urang kathot raƀah mat xwan,
Kaywa Dit Biya Thôr Riga bha di khol nhu!
4Phôl ka dôm urang hia patak parai,
Kaywa mưca bihu pajiông!
5Phôl ka dôm urang dhi dhau,
Kaywa mưca mưvarih tanưh!
6Phôl ka dôm urang ơk lipa gruk kahanôt,
Kaywa mưca bihu trei tal!
7Phôl ka dôm urang hu tian athur alim,
Kaywa mưca bihu athur alim!
8Phôl ka dôm urang hu tian haci hacih,
Kaywa mưca ƀôh Pô Lingik!
9Phôl ka dôm urang ba pathiam
Kaywa mưca bihu iêu nạn anưk bik Pô Lingik!
10 #
I Phi 3:14. Phôl ka dôm urang ciup di ep tatơk kaywa gruk kahanôt,
Kaywa Dit Biya Thôr Riga bha di khol nhu!
11 #
I Phi 4:14. Phôl ka khol hư, tuk kaywa di Ita bloh khol hư gok abih drei jhơk jhel, gơk tatơk, đôm palek#5:11 đôm palek: Dalam tha thanôn blah vak tangin nạn palek palam. tal abih kabha jhak. 12#Bruk 7:52.Xang ôn tabôn ôt nôt, kaywa kaya alin khol hư ngok thôr riga nạn biak prong; kaywa dôm pakat hôr dahlau khol hư lijang bhian gok mưnuix urang ep tatơk yau nan.”
Xara thong Tanrak hadah
(Mag 9:50; Lu-ka 14:34-35)
13 #
Mag 9:50; Lu 14:34,35. “Khol hư nạn xara anưd tanưh, min mưyah xara lihik licar ƀak yơ ngak yau halei ka nhu ƀak vơk? Xara nan gilaic hajiơng katôl, xang parah klāk nao thong gok mưnuix urang jwak jek ala takai. 14#Yâ 8:12; Yâ 9:5.Khol hư nạn tanrak hadah ka dunya. Tha boh dhan darap di ngok cơk ôh mưda gok pacang kavơk. 15#Mag 4:21; Lu 8:16; Lu 11:33.Ôh thei truic mưnhưk bloh cek ala jāk, min cek ngok kapuk mưnhưk piêh nhu pachang hadah abih mưnuix dalam thang. 16#I Phi 2:12.Lijang yau nan, tanrak hadah khol hư xang pachang hadah di anak abih drei, piêh khol nhu ƀôh dôm bruk ngak siam mưkrư khol hư thong pôk mưyom Amư khol hư mưdok ngok thôr riga”.
Hakum jakar thong Panôic hôr
17“Jôi xanưng Ita mưrai piêh yah klāk hakum jakar ngan panôic hôr; Ita mưrai, ôh njaup piêh yah klāk min piêh pathik. 18#Lu 16:17.Biak jơh, Ita đôm thong khol hư, dahlau di tuk lingik tanưh tapa nao, yơ tha tut, tha barih dalam hakum jakar lijang ôh mưda tapa nao bihu, ka tal tuk abih gruk bihu pathik.#5:18 abih gruk bihu pathik: Ngan nạn abih gruk mưjiơng tabiak. 19Ywa nan ka, thei yah klāk tha kabha axit yatha dalam dôm vahi ni thong pato mưnuix urang ngak yau nan, mưca gok mong nạn axit yatha dalam Dit Biya Thôr Riga, dok thei pang khik dôm vahi ni thong pato mưnuix urang ngak yau nan, yơ mưca bihu mong nạn prong dalam Dit Biya Thôr Riga. 20Ita đôm ka khol hư thau: Mưyah gruk kahanôt khol hư ôh hơl di gruk kahanôt gru pato adat thong mưnuix Pha-ri-si, khol hư ôh mưda tamư Dit Biya Thôr Riga bihu.
Pô Yê-su lang pato ka gruk dangih
21Khol hư krung hu pang panôic pato ka mưnuix yao laic: ‘Jôi pamưtai mưnuix; mưyah thei pamưtai mưnuix yơ xang gok mưdhir an pachang bican.’ 22Min Ita đôm thong khol hư: Thei dangih#5:22 dangih: Dalam tha thanôn blah vak tangin nạn dangih ôh gađi. di dei ai drei lijang đang gok bican inư; thei pôic dei ai drei nạn ‘gila luk’ yơ đang gok Ginum Biai Mưdhir An bican inư; thei pôic dei ai drei nạn hanrôi taba yơ đang gok apui nôriga dan dun. 23Ywa nan ka, tuk hư ba panôja ƀai tak jaban, bloh drưg kanal dei ai drei krưh dok hu kabha haget pagan gađi thong drei, 24xang cek panôja anak jaban, gilaic mai pabrai panôic thong dei ai hư dahlau ka, bloh xang mưrai ƀai panôja. 25Tuk hư nao di jalan thong ra palek palam drei, xang pabrai panôic bixamar thong urang nan, mưyah ôh, mưca urang nan jao hư ka kwan an, kwan an jao ka urang khik thang danuh, thong mưca hư gok jam karơk. 26Biak jơh, Ita đôm thong hư, mưca hư ôh tuk halei tabiak truh di thang danuh bihu ka tal tuk biyar bih boh jiên taluic.
Pô Yê-su lang pato ka glaic payar
27Khol hư hu pang panôic pato: ‘Jôi tanrok glaic payar.’ 28Min Ita đôm ka khol hư thau: Mưyah thei mong urang kamei bloh hag takrư yơ dalam tian krung hu tanrok glaic payar thong urang nan pajơ. 29#Mat 18:9; Mag 9:47.Mưyah mưta hanuk ngak ka hư tanrok glaic, xang log thong parah nhu mek! Kaywa dak lihik tha nôk rup pabhap dok hơl nạn bih rup pabhap gok parah tamư nôriga. 30#Mat 18:8; Mag 9:43.Mưyah tangin hanuk hư ngak ka hư tanrok glaic, xang koh thong parah nhu mek! Dak lihik tha nôk rup pabhap dok hơl nạn bih rup pabhap xang nao tamư nôriga.
Pô Yê-su lang pato ka gruk pakloh hadiup
(Ma-thi-ơ 19:9; Mag 10:11-12; Lu-ka 16:18)
31 #
Mat 19:7; Mag 10:4. Lijang pato laic: ‘Thei pakloh hadiup, xang brei ka kanai tha biar pakloh.’ 32#Mat 19:9; Mag 10:11,12; Lu 16:18; I Kô 7:10,11.Min Ita đôm thong khol hư: Thei pakloh hadiup, ôh njaup kaywa gađi gadha ƀang glai mưtah, yơ ngak ka hadiup jiơng mưnuix ƀang glai mưtah, dok thei khing urang kamei gok pakloh yơ tanrok glaic ƀang glai mưtah.
Pô Yê-su lang pato ka gruk hapah
33Khol hư hu pang panôic pato ka mưnuix rai dahlau laic: ‘Jôi lambil panôic hapah, xang khik tamo dôm panôic hapah thong Pô.’ 34#Yak 5:12. Mat 23:22.Min Ita đôm thong khol hư: Jôi hapah haget trah. Jôi tacei lingik bloh hapah, kaywa nan nạn thing mưnga Pô Lingik; 35Jôi tacei tanưh bloh hapah, kaywa nan nạn libik cek takai Bhô; jôi tacei dhan Yê-ru-sa-lem bloh hapah, kaywa nan nạn dhan anưd patao prong. 36Lijang jôi tacei akok hư bloh hapah, kaywa hư ôh mưda êng ngak ka tha arak ƀuk jiơng ƀông ngan juk bihu. 37Min ciêt đôm: ‘Njaup, njaup’ ngan ‘Ôh, ôh’ nạn tal. Dok thap paƀlwak kabha haget nạn kaywa ajin ag bloh tabiak.
Pô Yê-su lang pato ka gruk biyar mưbai
(Lu-ka 6:29-30)
38Khol hư hu pang panôic pato laic: ‘Mưta biyar mưta, tagei biyar tagei.’ 39Min Ita đôm thong khol hư: Jôi padhag ra ag. Gilaic vơk, mưyah thei pah ƀok gah hanuk, xang yêr takung ƀok gah dêh ka urang nan; 40mưyah thei ưng yak bak hư piêh mưk ao lingiu, xang brei ka urang nan mưk takung ao dalam. 41Mưyah thei mưk hư nao tha adhwa, xang nao thong urang nạn dwa adhwa. 42Thei likau, xang brei, thei nhim anưd hư yơ jôi mưlah.
Anit ranam ra thutruh
(Lu-ka 6:27-28; 6:32-36)
43Khol hư hu pang panôic pato laic: ‘Xang anit ranam mưnuix jek taphia, thong xang limuk ra thutruh.’ 44Min Ita đôm thong khol hư: Xang anit ranam ra thutruh, thong lang kar ka ra ep tatơk khol hư 45piêh ka khol hư bihu gilaic hajiơng anưk bik Amư khol hư ngok thôr riga; kaywa Bhô ngak ka ia harei tamuh tagôk pachang hadah ka ra xag mưjưy gam mưnuix siam, brei hajān ka mưnuix kahanôt gam mưnuix tidak adil.
46Mưyah khol hư ciêt anit ranam dôm urang halei anit ranam drei, yơ hu haget đang mưyom pa? Kaywa dôm mưnuix ikak jiư ôh dok dang yau nan ô? 47Mưyah khol hư ciêt xalam tanhi dei ai drei min, yơ hu hơl haget di thei pa? Kaywa dôm mưnuix lingiu agama ôh dok dang yau nan ô? 48Yau nan khol hư xang hajiơng thampuranư yau Amư khol hư ngok thôr riga nạn thampuranư.”
Селектирано:
Ma-thi-ơ 5: CJM2024
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2024 Bible Society Vietnam. All rights reserved.