Ma-thi-ơ 6
6
Pô Yê-su lang pato ka bruk hanim phôl
1 #
Mat 23:5. “Xang ajut, tuk ngak bruk hanim phôl jôi tanatap pamưyeh di anak abih drei. Mưyah ôh, yơ khol hư ôh bihu kaya alin haget mưng Amư khol hư dok ngok thôr riga.
2Yau nan, tuk hư ngak bruk hanim phôl, jôi yuk kadêt di anak drei yau dôm ra jalan adat baniai ngak dalam thang nhom thong di lingiu jalan ding piêh bihu mưnuix urang pôk mưyom. Biak jơh, Ita đôm thong khol hư, dôm ra nan krung hu tôk bihu kaya alin drei pajơ. 3Min tuk khol hư ngak bruk hanim phôl, jôi brei ka tangin iu thau tangin hanuk ngak haget 4piêh bruk hanim phôl hư bihu dađaup kavơk; thong Amư hư, Dê ƀôh dalam libik dađaup kavơk, mưca alin ka hư.
Pô Yê-su lang pato ka gruk lang kar
(Lu-ka 11:2-4)
5 #
Lu 18:10-14. Tuk khol hư lang kar, jôi ngak drơh dôm ra jalan adat baniai; kaywa khol nhu takrư dang lang kar dalam thang nhom thong libik akiêng ding piêh abih drei jang ƀôh. Biak jơh, Ita đôm thong khol hư, dôm ra nan krung hu tôk bihu kaya alin drei pajơ. 6Min tuk hư lang kar, xang tamư kati karei karơk baƀang vơk, bloh lang kar thong Amư hư, Dê bani dalam libik dađaup kavơk, thong Amư hư, Dê ƀôh dalam bruk dađaup kavơk mưca alin ka hư.
7Tuk khol hư lang kar, jôi angui ralô panôic thoh loh yau mưnuix lingiu agama; kaywa khol nhu xanưng laic mưyah đôm ralô yơ bihu hamit. 8Jôi ƀlah di khol nhu, kaywa Amư khol hư thau khol hư hajat haget dahlau tuk khol hư likau kanư di Bhô. 9Ywa nan ka, khol hư xang lang kar drơh yau ni:
‘Amư khol dahlak dok ngok thôr riga;
Angan Amư bihu papôk nưbi;
10Dit biya Amư bihu mưrai,
Jamal Amư bihu jiơng, ala tanưh yau ngok thôr riga!
11Likau ka khol dahlak kaya ƀang harei ni truh hanuk;
12Likau toh#6:12 toh: Dalam tapuk Hi-lap vak nạnthre. glaic ka khol dahlak,
Yau khol dahlak krung hu ampun ka dôm ra hu xwel thong khol dahlak;
13Likau jôi lôi khol dahlak gok palwô ngal,
Min dong khol dahlak truh di Ra Ag!
[Kaywa dit biya, gon xagta, xêh mưlang jang bha di Amư rit rai. A-men.]’#6:13 [Kaywa... A-men]: Dalam tha thanôn blah vak tangin ôh hu dôm akhar ni.
14 #
Mag 11:25,26. Mưyah khol hư ampun xwel ka mưnuix urang, yơ Amư khol hư ngok thôr riga lijang mưca ampun ka khol hư. 15Min mưyah khol hư ôh ampun ka mưnuix urang, yơ Amư khol hư ngok thôr riga lijang mưca ôh ampun ka khol hư.
Pô Yê-su lang pato ka gruk ikak tian ơk
16Tuk khol hư ikak tian ơk, jôi ngak mưnuh rau ri yau ra jalan adat baniai, kaywa khol nhu ngak mưnuh rau ri, ka abih drei thau khol nhu ikak tian ơk. Biak jơh, Ita đôm thong khol hư, dôm ra nan krung bihu kaya alin drei pajơ. 17Min tuk hư ikak tian ơk, xang luk mưnhưk ngok akok, thong tapai ƀok 18piêh mưnuix urang ôh thau ka hư krưh dok ikak tian ơk, min ciêt hu Amư hư, nạn Dê Bani pak libik dađaup kavơk thau min, thong Amư hư, nạn Dê ƀôh bruk dađaup kavơk mưca alin ka hư.”
Gilang banrik biak
(Lu-ka 12:33-34)
19 #
Yak 5:2,3. “Khol hư jôi patom patak drap ar di tanưh, nạn libik hu mu mok, đik eh pathei ngak pao, thong ra blơk ƀoh daning, cakaic tek bloh mưk. 20Min xang patom patak drap ar di thôr riga, nạn libik ôh hu mu mok, đik eh pathei ngak pao, lijang ôh hu ra klek ƀoh daning cakaic tek bloh mưk. 21Kaywa drap ar khol hư pak halei, yơ tian khol hư lijang dok pak nan.”
Tanrak hadah rup pabhap
(Lu-ka 11:34-36)
22“Mưta nạn mưnhưk ka rup pabhap, mưyah mưta hư siam yơ abih rup pabhap hư mưca bak tanrak hadah. 23Min mưyah mưta hư gok bang, abih rup pabhap hư ciêt nạn bhôlir. Yau nan, mưyah tanrak hadah dalam hư tôk nan bhôlir yơ bhôlir nạn biak xup thau kađơ!
Gruk uh tarak
(Lu-ka 16:13; 12:22-31)
24Ôh thei hu mưda ngak halun dwa pô; kaywa mưca limuk di pô ni bloh anit pô dêh, ngan pôkja pô ni bloh paong pô dêh. Khol hư ôh mưda gam ragxa Pô Lingik gilaic gam ragxa jiên padai#6:24 jiên padai: Dalam tha thanôn blah vak tangin nạn ma-môn. vơk.
25Ywa nan ka, Ita bican thong khol hư: Jôi kaywa gruk diup bloh uh tarak xang ƀang haget, [mưnhum haget]; lijang jôi kaywa di rup pabhap bloh uh tarak xang cuk haget. Gruk diup ôh puja banrik hơl di kaya ƀang ô? Rup pabhap ôh puja banrik hơl di khan ao ô? 26Xang mong pukar cim birim: ôh drāk, ôh ywak, ôh patom patak tamư gilang, min Amư khol hư ngok thôr riga jang rong nhu. Khol hư gilaic ôh puja banrik hơl di pukar cim ô? 27Hơl vơk, hu thei dalam khol hư kaywa di uh tarak bloh ngak ka rai diup drei atah paƀlwak tha vakak#6:27 atah paƀlwak tha vakak: Ngan nạn glong paƀlwak. lei? 28Dok ka khan ao, habar khol hư uh tarak ngak haget? Xang mong dôm bingu ceng di along tamuh tagôk yau halei; nhu ôh ngak bruk gleh glar, lijang ôh tasuh mrai; 29min Ita đôm thong khol hư, kanê patao Sa-lô-môn ghwơh ghang tal halei, lijang ôh bihu cuk mưlang bimi yau tha dalam dôm bingu ni. 30Yau nan, hơic dôm ra takik sagar dêh, mưyah bingu harơk lingiu along, vār ni dok diup, harei paguh gok parah tamư cakran bloh Pô Lingik dok brei cuk mưlang bimi yau nan, laic haget khol hư? 31Ywa nan ka, jôi uh tarak bloh êng tanhi: ‘Khol drei mưca ƀang haget?’, ‘Mưnhum haget?’, ‘Cuk haget?’. 32Kaywa abih dôm kabha ni dôm mưnuix lingiu agama jang bhian pachang dwah, thong Amư khol hư dok ngok thôr riga krung hu thau abih hanư jat khol hư. 33Min dahlau yatha xang pachang dwah dit biya [Pô Lingik]#6:33 [Pô Lingik]: Dalam tha thanôn blah vak tangin ôh hu dôm akhar ni; dalam tha thanôn blah vak tangin pakan nạn thôr riga. thong gruk kahanôt Bhô, yơ mưca Bhô ƀai brei ka khol hư abih kabha nan vơk. 34Yau nan, jôi uh tarak ka harei paguh; kaywa harei paguh mưca jari jarô ka bruk harei paguh, gruk gleh glar harei halei tal ka harei nan.”
Селектирано:
Ma-thi-ơ 6: CJM2024
Нагласи
Сподели
Копирај
Дали сакаш да ги зачуваш Нагласувањата на сите твои уреди? Пријави се или најави се
© 2024 Bible Society Vietnam. All rights reserved.