THRÜNTAN 39
39
Josep tüsho Potiphar Niube
1Kheakü Josep ju Ijip lim bede yüki. Tüsho ju ching bede yükirü Ishmaelrü kheaknü Pharao torü, aheangrü wühkenobuh, Ijiprü Potipharnü thulo. 2Josep lung Atungpuh lakheah, tüsho api akuk ngürü mihtsürü lakheah; tüsho api ju anihbuh putungrü Ijiprü yam ching lakheah. 3Api lung Atungpuh lakhi anihbuh putungrünü ngü tüsho api khah rhimo alala Atungpuhnü akuk ngüshih. 4Junangde api miki Josep amuzho ngü, tüsho api tankih. Apinü anihbuh ju api yam kheahrü kamshih, tüsho api lakhi alala akhah ching jih. 5Jumonü apinü api yam tüsho api lakhi alala kheahrü kamshihkhi kim chingnü Josep thsülimnü Atungpuhnü Ijipbuh yamkhün müngühjih; tüsho Atungpuh müngühmühi ju api yam ching alala tüsho thulu ching lakheah. 6Junangde api lakhi alala Josep khah ching jih, tüsho anihbuhnü tsühyungkhi kheak hode apinü tümü mümükheahde alakheah. Tüsho Josep ju trungdung tüsho akheahpü atsü lakheah. 7Kheakü anükhüh dunglim api putungrü niubenü Josep mürüh, tüsho tha, “I lung müyamang.” 8Tüshe apinü reanglo tüsho api putungrü niube ki tha, “Kheahang, thüyam ching I lung lakhi I putungrünü mümükheah, tüsho anihbuhnü api lakhi alala I khah ching jihdo. 9Ha yam ching I hobah sheshe ato müla; yungsho I kheaknü tümü she tukloa muzo tüshe nü lang ah, tümütüsho nü api niube ah. Dale küde thsah inü ha amütsü ato rhimopü, tüsho Thrünpuh azhihde neak yihbeakpü?” 10Junangde alibenü nimung aban Josep ki thatha she, apinü anihbe lung müyampü alibe ki mani.
11Nimung khülang Josep anihbuh rhimo thsüpü thüyam ching yüzah, tüsho thüyam ching yamlarü she mülade alakheah, 12junangde alibenü api khimmih kheaknü tholobah tha, “I lung müyamang.” Tüshe apinü anihbuh khimmih akhah ching bahjihbah alihde wungdo wukhiuk. 13Tüsho küyimki api khimmih anihbe khah ching bahjihbah wungdo alihde awukhiukkhi alibenü angükhea, 14alibenü anihbe yam ching yamlarübo ji tüsho arü ki tha, “Kheahang, apinü isa mükhemürangshihpü Ibrirü isa kilim bede arüa lah. Apinü I kheak amütsü thsüpü arü, tüsho inü düsheak achangnü zhikhit. 15Tüsho küyimki I düsheak achangnü azhikhi apinü asokheanü api khimmih I ki zobah alihde wungdo wukhiuk.” 16Jumonü api putungrü thüyam lim marüyi khiungde alibenü khimmih ju anihbe ki zo. 17Judüki alibenü api ki thiyu ha ruk tha, “Nünü isa kilim Ibrirü yamlarü bede arükhinü I ki mükhemürangpü arüdo; 18junangde inü I düsheak achangnü azhichoki api khimmih I ki bahbah alihde wungdo wukhiuk.”
19Küyimki aniubenü, “Nü yamlabuhnü I ki hadürü yakli rhimodo,” de athakhi api putungrünü asokhea, api bukakhiukde kam. 20Judüki Josep putungrünü api bea lubah kiulongthsürü yo aramrü zopung rihyam ching api yuk. Tüsho api rihyam ching lakheah. 21Tüshe Josep lung Atungpuh lakheah tüsho api ki amüthsüm huh, tüsho rihyam aheangrü miki api amuzho ngüshih. 22Tüsho rihyam aheangrünü rihyam ching lakhi aramrü alala Josep khah ching jih; tümüpürü arünü ju ching rhimokheanü, ju api rhimo lakheah. 23Rihyam aheangrünü Josep khah ching lakhi tümü she mükheahlüng, tümütüsho Thrünpuh api lung lakheah; tüsho tümüpürü apinü arhimokheanü, Atungpuhnü ju akuk ngüshih.
നിലവിൽ തിരഞ്ഞെടുത്തിരിക്കുന്നു:
THRÜNTAN 39: YIMCBSI
ഹൈലൈറ്റ് ചെയ്യുക
പങ്ക് വെക്കു
താരതമ്യം
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.