THRÜNTAN 40
40
Josepnü Aramrü Milim Thanakkhi
1Kim anükhüh dunglim, Ijip kiulongthsüpuh pung-jihrü tüsho yikhap-takrü anenü arü putungrü azhihde rhimo. 2Tüsho Pharaonü api yo atorü hane, pung-jihrü azopü tüsho yikhap-takrü azopü kheak bukakhiuk. 3Jumonü apinü ane ju aheangrü wühkenobuh yam, Josep lakhi rihyam ching ramyuka zo. 4Tüsho aheangrü wühkenobuhnü arü kheahshihpü Josep thiyi, tüsho apinü arü ahiuhakhip; junangde rihyam ching arü anükhühkheak lakheah. 5Judüki rihyam ching lakhi Ijip kiulongthsüpuh pung-jihbuh tüsho yikhap-takbuh ane chidonü tsüngrekhüh chingnü milim mi, tüsho amütsan buh lungkiki lakheah. 6Tüsho Josepnü yapsu ane kilim arübah ane kheak kheah, tüsho ane ju mulong tukthsüde ngü. 7Jumonü api putungrü yam, rihyam ching api lung lakhi Pharao torübo ki apinü keokhi, “Tümü thsükhi nüke khihni a mi mitingla le?” 8Anenü api ki alo, “Ike chidonü milim mido, tüsho ju athanakrü she müla.” Tüsho Josepnü ane ki tha, “Athanakkhi ju Thrünpuh yo yung de? Nüke milimbo I ki thaang.”
9Judüki pung-jihrü azopünü Josep ki api milim tha, “Kheahang, I milim ching I miki kurungasoliu khülang lakheah, 10tüsho kurungasoliu ching adübeak mahsam lakheah; ju duduhde arübah abün pung, tüsho kurungaso akeangthrünbo thsübah mün. 11Judüki Pharao pung I khah ching lakheah; tüsho inü kurungasobo ju lubah Pharao pung ching thsünyuk, tüsho pung ju Pharao khah ching yukjih.” 12Josepnü api ki tha, “Ju thanakkhi ha lah: Adübeak mahsam ju nimung mahsam ah. 13Nimung mahsam dükeak chingnü Pharaonü nü dükhebah tüsho akhuhlim nünü api pung-jihrü thsükhi nangde nünü api khah ching pung jihbah. 14Tüshe nü tsüde alachoki I lümkhitang, tüsho I ki amuzho huhang; I dünkheak Pharao ki thaang, tüsho ha yam chingnü I bekhitang. 15Tümüde I Ibrirü lomi chingnü ahüh-a lude tso; tüsho ha ching she inü rihyam ching binpü thülünde tümü mürhimode arünü I yuka zolah.”
16Küyimki athanakkhi ju yikhaptakrü azopünü tsüde angükhea, apinü Josep ki tha, “Inü she milim khülang mido: I ku kheak yikhap muluk mahsam lakheah. 17Muluk achangbe ching Pharao tsühyungbe dümkhi mungji alala lakheah, tüsho wuhnubonü I ku kheak mulukbo chingnü tsüh.” 18Jumonü Josepnü tha, “Ju thanakkhi ha lah: Muluk mahsam ju nimung mahsam ah. 19Nimung mahsam dükeak chingnü Pharaonü nü bekhitbah tüsho nü sangdung khülang kheak zhinbah; tüsho wuhnubonü nü shih tsühbah.”
20Kheakü nimung mahsampü ching, Pharao zübe nimung apinü anihbuh yamlarü alala thsungkheak thünio thsakham; tüsho apinü pung-jihrü azopü le yikhap-takrü azopü büne api yamlarübo miki bedarü. 21Judüki apinü pung-jihrü ju anihbuh rhimo ching yüloshih, tüsho apinü Pharao khah ching pung jih. 22Tüshe Josepnü ane ki thanakkhi nangde, apinü yikhap-takrü azopü a wuka zhin. 23Tütüshe pungjihrü azopünü Josep mülümkhit, tüshe api mihabah.
നിലവിൽ തിരഞ്ഞെടുത്തിരിക്കുന്നു:
THRÜNTAN 40: YIMCBSI
ഹൈലൈറ്റ് ചെയ്യുക
പങ്ക് വെക്കു
താരതമ്യം
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.