THRÜNTAN 41
41
Josepnü Kiulongthsüpuh Milimbo Thanakkhi
1Kam mahnepü akheam lim Pharao milim khülang lakheah; api Nile ayung miki zhip. 2Zukleangnü ayung chingnü moshi thüne, akheah atsü tüsho shihkih-a akhiuk; tüsho arünü sangrung tsühpü tankih. 3Judüki püpü moshi thüne trukkhita ashih-mükihde ayung chingnü akhiuk, tüsho ayung yean püpü moshibo ki zhip. 4Tüsho trukkhita ashih-mükihkhi moshibonü akheah atsü tüsho ashih-kihkhi moshibo ju tsühabah. Jushu a Pharao asürüabah. 5Kheaküshe api yapshede yü tüsho mahnepü milim khülang mi: Hidung khülang kheaknü aye thüne liuhliuh tüsho tsüde akhiuka lakheah. 6Jushu aniyüzahlim pungnü ayündüsükkhi aye thüne arü dunglim akhiuk. 7Tüsho adüsükkhi aye thünenü aliuhliuh aye thüne ju muyuabah. Pharao asürü, tüsho ju milim khülang lakheah. 8Jumonü yapsu api me küpkhukde alakheah; apinü thiyia yüshihbah Ijip wurük-huhrü tüsho lümlung lakhi mihtsürü alala ji. Pharaonü arü ki api milim tha, tüshe Pharao thsungkheak jurü thanakpü she mülakheah.
9Judüki pung-jihrü azopünü Pharao ki tha: “Khihni inü I mülimkhi lümkhitchoh. 10Küyimki Pharao api yamlarübo kheak bukakhiukkhea, tüsho aheangrü wühkenobuh yam rihyam ching I le yikhap-takrü azopü zokheanü, 11tsüngre khülang chingnü ike abande milim mi. Ike milim aban athanakkhi büthsüthsü lakheah. 12Ju ching aheangrü wühkenobuh yamlarü Ibri mihtsürü khülang ike lung lakheah. Ikenü api ki tha, tüsho apinü ike thsungkheak milimbo thanak; mihtsürü abande apinü nihbuh milim yande thanaka jih. 13Tüsho apinü ike ki thanakkhi yande ju dünji. Apinü I rhimoyam ching yüloshih, tüshe yikhap-takbuh a wuka zhin.”
14Judüki Pharaonü thiyia yüshihbah Josep ji, tüsho arünü niokheamde rihyam chingnü bekhit; apinü hützühütdoa lu tüsho khimmih müthribah Pharao kilim arü. 15Tüsho Pharaonü Josep ki tha, “Inü milim khülang mido, tüsho ju thanakkhukrü she müla. Tüsho nünü milim thanakkhuklah de inü sodo.” 16Jumonü Josepnü Pharao ki alo, “Ju I kheak yung; Pharaonü alunekhi Thrünpuhnü alojihbah.” 17Pharaonü Josep ki tha: “Kheahang, milim ching I Nile yean zhipde alakheah. 18Zukleangnü akheah atsü tüsho ashih-kihkhi moshi thüne akhiuk, tüsho arübo sangrung tsühpü thsüde alakheah. 19Judüki inü Ijip lomi alala ching ha ruk makhamde müngüakheahkhi püpü moshibo thüne trukkhita ashih-mükihde arü dunglim akhiuk. 20Tüsho trukkhita makhamde alakhi moshibonü ashih-kihkhi atan moshibo thüne ju tsühabah, 21tüshe küyimki arünü tsühabahkheanü arünü jurü tsühdo de shenü mümükheah, tümüde arübo atan nangde trukkhita akheahpü mütsüdü lang alakheah. Jushu I asürü. 22Kheaküshe inü I milim ching zukleangnü hidung khülang kheak aye thüne liuhliuh tüsho tsüde akhiukde ngü. 23Judüki aniakhiuklim pungnü yündüsükkhi aye thüne jurü dunglim akhiuk. 24Tüsho adüsükkhi aye thünenü aye atsü thüne ju muyuabah. Jumonü inü ha wurük-huhrübo ki tha, tüshe I ki thanakkhukpü she mülade alakheah.”
25Judüki Josepnü Pharao ki tha, “Pharao milimbo khülang tüsho rukhüh ah; apinü tümü rhimopü lanü Thrünpuhnü Pharao ki huhdo: 26Moshi atsü thüne ju kam thüne, tüsho aye atsü thüne ju kam thüne ah; milimbo khülang lang ah. 27Tüsho trukkhita ashih-mükihkhi moshi thüne arü dunglim akhiukkhi ju kam thüne, tüsho aniakhiuklim pungnü yündüsükkhi aye thüne ju kam thüne khümzung ah. 28Ha inü Pharao ki thado. Thrünpuhnü Pharao ki apinü arhimopü lakhi huhdo. 29Ijip lomi alala ching kam thüne muzhomopungkhi kam thüne arübah; 30tüshe jurü dunglim kam thüne khümzung labah, tüsho muzhomopungkhi alala Ijip lomi ching mihabahbah, tüsho khümzungnü lomi thsümünimbah. 31Junangde khümzung arükhinü lomi ching muzhomopungkhi mümükheahde akambah, tümüde ju khide muthsukde alabah. 32Tüsho milim ju Pharao ki mahne ki huhdo, tümütüsho Thrünpuhnü ha thsakhama lah, tüsho Thrünpuhnü ha nahde adünjishihbah. 33Kheakü jumonü, Pharaonü mütsankhitrü tüsho lümlung lakhi mihtsürü khülang mokhitang, tüsho api Ijip lomi kurungkheak zojang. 34Pharaonü ha rhimoang, tüsho muzhomopungkhi kam thüne ching Ijip lomi chingnü akhiukkhi phüngü shihcham thremukhungshihpü lomi kurungkheak atorübo zoang. 35Tüsho arünü kam atsübo arükhi ching tsühyungpü alala hanmukhungshang, tüsho Pharao yukhüm bukkhüp chingnü hibo zomukhungshang, tüsho arünü kiutobo ching tsühyungbebo zoshang. 36Tüsho ju tsühyungbe ju Ijip lomi ching lapü lakhi kam thüne khümzung thsungkheak küma-zokhi labah, junangde khümzung lachoki alomi ju müdükheak.”
Josep Ijip Kovünor Kamkhi
37Junangde lümlung jihkhi ju Pharao tüsho api yamlarü alala ki atsü lakheah. 38Tüsho Pharaonü ayamlarübo ki tha, “Thrünpuh me lakhi mihtsürü hadürü isanü angükhukba de?” 39Pharaonü Josep ki tha, “Thrünpuhnü ha alala nü ki huhdo, nü nangde sheshe mütsankhitkhi tüsho lümlung larü müla. 40Inü nü I lomi kurungkheak zojihbah, tüsho I mihtsürü alalanü nü yukhümbo anibah; kiulongthsübinkiu ching lang I nü kheaknü atobe labah.” 41Tüsho Pharaonü Josep ki tha, “Kheahang, inü nü Ijip lomi alala kurungkheak zojihlah.” 42Pharaonü api yingkhing chingnü yingkhüm yihkhit tüsho Josep yingkhing ching yukjih; apinü khimthünakbo api kheak phukihjih tüsho suna wuhrünlak ahung mükamde yukjih. 43Tüsho apinü api yo khora-lolungbe mahnepü kheak binshih; tüsho arünü api miki zhi, “Khukningang!” Junangde api Ijip lomi alala kurungkheak zojih. 44Kheaküshe Pharaonü Josep ki tha, “I Pharao ah, tütüshe nü yukhüm mulude Ijip lomi alala ching mihtsürü shenü she khah yungsho jing mushuhkih.” 45Tüsho Pharaonü Josep mung Zaphenathpanea de ji. Apinü anihbuh kilim On amükeamrü Potiphera tsührübe Asenath aniube thsüpü jih.
46Josep Ijip kiulongthsüpuh Pharao khinkih thsüpü yüzahchoki kam 30 azorü lakheah. Josepnü Pharao mikinü wukhiuk tüsho Ijip lomi alala ching yü. 47Suhdahkhi kam thüne dükeak ching alonü muzhomopungde akhiukshih. 48Jumonü apinü kam thüne ching yo tsühyungbe Ijip lomi ching lakhi hanmukhung, tüsho kiutobo ching zo; apinü arü mühi thulubo ching yo tsühyungbe ju kiuto abande zo. 49Josepnü hi ju apinü akhepü mutukloyi khiungde keto loyi nangde hihdakde hanmukhung, tümüde ju madünbinbe lakheah.
50Tüsho khümzung kambo marüyide, On amükeamrü Potiphera tsührübe Asenathnü api kilim tsührü 2 zübejih. 51Josepnü adüjibuh mung Manase#Amihkhi de ji tüsho tha, “Thrünpuhnü I küpkhukbo tüsho I buh yamkhün alala mihshih.” 52Mahnepü mung apinü Ephraim#Münü-lakhi de ji, “Tümüde Thrünpuhnü I küpkhukkhi lomi ching I aso asoshih.”
53Judüki Ijip lomi ching muzhomopungkhi kam thüne akheam thsü, 54tüsho Josepnü athakhi nangde kam thüne khümzung arüpü tankih. Khümzung ju lomi alala ching lakheah, tüshe Ijip lomi alala ching tsühyungbe lakheah. 55Jumonü küyimki Ijip lomi alala ching akhümpü tankihkheanü, mihtsürübonü Pharao ki tsühyungbe thsungkheak zhi. Judüki Pharaonü Ijiprü alala ki tha, “Josep kilim yüang; apinü nüsa ki tümü thabanü rhimoang.” 56Khümzung ju alomi alala ching lakheah, tüsho Josepnü jakambo alala khimshuh tüsho Ijiprübo ki yinjih. Tüsho khümzung ju Ijip lomi ching muthsukde kam. 57Jumonü alomi alalanü hi thulopü Ijip ching Josep kilim arü, tümütüsho khümzung ju lomi alala ching muthsukde alakheah.
നിലവിൽ തിരഞ്ഞെടുത്തിരിക്കുന്നു:
THRÜNTAN 41: YIMCBSI
ഹൈലൈറ്റ് ചെയ്യുക
പങ്ക് വെക്കു
താരതമ്യം
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.