THRÜNTAN 46
46
Jakob tüsho Api Yamkhün Ijip lim Yükhi
1Jumonü Israelnü api lakhi alala lubah hantsahmusu, tüsho Beersheba ching arü, tüsho abuh Isak Thrünpuh kilim shuhmülanga kingaünkhibo jih. 2Judüki Thrünpuhnü azhing michih ching Israel ki tha, “Jakob, Jakob!” Tüsho apinü alo, “I ha ching lah.” 3Tüsho apinü tha, “I a Thrünpuh, nü buh Thrünpuh ah; Ijip lim yükipü dütre, tümüde inü nü ju ching trükshih ato khülang kamshihbah. 4I nü lung Ijip lim yükibah, tüsho inü tsükjide nü belode atubah; tüsho Josep khahnü nü mük müyitdojihbah.” 5Judüki Jakobnü Beersheba chingnü tsahmusu; tüsho Israel tsührübonü arü abuh Jakob, arü tsührübo, tüsho arü niuberübo, Pharaonü api hanpü mühahkhi khora-lolungbebo chingnü han. 6Jumonü arünü Kanan lomi chingnü angükhi arü shiwühbo tüsho kukrukbo lubah, Jakob tüsho api lung anihbuh tsühsoniusobo alala Ijip lim yü. 7Api tsührübo tüsho api tsührü tsührübo, api tsührübebo tüsho api tsührü tsührübebo, tüsho api tsühsoniusobo alala anihbuh lung apinü Ijip lim bede yü. 8Kheakü Jakob tüsho api tsührübo Ijip lim yürü mung harü lakheah: Jakob tsührü adüjibuh Reuben lakheah. 9Reuben tsührübo Hanok, Pallu, Hezron, tüsho Karmi. 10Simeon tsührübo Jemuel, Jamin, Ohad, Jakin, Zohar, tüsho Kananberü tsührü Shual. 11Levi tsührübo Gershon, Kohath, tüsho Merari. 12Juda tsührübo Er, Onan, Shela, Perez, tüsho Zera (tüshe Er le Onan ane Kanan lomi ching sheabah). Perez tsührübo Hezron tüsho Hamul. 13Issakar tsührübo Tola, Puva, Job, tüsho Shimron. 14Zebulun tsührübo Sered, Elon, tüsho Jaleel. 15Harübo Paddan-aram ching Leanü Jakob kilim api tsührübe Dina bede zübejihkhi tsührübo ah. Api tsührübo tüsho tsührübebo alalanü 33 lakheah. 16Gad tsührübo Ziphion, Haggi, Shuni, Ezbon, Eri, Arodi, tüsho Areli. 17Asher tsührübo Imna, Ishva, Ishvi, Beria, tüsho arü niurü alibe Sera. Tüsho Beria tsührübo Heber le Malkiel. 18Harübo Labannü atsührübe Lea kilim jihkhi Zilpa tsührübo lakheah; tüsho alibenü harü mihtsürü 16 Jakob kilim zübejih. 19Jakob niube Rachel tsührübo Josep tüsho Benjamin. 20Tüsho Ijip lomi ching On amükeamrü Potiphera tsührübe Asenathnü Jakob kilim Manase tüsho Ephraim zübejih. 21Benjamin tsührübo Bela, Beker, Ashbel, Gera, Naaman, Ehi, Rosh, Muppim, Huppim, tüsho Ard. 22Harübo Jakob tsühsoniusobo 14 ju Rachel kheak yo ah. 23Dan tsührü Hushim lakheah. 24Naphtali tsührübo Jaziel, Guni, Jezer, tüsho Shillem. 25Harübo Labannü atsührübe Rachel kilim jihkhi Bilha tsührübo lakheah, tüsho alibenü Jakob kilim mihtsürü 7 zübejih. 26Jakob lung yükhi mihtsürü alala, apang ching yo, Jakob tsührübo niuberübo thsürubah alalanü 66. 27Tüsho Ijip ching Josep kilim zübejihkhi tsührü 2 lakheah. Jakob yamkhün Ijip lim yükhi mihtsürü alalanü 70.
Ijip ching Josep tüsho Api Yamkhün
28Judüki apinü Josep ki thaa Goshen ching mihleang arüshihpü api müngüh Juda yüshih. Tüsho arübo Goshen lomi ching arü. 29Jumonü Josepnü api khoralolungbe thsakham tüsho abuh Israel shorupü Goshen lim wutu; Josepnü api miki yü akede akhahnü abuh kap tüsho ruhde trip. 30Tüsho Israelnü Josep ki tha, “Kheaküa I sheanü, tümütüsho inü nü miro ngüdo, tüsho nü kheakü khiungde lah.” 31Judüki Josepnü akeoniorübo le abuh yamkhün ki tha, “I wutubah tüsho Pharao ki thabah, ‘Kanan lomi ching lakhi I keoniorübo tüsho I buh yamkhün I kilim arüdo. 32Tüsho mihtsürübo ju namfimihnu neakrübo ah, tümüde arü rhimobo ju shiwüh kümpü lakheah; tüsho arünü arü mihnubo le moshibo tüsho arü lakhi alala lude arüa lah.’ 33Jumonü küyimki Pharaonü nüsa jibah athaba, ‘Nüsa rhimo tümü a?’ 34Nüsanü alobah, ‘Isa le isa abuh chido isa athunuchokinü isa rhimo ju shiwüh kümde arükheah,’ junangde nüsa Goshen lomi ching labah; tümüde namfimihnu neakrübo ju Ijiprü ki athraneanbe lah.”
നിലവിൽ തിരഞ്ഞെടുത്തിരിക്കുന്നു:
THRÜNTAN 46: YIMCBSI
ഹൈലൈറ്റ് ചെയ്യുക
പങ്ക് വെക്കു
താരതമ്യം
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.