THRÜNTAN 47
47
1Judüki Josepnü yü tüsho Pharao ki tha, “I buh le I keoniorübo, arü mihnubo le moshibo tüsho arü lakhi alala Kanan lomi chingnü arüa lah; tüsho arübo Goshen lomi ching lah.” 2Tüsho apinü akeoniorü bolungnü mihtsürü 5 bea lubah Pharao ki yü. 3Judüki Pharaonü api keoniorübo ki tha, “Nüsa rhimo tümü a?” Tüsho arünü Pharao ki alo, “Nü yamlarübo isa jipü lungkinü namfimihnu neakrübo ah.” 4Arünü Pharao ki tha, “Isabo lomi ching lacholapü arükheah, tümütüsho nü yamlarübo mihnu boto thsungkheak rimlopung müla, tümüde khümzung ju Kanan lomi ching muthsukde lah. Kheakü jumonü, muzhobah nü yamlarübo Goshen lomi ching lashang.” 5Judüki Pharaonü Josep ki tha, “Nü buh le nü keoniorübo nü kilim arüdo. 6Ijip lomi nü müngüh lah. Nü buh le nü keoniorübo lomi atsübe ching lashang; arübo Goshen lomi ching lashang. Tüsho nünü mulonglamkhi mihtsürü arü bolung mükheahsho, I yo shiwüh kurungkheak aberü thsüshang.”
7Judüki Josepnü abuh Jakob bea lubah Pharao miki yü; tüsho Jakobnü Pharao müngühjih. 8Pharaonü Jakob ki tha, “ Nü kam küdükhüh a?” 9Jakobnü Pharao ki alo, “I rümde atsahkhi kambo 130 ah; I kambo ju nüklah tüsho küpkhuk lado, tüsho jurünü I buh pürü rümde atsahkhi kambo mukhiung.” 10Jumonü Jakobnü Pharao müngühjih, tüsho Pharao mikinü wukhiuk. 11Tüsho Pharaonü thiyukhüm jihkhi nangde Josepnü abuh le akeoniorübo lashih, tüsho Ijip lomi ching, Rameses lomi atsüdakbe yamalobo arü kilim jih. 12Judüki Josepnü abuh, akeoniorübo tüsho abuh yamkhün alala kilim arü wühkhe ayannü tsühyungbe jih.
Khümzung
13Kheakü lomi alala ching tsühyungbe mülade alakheah; tümüde khümzung ju khide muthsukde la, junangde Ijip tüsho Kanan lomi alala khümzung hode yiuhyiuhde kam. 14Tüsho Josepnü Ijip tüsho Kanan lomi ching arünü hi thulokhi dün sho alala hanmukhung; tüsho Josepnü sho ju Pharao yam ching lude yü. 15Jumonü küyimki Ijip tüsho Kanan lomi ching sho bahkhamkhea, Ijiprü alalanü Josep ki arü tüsho tha, “Isa kilim tsühyungbe jihang, tümüde isa nü miki sheshihpü? Tümüde sho bahkhamdo.” 16Josepnü alo, “Sho bahkhama lasho, nüsa shiwühbo lubah arang, tüsho nüsa shiwühbo dün inü nüsa kilim tsühyungbe jihbah.” 17Jumonü arünü arü shiwühbo Josep kilim hande arü, tüsho Josepnü arü kilim khorabo, mihnubo, moshibo tüsho donkibo müthri tsühyungbe jih. Hanangde apinü arü shiwühbo müthri ju kam arübo tsühyungbe ahiuh-a jih. 18Küyimki ju kam kheamkhea, arünü ashikampü api kilim arü tüsho tha, “Isa sho bahkhamkhi isanü isa tungpuh ki müram; isa shiwühbo isa tungpuh yo ah. Isa tungpuh miki tümü she aninga müla tüshe isa pangbo tüsho isa lobo lang ah. 19Tümüde isa nü miki isa le isa lo chido dükheakpü? Tsühyungbe dün isa le isa lo thuloang, tüsho isa le isa lo Pharao yamlarü thsübah; isa müshede rhangdung lapü thsüde isa kilim müjih jihang, junangde alo mübahkhit.”
20Jumonü Josepnü Ijip lo alala Pharao thsungkheak thulo; tümüde Ijiprü abannü nihbuh lu yin, tümütüsho arü kheak khümzung ju muthsukde alakheah. Junangde alo ju Pharao yo kamabah, 21tüsho Josepnü mihtsürübo ju Ijip akheam khülimnü thripkhüh khiungde arü azhorü kamshih. 22Amükeamrübo lo lang apinü muthulo; tümüde amükeamrübo a Pharaonü arü kilim tsühyungbe shihcham thsüa jih, tüsho arünü ju tsüh; jumonü arünü arü lobo müyin. 23Judüki Josepnü mihtsürübo ki tha, “Khihni inü nüsa le nüsa lo Pharao thsungkheak thulodo. Kheahang, ha ching nüsa thsungkheak müjih lah, tüsho alo ching yangzüyangdobah. 24Tüsho nüsanü yimluchoki phüngü ching shihchamkhüh Pharao kilim jihbah. Shihcham phüyi ju thulu ching müjih thsüpü tüsho nüsa le nüsa yamkhünbo tüsho nüsa tsührü aninibo thsungkheak tsühyungbe labah.” 25Arünü alo, “Nünü isa rhangdungbo khümkhitdo; isa tungpuh miki isa amuzho ngüshang, tüsho isa Pharao yamlarübo thsübah.” 26Tüsho amükeamrübo lo Pharao yo mükamkhi kheak hode, Pharaonü phüngü ching shihchamkhüh lupü Ijip lomi ching khihni ha khiungde yakzan khülang thsü.
Jakobnü Akheam Thsüde Mushukhi
27Jumonü Israelrü Ijip lomi, Goshen lo ching la; tüsho ju ching yamalobo lakheah tüsho khide wüh bu. 28Tüsho Jakob ju Ijip lomi ching kam thürükheak thüne la. Jumonü Jakob kam 147 azorü lakheah. 29Küyimki Israel ashepü kim khiungkheanü, apinü atsührü Josep ji tüsho api ki tha, “Kheakü I nü miki amuzho ngüa lasho, muzhobah I pho dükeak nü khah yukang, tüsho I ki muzhode thiyuronü rhimoang. Muzhobah Ijip ching I mi dübah, 30tüshe küyimki I jipürü lung yapbanü, nünü Ijip chingnü I hankhitang, tüsho arü mibahpung kiuyuka bahang.” Tüsho Josepnü alo, “Nünü athakhi nangde isanü arhimobah.” 31Apinü tha, “I ki thiyuchihchimang.” Tüsho apinü anihbuh ki thiyuchihchim. Judüki Israelnü anihbuh yapkiu kumung lim mükhümabah.
നിലവിൽ തിരഞ്ഞെടുത്തിരിക്കുന്നു:
THRÜNTAN 47: YIMCBSI
ഹൈലൈറ്റ് ചെയ്യുക
പങ്ക് വെക്കു
താരതമ്യം
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.