THRÜNTAN 48
48
Jakobnü Ephraim tüsho Manase Müngühjihkhi
1Kim anükhüh dunglim Josep ki tha, “Nü buh tukthsülah”; jumonü apinü atsührüne Manase tüsho Ephraim api lung bebah Jakob shorupü yü. 2Tüsho Jakob ki tha, “Kheahang, nü tsührü Josep nü kilim arüchoh”; tüsho Israelnü anihbuh reangzahlo tüsho yapkiu kheak bin. 3Judüki Jakobnü Josep ki tha: “Wuto Thrünpuh Kanan lomi Luz ching I ki akhiuk tüsho I müngühjih, 4tüsho I ki tha, ‘Kheahang, inü nü aso asoshihbah tüsho wüh bushihbah, tüsho inü nü yimto mihtsürü kamshihbah, tüsho nü dunglim ha lomi akheam müla yamalo thsüde nü tsühsoniusobo kilim jihbah.’ 5Tüsho kheakü I Ijip ching nü kilim marüyide Ijip lomi ching nü kilim zübejihkhi tsührü Ephraim tüsho Manase büne I yo ah; Reuben tüsho Simeon nangde, ane I yo thsübah. 6Nü münübo ane dunglim ngükhi nü yo thsübah, tüsho arü yamrüplurüp ngüpü ju Ephraim tüsho Manase hode arübah. 7Tümütüsho I Paddan chingnü arüchoki, Ephrath lim yüpü limro adükeak anükhüh lade, Kanan lomi ching Rachel I kinü sheabah; tüsho inü anihbe Ephrath (ju Bethlehem) lim yüpü limro kheak kiuyukabah.”
8Judüki Israelnü Josep tsührübo ngü tüsho tha, “Ha sherü a?” 9Judüki abuh ki alo, “Ha dangpung ching Thrünpuhnü I kilim jihkhi I tsührübo ah.” Tüsho apinü tha, “Muzhobah arübo I kilim bede arang, tüsho inü arü müngühjihbah.” 10Kheakü Israel shina amükbo thrimthrimkhinü müngükhukde alakheah. Judüki Josepnü ane api thüninde bebah arü, tüsho apinü ane müthsüpbah kap. 11Tüsho Israelnü Josep ki tha, “Inü nü miro ngüpü mülüm; tüshe Thrünpuhnü nü tsührübo she I huhdo!” 12Judüki Josepnü api mukhukbo kinü ane beakhin, tüsho apinü amiro alo lim thsübah khukning. 13Tüsho Josepnü ane chido, akhah tsülimnü Israel khah huzulimpeang Ephraim tho, tüsho akhah huzulimnü Israel khah tsülimpeang Manase thobah api thüninde bedarü. 14Judüki Jakobnü akhah thrütchahchihbah akheambuh thsüa lalashe akhah tsülimnü Ephraim ku kheak nimkih tüsho akhah huzulimnü adüjibuh Manase ku kheak nimkih. 15Apinü Josep müngühjih, tüsho tha:
“Thrünpuh shepü müngüh I buh pürü Abraham tüsho Isak tsahkhea,
Thrünpuh shepünü I rhangdung amuyung khihni ha khiungde abekhea,
16Yunirü shepünü amütsü alala chingnü I rhokhitkhea,
azürübo müngühjang;
tüsho arü kheak I mung tüsho
I buh pürü Abraham tüsho Isak mung lashang;
tüsho arübo alomi ching mihhihde kamshang.”
17Küyimki abuhnü akhah tsülim Ephraim ku kheak yihkihkhi Josepnü angükhea, junü api masühde kam; jumonü apinü Ephraim ku kheaknü Manase ku kheak yihkihpü abuh khah kheak zhim. 18Tüsho Josepnü abuh ki tha, “Jude yung, abuh, ha adüjibuh ah; nü khah tsülim api ku kheak yihkihang.” 19Tüshe abuhnü reanglo tüsho tha, “Inü mükheahlah, I tsah-a, inü mükheahlah. Api she mihtsürü khülang kambah, tüsho api ato kambah; tüshe tsükjide akheambuh ha api kheaknü atobe labah, tüsho api tsühsoniusobo ju ahihdakkhi trükshihbo kambah.” 20Jumonü apinü ju nimung ane müngühjihde tha, “Nüke hode Israel müngühjihde athabah, ‘Ephraim tüsho Manase nangde Thrünpuhnü nüsa kamshang!’ ” Hanangde apinü Ephraim ju Manase müngüh kamshih. 21Judüki Israelnü Josep ki tha, “Kheahang, I shechoh, tüshe Thrünpuh nü lung labah; tüsho nü pü pürü lomi ching nü belode ayübah. 22Tüsho Amorrü khah chingnü I nukshang tüsho I sanglühnü ayankhikhi awung düpheak khülang nü keoniorübo kheaknü büthsüde nü kilim jihchoh.”
നിലവിൽ തിരഞ്ഞെടുത്തിരിക്കുന്നു:
THRÜNTAN 48: YIMCBSI
ഹൈലൈറ്റ് ചെയ്യുക
പങ്ക് വെക്കു
താരതമ്യം
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.