Khuurakikha 4
4
Kayini akhoonya Abeli
1Adamu waakona n'umukhasi weewe Eva, waaba shisoombo, lwanyuma waasaala umwaana umusiinde. Kila Eva amutwiikha lisiina ari Kayini, lwekhuuba elomela ari, “Naafunile umwaana umusiinde lwe buyeeti bw'Omukasya.” 2Lwanyuma waasaalayo umwaana ukuundi umusiinde, waamutwiikha lisiina ari Abeli.
Abeli weekyela umwaayi we kamasheese, ne Kayini weekyela umulimi. 3Nga imbuka yaabirakilewo, Kayini waareera bitweela khu bilime byeewe, waabiwaanayo nga shiwaanwa isi Umukasya. 4#Heb 11.4Abeli naye wawaanayo shiwaanwa sheewe isi Umukasya. Niye aakhoonya lisheese lilyaana liikiboole litweela, khukhwaama mu masheese keewe, waabukula bisiintsa bibifuurayo buulayi, waabiwaanayo nga shiwaanwa. Aryo Umukasya waasangaalila Abeli atweela ni shiwaanwa sheewe, 5ne wekaana Kayini atweela ni shiwaanwa sheewe. Shino shaakhalasa naabi Kayini, waatuunduuma ni lirima liikali naabi.
6Lwanyuma kila Umukasya alomela Kayini ari, “Lwashiina iwe ukhalaale naabi musaambo iyo? Shiina kila utuunduuma ni lirima liikali liryo? 7Iwe uba nga ukholile shishiindu shiilayi, khali ikhufukiiliile ni shiwaanwa shoowo. Ne lwekhuuba ndi ukholile shishiindu shiibi, shishoonako ari shaaliindiliile busa amulyaango kwoowo. Shikana khukhuwula iwe, ne siwaakha waashifukiilila shaakhuwula ta.”
8 #
Mat 23.35; Luka 11.51; 1 Yok 3.12 Lwanyumakho Kayini waalomela waandaaye Abeli ari, “Khakhutsye khukyeendakekho iyo mwirome.” Ne ni baaba nga bali ibweene iyo mwirome, Kayini wenyukhila waandaaye Abeli tsana, waamukhoonya.
9Nga byabeele biryo, Umukasya waareeba Kayini ari, “Waandaayo Abeli ali waheena?”
Kayini weelamwo ari, “Ise sinaamanyile ta. Ise niye uuli ni khuuba umuliindi wa waandaayase?”
10 #
Heb 12.24
Lwanyuma lwayo ndi kila Umukasya alomela Kayini ari, “Lwashiina iwe ukholile shishiindu shiibi nga shino? Iwe waakhoonyile waandaayo, ni kamafuki keewe kalikho kaantsilootsela ise khukhwaama aasi mwiloba. 11Ni nashiryo, ari indi khuukhutsuba iwe, ni khuubona ndi s'ulima luundi ta khu liloba lilyaasamile lyaamila kamafuki ka waandaayo, isi iwe wirire. 12Isi kane iwe ukhakilekho bari ulima khu liloba, nalyo singene likhusaalile biilyo ta. Khukhwaama shaleelo shino, kane ube umuundu ukhalikho ni ango ta, kane ube umukyeendaani busa khu shibala.”
13Kayini naye weelamwo Umukasya ari, “Shitaambiso sheesi umbeele shili shirafu naabi siinashinyalisa ta. 14Ari bona ulikho umboona ise khuurura khu liswa, ni khuutsya khuumenya aleeyi naabi ni nawe. Ise kane imbe umuundu ukhalikho ni aango ta, naluundi umukyeendaani busa khu shibala, n'umuundu yeesi ukane anyoole, kane antsire.”
15Ne Umukasya naye weelamwo Kayini ari, “Singene shibe shiryo ta. Umuundu yeesi ukane akhoonye Kayini, kane aweebwe shiitaambiso shishiili shirafu kimiluundi musaafu khuuminyisakho shitaambiso sheesi ise indi khuukhuwa iwe.” Aryo kila Umukasya ara khu Kayini khaabonelo, khuurewula ari ikhabawo umuundu yeesi unyala waakhoonya Kayini ta. 16Lwanyuma Kayini waakyeenda waarura isi Umukasya, waatsya waamenya iyo mu shibala she “Khuukyeendaana,” shishiili ibwaamanyaanga wa Edeni.
Babetsukhulu ba Kayini
17Kayini waakona n'umukhasi weewe, waaba shisoombo, wasaala umwaana umusiinde, baamutwiikha lisiina bari Enoka. Khu mbuka iyo Kayini woombekha shiriimba waashitwiikha lisiina ly'omusooleli weewe, waashilaanga ari Enoka. 18Enoka naye waafuna umwaana umusiinde, waamulaanga ari Aradi, Aradi naye waafuna umwaana umusiinde waamulaanga ari Mehuyayeli, naye uwafuna umwaana umusiinde waamulaanga ari Mesushayeli, naye uwafuna umusiinde waamulaanga ari Lameka.
19Lameka waayila bakhasi babili, abe mutweela bari Ada, n'ukuundi abe bari Zila. 20Lameka ni Ada basaala Yabali. Yabali yuno niye uwaba paapa we babaandu babaamenya mu masari, naluundi nga baayisa bibyaayo. 21Baasaalayo umwaana ukuundi bari Yubali. Yubali yuno niye uwaba paapa we babaandu babaakhupa kamatuungu, ni khuufuura kimilele.
22Ndi Lameka ni Zila baasaalayo umwaana musiinde baamutwiikha bari Tubali-Kayini, uwaba ni kamakyesi khukhwikholakholanisa ni buroonzi ni ayoni, waamisamwo bibiindu bibiindi. Lwanyuma lweewe, baasaalayo umwaana umukhaana, baamulaanga bari Naama.
23Shifukhu shitweela Lameka waalomela bakhasi beewe boombi ari,
“Inywe Ada ni Zila, ni mundekeerese buulayi.
Inywe bakhasi baase mumanye buulayi sheesi inoma:
Iliyo umusaani isi ise neerire,
neerire umusaani umusooleli,
lwekhuuba aakhupile ise likuma.
24Oba nga umuundu yeesi ukhakakho khukhwiira Kayini,
afuna shitaambiso kimiluundi musaafu khuuminyisakho,
ne uyo ukhakakho khukhwiira Lameka,
afuna shitaambiso kimiluundi kamakhumi musaafu na musaafu khuuminyisawo.”
Seezi ni Enoshi
25Adamu waakona n'umukhasi weewe Eva luundi, baasaalayo umwaana umusiinde ukuundi. Oyu baamutwiikha lisiina bari Seezi. Lwekhuuba Eva aaloma ari, “Wele waambeele umwaana umusiinde ukuundi, mu shifwo sha Abeli isi Kayini aakhoonya.” 26Lwanyuma Seezi naye aafunayo umwaana umusiinde isi baalaanga bari Enoshi. Khu mbuka nyene yino niyo isi babaandu baarakikhila khuuraambisa lisiina ly'Omukasya mu khwiisaaya.
നിലവിൽ തിരഞ്ഞെടുത്തിരിക്കുന്നു:
Khuurakikha 4: LPE
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
The Bible in Lumasaaba © Bible Society of Uganda, 2016.