Khuurakikha 5
5
Babetsukhulu ba Adamu
(2 Bye Kimiboolo 1.1-4)
1 #
Rak 1.27-28
Luno nilwo luruungo lwe babetsukhulu ba Adamu. Wele n'abuumba umuundu, aamubuumba mu shifwaani shisheewe shisheene. 2#Mat 19.4; Mako 10.6Wele aababuumba umuseetsa n'umukhasi, lwanyuma waabawa tsikhabi, waabalaanga ari babaandu baalamu.
3Nga Adamu wahaangaale woolesile kimiiko shitoondo shitweela ni kamakhumi kataru (130) kye buukhulu, waafuna umwaana umusiinde, uwaba afwaananila ilala nga niye umweene, waamutwiikha lisiina ari Seezi. 4Lwanyuma lwooyo, Adamu aawangala woolesa kimiiko bitoondo shinaane (800). Adamu aasaalayo babaana babaandi besiinde ni bekhaana, 5lwanyuma waafwa nga waayolesa kye buukhulu bitoondo syeenda ni kamakhumi kataru (930).
6Nga Seezi woolesile kye buukhulu shitoondo shitweela na kiraano (105), waafuna umwaana umusiinde, waamutwiikha ari Enoshi. 7Lwanyuma lwooyo, Seezi aawaangala woolesa kye buukhulu bitoondo shinaane na musaafu (807). Seezi aasaalayo babaana babaandi besiinde ni bekhaana. 8Lwanyuma waafwa nga waayolesa kye buukhulu bitoondo syeenda ni likhumi na kibili (912).
9Nga Enosi woolesile kye buukhulu kamakhumi syeenda (90), waafuna umwaana umusiinde, waamutwiikha lisiina ari Kenani. 10Lwanyuma lwooyo, aawaangala woolesa kye buukhulu bitoondo shinaane ni likhumi na kiraano (815). Enosi aasaalayo babaana babaandi besiinde ni bekhaana. 11Lwanyuma waafwa nga waayolesa kye buukhulu bitoondo syeenda na kiraano (905).
12Nga Kenani woolesile kye buukhulu kamakhumi musaafu (70), waafunayo umwaana umusiinde, waamutwiikha lisiina ari Mahalaleli. 13Lwanyuma lwooyo, aawaangala woolesa kye buukhulu bitoondo shinaane ni kamakhumi kane (840). Kenani aasaalayo babaana babaandi besiinde ni bekhaana. 14Lwanyuma waafwa nga waayolesa kye buukhulu bitoondo syeenda ni likhumi (910).
15Nga Mahalaleli woolesile kye buukhulu kamakhumi kasesaba na kiraano (65), waafunayo umwaana umusiinde, waamutwiikha lisiina ari Yaredi. 16Lwanyuma lwooyo, aawaangala woolesa kye buukhulu bitoondo shinaane ni kamakhumi kataru (830). Mahalaleli aasaalayo babaana babaandi besiinde ni bekhaana. 17Lwanyuma waafwa nga waayolesa kye buukhulu bitoondo shinaane ni kamakhumi syeenda na kiraano (895).
18Nga Yaredi woolesile kye buukhulu shitoondo shitweela ni kamakhumi kasesaba na kibili (162), waafunayo umwaana umusiinde, waamutwiikha lisiina ari Enoka. Yaredi aasaalayo babaana babaandi besiinde ni be khaana 19Lwanyuma lwooyo aawaangala woolesa kye buukhulu bitoondo shinaane (800). Yaredi aasaalayo babaana babaandi besiinde ni bekhaana 20lwanyuma waafwa nga woolesile kye buukhulu bitoondo syeenda ni kamakhumi kasesaba na kibili (962).
21Nga Enoka woolesile kye buukhulu kamakhumi kasesaba na kiraano (65), waafunayo umwaana umusiinde, waamutwiikha lisiina ari Mesusela. 22Lwanyuma lwooyo, Enoka aawaangala woolesa kye buukhulu bitoondo bitaru (300), nga ali mu butweela naabi ni Wele. Enoka aasaalayo babaana babaandi besiinde ni bekhaana. 23Kimiiko kyoosi kyeesi Enoka aawaangala atweela kyoola bitoondo bitaru ni kamakhumi kasesaba na kiraano (365). 24#Heb 11.5; Yuda 1.14Enoka aamala buulamu bweewe bwoosi nga ali mu butweela naabi ni Wele, lwanyuma waakoraanawo busa, lwekhuuba Wele aamuyila.
25Mesusela nga woolesile kye buukhulu shitoondo shitweela ni kamakhumi shinaane na musaafu (187), waafunayo umwaana umusiinde waamutwiikha lisiina ari Lameka. 26Lwanyuma lwooyo aawaangala woolesa kye buukhulu bitoondo musaafu ni kamakhumi shinaane na kibili (782). Mesusela aasaalayo babaana babaandi besiinde ni bekhaana. 27Lwanyuma waafwa nga woolesile kye buukhulu bitoondo syeenda ni kamakhumi kasesaba na syeenda (969).
28Lameka nga woolesile kye buukhulu shitoondo shitweela ni kamakhumi shinaane na kibili (182), waafunayo umwaana umusiinde. 29Lameka waaloma ari, “Kane imutwiikhe lisiina ndi Nowa, lwekhuuba niye anakhuwosawosakho mu khurekana khuukali khweesi khubiramwo nga khuraamba lwe shitsubo sheesi Umukasya aatsuba liloba.” 30Lameka aawaangala woolesa kye buukhulu bitoondo biraano ni kamakhumi syeenda na kiraano (595). Lameka aasaalayo babaana babaandi besiinde ni bekhaana. 31Lwanyuma waafwa nga woolesile kye buukhulu bitoondo musaafu ni kamakhumi musaafu na musaafu (777).
32Nowa nga woolesile kye buukhulu bitoondo biraano (500), waafunayo babaana besiinde bataru nga nibo Shemu, Hamu, ni Yafesi.
നിലവിൽ തിരഞ്ഞെടുത്തിരിക്കുന്നു:
Khuurakikha 5: LPE
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
The Bible in Lumasaaba © Bible Society of Uganda, 2016.