Markus 1
1
Yohanes Pembaptis kase tau supaya orang-orang basadia trima pa Tuhan
(Mat. 3:1-12; Luk. 3:1-20; Yoh. 1:19-28)
1Ini tu Kabar Bae tentang Yesus Kristus, tu Anak Allah. 2#Mal. 3:1Kabar Bae ini mulai deng tu da tulis di kitab nabi Yesaya bagini,
“Tarukira jo bae-bae, Kita mo suru tu Kita pe utusan
lebe dulu dari Ngana.
Dia itu yang mo buka akang jalang for Ngana,
supaya orang pe hati siap trima pa Ngana.
3 #
Yes. 40:3
Dia babicara deng suara kuat di padang gurun, dia babilang,
‘Buka jalang for trima pa Tuhan,
kong kase tre tu jalang for sambut pa Dia.’ ”
4Tuhan pe utusan itu, de pe nama Yohanes Pembaptis. Dia datang di padang gurun kong ja babilang pa orang-orang yang datang pa dia, “Bertobat jo supaya Tuhan kase ampung tu ngoni pe dosa, kong kase jo ngoni pe diri for mo baptis, tanda ngoni so bertobat.”
5Banya orang dari sluru daera Yudea deng dari kota Yerusalem pigi pa Yohanes di kuala Yordan. Dorang mangaku dong pe dosa-dosa, kong Yohanes baptis pa dorang di situ. 6#2Raj. 1:8Yohanes ja pake baju panjang dari bulu onta deng da ika tu pinggang pake tali dari kuli binatang, trus dia pe makanan belalang deng madu utang. 7Kong ini tu dia ja kase tau pa orang-orang, “Abis kita, ada tu mo datang yang lebe berkuasa dari kita. Hele mo maruku for buka Dia pe tali capatu, kita nyanda pantas. 8Kita baptis pa ngoni deng aer, mar Dia mo baptis pa ngoni deng Roh Kudus.”
Yohanes baptis pa Yesus
(Mat. 3:13-17; Luk. 3:21-22)
9Waktu itu, Yesus datang dari Nazaret di daera Galilea, kong Yohanes baptis pa Dia di kuala Yordan. 10Serta Yesus kaluar dari aer, Dia iko lia tu langit tabuka, trus tu Tuhan pe Roh yang rupa burung pombo turung di atas pa Dia. 11#Kej. 22:2; Mzm. 2:7; Yes. 42:1; Mat. 3:17, 12:18; Mrk. 9:7; Luk. 3:22, 9:35Kong dapa dengar suara dari sorga, “Ngana ini Kita pe Anak, Kita sayang pa Ngana. Ngana ini beking Kita pe hati snang.”
Setang pe bos goda pa Yesus di padang gurun
(Mat. 4:1-11; Luk. 4:1-13)
12Pe klar itu, Tuhan pe Roh iko bawa pa Yesus ka padang gurun. 13Yesus ada di padang gurun itu slama ampa pulu hari, kong di situ setang pe bos goda pa Dia. Yesus tinggal di situ deng binatang-binatang liar, kong malaekat-malaekat ja layani pa Dia.
Yesus kase tau Kabar Bae dari Tuhan Allah
(Mat. 4:12-22; Luk. 4:14-15, 5:1-11)
14Waktu Yohanes so dapa tangka kong kase maso ka bui, Yesus pigi ka daera Galilea kong kase tau tu Kabar Bae dari Tuhan Allah. 15#Mat. 3:2, 4:7Dia bilang, “Tu waktu yang Tuhan Allah da tentukan so sampe, Tuhan Allah so mo Berkuasa sbagai Raja. So itu, bertobat jo deng percaya tu Kabar Bae.”
Yesus pangge ampa orang tukang tangka ikang for iko pa Dia
16Satu kali Yesus da bajalang di pinggir danau Galilea, kong Dia dapa lia dua orang kaka ade, dong dua pe nama Simon deng Andreas. Dorang da balego jala di danau, lantaran dorang pe karja ja bacari ikang. 17Kong Yesus pangge pa dorang, “Mari jo iko pa Kita! Ngoni biasa bacari ikang, mar Kita mo kase ajar pa ngoni bagimana ja bacari orang for iko pa Kita.” 18Pe dengar itu, dorang iko kase tinggal dong pe jala kong iko pa Yesus.
19Abis itu, Yesus bajalang nyanda jao dari situ kong Yesus dapa lia pa Yakobus deng de pe sudara Yohanes, dorang dua itu Zebedeus pe anak-anak. Dorang da beking butul dorang pe jala di prao. 20Dia iko pangge pa dorang dua, kong dong iko pa Dia. Dorang kase tinggal dong pe papa di prao sama-sama deng tu orang-orang karja.
Yesus da user setang pa satu orang di Kapernaum
(Luk. 4:31-37)
21Yesus deng Dia pe murit-murit sampe di Kapernaum. Serta so hari Sabat, Yesus iko maso ka dalam ruma ibada agama Yahudi kong mangajar di situ. 22#Mat. 7:28-29; Luk. 4:32Orang-orang yang badengar pa Dia taheran-heran da dengar tu Dia pe ajaran, lantaran Dia da mangajar pa dorang punung deng kuasa, nyanda sama deng dorang pe ahli-ahli Taurat pe mangajar.
23Waktu itu, ada satu orang di ruma ibada itu yang da kemasukan setang. Tu orang itu bataria, 24“Yesus, orang Nazaret! Apa so Ngana pe urusan deng torang? Ngana datang mo kase binasa pa torang kang? Kita tau sapa Ngana, so Ngana Yang Kudus dari Tuhan Allah.”
25Mar Yesus togor deng kras pa tu setang itu, “Badiam, kaluar ngana dari pa dia!”
26Tu setang beking sampe tu orang itu tagoyang kras, kong deng bataria kuat tu setang kaluar dari pa dia. 27Samua orang di situ jadi taheran-heran, sampe dorang baku bilang, “Eh, co lia! So ajaran baru ini! Dia pe bicara punung deng kuasa. Dia user tu setang-setang kong tu setang-setang itu lei iko De pe prenta.”
28Abis itu, tu brita tentang Yesus iko tasiar ka samua tampa di daera Galilea.
Yesus kase bae pa Simon pe mama mantu deng banya orang laeng
(Mat. 8:14-17; Luk. 4:38-41)
29Pe kaluar dari ruma ibada agama Yahudi, Yesus, Yakobus deng Yohanes pigi pa Simon deng Andreas pe ruma. 30Waktu itu Simon pe mama mantu da tidor-tidor lantaran saki panas, kong dorang iko kase tau pa Yesus kalu Simon pe mama mantu da saki. 31Abis itu, Yesus pi badekat pa Simon pe mama mantu, trus Yesus pegang de pe tangan kong bantu kase badiri pa dia. Waktu itu jo, tu Simon pe mama mantu pe panas ilang, kong dia mulai layani pa dorang.
32Waktu so mo malam, orang-orang bawa pa Yesus samua orang da saki deng da kemasukan setang. 33Kong samua orang di kota itu bakumpul di muka ruma. 34Trus Yesus kase bae banya orang dari rupa-rupa panyaki, deng Dia lei user tu setang-setang yang da maso pa orang-orang. Yesus nyanda kase tu setang-setang mo babicara, lantaran dorang tau sapa Dia.
Yesus kase tau tu Kabar Bae dari Tuhan Allah di daera Galilea
(Luk. 4:42-44)
35Waktu amper siang, Yesus bangong kong kaluar ruma. Dia pigi ka tampa yang jao dari kampung kong basombayang di situ. 36Mar Simon deng de pe tamang-tamang pi cari pa Dia. 37Pe baku dapa deng Dia, dorang bilang, “Guru, pe banya orang da bacari pa Guru.”
38Kong Yesus bilang pa dorang, “Mari jo, torang pigi ka tampa laeng, di kota-kota dekat sini. Di situ lei Kita mo kase tau tu Kabar Bae dari Tuhan Allah, so lantaran itu Kita da datang.”
39 #
Mat. 4:23, 9:35; Luk. 4:44 Abis itu Yesus pigi ka samua tampa di Galilea, kong Dia kase tau pa dorang tu Kabar Bae dari Tuhan Allah di ruma-ruma ibada agama Yahudi deng Dia user tu setang-setang yang da maso pa orang-orang.
Yesus kase bae orang da saki kusta
(Mat. 8:1-4; Luk. 5:12-16)
40Ada satu orang saki kusta datang pa Yesus. Tu orang itu berlutut di muka pa Dia kong minta tolong, “Kalu Bapak suka, Bapak bole kase bae pa kita.”
41Pe dengar itu, Yesus rasa kasiang, kong Dia pegang tu orang itu kong babilang pa dia, “Iyo Kita suka, jadi bae jo ngana!” 42Waktu itu jo, tu orang itu pe panyaki kusta iko ilang, kong dia bae.
43Abis itu Yesus iko suru pigi pa dia, kong deng tegas Yesus kase inga, 44#Im. 14:1-32“Inga eh! Ngana jang se tau pa sapa-sapa tu Kita da beking pa ngana. Mar ngana pigi jo pa imam supaya dia bole lia kalu ngana so bae. Abis itu, ngana bawa korban persembahan sama deng tu Musa da prenta, itu tu bukti for mo se tunjung pa orang-orang kalu ngana memang butul-butul so bae.”
45Mar tu orang itu cuma tare da pi bacirita kamana-mana apa tu da jadi pa dia. So itu Yesus so nimbole maso ka kota deng trang-trangan, Dia kurang da tinggal di tampa-tampa yang jao dari kampung di luar kota. Mar biar lei bagitu, dari mana-mana orang badatang trus pa Yesus.
നിലവിൽ തിരഞ്ഞെടുത്തിരിക്കുന്നു:
Markus 1: MDO
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Perjanjian Baru Bahasa Manado @ Lembaga Alkitab Indonesia 2017