Luk 7
7
1Naŋ we vava paso nol mon o vavae ŋaŋ alo qoro sul, ti mule pata siwo i Kapernaum. 2Wa o rowrowovag anan o tuara liwoa goro soldier melnol we gopa te mate, ni we nonom aneane ape neia. 3Wa ni me roŋotag apen i Jesus, ti vatraŋ o tuan tamatua ta Judea suria, ti paere munia ni mule ma ni ge esu o rowrowovag anana iloke. 4Naŋ neira me va niŋa i Jesus, we paere togtogoa munia, we vava wa, Ni we sar ape gene ko te ge munia. 5Ape ni we tape o sul ananina, wa ni me taur mona veta o ima siwo tuwale mun kamam. 6Naŋ i Jesus ti gis raka tuwale amaira. Wa ni me niŋa veta gate aras nan o ima, o tanun liwoa goro soldier melnol ti vatraŋ o tuan pulsalana suria, ti vava munia wa, Lord, nipea anumagiko, ape na gate sar si ka kalo pata ma lele imak. 7Wa o manigiu o ine na gate nonom si na we sar si na mule suriko anaqarig; nava ka log o vavae, wa o reremera anak te esu apena. 8Ape inau mulaŋ o tanun me map sur siwo inau munra liwoa goro, wa amenau o tuan soldier we sur siwo mun nau; wa na we vava mun tuara, Ka van at, pa ti van; wa mun tuara, Van ma, wa ti van ma; wa mun o rowrowovag anak, Ka ge tamaike, wa ti ge. 9Naŋ i Jesus me roŋotag iloke, we mamakei ape ineia, ti kilau ris ti vet mun o sul we tataga ineia, ti vet wa, Nau we vava mun kamiu wa, Na gate ilo suar qalo o nomtup we poa tamaike amaira Israel. 10Wa ira gene vatraŋ we vusiag kel ilo imana, we ilo o rowrowovag ilone me gopa ti we esu.
11Naŋ tuara qoŋ rowo ni me vano ilo laqlaqe vanua we log si Nain, wa ira tiŋqoro anana me goara tuwale amaia, wa o sul we qoqo. 12Naŋ ni me rivtag o mategeare vanua, ilo, we sasa lue o tamate, natun ravevena o wotuwale, wa ro gene ilone o naro, wa o tanun talo vanua ilone o sul amaia. 13Naŋ i Lord me iloa ti magarosa ineia, ti vava munia wa, Nipea taŋtaŋ. 14Wa ni me peteŋ, ti taŋo o tanosasasa, wa iragai we sasa we tira late. Naŋ neia wa, Lumagav, nau we vava muniko, Tavaraka ma. 15Naŋ o tamate ti pute raka, ti qeteg vavava. Wa ni me ukegia mun ravevena. 16Wa o gogolo me lavira nol, wa neira we log ronoga God, we vet wa, O prophet liwoa me wot ma amen nina, wa God me vaatev ma o sul anana. 17Wa o roro ike ape neia me gao nol a Judea, wa alo vanua nol we toga wawaliog.
18Wa ira tiŋqoro anan John me gaganag munia ape savasava ŋaŋ iloke. 19Wa ni me suware ma o tuan tiŋqoro anana pulrua, we vatraŋ rara sur i Lord, ti vava wa, Iniko i gene wasi te mule ma, si kamam te qale nerei isei we sea? 20Wa irara ilone me va niŋa ineia we vava wa, I John i Vasugroŋo me vatraŋ i kara ma suriko, was, Iniko i gene wasi te mule ma, si kamam te qale nerei isei we sea? 21Naŋ alo masao qoŋ ilone nane ni me ge esura we qoqo nan o gopae, wa nan o vivtig, wa nan o vui we tatas, wa ni me vasoal mun o matapei we qoqo si neira iloilo. 22Naŋ ni we valui goro rara we vet wa, Ura mule, ura gaganag kel mun John o sava ŋaŋ kamurua me ilo veta wa me roŋotag, was o matapei ŋaŋ we lik kel, wa o qages we mule kelkel, wa o resresmavin we wenewene kel, wa o qorowono we roŋotag, wa ira mate we tavaraka kel, wa we gaganag o lea we wia mun ra masara ŋaŋ. 23Wa turwia isei qe tete tutuag ape nau.
24Wa ira sala anan i John me vanreag, i Jesus we vava raka mun o sul apen i John wa, Kamiu me rowolue ilo vanua vanameag si a ilo o sava? O togo we magmagoa ape laŋ? 25Pa kamiu me rowolue si a ilo o sava? O tanun we saru o siopa malumlum? Ilo, iragai we saru o siopa valeleas wa we gana vagae o tur sinaga we toga alo imara maranaga. 26Pa kamiu me rowolue si a ilo a sava? O prophet? We nun nau we vava mun kamiu, wa raka sage nan o prophet. 27Pa ineia iloke me rave ti we tuai apena wa,
Ilo, na we suware nasalak at goro nanagoma,
Wa ni te wurvag moai ko namatesalama.
28Pa nau we vava mun kamiu wa, Amaira nol me wota veta ma amen o vavine isei tea gate liwoa nan i John i Vasugroŋo, panava isei qe mano mantagai alo marana non God we liwoa nania.
29Wa o sul nol me roŋotagia, wa ira rowoagtalsom me vet apen God si we taniniga, me la veta mora ti o vasugroŋo amon John. 30Panava ira Pharise tara vatogo ŋaŋ me sirigavtag mora o lea God me vonog vasarig apena, gate la mora gina o vasugroŋo amona. 31Naŋ i Lord me vava wa, O manigiu o ine, na te tenegag o tanun talo taraŋiu iloke ape sa? wa neira we sasarita ape sava? 32Neira we sasarita ape reremera ŋaŋ we pute alo tinesara, wa we varloglogira, we vava wa, Ikamam me ge o vigo mun kamiu, panava kamiu gate laka goro; ikamam me ruruŋtap mun kamiu, pa kamiu gate taŋtaŋ tataga. 33Apen i John i Vasugroŋo me mule ma gate ganagana o bread gate unun o wine, wa ikamiu we vava wa, O vui we tatas amaia. 34Pa i Nat tanun me mule ma we ganagana we unun, wa i kamiu we vava wa, Ilo, iloke o mansinaga o manuima, rapulsalana ira rowoagtalsom ŋaŋ tara ganganor. 35Wa ira nat lolomaran we veveg taniniga o lolomaran.
36Naŋ o tuara Pharise me paere munia sin ganagana tuwale amaia. Naŋ ni me mule pata ilo iman o Pharise ilone, we risa ape ganagana aia. 37Pa alo vanua ilone o tuara vavine i ganganor we gilala si ni we pute ape ganagana alo iman o Pharise ilone, ti le ma o wetov matevat o urai alolona, 38ti tira peteŋ naraŋona ape kulana, ti taŋtaŋ, ti qeteg vasug naraŋona mun nasurmatana, ti maŋ mamasa mun nauluna, wa ti nimnim naraŋona, ti nonon mun o urai ilone. 39Wa o Pharise ilone me suware i Jesus ma ti me ilo, ti vava alo toqana wa, Iloke si ta prophet te gilala ape vavine ilone we savai we taŋoa, ape neia i ganganor. 40Naŋ i Jesus me valui goroa we vet wa, Simon, na we vet mok o gene muniko. Naŋ neia wa, Vatogo, si ka vava. 41O tuara tag pug mon o pug avune tanun nirua. Avunan i tuwale o pug o pene melnol vaga tavelima, avunan o varuei saŋavul tavelima. 42Pa tagai amenrara si rara wono pug nia, wa ni me nomvitag mamasa munrara rua. Isei nan rara te tape raka sage ineia apena? 43Naŋ i Simon me valui, we vet wa, Nau we nonom si ineia wun me nomvitag raka sage ti munia. Naŋ ti vet munia wa, Ko me veveg taniniga ran. 44Naŋ ni we kilau ape vavine ilone, ti vet mun Simon wa. Ko we ilo o vavine iloke? Na me kalo pata ma ilele imama, wa ko gate le munau o pei ape raŋok, panava iro gene iloke me vasug naraŋok mun nasurmatana, me maŋ mamasa mun nauluna. 45Ko gate nimnim ilo nau, panava na me kalo pata ma wa ineia iloke gate mot ran ma we nimnim naraŋok. 46Ko gate urai naqatuk mun o ligiu, panava ineia me nonon naraŋok mun o urai. 47O manigiu o ine na we vava muniko wa, Napugana we qoqo, pa me nomvitag veta; ape ni me tape aneane: pa ta nomvitag mantagai munsei, ni te tape mantagai. 48Naŋ ni me vava munia wa, Me nomvitag napugama ŋaŋ. 49Wa iragai we risa tuwale amaia ape ganagana we varvava raka wa, Isei gai iloke we nomvitag mulaŋ o pugai? 50Naŋ neia we vet mun o vavine wa, Nom o nomtup me vaesuko; mule tamata at.
നിലവിൽ തിരഞ്ഞെടുത്തിരിക്കുന്നു:
Luk 7: MOTA
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
New Testament was published by the British and Foreign Bible Society in 1931.