San Juan 2
2
Galirea rȩjȩnä̧ttü̧, Caná ütawiyättü ü'käwinü̧
1Wäbodäkuä mo̧ro̧ päi'omȩnä̧ Galirea rȩjȩttü̧, Caná ütawiyättü ya̧tȩ ü'käu pä'käri kki̧na̧'a̧. Ja̧'wa̧nü̧ ja̧'a̧, Jesú ja̧ju̧'i̧nä̧ juȩnȩtä̧ kki̧nä̧ju̧. 2Ja̧'wa̧ta̧nü̧ Jesú'i̧nä̧ u̧wo̧juȩtä̧u̧ku ttä̧tȩpi̧nä̧ku̧, jua̧u̧ ü'käu pä'kärira̧'a̧ i̧'cha̧ pä'ü. 3Ja̧'wa̧nü̧ i̧'chä̧ja̧'a̧ vino isoya beipächiyäkua, Jesú ja̧ju̧mä̧ päjinä̧ku̧:
—Vino isoya joipächa'a.
4Päjiyäku Jesú-mä̧ ädätinä̧kua̧:
—Jua̧u̧mä̧ ujutu jäwämä̧kü̧. Ji̧nä̧ Ttütä chütü'kü jidäkuäu mo̧ro̧mä̧ rȩbȩä̧kuä̧wo̧ka̧'a̧.
5Ja̧ju̧mä̧ juȩnȩ aditätürü pä'inä̧ju̧:
—Päümä̧ o'kajuiyünä̧ jȩpä̧tu̧kui̧.
6Juȩnȩmä̧, kko̧ro̧mü̧ttü̧ ji̧yü̧tȩnü̧ jo̧mȩnä̧ 'kä̧nä̧ri̧yü̧mä̧ i̧nä̧ttü̧ adikuä kka̧kui̧na̧'a̧, judío tükäu iku jȩttä̧'i̧jü̧. Jua̧u̧ ji̧yü̧ku̧pü̧nä̧mä̧ cien litros jo̧mȩnä̧ akuipü ji̧na̧'a̧. 7Jesú-mä̧, juȩnȩ aditätürü pä'inü̧:
—Ji̧yȩja̧ 'kä̧nä̧ri̧yu̧nä̧ ajiya su̧'pȩnü̧ 'karü kku̧nä̧tu̧kui̧,
Pä̧jä̧u̧mä̧, su̧'pȩnü̧ 'karü kku̧ni̧nä̧tü̧. 8Jua̧u̧nü̧ o'ka'a, Jesú-mä̧ päinä̧u̧:
—Jitämä̧ a̧'u̧ku̧nä̧ wä'opü ȩmi̧pü̧, pä'käri to̧ä̧rä̧kuä̧wä̧ i̧sa̧rü̧ iyäjätukui.
Ja̧'wa̧nü̧ weüta'anü̧ jȩpi̧nä̧tü̧: 9Ja̧'wa̧nü̧ ja̧'a̧ pä'käri to̧ä̧rä̧kuä̧wä̧ i̧sa̧mä̧, ajiya jä̧joyamä̧ vino isoyatä pärowächäja'a au topinü̧, juorü ȩmä̧woya pä'ümä̧ ieruwa'a jakuänä̧; suro juoya jȩpä̧jä̧tü̧jä̧ wo̧jui̧nä̧tü̧. Ja̧'wa̧nü̧ ja̧'a̧, ü'käwa'a pä'käri kki̧yä̧ku̧ru̧ wopo'ü, 10pä'inü̧:
—O'katoi'ünä̧tä̧ ä̧kuo̧mȩnä̧mä̧, vino isoya adiwäjuei isoyamä̧ iyä'ijätü, ttä̧tȩpä̧jä̧u̧ jo̧mȩnü̧ au kättädü o'ka'atä, täkü vino isoya suräjuei isoyamä̧ ttaja pä'ü. Ja̧'wa̧nü̧ ja̧'a̧nä̧ ukumä̧, adiwäjuei vino isoya jitäbü päi'ünä̧ wa'adü kkü̧nä̧ji̧jä̧.
11Pi̧yȩ ji̧na̧'a̧, Jesú Galirea rȩjȩttü̧, Caná ütawiyättü ä̧kuo̧mȩnä̧ jȩtto̧kü̧ juei jȩi̧nü̧mä̧, ujuru i̧jȩpü̧. Ja̧'wa̧nü̧ jȩa̧'a̧ topü u̧wo̧juȩtä̧u̧mä̧ ttesetinä̧ku̧.
12Jua̧u̧ 'kuäopäji o'ka'a Cafarnaúm ütawiyära̧'a̧ 'chi̧nä̧tü̧, ja̧ju̧'i̧nä̧, ü̧jä̧wa̧tü̧'i̧nä̧, u̧wo̧juȩtä̧u̧'i̧nä̧ jü̧nä̧; juȩnȩmä̧ a̧'u̧ku̧nä̧tä̧ mo̧ro̧ kka̧kui̧nä̧tü̧.
Dio-rü ukuokuäkuäwodenä̧ iyä'chätürü rä'epü ikuinü̧
(Mt 21.12-13; Mc 11.15-18; Lc 19.45-46)
13Judío jȩttä̧'i̧jü̧ Pacua pä'käri tü'küwächa'a, Jesú-mä̧ Jerusarȩ́-ra̧'a̧ 'chi̧nü̧. 14Ja̧'wa̧nü̧ ja̧'a̧ i̧'chi̧'o̧mȩnä̧, Dio-rü ukuokuäwodenä̧ pä̧kä̧yü̧rü̧'i̧nä̧, oweja-tü̧rü̧'i̧nä̧, u̧nu̧ku̧tu̧ru̧'i̧nä̧ mikuänä̧ iyä'chü kkä̧nü̧, pärätä pärowätu'i̧nä̧ ttü̧'ȩja̧'a̧ topinü̧. 15Ja̧'wa̧nü̧ ji̧yä̧ku̧, i̧so̧chu̧ bȩo̧chu̧ jȩpo̧'ü̧, o'katoi'ünä̧rü̧ Dio-rü ukuokuäkuäwodettü rä'epü ikuinü̧, ttä̧ji̧mü̧ oweja-tü̧tä̧ku̧, ttä̧ji̧mü̧ pä̧kä̧yü̧tä̧ku̧; ja̧'wa̧ta̧nü̧ pärätä päroäkuäwä isotürü'i̧nä̧, ttiäre mesa odiyä'i̧nä̧, kkisäu iku, ttiäre pärätä'i̧nä̧ pperetü ikuini̧yä̧u̧. 16Ja̧'wa̧nü̧ u̧nu̧ku̧tu̧ru̧ iyä'chätürü pä'inü̧:
—¡Pitürü'i̧nä̧ jȩpü̧ ikuätukui!
Chä'o ojusodemä̧ kkorojuei iyäwodemä̧ juokuepätukuä. 17Ja̧'wa̧nü̧ jȩi̧yä̧u̧, u̧wo̧juȩtä̧u̧mä̧ wȩyu̧kuä̧ wȩnȩnä̧: «Kuojusode rü̧ȩnä̧ repeda'attü̧, okurä jä'i̧nü̧'a̧nü̧ kuoäkusä» pä'ü wȩyu̧kuä̧'i̧jo̧mȩ amükuädi'inä̧tü̧.
18Ja̧'wa̧nü̧ jȩi̧yä̧u̧ judío-mä̧ Jesú-ru jä'epü ä̧ju̧kui̧nä̧tü̧:
—¿Ja̧'wa̧nü̧ jȩ'kua̧'a̧mä̧, dí weäwänä̧ jȩ'kua̧'a̧jä̧ttü̧?
19Pättäku Jesú-mä̧ ädätinä̧u̧:
—«Pode Dio-rü ukuokuäkuäwode pparopü ikuätukui, wäbodäkuä mo̧ro̧tä̧ chäräbe'iyätukuaku.»
20Pä̧i̧yä̧u̧ judío-mä̧ pättinä̧ku̧:
—Podemä̧, cuarenta y sei año jo̧mȩnä̧ ttaditinode ja̧'wa̧nü̧ ja̧'a̧ ¿ukumä̧ wäbodäkuä mo̧ro̧tä̧ adito'ü kuäräbe'äkua'a?
21Ja̧'wa̧nü̧ ja̧'a̧nä̧, Jesú-mä̧ chutä jä̧ttä̧pä̧ya̧ isode 'kua̧rü̧nä̧ ukuokuinü̧. 22Ja̧'wa̧nü̧ ja̧'a̧ttü̧, Jesú wa'arettü ttoächomȩnä̧mä̧, u̧wo̧juȩtä̧u̧mä̧ ukuokuinü̧ ji̧nü̧ amükuädi'inä̧tü̧; ja̧'wa̧nü̧ ja̧'a̧ttü̧ wȩyu̧kuä̧ wȩnȩnä̧'i̧nä̧, Jesú ukuoku'i̧nä̧ esetinä̧tü̧.
Jesú-mä̧ o'katoi'ünä̧rü̧ wo̧jua̧
23Jesú Jerusarȩ́-ttü̧, Pacua pä'käri kka̧'a̧ ü̧jo̧mȩnä̧, jȩtto̧kü̧ juei jȩa̧'a̧ topü rekuätü ttesetinä̧ku̧. 24Ja̧'wa̧nü̧ ja̧'a̧nä̧ Jesú-mä̧ a̧'kua̧ u̧wȩnäro̧ko̧u̧ pinä̧tü̧, jua'amä̧ o'katoi'ünä̧rü̧tä̧ u̧wo̧jua̧'a̧ttü̧, 25Ja̧'wa̧nü̧ ja̧'a̧ttü̧, ttü̧ja̧ ttütü'kümä̧ ya̧tȩ'i̧nä̧ jiäwarü pä'ümä̧ rekuärü̧jo̧ko̧ku̧ pinü̧; jua'amä̧ u̧wo̧jua̧'a̧ttü̧ ttü̧ja̧sa̧ a̧mi̧so'kinä̧ kkü̧mä̧.
നിലവിൽ തിരഞ്ഞെടുത്തിരിക്കുന്നു:
San Juan 2: PNT13
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© Sociedades Biblicas Unidas en Venezuela