مَتّایِ انجیل 4
4
عیسی امتحان بِه
1بازون، خُدا روح عیسیَ ویاوان درون رانمائی بُکود تا ابلیس اونَ امتحان بُکونه. 2عیسی بعدِ اونکی چِل شبندِروج، روزه دَشتی، ویشتا بو. 3هو موقع ابلیس، اونِ ورجه بامو و بُگفت: «اگه تو خُدا پسری، اَ سنگانَ بُگو نان ببه!» 4عیسی اونِ جوابِ درون بُگفت: «توراتِ میان بینیویشته بُبوسته کی:
«”آدمی فقط نانِ مرا زنده نیه،
بلکی هر کلامِ مرا کی خُدا دَهنِ جا بیرون اَیه.“»
5بازون ابلیس اونَ مُقدّس شار ببَرده و اونَ معبدِ بُجور بنه 6و عیسیَ بُگوفت: «اَگه خُدا پسری، تره بجیر تَوَد، چونکی زبورِ کتابِ درون بینیویشته بُبوسته:
«”تی واسی خو فیریشته ئانَ دستور خوائه دَئن“
و
”اوشان تره خوشانِ دَسانِ سر دَریدی
نبه کی تی لنگَ ایتا سنگَ بزنی.“»
7عیسی اونِ جوابِ درون بُگفت: «اَنم تورات درون بینیویشته بُبوسته کی،
«” تی خُداوندْ خُدایَ، امتحان نوا کودن.“»
8ایوار ده، ابلیس اونَ ایتا پیله کوهِ توکِ سر ببَرد و تمانِ دُنیا مملکتان و اوشانِ شکوه و جلالَ، اونَ نیشان بدَه 9و بُگفت: «اَگه می جُلُو بکفی و مَرا پرستش بُکونی، اَشان همه یَ تره خوائم فَدَن.» 10عیسی اونَ بُگوفت: «دورَ بو اَی شیطان! چونکی تورات میان بینیویشته بُبوسته:
«” تی خُداوندْ خُدایَ بپرست
و فقط اونَ عبادت بُکون.“»
11بازون ابلیس عیسیَ وِلا کود و فیریشته ئان باموئید، اونَ خیدمت بُکودید.
عیسی خو خیدمتَ شروع کونه
12هَطوکی عیسی بیشتاوست یحیی گرفتارَ بوسته، جلیل ولایت واگردَست. 13بازون ناصره شارَ تَرکا کود، کَفَرناحوم شار بُشو و اویا بِئسا. کَفَرناحوم، جلیلِ دریا وَر کی زبولون و نفتالی سامانسر نئَه بو، قرار دَشتی. 14اَ ایتفاق دکفته تا اِشعیایِ پیغمبرِ گبان به انجام فارسه کی بگفته بو:
15«زبولونِ سامانسر و نفتالی سامانسر،
شُمان کی دریا راه سر و اُردنِ اُطرف ایسائید،
جلیلِ ملّتان؛
16مردومی کی ظولماتِ درون ایسابید،
ایتا پیله روشنائی بیده ئید،
و اوشانیَ کی مرگِ سایه و ولایت درون ایسابید،
روشنائی فَتاوست.»
17عیسی جه اُ زمات بنا بُکود موعظه کودن و گُفتی: «توبه بُکونید، چونکی آسمانِ پادشائی نزدیکه!»
عیسی اولتا شاگردان
18وقتی عیسی جلیلِ دریا کنار راه شئون دوبو، دو تا برارَ بیده کی اوشانِ نام شَمعون شناس به پِطرُس، و اونِ برار آندریاس بو، کی آبِ درون ماشک زِئندِبید، چونکی صیّاد بید. 19عیسی اَشانَ بُگفت: «می دُمبالسَر بائید و من شمرأ مردومِ صیّاد کونم.» 20اوشان درجا خوشانِ ماشکَ وِلا کودید و تأدی مرا اونِ دُمبالسر بُشوئید. 21عیسی هُطو کی خو رائَ شئون دوبو، دو تا دِه برار بیده، یعنی یعقوب، زِبِدی پسر و اونِ برار یوحنا کی خوشانِ پِئر زِبِدی مرا لوتکا درون ایسابید و خوشانِ ماشکَ حاضیرَ کودن دیبید. اوشانَم دوخواد؛ 22اَشان درجا لوتکا و خوشانِ پئرَ وِلا کودید و اونِ دُمبالسر بُشوئید.
ناخوشانِ شفا
23جه اَ رو عیسی سر تا سر جلیلَ گردستی و عبادتگائانِ درون مردومَ آموختی و خُدا پادشائی خُبِ خبرَ اعلام کودی و هر جور درد و ناخوشی کی مردوم دَشتیدَ شفا بخشه ئی. 24پس عیسی آوازه تمانِ سوریه درون بپیچَست و مردوم تمان ناخوشانَ کی هرجور درد و مرضی دَشتید، و هم دیو بزِه ئان و غَشیان و ایفلیجانَ اونِ ورجه اَوَردید و عیسی اوشانَ شفا دَئی. 25پس پیله جماعتی، جلیل و دِکاپولیسِ جا، اورشلیم و یهودیه و اُردنِ اُ طرف، اونِ دُمبالسر رادکفتید.
നിലവിൽ തിരഞ്ഞെടുത്തിരിക്കുന്നു:
مَتّایِ انجیل 4: GIL
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
@ 2024 Korpu Company