مَتّایِ انجیل 5
5
موعظه کودن کوه جور
1وقتی عیسی خلقَ بیده، ایتا کوه سر بُشو و بینیشت. بازون اونِ شاگردان اونِ ورجه باموئید 2عیسی، بنا به اوشانِ آموختن بُکود و بگفت:
3«خوشا به حالِ اوشانی کی واخُبید، روحِ درون نیازمندید،
چونکی آسمانِ پادشائی
اوشانِ شینه.
4خوشا به حالِ ماتم بزه کسان،
چونکی اوشان، آرامی خوائید یافتن.
5خوشا به حالِ فروتنان،
چونکی اوشان زمینَ به ارث
خوائید بَردن.
6خوشا به حالِ اوشانی کی تشنه
و ویشتایِ عیدالتید،
چونکی اوشان سِئر خوائید بوستن.
7خوشا به حالِ اوشانی کی رحم کونیدی،
چونکی اوشانِ ره رحم خوائید کودن.
8خوشا به حالِ اوشانی کی دیل پاکید،
چونکی اوشان خُدایَ خوائید دِئن.
9خوشا به حالِ اوشانی کی سُلوُک کونیدی،
چونکی اوشان خُدا زاکان
دوخواده خوائید بوستن.
10خوشا به حالِ اوشانی کی عیدالتِ راهِ درون عذاب کشیدی،
چونکی، آسمانِ پادشائی اوشانِ شینه.»
11«خوشا به حالِ شُمان، هو موقع کی مردوم می واسی شمرأ فاش دِئیدی و اذیت کونیدی و هر بدِ گبیَ به دوروغ، ضِّدِ شُمان بیگید. 12خوش بیبید و شادی بُکونید، چونکی شیمی پاداش آسمانِ درون پیله یِ. چره کی هُطو، پیغمبرانیَ کی پیش جه شُمان ایسابید اذیت بُکودید.
نمک و روشنائی
13«شُمان دُنیا نمک ایسید. ولی اَگه نمک خو مزه یَ جه دَس بده، چُطو بِه ایوارده اونَ شورَ کودن؟ دِه بدردِ هیچی نُخوره مگه اَنکی اونَ بیرون فیشانید و مردوم اونَ لگَد دَمَج بُکونید.
14«شُمان دُنیا روشنائی ایسید. شاری کی ایتا کوه لچّه سر بنا بُبوسته یَ، نیشه قایمَ کودن. 15هیکّس گرسوزَ وانگیرانه تا اونَ ایتا دَلف جیر بنِه! بلکی اونَ چراغدان سر نئِه تا اونِ روشنائی تمانِ اوشانیَ کی خانه درون ایسائید فتاوه. 16پس وائالید شیمی روشنائی مردومِ سر فتاوه تا شیمی خُبِ کارانَ بیدینید و شیمی پئرَ کی آسمان درون ایسا، پرستش بُکونید.»
مسیح بامو تا شریعتَ تمان و کمال انجام بده
17«خیال نُکونید کی باموم تا تورات و پیغمبران بینیویشته ئانَ باطلَ کونم؛ ناموم تا اوشانَ باطلَ کونم، بلکی باموم تا اوشانَ تمان و کمال انجام بدم. 18چونکی حئیقتن، شمرأ گَم، تا آسمان و زمین از بین نشه، نُخطه یا ایتا حمزه، توراتِ جا هرگس از بین نخوائه شئون، تا اَنکی همه ذرّه انجام ببه. 19پس هر کی ایتا جه کوجی تَرینِ اَ حُکمانَ سرسری بیگیره و دیگرانم اَطو یاد بده، آسمان پادشائی درون، کوجی تَرین اِشمارده بِه. ولی هر کی اَ حُکمان انجام بده و اوشانَ دیگرانَ یاد بدِه، اون، آسمانِ پادشائی درون، پیله دوخواده به. 20چونکی شمرأ گَم، تا شیمی صالحی سرتر جه توراتِ آموجگاران و فَریسی فرقه عالمانِ صالحی نبه، هرگس آسمانِ پادشائی درون نخوائید شوئن.»
غیظ
21«بیشتاوَستید کی قدیمیانَ بگفته بُبوسته ” قتل نُکون، و هر کی قتل بُکونه، سزاوارِ محاکمه یِ.“ 22ولی من شمرأ گَم، هر کی خو برار سر غیظ بُکونه، سزاوارِ محاکمه یِ؛ و هر کی خو برارَ توهین بُکونه، شورا ورجه سزاور محاکمه یِ؛ و هر کی خو برارَ شانتِه بگه، اونِ سزا جهندم آتش بِه. 23پس اَگه اُ موقع کی تی پیشکشَ، قربانگایَ فدَن دری به یاد باوری کی تی برار تی جا ایچی به دیل درِه، 24تی پیشکشَ قربانگا میان بنِه و اول بوشو تی برارِ مرا سُلُوک بُکون و بازون بیا و تی پیشکشَ فدَن. 25تی شاکی مرا کی تره محکمه سو بَردن دَره، تا هنو اونِ مرا راه درون ایسائی، سُلُوک بُکون، نبه کی تره قاضی دَس واسپاره و قاضی تره مأمور دَس فدِه و خولتانکِ درون دکفی. 26حئیقتن، تره گَم کی تا قِران آخرَ فاندی، خولتانکِ جا بیرون نائی.»
شهوت
27«بیشتاوستید کی بگفته بُبوسته ”زینا نُکون.“ 28ولی من شمرأ گَم، هر کی شهوتِ مرا ایتا زناکَ فندره، هو دَم خُو دیلِ درون اونِ مرا زینا بُکوده دَره. 29اَگه تی راستِ چوم تره به گُناه فاکشه، اونَ بیرون باور و فیشان، چونکی تره بختر اَنه کی ایتا جه تی اوسم و اعضا ناقص ببه تا اَنکی تمانِ تی تن جهندمِ درون اِگاده ببه. 30و اَگه تی راستِ دَس تره به گُناه فاکشه، اونَ بؤرسین و فیشان، چونکی تره بختر اونه کی ایتا جه تی اوسم و اعضا ناقص ببه تا اَنکی تمانِ تی تن جهندم درون اِگاده ببه.»
طلاق
31«اَطو بگفته بُبوسته کی ”هر کی خو زنِ طلاق بده، بایسی اونَ ایتا طلاقنامه فَدِه.“ 32ولی من شمرأ گَم، هر کی خو زنَ جغیرِ اَنکی زینا بُکوده ببه طلاق بده، اونَ به زیناکاری فاکشه و هر کی طلاقَ گیفته زناکَ به زنی بیگیره زینا کونه.»
قسم
33«بازم بیشتاوستید کی قدیمیانَ بگفته بُبوسته، ”دوروغِ قسم نُخور، بلکی قسمانیَ کی خُداوندِ ره بُخوردی وفا بُکون.“ 34ولی من شمرأ گَم، هرگس قسم نُخورید، نه آسمانَ، چونکی خُدا پادشائی تختِ، 35و نه زمینَ، چونکی اونِ لنگ جیرِ کَتلِ، و نه اورشلیمَ، چونکی اُ پیله پادشا شارِ. 36و تی سرم قسم نُخور، چونکی حتی نتانی ایتا مویَ سیفید یا سیاه بُکونی. 37پس شیمی بله هو ’بله‘ ببه و شیمی نه هو ’نه‘، چونکی ویشتر جه اَن، شریر شینه.»
تلافی
38«اَنَم بیشتاوستید کی بگفته بُبوسته ”چوم عوضِ چوم و گاز عوضِ گاز.“ 39ولی من شمرأ گَم، شُرورِ آدم جُلُو نئسید. اگر ای کَس تی دیمِ ای وَرَ کشیده بزه، اویتا وَرَم وائال بزنه. 40و هر وقت اینفر بخوائه تره محکمه سو فاکَشانه و تی پیرهنَ تی جا فیگیره، تی قبایم اونَ فَدَن. 41اَگه ایتا رومی سرباز تره زور بُکود کی اون بارَ دو کیلومتر اون ره ببری، چهار کیلومتر اونِ ره ببر. 42هَرکس منّتِ مرا تی جا ایچی بخوائه، اونَ فَدَن و هَرکس تی جا ایچی قرضی بخوائه، تی دیمَ وَنگَردان.»
دُشمندانَ محبت بُکونید
43«بیشتاوستید کی بگفته بُبوسته ”تی هَمساده یَ محبت بُکون و تی دُشمندِ مرا دُشمندی بُکون.“ 44ولی من شمرأ گَم شیمی دُشمندانَ محبت بُکونید و اوشان واسی کی شمرأ عذاب دیئیدی، دُعای خیر بُکونید، 45تا شیمی پئرِ ره کی آسمان درون ایسا، زاکان بیبید. چونکی اون خو آفتاوَ بدِ آدمان و خُبِ آدمانِ سر فتاوانه و خو وارشَ صالحان و بدکارانِ سر وارانه. 46اَگه فقط اوشانیَ محبت بُکونید کی شمرأ محبت کونید، چی پاداشی خوائید داشتن؟ مگه حتی خراجگیرانم هه کارَ نُکونیدی؟ 47و اَگه فقط شیمی برارانَ سلام بیگید، دیگرانِ جا چی سرتری دَریدی؟ مگه حتی بُت پرستِ مردومانم، هه کارَ نُکونیدی؟ 48پس شُمان کامل بیبید، هُطوکی شیمی آسمانی پئر کامل ایسه.»
നിലവിൽ തിരഞ്ഞെടുത്തിരിക്കുന്നു:
مَتّایِ انجیل 5: GIL
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
@ 2024 Korpu Company