Luk 1
1
EMMANA YỌỌN ỌDUỌK OWOM MMUUŊ
1Akwaa odod upono Tiofidọs, uwak owom ama odomo ukeme iwed mbuk mbaaŋa mme mpọ nkoro ekewọrọde osu k'otu nnyin nte Idem-Mbubod ekeŋwuŋọde. 2Mmọ ewed se eketibede ukem ukem nte mmọnimi ekedede ntiense ekeyakde ọnọ nnyin, tọọŋọ ke ntọọŋọ. Ndien mme ntiense nken ekede mme ọkwọọrọ ikọọ Idem-Mbubod. 3Ami metehede idem nam nduuŋọ mbaaŋa mfifien mpọ abaaŋade Yisọs, tọọŋọ ke emana ese. Ọfọn sọ ma ami iwed inọ fin, ofo Akwaa odod upono Tiofidọs, ukem se eketibede. 4Mbaak ofo ọdiọŋọ ke se mmọ ekepeebide fin abaaŋa Yisọs ekede apanikọọ.
ENYERE AYAARA EMANA YỌỌN ỌNỌ SAKARAYA
Luk 1:5-25
5K'oyo Erọd ekedede ọbọọŋ k'idak ukara Yudia, oku Idem-Mbubod keen amaadu emi ekekerede Sakaraya, enye ekede ọku ke nka Abiya ma aŋwaan ese Adisabed ekedede eyen ubon Erọn. 6Mmọ mbumbaa ekedeeŋe ntiti owom k'iso Idem-Mbubod, mmọ onyuŋ asaŋa ke mme mbed Idem-Mbubod onyuŋ anana ndo. 7Ede mmọ ikinyeneke eyen, sia Adisabed ekedede adaa, ndien mmọ ekedeŋe nkenye-owom.
8Usen keen, idaha Sakaraya anamde utom nte oku k'iso Idem-Mbubod, k'otu mme uke ise, sia mmọn uke ise ekedeŋe mme akama utom ke efe-uwa ke obio Yedusedem. 9Ekeene nte ubono mpọ mme oku Idem-Mbubod ekedede, mmọ ama esin afia idiọŋọ enye ododde iduk efe-uwa ifọp insens. Ndien afia ama-tad Sakaraya nte enyeem emidede ọfọp insens ke efe-uwa. 10Otutu owom adaa ke eseen efe-uwa ọbọŋ akam k'idaha enye ọsuk ọfọpde insens ke esid efe-uwa.
11Ndien Enyere Ọbọọŋ ọbiọŋọde Sakaraya k'iso, onyuŋ adaa k'ubọk namisa opokodo-ufọp insens. 12K'idaha Sakaraya okudde eme, uted ọmum eme. 13Ede Enyere ete eme, «Sakaraya, kuyak umim anam fin, sia Idem-Mbubod ama okop akam fo, ndien Adisabed anwaan fo akaman eyen ideeni inọ fin, ndien ofo akaikood eme Yọọn. 14Ndien ofo akainyene idara ma inemesid, uwak owom akainyuŋ idara emana ese. 15Sia enye akaipon k'iso Ọbọọŋ. Imiŋinyuŋ inwuŋ ukọd ipu ma ukọd inaam, ndien enye aka iyọhọ ma Nsasana Sibidid, ọtọọŋọ ke esid nsa nne nse. 16K'utọ ntak nkoro, enye akainam efuri ntitọọŋ Isuel ekaabade esid ekene Idem-Mbubod mmọ. 17Enye akaide owom eke enyenede sibidid ma odudu Idaiya, akaidi mbemiso Ọbọọŋ, onyuŋ ọtum mmọn owom idem ebed edidi Ọbọọŋ. Enye akainam mme ntaa enam emem ma ntitọọŋ mmọ, onyuŋ anam mmọn nsọŋ ibuod esaŋa k'ikike Idem-Mbubod.»
18Ndien Sakaraya ebib Enyere, «Mmenam ntewe ndiọŋọ k'ikọọ iken atiŋde akaitibe ke apanikọọ? Sia ami nde ekenye Owom, aŋwaan ni onyuŋ opon owom ke itua emana imihinyuŋ ikan iman eyen.»
19Ndien Enyere ọbọrọọ eme ete, «Enyin mi ede Kebre, emi ndaade k'iso Idem-Mbubod, ndien enye ọdọŋ min ebe ntiŋ etiti mbuk nken nnọ fin abaaŋade eyen fo. 20Ede, paŋ min utọŋ, ofo aka uforo imuuk, umuhu unyuŋ ukan utiŋ ikọọ, tutu usen mpọ nken emitibede, sia ofo unumke min ke apanikọọ. Mfifien se ntiŋde nnọ fin akaiwọrọ isu k'ikemini.»
21Ke eseen efe-uwa, mmọn owom edidak ebed Sakaraya yak ọwọrọ edi. Ndien ekikere mmọ ama etimere se anamde enye apeenede iwọrọ idi. 22Ede enye ekewọrọ edi ke efe-uwa, ikanke itiŋ ikọọ ma mmọ. Editiŋ ikọọ k'ubọk, sia enye ama oforo imuuk. Ndien mmọ ọdiọŋọ ke enye okud nkukud esi Idem-Mbubod ke esid efe-uwa.
23Ndien k'idaha udua usen utom ise ke efe-uwa ekekwerede, enye onyuŋ ufọk ise k'idak ukara Yudia. 24Ndien ke mme usen ikoro imaik'ibei, Adisabed aŋwaan ese ọduk idibi, onyuŋ edibe ke ufaŋ ọfiọŋ ition. 25Adisabed onyuŋ ete k'idem ise, «Ọbọọŋ anam ayaai ma ami, anam ami nyene eyen. Enye ọfọn ma ami idaha iken onyuŋ ekwehede min obuud k'iso mmọn owom.»
ENYERE ETIŊ ỌNỌ MBEDI ABAŊA EMANA KRAIS
Luk 1:26-38
26Ndien sia nsa idibi Adisabed imaik'iyọhọ ọfiọŋ iteken, Idem-Mbubod ọdọŋ Enyere Kebre utom ke obio Nasaded ek'odude k'idak ukara Kadidi. 27Enye akaa ebine Mbedi edeheseŋ asaŋiferi#1:27 Edeheseŋ asaŋiferi. Ikaidiọŋke ideeni apa, emi Yosef eyen ubon ọbọọŋ Defed, ekekọbide ubọk ke ndọ. 28Ndien Enyere ọduk ufọk Mbedi, onyuŋ ete eme, «Mekọm fin, ofo eken ọyọhọde ma akwaa mfọn Idem-Mbubod. Ọbọọŋ odu ma ofo, ọfọfọn ọnọ fin k'otu mme ibaani!»
29Ndien Mbedi ekekop ekọm Enyere, esid ese etimede abaŋa ikọọ iken enye atiŋde, ndien enye ekere se utọọ ekọm eken epeọwọrọde. 30Ndien Enyere ete eme, «Mbedi, kuyak umim anam fin, sia ofo okud mfọn k'iso Idem-Mbubod. 31Ofo aka uyoomo idibi uman eyen ideeni. Onyuŋ osio eme enyin, Yisọs. 32Enye aka iyọhọ ma uko, ndien ekaisio eme enyin, Eyen Nkoŋnkan Idem-Mbubod. Ọbọọŋ Idem-Mbubod aka imek eme Ọbọọŋ ọnọ mbuue nse nte enye eke onwuŋọde ọnọ ntaa ntaa nse Defed.» 33Ndien Enye akainyuŋ ida ukara ke ubon Yekọb ke nsinsi. Enye imihi iture idaa Ubọọŋ k'nsinsi.
34Ndien Mbedi ọbọọrọ, Enyere, «Utọ mpọ-nken eminam ntewe itibe sia nka-nyeneke ebuana ma ideeni apa?»
35Ndien Enyere ọbọrọọ eme ete, «Nsasana Sibidid Nkoŋnkan Idem-Mbubod akaidi inam akwaa-kwa utom k'idemfo. K'utọ ntak nkoro, eyen eken ofo omumanade ede Nsasana, emikere, Eyen Nkoŋnkan Idem-Mbubod. 36Se yak ntiŋ nọ fin ke Adisabed, eyen-eka fo, oyoomo sọ idibi eyen ideeni. Ndien ọyọhọ ọfiọŋ iteken ise owoom, emi mmọ ekese okoodde eme, Adaa. 37Mfifien mpọ nken etibe sia iduhe se ọsọŋde akan Idem-Mbubod inam.»
38Ndien Mbedi ọbọọrọ ete, «Yak osu ọnọ min nte ikọọ fo adede sia ami ndede eyen-utom Ọbọọŋ. Ndien Enyere adaha ọpọŋ eme.
MBEDI AKAA EKE ADISABED
Luk 1:29-45
39Ndien ke mpọ nte usen ifaŋ imaikibei, Mbedi ebene ke usọp adaha akaa obio ke opupo Yudia emi Sakaraya ekedunŋde. 40Enye eke esibi ufọk Sakaraya, ọkọm Adisabed. 41Ndien k'idaha Adisabed okopde uyo ekọm Mbedi, idaha-idaha ikoro eyen ke esid nsa Adisabed eyehede idem ma idaara. Ndien Adisabed ọyọhọ ma odudu Nsasana Sibidid. 42Ndien enye ebeene uyo ise ma idadesid, ete Mbedi, «Ọfọfọn ọnọ fin k'otu mme ibaani, ndien Idem-Mbubod ọdiọŋ eyen ofo omumande. 43Ndien ami meyọhọ ma upono inyene fin, nne Ọbọọŋ mi idide edise min. 44Sia nkekopkop uyo ekọm fo, eyen esid nsa mi atuak k'inemesid. 45Ọbọọŋ ọdiọŋ fin sia onumde ke apanikọọ ke enye akainam se eke onwuŋọde inọ fin.
MBEDI ỌKWỌỌ IKWỌỌ ITORO ỌNỌ IDEM-MBUBOD
Luk 1:46-55,56
46Ndien Mbedi ete,
Ami mme tooro Ọbọọŋ ni ke ofuri esid ni.
47Ami menehede nkop idadesid ke Idem-Mbubod andinyaaŋa.
Eyem edede andinyaaŋa mi.
48Sia enye eke okudde usuhọde itie mi.
Eyen utom ise emi enye emekde nte nne Andinyaaŋa. K'utọ ntak nkoro.
Tọọŋọ k'idaha iken mfifien emana akaikood min edidiọŋ.
49Sia eyem nken eded ọpọsọŋ anam akwaa mpọ ọnọ min.
Enyin Eseede Nsasana.
50Idem-Mbubod ekainyene mbọm ke nsinsi abaaŋa mmọnimi oponode
Onyuŋ anamde mpọ ọnọ eme.
51Enye ọwuri mfifien owom akwaa odudu ese.
Enye akan mmọn nkeŋidem ke mme ekikere esid mmọ.
52Enye ọsuhọde mme mbọọŋ ke itie upono mmọ.
Ede ebene mmọnimi ọsuhọdede idem onum k'itie upono.
53Ọbọọŋ ada etiti mpọ anam nsa ọyọk mfifien mmọnimi ọbiọọŋ ọdọŋde.
Ede anam mme enyene mpọ owom onyuŋ ubọk ipuipu.
54Enye esin unwam ọnọ ntitọọŋ edọŋutom ise, Isuel.
Ke enye itei mme ewuŋọ ese, ọnyuŋ atua mmọ mbọm.
55Ukem nte Enye eke onwuŋọde ọnọ ntaa-ntaa nnyin, Ebraham ma ofuri emana ese ke nsinsi.
Ke ntoro enye amaanam mme ewuŋọ ese ọwọrọ osu.
56Ndien Mbedi ama ọduŋ ma Adisabed ọyọhọ ọfiọŋ ita inye enye afiak onyuŋ ufọk ise ke obio Nasaded.
EMANA YỌỌN ỌDUỌK OWOM MMUUŊ
Luk 1:57-66
57K'idaha ọfiọŋ uman ekedi'kem anaade nte Adisabed aman eyen, enye aman eyen ideeni.
58Ndien mfifien mmọn nkan-nkuk ma ntitọọŋ eyeneyenika ese okop etop ke Ọbọọŋ anam mfọn nse opon k'uwem Adisabed, ndien mmọ adaara ma eme.
UNUM MBOBI YỌỌN ỌDUỌK OWOM MMUUŊ
59Eyen eke ọyọhọ usen itiaita mmọ edinum nsek eyen eken mbobi, ndien mmọ osio eme enyiŋ, Sakaraya, enyiŋ ntaa nse. 60Ede Nne nse Adisabed, ete mmọ, «waa, ikereke Sakaraya ede enyiŋ eseede Yọọn.»
61Mmọ fifien ete eme, k'iduehe owom ekerede utọ enyiŋ eken apa k'ubon mfo.
62Ndien mmọ anam idiọŋọ ọwuri ntaa nse, nte enye emi koode eyen ese. 63Ede Sakaraya akama ubọk atiŋ yak mmọ ọnọ eme itiad ŋwed, mmọ eke ọnọ eme, enye ewed, «Enyiŋ ese ede Yọọn.» Ndien idem apa mfifien owom ekekudde se Sakaraya ekewedde. 64Ndien ataa idaha-idaha ikoro Sakaraya amaana ọtọọŋọ atiŋ ikọọ, onyuŋ otooro Idem-Mbubod. 65Ndien idem apa mfifien mmọnido eke ọduŋde epere mmọ. Mbuk nken atuana ke mfifien odoro obio idak ukara Yudia. 66Ndien mfifien owom ekekopde mbuk nken ekere ke mpaidem, ete, «Ke apanikọọ eyen eken akaipon idide apanowom!» Sia ama anwaŋa mmọ ke Ọbọọŋ odu ma eme.
IKỌỌ USIAK UDUAK SAKARAYA
Luk 1:67-79
67Ndien idaha-idaha ikoro, Sakaraya eke ọyọhọ ma Nsasana Sibidid onyuŋ ọnọ etop eside Idem-Mbubod, ete,
68Iyak nnyin itoro Ọbọọŋ, emi edede Idem-Mbubod Isuel.
Sia enye edi inwam nnyin mbuue nse, imaana inyaaŋa nnyin.
69Enye ọnọ ọpọsọŋ Andinyaaŋa ọsọk nnyin esi
K'ubon Defed, eyen-utom ise.
70Enyem ede ataa ukem ukem se Idem-Mbubod eke wuŋọde ke eme ikainam.
Esike ndimek asiak-uduak ise ekedude ọtọọŋọ ke oyooko.
71Enye ọnọ Andinyaaŋa edi
Mbaak anyaaŋa nnyin osio k'ubọk mmọndioi
Ma mmọnimi atuade nnyin.
72Idem-Mbubod eke anam ntee mbaak ọwuri mbọm ọnọ mme ntaa ntaa nnyin.
Ke enye inam se enye eke onwuŋọde ọnọ ke nsasana ediomi ise.
73Uwuŋe ido enye eke onwuŋọde ọnọ ntaa ntaa nnyin Ebraham.
74Enye ete, Ami, nkainyaaŋa mfo nsio k'ubọk mmọn utua fo.
Mbaak ofo opono min ubaake umim.
75Enye eyem nnyin isọọŋọidaa ipono eme.
Inyuŋ inum mbed nse adaŋa nte nnyin idude uwem.
76Nte ofo, eyen ni, ekaikod fin asiak-uduak Nkoŋnkan Idem-Mbubod.
Sia ofo akaibem iso ikitum mmọn owom idem inọ edidi Ọbọọŋ.
77Ofo akainwam mbuue nse ọdiọŋọ ke Ọbọọŋ ọsukedi
Inyaaŋa mmọ ke enye ifeen mme idiọk-mpọ mmọ.
78Esike ataa mbọm Idem-Mbubod ke enye anyaaŋa nnyin.
Ntoro anam enye ọnọ Krais esi edem-onyuŋ edi wam nnyin.
79Enye ayaama unwana ọnọ mmọnimi inyeneke Idem-Mbubod ma mfifien owom umim mpa anamde.
Enye akaida nnyin usuŋ mbaak nnyin iduŋ ke emem
Ma Idem-Mbubod.
80Ndien Yọọn ọkọdi, onyuŋ okop uko ke Sibidid, ọduŋ ke oporo. Tutu edisibi usen enye ọtọọŋọde ikwọrọ ikọọ anwa-anwa nnọ ntitọọŋ Isuel.
നിലവിൽ തിരഞ്ഞെടുത്തിരിക്കുന്നു:
Luk 1: NKZ
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Nkari Bible by Beyond Translation is licensed under Creative Commons Attribution-ShareAlike 4.0 License.