Luk MBEN ŊWURI SE ŊWED LUK ABAŊADE
MBEN ŊWURI SE ŊWED LUK ABAŊADE
EWED ŊWED: Owom eken ekewedde ŋwed nken ikisiake enyiŋ ese. Ede, uwak mme adaa-usuŋ k'otu mmọnido ekenumde Yisọs ke apanikọọ ke oyooko enam nnyin idiọŋọ ke Luk ekede ewed-ŋwed nken. Uwak mme atitia ŋwed Idem-Mbubod ofufa emana eken esọọŋọ ke Luk ekede ewedde ŋwed nken.
Luk ekede nkukwere owom eken ikisihe Yuu ekewedde ŋwed ofufa ediomi. Enye ekede akwaa abia-usọbọ mmakara onyuŋ enehede epeebi mpọ ke ikọọ Krik ma usuŋ eduwem mmọ. Enye ekede adaa asaŋa-utom Pọọd emi mmọ ekese esaŋade ntoro akaa mme nsaŋa-utom ikọọ Idem-Mbubod. Ndien esio ewuri ke «Utom mme Nsaŋa-utom Krais ibuod 16:10-17, Utom mme Nsaŋa-utom Krais ibuod 20:5-21,17.» Luk eketie ke Rum ewed ŋwed nken ke mpọ nte ufaŋ itua AD 60 ma AD. 80.
Ntak Luk Ekewedde Ŋwed Nken
Luk eke ewed ŋwed nse ọnọ owom eken ekekerede Akwaa odod-upono Tieofidọs. Tieofidọs eken ekede ataa apanowom k'otu mme adaa ukara Rum. Luk ekeyem enye enehede enyene ifiọk abaaŋa mbuk Yisọs mfọn-mfọn. Enye ekeyem sọ mmọn owom ke mfifien itie, ma idem mmọnimi ikidehe Yuu, mbaak mmọ ọdiọŋọ apanikọọ abaŋa mbuk Yisọs Krais. Enye ekemaana eyem mmọ ọdiọŋọ se Yisọs ekese anamde onyuŋ epeebide. Enye nkoŋ ekenyuŋ eyem mmọn owom ọdiọŋọ ke Yisọs ekedi inyaaŋa mfifien owom eken onumde eme ke apanikọọ.
Se Luk Ekewedde Abaŋa
Ke ŋwed nken, Luk etiŋ abaŋa se Yisọs eketiŋde onyuŋ anamde, mbaak anwam mmọn owom idiọọŋọ nte Idem-Mbubod anyaŋade mmọ osio k'idiọk mpọ mmọ. Luk ekewed abaŋa uwem Yisọs, tọọŋọ k'idaha enye ikaimanake tutu esim idaha enye afiakde onyuŋ amana akaa edem-onyuŋ. Enye ọnọ ntutuŋe mbuk abaŋa emana Yọọn ọduọk owom mmuuŋ ma Yisọs. Ntutuŋe mbuk nken ọwuri ke Yisọs ekede Andinyaaŋa emi Idem-Mbubod eke onwuŋọde ke eme ika inọ yak edi. Luk amaana sọ ewed abaŋa Yisọs nte eyen owom. Enye etiŋ abaŋa nte Yisọs eke anwamde mmọn owom ekedọŋọde, ma mme ubueene ma nte enye ekenyiimede mmọnido mmọn owom eke esinde. Enye ọkọk mmọn owom udọŋọ, efeen ke mme idiọk mmọ, amaana etiŋ ọnọ mmọ abaŋa obio Ubọọŋ Idem-Mbubod.
Uwak ikọọ ke ŋwed nken abaŋa mme utom se Yisọs ekenamde ma mme upeebi mpọ nse ke idak ukara Kadidi. Luk amaana ewed abaŋa se Yisọs ekenamde ma se enye eketiŋde k'idaha enye ekeside idak ukara Kadidi emidikaa obio Yedusedem. Yisọs ete mme mbed nse ke anaa eme ikud ukuud inyuŋ ipa mbaak esi ke odo mmọn owom enyene ubọhọ ke idiọk mpọ mmọ. Ndien Idem-Mbubod akainam enye eseedi ke mpa ke ọyọhọ usen ita. Yisọs ete mmọ eme iseedi ke mpa, usen imihi ipeene eme ika iyuurọ iditọọŋọ obio ubọọŋ eme. Luk ewed abaŋa mpọ eketibede idaha Yisọs ekesibide Yedusedem. Nte Yisọs eketiŋde, keen ke otu mme mbed nse atap eme ọnọ mpa. Mme oku-uwa mme Yuu ma mme adaa-usuŋ mmọ ete ke enye odod mpa, ndien mmọ eben eme aka isọ Ukara mmọ Rum, ndien mmọ owod eme, Ke ọyọhọ usen ita ke Yisọs imaikipa, Idem-Mbubod anam enye eseedi ke mpa, Enye ọwuri uwak owom idem k'eme iseedi imaana idu uwem. Ndien Idem-Mbubod adaa eme ọdọk edem-onyuŋ.
Luk ekede nwọrọ ndaa owom k'inọ nnyin nenen idaha Yọọn ọduọk owom mmuuŋ eketọọŋọde utom ise. Enye anam ntoro k'idomo ukeme inam mbuk nken edidọọŋọ ma ini ukara mbọọŋ mmọn Rum.
Luk anwana iture ikama mme usem mmọn Ibru k'iwed ŋwed nse. Enye akama mme ikọọ nte, ‹Ette-ufọk›, ‹Atitia› utu ke ‹Rabai? Enye ada usem nte ‹epeipe› k'itie ‹Epeebi mbed› Enye ese ama ibe ke Yisọs ekebe, ‹ke apanikọọ› utu ke ‹Ameen› Enye etiŋ abaŋa mme idiọŋọ k'itie ‹Inyaŋ Kadidi.› Utọ mpọ ntee idehe mpọ mpaidem sia Luk esi Krik ndien enye okood ŋwed nse ọnọ owom eken ekerede enyiŋ Krik. Luk ekese ama itiŋ ikọọ ibaŋa mmọnido ikisiduhe k'otu owom. Matio etiŋ abaŋa mme ọdiọọŋọ mpọ owom ekedide ise nsek eyen Yisọs, ede Luk ọwuk enyin ese ke edidi mme epeme edọŋ. Luk eben mme ọbọọ ataasi nte Sakiọs ọwuri ke se enye ekewedde ke ibuod ŋwed 19:2-8, Difitikọs 5:27-29, onyuŋ etiŋ mme mbuk abaŋa mme Farisi ma mme ọbọọ ataasi ke ibuod ŋwed 18:10-13.
Luk etiŋ abaŋa mme ntiti mmọn Samedia ke mbuk abaŋade etiti owom Samedia ke ibuod ŋwed 10:33-42 ma owom epamfia emi ekeside Samedia edikọm Yisọs ke ntak enye ekekoodde eme udọŋọ epamfia ke ibuod ŋwed 17:16.
Luk etiŋ abaŋa edinam Yisọs ke abaŋade mme ubueene, eben mbuk owom inyene ma ubueene iken ekekerede Dasọdọs ke ibuod ŋwed 16:20-31 ọwuri. Onyuŋ abuaana ikọọ nyan ubọk Yisọs, unam usọrọ nkood mme ubueene, mmọn mbuŋọ, mmọn mpọ nam ma naan ke ibuod ŋwed 14:13. Amana anam nnyin idiọŋọke Yisọs ama ọbọọ uyed adan ikwọọrọ ikọọ Idem-Mbubod inọ mmọn ubueene, itad mmọnido ekesinede k'ukad, inam naan okud usuŋ, inam mme anana owom ọbọhọ nte esinede ke ibuod ŋwed 4:18.
Luk ọsọọŋọ eyiire ke etiti mbuk abaŋade Yisọs anaa ọnọ mfifien owom, ma mmọn Yental, mmọn Yuu, mme anam idiọk, mme anam ntiti mpọ, mmọn ubeene ma mme enyene mpọ owom. Uwak mbuk ọdọŋọdo ke ŋwed Luk emi ọwuride mme mpọ nken. Uwak mme mbuk nken oduke ŋwed Luk ọpọọŋ, iduhe ke ŋwed Matio, Maak, ma Yọọn. Emi ede mme uwud mpọ, Ibaani iken ekeyedde Yisọs adan k'ukod.
Luk 7:36-50 Etiti owom Samedia, Luk 10:30-37, Eyen eken ekesopde, Mbuk idiọk Udo, Luk 15:11-32 Owom inyene ma ubueene: Luk 16:19-31, Sakiọs ọbọọ ataasi, Luk 18:9-14.
MME IBUOD IKỌỌ KE ŊWED LUK
1:1-4 ọtọọŋọ ŋwed nse ma mbuk abaŋade Yisọs.
1:5—4:13 Idem-Mbubod ọnọ Yisọs edinyaŋa owom.
4:14—9:50 Yisọs ọnọ upeebi mpọ ke Kadidi.
9:51—19:27 Yisọs ọkwọọrọ ikọọ k'usuŋ enye ekekaade Yedusedem.
19:28—21:38 Yisọs ọnọ upeebi mpọ ke Yedusedem.
22:1—23:56 Yisọs Mpa.
24:1-53 Yisọs eseedi ke mpa.
നിലവിൽ തിരഞ്ഞെടുത്തിരിക്കുന്നു:
Luk MBEN ŊWURI SE ŊWED LUK ABAŊADE: NKZ
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Nkari Bible by Beyond Translation is licensed under Creative Commons Attribution-ShareAlike 4.0 License.