Соломоны дуун 6
6
1Бүсгүйчүүлийн дундаас
бүр сайхан минь ээ
Янаг чинь хаашаа одоо вэ?
Ямар замаар ороо вэ?
Явж хамтдаа эрэх үү дээ.
2—Үнэн хайр минь
цэцэрлэгрүүгээ
Үнэрт цэцэгсийн
мандалруугаа
Цэцэрлэгт сүргээ бэлчээрлүүлж
Цэцэгс сарааныг
түүхээр орсон.
3Хайрт минь минийх
Харин би түүнийх
Сараануудын дундуур
сүргээ тэр бэлчээнэм.
Сүйт бүсгүйн хосгүй үзэсгэлэн
4—Амраг минь Тирзатай
адилхан чи жавхаатай
Иерусалимын ижил ээнэгшмээр
Тугт цэрэг мэт
тун ч сүрдмээр
5Надаас харцаа холдуулаач
Намайг тэр чинь
балмагдуулж байна
Гилеадаас уруудах
ямаан сүргийг
Үс чинь эрхгүй
санагдуулж байна
6Хяргуулаад сая
угаалгаас гарсан
хонин сүрэг мэт шүдтэй
Эдний дунд
хурга хаясан нь үгүй
Ихрийг бүгд тээсэн гэлтэй
7Хацар шанаа нь
гивлүүр цаанаа
Анар жимсний зүсэм аятай.
8Жарын жаран хатан,
наян татвар эм
Үй олон шивэгчин байгаа ч
9Тагтаахан минь,
өөгүйхэн минь ганцхан
Төрсөн эхийнхээ
энхэрхэн минь
Төрүүлсэн тэрнийхээ
цэвэрхэн минь
Түүнийг үзээд шивэгчингүүд
жаргалтайгаар нь дуудна
Татвар эмс, хатад түүнийг
тал өгөн магтана.
10Үүрийн туяа шиг үзэгдэх
Саран адил тунгалаг
наран ижил өнгөлөг
Тугт цэрэг мэт сүрдэм
тун ч сайхан нь хэн юм?
11Хөндийн ногоо
дэлгэрэхийг харж
Усан үзэм цэцэглэж үү
Анарын мод нахиалж уу үзэхээр
Самрын цэцэрлэгт
орж явчихав, би.
12Сэтгэл бодол минь намайг
Сэхээ өгөлгүй хөтөлж
Сэнтийтний тэргэнд суулгавай.
13Буцаад ир, Шулаамын охин, буцаад ир
Буцаад ир, бид чамайг харцгаая, буцаад ир.
—Хоёр хуарангийн өмнөх
бүжиг үзэх лугаа
Та нар юунд Шулаамын охиныг ширтнэм бэ?
Одоогоор Сонгогдсон:
Соломоны дуун 6: АБ2013
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Ariun Bible © Mongolian Union Bible Society 2013.