လံာ်မၢ်ကူး 12
12
တၢ်ကတိၤဒိဘၣ်ဃးပှၤဒိးလဲစပံးလီၢ်တဖၣ်
(မး. ၂၁:၃၃-၄၆; လူၤ. ၂၀:၉-၁၉)
1အန့ၣ်တစု, ယ့ၣ်ၡူးစံးကတိၤကဒီးတၢ်ဒီးပှၤတဖၣ်န့ၣ်လၢတၢ် ကတိၤဒိတဖၣ်လီၤ. တဘျီပှၤအိၣ်ဝဲတဂၤလၢအသူၣ်စပံးမုၢ်တဖၣ်လၢစပံးလီၢ်တလီၢ် အပူၤ, ကရၢဃာ်အစပံးလီၢ်ဝးတရံး, ခူၣ်လီၤဆၢၣ်ဝဲတၢ်ပူၤတပူၤလၢကဆီလီၤနီၣ်စံၢ်စပံးသၣ်အကျိး အဂီၢ်, ဝံၤဘှီထီၣ်ဝဲတၢ်လီၢ်ကစီၤထီၣ်ဖးထီတခါလီၤ. အန့ၣ်ဝံၤ, ဒိးလဲလီၤဝဲအစပံးလီၢ်လၢပှၤဒိးလဲအီၣ်တၢ်တဖၣ်အစုပူၤ ဒီးလဲၤဝဲဆူတခီထံတခီကီၢ်န့ၣ်လီၤ. 2တုၤစပံးသၣ်မံထီၣ်အကတီၢ်ဘၣ်ဒီး, အဝဲဒၣ်မၢလီၤအခ့အပှၤတဂၤလၢအကလဲၤဟံးန့ၢ်စပံးသၣ်လၢ အဝဲဒၣ်ကြၢးန့ၢ်ဘၣ်ဝဲန့ၣ်လီၤ. 3ပှၤဒိးလဲအီၣ်တၢ်တဖၣ်ဖီၣ်ဃာ်တၢ်ခ့တၢ်ပှၤတဂၤန့ၣ်, ဒိအီၤတီၢ်အီၤ, ဒီးဒုးက့ၤအီၤထဲစုယၢ်ခီလီၤ. 4အန့ၣ်ဝံၤ, စပံးလီၢ်ကစၢ်မၢလီၤကဒီးအခ့အပှၤအဂၤတဂၤဆူအဝဲသ့ၣ် အအိၣ်လီၤ. အဝဲသ့ၣ်တဖၣ်ဒိဝဲတီၢ်ဝဲအခိၣ်ဒီးမၤမဲာ်ဆှးအီၤဒိၣ်ဒိၣ် ကလဲာ်လီၤ. 5စပံးလီၢ်ကစၢ်မၢလီၤအခ့အပှၤအဂၤတဂၤဒီးအဝဲတဂၤအံၤ အဝဲသ့ၣ်မၤသံကွံာ်ဝဲလီၤ. ဒီးအဝဲသ့ၣ်မၤပှၤတဘျုးဂၤဒ်န့ၣ်အသိး, ဒိဝဲတီၢ်ဝဲတနီၤဒီးမၤသံကွံာ်ဝဲတနီၤန့ၣ်လီၤ. 6အဝဲကမၢလီၤဝဲအဂီၢ်ပှၤအိၣ်တီၢ်ထဲတဂၤလၢအမ့ၢ်အဖိခွါလၢ အအဲၣ်ဘၣ်ဝဲဒိၣ်မးန့ၣ်လီၤ. လၢခံကတၢၢ်မၢလီၤဝဲဆူပှၤဒိးလဲအီၣ်တၢ်တဖၣ်အအိၣ်လီၤ. အဝဲဒၣ်စံးဝဲ, “ယနာ်လၢအဝဲသ့ၣ်ကပာ်ကဲယဖိခွါလီၤ.” 7ဘၣ်ဆၣ်ဒီးပှၤဒိးလဲအီၣ်တၢ်တဖၣ်စံးလိာ်အသးတဂၤဒီးတဂၤ, “အဝဲတဂၤအံၤမ့ၢ်စပံးလီၢ်ကစၢ်အဖိခွါလၢကန့ၢ်ဘၣ် သါတၢ်ဖိတၢ်လံၤလီၤ. ဟဲဃီၤ, မ်ပကမၤသံကွံာ်အီၤ, အန့ၣ်ဒီးတၢ်ဖိတၢ်လံၤလၢအကြၢးန့ၢ်ဘၣ်ဝဲန့ၣ်ကကဲပတၢ်လီၤ.” 8ဒီးအဝဲသ့ၣ်ဖီၣ်ဃာ်အီၤဒီးမၤသံကွံာ်အီၤဝံၤတၢၤကွံာ်အစိၣ် ဆူစပံးလီၢ်ကရၢၢ်အချၢလီၤ.
9ယ့ၣ်ၡူးသံကွၢ်ဝဲ, “မ့မ့ၢ်ဒ်န့ၣ်ဒီးစပံးလီၢ်ကစၢ်တဂၤန့ၣ်ကမၤဝဲဒ်လဲၣ်. အဝဲဒၣ်ကဟဲဒီးမၤသံကွံာ်ပှၤဒိးလဲအီၣ်စပံးလီၢ်တဖၣ်န့ၣ်, ဒီးကဒိးလဲလီၤက့ၤအစပံးလီၢ်လၢပှၤဂၤတဖၣ်လီၤ. 10တၢ်ကွဲးအသးအံၤမ့ၢ်သုတဖးဘၣ်ဒံးဘၣ်ဧါ.
‘လၢၢ်တဖျၢၣ်လၢပှၤဘှီထီၣ်ဟံၣ်တဖၣ်ညိကွံာ်ဝဲ
ဒ်တၢ်လၢအဘျုးတအိၣ်နီတမံၤဘၣ်န့ၣ်,
ကဲထီၣ်တ့ၢ်လံဟံၣ်သနၢၣ်အလၢၢ်
လၢအဘျုးအဖှိၣ်အိၣ်ဒိၣ်ကတၢၢ်န့ၣ်လီၤ.
11အအံၤမ့ၢ်ကစၢ်အတၢ်မၤ, ဒီးအိၣ်ဖျါလၢပမဲာ်ညါ
လၢအမ့ၢ်တၢ်လီၤလးဒိၣ်မးလီၤ.’ ”
12ပှၤယူဒၤဖိအခိၣ်အနၢ်လၢယ့ၣ်ၡူးကတိၤတ့ၢ်တၢ်ဒီးအီၤတဖၣ်နၢ် ပၢၢ်ဝဲလၢတၢ်ကတိၤဒိအံၤမ့ၢ်တၢ်ကတိၤထီဒါအဝဲသ့ၣ်အဃိ, ဃုကျဲလၢအကဖီၣ်န့ၢ်အီၤလီၤ. ဘၣ်ဆၣ်ဒီးမ့ၢ်လၢအဝဲသ့ၣ်ပျံၤဘၣ်ပှၤဂီၢ်မုၢ်တဖၣ်အဃိ, ပာ်တ့ၢ်အီၤဒီးဟးထီၣ်ကွံာ်ဝဲဖဲန့ၣ်လီၤ.
တၢ်သံကွၢ်ဘၣ်ဃးတၢ်ဟ့ၣ်တၢ်ခိတၢ်သွဲ
(မး. ၂၂:၁၅-၂၂; လူၤ. ၂၀:၂၀-၂၆)
13ပှၤဖၤရံၤၡဲတနီၤဒီးဟ့ၤရိာ်ကရၢဖိတနီၤဘၣ်တၢ်မၢလီၤအီၤ ဒ်သိးအကလဲၤဆူယ့ၣ်ၡူးအအိၣ်ဒီးသံကွၢ်သံဒိးအီၤ, ဒ်သိးအကဖီၣ်န့ၢ်အီၤလၢအတၢ်ကတိၤဒၣ်ဝဲတဖၣ်န့ၣ်လီၤ. 14အဝဲသ့ၣ်ဟဲဆူအအိၣ်ဒီးစံးဘၣ်အီၤ, “သရၣ်ဧၢ, ပသ့ၣ်ညါလၢနမ့ၢ်ပှၤတီပှၤလိၤဒီးကတိၤတၢ်တီတီလိၤလိၤ, ဒီးနတပျံၤဒီးကွၢ်မဲာ်ပှၤနီတဂၤဘၣ်န့ၣ်လီၤ. ပှၤအိၣ်ဒီးပှၤလီၢ်ပှၤလၤန့ၣ်နတပာ်ဒိၣ်လီၤဆီအီၤဘၣ်, မ့မ့ၢ်ကစၢ်ယွၤအကျဲလၢအပာ်လီၤဝဲလၢပှၤကညီအဂီၢ်န့ၣ်နသိၣ် လိသီလိအီၤတီတီလိၤလိၤလီၤ. တဲဘၣ်ပှၤတက့ၢ်. ပဟ့ၣ်တၢ်ခိတၢ်သွဲဆူရိမ့ၤအစီၤပၤဖးဒိၣ်န့ၣ် မ့ၢ်အကြၢးဝဲဘၣ်ဝဲကစီဒီဧါ. မ့ၢ်အတကြၢးတဘၣ်ဘၣ်လဲၣ်. မ့ၢ်ပကြၢးဟ့ၣ်ဧါ, မ့တမ့ၢ်တကြၢးဟ့ၣ်ဘၣ်လဲၣ်.”
15ဘၣ်ဆၣ်ဒီးယ့ၣ်ၡူးသ့ၣ်ညါန့ၢ်အတၢ်ပာ်မၤအသးသတးဒီးစံးဆၢ အဝဲသ့ၣ်, “ဘၣ်မနုၤသုဘၣ်သံကွၢ်သံဒိးယၤဒ်သိးသုကဖီၣ်န့ၢ်ယၤလၢ ယတၢ်ကတိၤဒၣ်ယဲန့ၣ်လဲၣ်. ဟဲစိာ်န့ၢ်ယၤစ့ဒန့ၤရံတဘ့ၣ်ဒီးပျဲယကွၢ်အီၤတက့ၢ်.”
16အဝဲသ့ၣ်ဟဲစိာ်စ့ဒန့ၤရံတဘ့ၣ်ဆူအအိၣ်, ဒီးအဝဲဒၣ်သံကွၢ် အဝဲသ့ၣ်, “တၢ်အံၤမ့ၢ်မတၤအခိၣ်အဂီၤဒီးအမံၤလဲၣ်.”
အဝဲသ့ၣ်စံးဆၢက့ၤ, “မ့ၢ်ရိမ့ၤအစီၤပၤဖးဒိၣ်ကဲစၢ်အဂီၤဒီးအမံၤလီၤ.”
17ယ့ၣ်ၡူးစံးဘၣ်အဝဲသ့ၣ်, “ဂ့ၤလံ, မ့မ့ၢ်ဒ်န့ၣ်ဒီး ရိမ့ၤအစီၤပၤဖးဒိၣ် အတၢ်န့ၣ်ဟ့ၣ်ရိမ့ၤအစီၤပၤဖးဒိၣ်, ဒီးကစၢ်ယွၤအတၢ်န့ၣ်ဟ့ၣ်ကစၢ်ယွၤတက့ၢ်.”
ယ့ၣ်ၡူးစံးတၢ်အံၤဒုးကမၢကမၣ်အဝဲသ့ၣ်ဒိၣ်ဒိၣ်ကလဲာ်လီၤ.
တၢ်သံကွၢ်ဘၣ်ဃး တၢ်ဂဲၤဆၢထၢၣ်က့ၤလၢတၢ်သံ
(မး. ၂၂:၂၃-၃၃; လူၤ. ၂၀:၂၇-၄၀)
18ပှၤစးဒူၤကဲတနီၤလၢအစံးဝဲလၢပှၤသံန့ၣ်တမ့ၢ်ကဂဲၤဆၢထၢၣ် သမူထီၣ်က့ၤနီတစုဘၣ်န့ၣ်, ဟဲဆူယ့ၣ်ၡူးအအိၣ်ဒီးစံးဘၣ်အီၤ, 19“သရၣ်ဧၢ, စီၤမိၤၡ့ကွဲးဟ့ၣ်ပဝဲဒၣ်ပှၤယူဒၤဖိတဖၣ်အတၢ်သိၣ်တၢ်သီ တထံၣ်လၢအစံးဝဲ, ‘ပှၤပိာ်ခွါတဂၤအဒီပုၢ်ဝဲၢ်ခွါမ့ၢ်သံဒီးပာ်တ့ၢ် အမါဘၣ်ဆၣ်အဖိမ့ၢ်တအိၣ်နီတဂၤဘၣ်ဒီး, ပှၤတဂၤန့ၣ်ကဘၣ်ဟံးန့ၢ်အဒီပုၢ်ဝဲၢ်အမါ, ဒီးဒုးအိၣ်ထီၣ်ဖိလံၤလၢအဒီပုၢ်ဝဲၢ်ခွါအဂီၢ်လီၤ.’ 20ဘၣ်တဘျီပှၤဒီပုၢ်ဝဲၢ်အိၣ်နွံဂၤထဲအပိာ်ခွါလီၤ. အဒိၣ်ကတၢၢ်တဂၤဟံးန့ၢ်အမါဒီးသံဝဲ, ဒီးဖိလံၤတအိၣ်နီတဂၤဘၣ်. 21အန့ၣ်ဒီး, အဒီပုၢ်ဝဲၢ်ခံဂၤတဂၤဟံးန့ၢ်ပိာ်မုၣ်န့ၣ်ဝံၤသံဝဲ, ဒီးဖိလံၤတအိၣ်နီတဂၤဘၣ်. တၢ်မၤအသးဒီးအဒီပုၢ်ဝဲၢ်သၢဂၤတဂၤမ့ၢ်တမံၤဃီ, 22ဒီးတၢ်မၤအသးဒီးအဒီပုၢ်ဝဲၢ်လၢအိၣ်တ့ၢ်အဂၤတဖၣ်မ့ၢ်တၢ်တမံၤ ဃီစ့ၢ်ကီးန့ၣ်လီၤ. အဒီပုၢ်ဝဲၢ်နွံဂၤလၢာ်ဟံးန့ၢ်ပိာ်မုၣ်တဂၤဃီန့ၣ်ဝံၤ သံဝဲဒီးဖိလံၤတအိၣ်တ့ၢ်နီတဂၤဘၣ်န့ၣ်လီၤ. လၢခံကတၢၢ်ပိာ်မုၣ်န့ၣ်သံဝဲစ့ၢ်ကီးလီၤ. 23တုၤမုၢ်နံၤလၢပှၤသံတဖၣ်ဂဲၤဆၢထၢၣ်သမူထီၣ်က့ၤန့ၣ်, အဝဲဒၣ်ကမ့ၢ်ပှၤဖဲလဲၣ်တဂၤအမါလဲၣ်. အဝဲသ့ၣ်နွံဂၤလၢာ်ဟံးန့ၢ်တ့ၢ်အီၤလီၤ.”
24ယ့ၣ်ၡူးစံးဘၣ်အဝဲသ့ၣ်, “သုစံးတၢ်န့ၣ်မ့ၢ်အကမၣ်ဒ်လဲၣ်န့ၣ်မ့ၢ်သုသ့ၣ်ညါစ့ၢ်ကီး ဧါ. အဂ့ၢ်မ့ၢ်လၢတၢ်ကွဲးအသးစီဆှံသုတသ့ၣ်ညါဘၣ်, ဒီးယွၤအစိကမီၤအိၣ်ဒ်လဲၣ်န့ၣ်သုတသ့ၣ်ညါဘၣ်အဃိလီၤ. 25အဂ့ၢ်ဒ်လဲၣ်န့ၣ်, တုၤပှၤသံတဖၣ်ဂဲၤဆၢထၢၣ်သမူထီၣ်က့ၤဒီး, ပှၤတန့ၢ်မါန့ၢ်ဝၤလၢၤဘၣ်ဒီးတၢ်ဒိးတ့ဒိးဖျီလိာ်သးတအိၣ် လၢၤဘၣ်. 26မ့မ့ၢ်တခီန့ၣ်, ပှၤကအိၣ်မူဒ်မူခိၣ်ကလူးတဖၣ်အသိးန့ၣ်လီၤ. တၢ်ဂ့ၢ်ဘၣ်ဃးပှၤသံတဖၣ်ဘၣ်တၢ်ဒုးဂဲၤဆၢထၢၣ်က့ၤအီၤန့ၣ်, မ့ၢ်သုတဖးဘၣ်လၢလံာ်မိၤၡ့အပူၤတၢ်ကွဲးတတီၤလၢအစံး တၢ်ဘၣ်ဃးတၤဆှုၣ်တပှီာ်တလိၣ် လၢမ့ၣ်အူအီၣ်အီၤအဂ့ၢ်န့ၣ်နီတဘျီဘၣ်ဧါ. လၢတၢ်ကွဲးဖဲန့ၣ်အပူၤကစၢ်ယွၤစံးဘၣ်စီၤမိၤၡ့, ‘ယမ့ၢ်စီၤအၤဘြၤဟၣ်အကစၢ်ယွၤ, စီၤအံၤစဲး အကစၢ်ယွၤဒီးစီၤယၤကိာ်အကစၢ်ယွၤလီၤ.’ 27အဝဲဒၣ်မ့ၢ်ပှၤမူဝဲတဖၣ်အကစၢ်ယွၤ, ဒီးတမ့ၢ်ဘၣ်ပှၤသံတဖၣ် အယွၤဘၣ်. သုတၢ်န့ၣ်ကမၣ်န့ၢ်သုဒိၣ်ဒိၣ်ကလဲာ်လီၤ.”
တၢ်မၤလိာ်အဒိၣ်ကတၢၢ်တထံၣ်
(မး. ၂၂:၃၄-၄၀; လူၤ. ၁၀:၂၅-၂၈)
28အကတီၢ်ဖဲန့ၣ်ပှၤသ့တၢ်ဘူၣ်တၢ်ဘါအတၢ်သိၣ်တၢ်သီ တဂၤအိၣ်ဖဲပှၤသ့ၣ်တဖၣ်အကျါ, ဒီးနၢ်ဟူအဝဲသ့ၣ်ဂ့ၢ်လိာ်ဘှီလိာ်အသးတဂၤဒီးတဂၤန့ၣ်လီၤ. ထံၣ်ဝဲလၢယ့ၣ်ၡူးစံးဆၢက့ၤပှၤစးဒူၤကဲတဖၣ်သ့ဂ့ၤမး သတးဒီးဟဲဝဲဆူအအိၣ်ဒီးသံကွၢ်အီၤ, “တၢ်မၤလိာ်အဒိၣ်ကတၢၢ်မ့ၢ်ဖဲလဲၣ်တထံၣ်လဲၣ်.”
29ယ့ၣ်ၡူးစံးဆၢက့ၤအီၤ, “တၢ်မၤလိာ်အဒိၣ်ကတၢၢ်မ့ၢ်အအံၤ, ‘ကနၣ်တက့ၢ်. သုဝဲပှၤအံၣ်စရ့လးဖိသ့ၣ်ဧၢ, ကစၢ်လၢအမ့ၢ်ပယွၤန့ၣ်မ့ၢ်ကစၢ်ထဲတဂၤဧိၤလီၤ. 30ဒီးသုဘၣ်အဲၣ်သုယွၤသုကစၢ်ယွၤလၢသုသးဒီဖျၢၣ်ညါ, လၢသုသူၣ်ကံၢ်သးလဲ, လၢသုတၢ်ကူၣ်တၢ်ဆးတုၤအလၢာ်, ဒီးသုဂံၢ်သုဘါခဲလၢာ်လီၤ.’ 31တၢ်မၤလိာ်အဒိၣ်ကတၢၢ်ခံထံၣ်တထံၣ်မ့ၢ်အအံၤလီၤ. သုဘၣ်အဲၣ်ပှၤဂၤဒ်သုအဲၣ်လီၤသုသးဒၣ်သုဝဲအသိးန့ၣ်လီၤ. တၢ်မၤလိာ်အဂၤလၢအဒိၣ်န့ၢ်တၢ်ခံထံၣ်အံၤတအိၣ်ဘၣ်.”
32ပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဂၤန့ၣ်စံးဘၣ်ယ့ၣ်ၡူး, “သရၣ်ဧၢ, နစံးတၢ်န့ၣ်ဘၣ်ဂ့ၤမးလီၤ. နစံးလၢထဲယွၤတဂၢၤဧိၤမ့ၢ်ကစၢ်ယွၤန့ၣ်မ့ၢ်တၢ်ကတိၤအမ့ၢ် အတီလီၤ. ယွၤအဂၤတအိၣ်နီတဂၤဘၣ်. 33ပှၤကညီတဂၤမ့ၢ်အဲၣ်ကစၢ်ယွၤလၢအသးဒီဖျၢၣ်ညါ, လၢအတၢ်ကူၣ်တၢ်ဆးတုၤအလၢာ်, ဒီးလၢအတၢ်ဂံၢ်တၢ်ဘါခဲလၢာ်, ဒီးမ့ၢ်အဲၣ်ပှၤကညီကဒဲကဒဲဒီးအီၤဒ်အအဲၣ်လီၤအသးဒၣ်ဝဲန့ၣ်, မ့ၢ်တၢ်အဂ့ၤဒိၣ်န့ၢ်ဒံးတၢ်လုၢ်မ့ၣ်အူလၢအမ့ၢ်တၢ်လုၢ်ဆၣ်ဖိကီၢ်ဖိဒီဒု, ဒီးတၢ်လုၢ်အဂၤတဖၣ်ခဲလၢာ်တက့ၢ်လီၤ.”
34ယ့ၣ်ၡူးထံၣ်ဘၣ်ဝဲလၢပှၤတဂၤအတၢ်စံးဆၢအံၤအိၣ်ဒီးတၢ်ကူၣ် သ့သတးဒီးစံးဘၣ်အီၤ, “နတယံၤဘၣ်ဒီးကစၢ်ယွၤအဘီအမုၢ်ဘၣ်.” အန့ၣ်ဝံၤအလီၢ်ခံပှၤသံကွၢ်ယ့ၣ်ၡူးလၢတၢ်သံကွၢ်တဘူၣ်လၢၤနီတဂၤဘၣ်.
တၢ်သံကွၢ်ဘၣ်ဃးခရံာ်
(မး. ၂၂:၄၁-၄၆; လူၤ. ၂၀:၄၁-၄၄)
35ဖဲယ့ၣ်ၡူးသိၣ်လီၤသီလီၤတၢ်လၢတၢ်လုၢ်ဟံၣ်ပူၤအကတီၢ်န့ၣ်, သံကွၢ်ဝဲတၢ်သံကွၢ်တထံၣ်, “ပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဖၣ်စံးဝဲလၢ ခရံာ်မ့ၢ်စီၤဒၤဝံးအစၢၤအသွဲၣ်လီၤန့ၣ်, မ့ၢ်အစံးဝဲသ့ဒ်လဲၣ်. 36စီၤဒၤဝံးအကစၢ်ဒၣ်ဝဲန့ၣ်သးစီဆှံထိးဘၣ်အသးဒီးစံးဝဲ,
‘ယွၤစံးဘၣ်ယကစၢ်,
ဆ့ၣ်နီၤလၢယစုထွဲတခီ,
တုၤယဒုးအိၣ်နဒုၣ်နဒါတဖၣ်လၢ
နခီၣ်ညါသးအဖီလာ်တစုတက့ၢ်.’
37စီၤဒၤဝံးအကစၢ်ဒၣ်ဝဲကိးအီၤလၢ ‘ကစၢ်’ သတးဒီး, အကစၢ်န့ၣ်ကကဲလၢအစၢၤအသွဲၣ်တခီကသ့ဒ်လဲၣ်.”
ယ့ၣ်ၡူးဟ့ၣ်ပလီၢ်တၢ်ဘၣ်ဃး ပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဖၣ်
(မး. ၂၃:၁-၃၆; လူၤ. ၂၀:၄၅-၄၇)
ပှၤဂီၢ်မုၢ်ဖးဒိၣ်ဒိကနၣ်ယ့ၣ်ၡူးအတၢ်သိၣ်လီၤသီလီၤပှဲၤ ဒီးတၢ်သူၣ်ဖှံသးညီလီၤ. 38လၢအတၢ်သိၣ်လီၤသီလီၤတၢ်အပူၤယ့ၣ်ၡူးစံးဝဲ, “ပလီၢ်သုသးလၢ ပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဖၣ်န့ၣ်တက့ၢ်. အဝဲသ့ၣ်မိၣ်ဟးထီၣ်ဟးလီၤသး, သိးဒီးဆ့ကၤဖီခိၣ်ဖးထီ, ဒီးလၢဖၠါပူၤန့ၣ်အဲၣ်ဒိးဝဲလၢပှၤကကတိၤဒိၣ်အဝဲသ့ၣ်လၢတၢ် ယူးယီၣ်ပာ်ကဲအပူၤန့ၣ်လီၤ. 39လၢဘူၣ်ဘျီၣ်လၢအမ့ၢ်တၢ်ဘါလီၢ်တဖၣ်အပူၤန့ၣ်အဝဲသ့ၣ်အဲၣ်ဒိး န့ၢ်ဘၣ်တၢ်လီၢ်အဂ့ၤကတၢၢ်, ဒီးလၢတၢ်အီၣ်အမူးပူၤန့ၣ်အဲၣ်ဒိးန့ၢ်ဘၣ်တၢ်လီၢ်လၢ ပှၤပာ်လီၤဆီတဖၣ်န့ၣ်လီၤ. 40အဝဲသ့ၣ်ဂုာ်ဆူၣ်ပျိဆူၣ်မုၣ်ကမဲတဖၣ်အဟံၣ်ဒီးအစုလီၢ်ခီၣ် ခိၣ်, ဒီးပာ်မၤအသးဒ်အမ့ၢ်ပှၤဂ့ၤပှၤဝါအသိးခီဖျိတၢ်ဃ့ထု ကဖၣ်တၢ်ထီထီကလဲာ်န့ၣ်လီၤ. လၢမုၢ်စံၣ်ညီၣ်အနံၤန့ၣ်အဝဲသ့ၣ်ကဘၣ်တၢ်စံၣ်ညီၣ်အီၤနးန့ၢ် ပှၤဂၤတက့ၢ်န့ၣ်လီၤ.”
မုၣ်ကမဲတဂၤအတိၢ်မၤဘူၣ်
(လူၤ. ၂၁:၁-၄)
41ယ့ၣ်ၡူးဆ့ၣ်နီၤဝဲဖဲပှၤဒၢနုာ်တိၢ်မၤဘူၣ်အလီၢ်အမဲာ်ညါလိၤ လိၤအဖၢမုၢ်န့ၣ်, ထံၣ်ပှၤတဖၣ်ဒၢနုာ်အတိၢ်မၤဘူၣ်လၢတၢ်မၤဘူၣ်အတလါတဖၣ်ပူၤ လီၤ. ပှၤထူးပှၤတီၤအါဂၤဒၢနုာ်တိၢ်အါအါကလဲာ်လီၤ. 42အန့ၣ်ဝံၤမုၣ်ကမဲလၢအဖှီၣ်တဂၤဟဲဒီးဒၢနုာ်လီၤဝဲတိၢ်ဂီၤ မဲာ်ဖိခံဘ့ၣ်လၢအလီၤလၢတိၢ်တဘ့ၣ်န့ၣ်လီၤ. 43ယ့ၣ်ၡူးကိးဃီၤအပျဲၢ်အဘီၣ်တဖၣ်ဒီးစံးဘၣ်အဝဲသ့ၣ်, “ယစံးဘၣ်သုတီတီလီၤ. မုၣ်ကမဲလၢအဖှီၣ်တဂၤအံၤဒၢနုာ်တိၢ်မၤဘူၣ်လၢတလါအပူၤ အါန့ၢ်ပှၤအဂၤတဖၣ်ခဲလၢာ်တက့ၢ်လီၤ. 44အဂ့ၢ်ဒ်လဲၣ်န့ၣ်, အဝဲသ့ၣ်တဖၣ်ဟ့ၣ်မၤဘူၣ်လီၤဒၣ်အတၢ်အိၣ်ဘျဲၣ် အိၣ်စဲၢ်လီၤ. မ့မ့ၢ်ပိာ်မုၣ်တဂၤအံၤ, လၢအတၢ်ဖှီၣ်တၢ်ယာ်အပူၤဒၢနုာ်လီၤဝဲကယဲၢ်တၢ်အိၣ်ဒီးအီၤန့ၣ် ခဲလၢာ်, တၢ်လၢကလုၢ်အီၣ်အသးသမူအဂီၢ်န့ၣ်လီၤ.”
Одоогоор Сонгогдсон:
လံာ်မၢ်ကူး 12: KSWC
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Sgaw Karen Common Bible © Bible Society of Myanmar, 1992.