လံာ်မၢ်ကူး 13
13
ယ့ၣ်ၡူးစံးကတိၤတၢ်ဘၣ်ဃး တၢ်လုၢ်ဟံၣ်ကဘၣ်တၢ်မၤလီၤပှီၢ်ကွံာ်အီၤ
(မး. ၂၄:၁-၂; လူၤ. ၂၁:၅-၆)
1ဖဲယ့ၣ်ၡူးဟဲက့ၤထီၣ်လၢတၢ်လုၢ်ဟံၣ်ပူၤအကတီၢ်န့ၣ်, အပျဲၢ်အဘီၣ်အကျါတဂၤစံးဘၣ်အီၤ, “ကွၢ်တက့ၢ်, သရၣ်ဧၢ, လၢၢ်သ့ၣ်တဖၣ်ဒီးတၢ်သူၣ်ထီၣ်သ့ၣ်တဖၣ်မ့ၢ်တၢ်လၢ အလီၤဘီလီၤမုၢ်မးလဲၣ်.”
2ယ့ၣ်ၡူးစံးဆၢက့ၤအီၤ, “နထံၣ်နဲတၢ်သူၣ်ထီၣ်အဒိၣ်အမုၢ်တဖၣ်အံၤစ့ၢ်ကီးဧါ. လၢၢ်တဖၣ်အံၤတၢ်ကမၤလီၤပှီၢ်ကွံာ်အီၤခဲလၢာ်, ဒီးကအိၣ်စဲဘူးလိာ်အသးခံဖျၢၣ်တပူၤဃီဒၣ်လဲာ်န့ၣ်တအိၣ်လၢၤ နီတပူၤဘၣ်.”
တၢ်ကီတၢ်ခဲဒီးတၢ်မၤနးမၤဖှီၣ်တဖၣ်
(မး. ၂၄:၃-၁၄; လူၤ. ၂၁:၇-၁၉)
3ဖဲယ့ၣ်ၡူးဆ့ၣ်နီၤဝဲလၢကစၢၢ်သ့ၣ်စၤယံးအဒီခိၣ်ဒီးကွၢ်ဃီၤ တၢ်ဆူတၢ်လုၢ်ဟံၣ်အကတီၢ်န့ၣ်, စီၤပ့းတရူး, စီၤယၤကိာ်, စီၤယိၤဟၣ်, ဒီးစီၤအၣ်ဒရ့းတဖၣ်သံကွၢ်အီၤကစုဒု, 4“တၢ်လၢနစံးနဲတမံၤန့ၣ်ကမၤအသးအကတီၢ်ဖဲလဲၣ်ဒီးတၢ်ပနီၣ်လၢ ကဒုးသ့ၣ်ညါပှၤတၢ်ဆၢကတီၢ်လၢတၢ်ခဲလၢာ်အံၤကမၤအသးန့ၣ် မ့ၢ်မနုၤတဖၣ်လဲၣ်. စံးဘၣ်တဲဘၣ်ပှၤတက့ၢ်.”
5ယ့ၣ်ၡူးစံးဘၣ်အဝဲသ့ၣ်, “ပလီၢ်သုသးတက့ၢ်. သုတပျဲပှၤလီန့ၢ်သုနီတဂၤတဂ့ၤ. 6ပှၤအါဂၤကဟဲဒီးကမၤအသးဒ်အမ့ၢ်ယၤအသိးဒီးကစံးဝဲလၢအမ့ၢ် ခရံာ်ဒီးကလီန့ၢ်လွဲန့ၢ်ပှၤအါဂၤအသးလီၤ. 7ဒီးတုၤသုနၢ်ဟူဘၣ်တၢ်ဒုးတၢ်ယၤသီၣ်ထီၣ်သဲထီၣ်ဖဲတၢ်လီၢ် ဘူးဒီးသု, ဒီးသုမ့ၢ်န့ၢ်ဘၣ်တၢ်ကစီၣ်လၢတၢ်ဒုးတၢ်ယၤအိၣ်ထီၣ် စ့ၢ်ကီးလၢအယံၤန့ၣ်, သုတသူၣ်ကိၢ်သးဂီၤတဂ့ၤ. တၢ်တဖၣ်အံၤကဘၣ်မၤအသး, ဘၣ်ဆၣ်တမ့ၢ်ဒံးတၢ်အစိၤကတၢၢ်ဘၣ်. 8ပှၤကလုာ်တဖၣ်ကဂဲၤဆၢထၢၣ်ထီဒါလိာ်အသး တကလုာ်ဒီး တကလုာ်, ဒီးထံကီၢ်ဘီမုၢ်တဖၣ်ကဒုးလိာ်အသးတဘီမုၢ်ဒီး တဘီမုၢ်လီၤ. ဟီၣ်ခိၣ်ကဟူးဝးဝဲလၢတၢ်လီၢ်သကုၤဆးဒး, ဒီးတၢ်သၣ်ဝံၤလီၤဒိတဖၣ်ကအိၣ်စ့ၢ်ကီးဝဲလီၤ. တၢ်တဖၣ်အံၤမ့ၢ်တၢ်နးတၢ်ဖှီၣ်အခီၣ်ထံးန့ၣ်လီၤ.
9ကစၢ်ဒၣ်သုဝဲ, သုဘၣ်ပလီၢ်သုသးလီၤ. တၢ်ကဖီၣ်သုဒီးတၢ် ကဆှၢထီၣ်သုဆူသူၣ်က့သးပှၢ်အခိၣ်အနၢ်တဖၣ်အမဲာ်ညါလီၤ. သုကဘၣ်တၢ်ဒိတၢ်တီၢ်သုလၢဘူၣ်ဘျီၣ်လၢအမ့ၢ်တၢ်ဘါ အလီၢ်တဖၣ်အပူၤလီၤ. လၢယဃိသုကဘၣ်အိၣ်ဆၢထၢၣ်လၢကီၢ် ပဒိၣ်ဖးဒိၣ်ဒီးစီၤပၤတဖၣ်အမဲာ်ညါလၢတၢ်ကစံၣ်ညီၣ်သုအဂီၢ်, ဒီးသုကကဲထီၣ်ပှၤအုၣ်အသးတဖၣ်လၢအဝဲသ့ၣ်အမဲာ်ညါလီၤ. 10ဘၣ်ဆၣ်ဒီးတချုးတၢ်အကတၢၢ်ဟဲတုၤဒံးဘၣ်န့ၣ်, အလီၢ်အိၣ်လၢပှၤကဘၣ်ဒုးဟူထီၣ်သါလီၤတၢ်သးခု ကစီၣ်လၢပှၤကိးကလုာ်ဒဲးလီၤ. 11ဒီးတဘျီလၢ်လၢ်ဖဲတၢ်ဖီၣ်သုဒီးတၢ်ဆှၢထီၣ်သုလၢတၢ် ကစံၣ်ညီၣ်သုအဂီၢ်န့ၣ်, သုကဘၣ်စံးဘၣ်ကတိၤတၢ်မနုၤလဲၣ်န့ၣ်သုတဘၣ်သူၣ်ကိၢ်သးဂီၤဆိ ပာ်တဂ့ၤ. မ့မ့ၢ်တုၤအဆၢကတီၢ်ဘၣ်ဒီး, ကတိၤတၢ်ကတိၤလၢတၢ်ဟ့ၣ်သုဖဲအကတီၢ်န့ၣ်တက့ၢ်. အဂ့ၢ်ဒ်လဲၣ်န့ၣ်တမ့ၢ်သုကတိၤသုတၢ်ကတိၤဒၣ်ဝဲဘၣ်. သုတၢ်ကတိၤတဖၣ်ဟဲလၢသးစီဆှံတခီလီၤ. 12ဒီပုၢ်ဝဲၢ်ကဒဲကဒဲကဟ့ၣ်လီၤကွံာ်အဒီပုၢ်ဝဲၢ်လၢတၢ်ကမၤသံ အီၤအဂီၢ်, ဒီးပၢ်တဖၣ်ကဟ့ၣ်လီၤကွံာ်အဖိတဖၣ်လၢတၢ် တမံၤဃီအဂီၢ်လီၤ. ဖိလံၤတဖၣ်ကဂဲၤဆၢထၢၣ်ထီဒါမိၢ်ပၢ် တဖၣ်ဒီးပျဲတၢ်မၤသံကွံာ်အဝဲသ့ၣ်လီၤ. 13လၢယဃိပှၤခဲလၢာ်ကသးဟ့သုလီၤ. ဘၣ်ဆၣ်ဒီးပှၤတဂၤလၢ်လၢ်လၢအအိၣ်ဂၢၢ်ကျၢၤဝဲတုၤအကတၢၢ် တစုန့ၣ်, ယွၤကအုၣ်က့ၤခီၣ်က့ၤအီၤလီၤ.
တၢ်လီၤပျံၤလီၤဖုးလၢအလီၤသးဘၣ်အၢ ဒိၣ်ဒိၣ်ကလဲာ်
(မး. ၂၄:၁၅-၂၈; လူၤ. ၂၁:၂၀-၂၄)
14သုဝဲသ့ၣ်သုကထံၣ်ဘၣ်တၢ်မၤလီၤပျံၤလီၤဖုးတၢ်လၢအလီၤ သးဘၣ်အၢဒိၣ်ဒိၣ်ကလဲာ်န့ၣ်အိၣ်ဝဲလၢတၢ်လီၢ်လၢအတကြၢး အိၣ်ဝဲဘၣ်န့ၣ်လီၤ. (ပှၤဖးတၢ်ဖိတဂၤကဘၣ်နၢ်ပၢၢ်တၢ်တမံၤအံၤ အခီပညီသပှၢ်ကတၢၢ်လီၤ.) အန့ၣ်တစုပှၤအိၣ်လၢကီၢ်ယူဒၤပူၤ တဖၣ်ကဘၣ်ဃ့ၢ်ပူၤဖျဲးအသးဆူကစၢၢ်ကလိတဖၣ်အကျါလီၤ. 15ပှၤတဂၤလၢအအိၣ်လၢအဟံၣ်ခိၣ်ဒုးအဖီခိၣ်န့ၣ်, တဘၣ်က့ၤနုာ်ဆူ အဟံၣ်ပူၤလၢကဟံးန့ၢ်တၢ်ဖိတၢ်လံၤတမံၤမံၤလၢကဃ့ၢ်စိာ်ဝဲလၢ အသိးအဂီၢ်န့ၣ်ဘၣ်. 16ပှၤတဂၤလၢအဖံးတၢ်မၤတၢ်လၢစံာ်ပျီပူၤန့ၣ်, မ်အသုတက့ၤကဒါက့ၤဆူအဟံၣ်လၢကဟံးန့ၢ်အဆ့ကၤဖီခိၣ် အဂီၢ်တဂ့ၤ. 17တုၤမုၢ်နံၤမုၢ်သီတဖၣ်ဘၣ်ဝဲဒီးပိာ်မုၣ်လၢအအိၣ်ဒီးအဟုး အသး, ဒီးမိၢ်လၢအအိၣ်ဒီးဖိဆံးအီၣ်နုၢ်ဖိတဖၣ်, ကမ့ၢ်တၢ်အကတီၢ်လၢအဖှီၣ်အနးဒိၣ်မးလၢအဝဲသ့ၣ် အဂီၢ်လီၤ. 18ဃ့ထုကဖၣ်လၢကစၢ်ယွၤဒ်သိးတၢ်သ့ၣ်တဖၣ်အံၤအသု တမၤအသးလၢတၢ်ဂိၢ်တၢ်ခုၣ်အကတီၢ်တဂ့ၤန့ၣ်တက့ၢ်. 19အဂ့ၢ်ဒ်လဲၣ်န့ၣ်, တၢ်နးတၢ်ဖှီၣ်တကလုာ်လၢမုၢ်နံၤမုၢ်သီတဖၣ်န့ၣ်ကမ့ၢ်တၢ်လၢ အနးဒိၣ်မးတကလုာ်လၢအတမၤဒံးဘၣ်အသးနီတစုလၢ ယွၤတ့လီၤပာ်လီၤတၢ်လၢထံးလၢသီတုၤလီၤလၢအခါခဲအံၤ န့ၣ်လီၤ. ဒီးတမ့ၢ်လၢတၢ်ကမၤအသးဒ်သိးအံၤနီတစုလၢၤဘၣ်. 20ကစၢ်မ့ၢ်တမၤစှၤလီၤမုၢ်နံၤမုၢ်သီတဖၣ်န့ၣ်ဘၣ်ဒီး, တမ့ၢ်လၢပှၤကတုၤဘၣ်က့ၤလၢတၢ်အုၣ်က့ၤခီၣ်က့ၤနီတဂၤ ဘၣ်. ဘၣ်ဆၣ်ဒီးပှၤလၢအဘၣ်တၢ်ဃုထၢပာ်ဝဲတဖၣ် အဂီၢ်န့ၣ်, ကမၤစှၤလီၤမုၢ်နံၤမုၢ်သီတဖၣ်န့ၣ်လီၤ.
21အန့ၣ်ဝံၤပှၤတဂၤဂၤမ့ၢ်စံးဘၣ်နၤ, ‘ကွၢ်တက့ၢ်, ခရံာ်ကစၢ်အိၣ်လၢအံၤ’ မ့တမ့ၢ်ဘၣ်ဒီးမ့ၢ်စံးဘၣ်နၤ, ‘ကွၢ်တက့ၢ်, ခရံာ်ကစၢ်အိၣ်လၢန့ၣ်’ ဒီး, နာ်အီၤတဂ့ၤ. 22အဂ့ၢ်ဒ်လဲၣ်န့ၣ်, ခရံာ်အဘျၣ်ဒီးဝံအဘျၣ်တဖၣ်ကဟဲပၢၢ်ထီၣ်, ဒီးကဒုးနဲၣ်ပှၤလၢတၢ်ပနီၣ်လီၤဆီအါမံၤဒီးကမၤတၢ်လီၤလး တဖၣ်ဒ်သိးမ့ၢ်သ့ဒီးကလီန့ၢ်လွဲန့ၢ်ကစၢ်ယွၤအပှၤဃုထၢဖိ တဖၣ်ဒၣ်လဲာ်န့ၣ်လီၤ. 23ပလီၢ်သုသးတက့ၢ်. တချုးတၢ်တဖၣ်အံၤမၤဒံးအသးဘၣ်ဒီး, ယတဲပလီၢ်တ့ၢ်သုတၢ်ကိးမံၤဒဲးလံ.
ပှၤကညီဖိခွါကဟဲဝဲ
(မး. ၂၄:၂၉-၃၁; လူၤ. ၂၁:၂၅-၂၈)
24မုၢ်နံၤမုၢ်သီတဖၣ်လၢတၢ်နးတၢ်ဖှီၣ်ဘၣ်ပှၤဝံၤအလီၢ်ခံန့ၣ်, မုၢ်ကခံးလီၤကွံာ်ဒီးလါအတၢ်ကပီၤကလီၤမၢ်ကွံာ်, 25ဆၣ်အိၣ်လၢမူကပိာ်လိၤတဖၣ်ကလီၤတဲာ်ဒီးတၢ်အစိ အကမီၤအိၣ်လၢမူကပိာ်လိၤတဖၣ်ကဘၣ်တၢ်မၤဟူးဝး ဆှဲးဆှိးအီၤလီၤ. 26တုၤနုၤတစုပှၤကထံၣ်ဘၣ်ပှၤကညီဖိခွါဟဲလီၤဝဲလၢတၢ် အၢၣ်တဖၣ်အကျါ, အိၣ်ဒီးတၢ်စိဒိၣ်ကမီၤဒိၣ်ဒီးတၢ်လၤ တၢ်ကပီၤန့ၣ်လီၤ. 27အဝဲဒၣ်ကမၢလီၤမူခိၣ်ကလူးတဖၣ်လၢကလဲၤဒီးကိးဖှိၣ်က့ၤ ကစၢ်ယွၤအပှၤဃုထၢဖိတဖၣ်အိၣ်လၢကလံၤထံးဒီးကလံၤစိး, လၢမုၢ်ထီၣ်ဒီးလၢမုၢ်နုာ်, လၢဟီၣ်ခိၣ်အကတၢၢ်ပၢၢ်တုၤလၢမူခိၣ်အကတၢၢ်န့ၣ်လီၤ.
တၢ်မၤလိလၢချၢၣ်ဒၢအအိၣ်
(မး. ၂၄:၃၂-၃၅; လူၤ. ၂၁:၂၉-၃၃)
28ဟံးန့ၢ်မၤလိတၢ်လၢချၢၣ်ဒၢအအိၣ်န့ၣ်တက့ၢ်. တုၤအဒ့တဖၣ်ဒိးစၢ်ထီၣ်ဒီးအလၣ်တဖၣ်ဟဲထီၣ်လံန့ၣ်, သုသ့ၣ်ညါလၢတၢ်ကိၢ်ခါအကတီၢ်ကဘၣ်ဘူးထီၣ်လံန့ၣ်လီၤ. 29ဒ်န့ၣ်အသိး, တုၤသုထံၣ်ဘၣ်တၢ်တဖၣ်အံၤမၤအသးဒီး, သုဘၣ်သ့ၣ်ညါလၢတၢ်ဆၢကတီၢ်ကဘၣ်ဘူးထီၣ်လံ. 30ယတဲသုသပှၢ်ကတၢၢ်လီၤ. တချုးလၢပှၤတစိၤအံၤသံဝဲခဲလၢာ်န့ၣ်, တၢ်သ့ၣ်တဖၣ်အံၤကမၤအသးလီၤ. 31မူခိၣ်ဒီးဟီၣ်ခိၣ်အစိၤကကတၢၢ်ကွံာ်ဝဲဒၣ်, ဘၣ်ဆၣ်ဒီးယတၢ်ကတိၤတဖၣ်ကအိၣ်ဂၢၢ်ဆိးကျၢၤလီၤစိၤလီၤထီလီၤ.
မုၢ်နံၤမုၢ်သီဒီးအဆၢကတီၢ်နၣ်ရံၣ်န့ၣ် ပှၤတသ့ၣ်ညါနီတဂၤဘၣ်
(မး. ၂၄:၃၆-၄၄)
32မ့မ့ၢ်တၢ်တဖၣ်အံၤကမၤအသးအမုၢ်နံၤမုၢ်သီအဆၢကတီၢ်နၣ်ရံၣ် န့ၣ်, ပှၤတသ့ၣ်ညါနီတဂၤဘၣ်. ကလူးလၢမူခိၣ်တဖၣ်မ့ၢ်ဂ့ၤ, ဖိခွါမ့ၢ်ဂ့ၤတသ့ၣ်ညါဝဲဘၣ်. ပှၤသ့ၣ်ညါတၢ်အံၤမ့ၢ်ထဲပၢ်တဂၤဧိၤလီၤ. 33ပလီၢ်သုသးတက့ၢ်. အိၣ်ကတီၤသးဒီးထုကဖၣ်တက့ၢ်. အဂ့ၢ်ဒ်လဲၣ်န့ၣ်, တၢ်ကမၤအသးအဆၢကတီၢ်ကဘၣ်ခဲလဲၣ်န့ၣ်သု တသ့ၣ်ညါဘၣ်. 34တၢ်မၤအသးအံၤလီၤဂာ်ဒီးပှၤတဂၤလၢအဟးထီၣ်လၢ အဟံၣ်ဒီးလဲၤတၢ်န့ၣ်လီၤ. ပာ်တ့ၢ်တၢ်ခဲလၢာ်လၢအခ့အပှၤတဖၣ် အစုပူၤ, ဒီးတဂၤစုာ်စုာ်ဟ့ၣ်ဝဲမူဒါလၢကဘၣ်မၤဝဲအဂီၢ်, ဒီးမၤလိာ်တ့ၢ်ပှၤပၢၤကျဲစၢၤတဂၤန့ၣ်ဒ်သိးအကဆိးသီဝဲ အဂီၢ်န့ၣ်လီၤ. 35လၢတၢ်န့ၣ်အဃိဆိးသီတက့ၢ်. အဂ့ၢ်ဒ်လဲၣ်န့ၣ်ဟံၣ်ကစၢ်ကဟဲက့ၤအကတီၢ်ဖဲလဲၣ်, လၢဟါခီ, လၢဖးဖီမုၢ်, လၢဆီဖါအိၣ်အိအကတီၢ်, လၢမုၢ်ဆ့ၣ်ထီၣ်ဧါန့ၣ်, သုတသ့ၣ်ညါသုဝဲဘၣ်. 36ဟံၣ်ကစၢ်မ့ၢ်ဟဲက့ၤဝဲသတူၢ်ကလာ်ဒီး, ကထံၣ်န့ၢ်ဘၣ်ဖုးသုမံသပ့ၤဘၣ်သုသးလီၤ. 37တၢ်လၢယစံးဘၣ်သုအံၤမ့ၢ်ယစံးဘၣ်ပှၤကိးဂၤဒဲးလီၤ. ဆိးသီတက့ၢ်.”
Одоогоор Сонгогдсон:
လံာ်မၢ်ကူး 13: KSWC
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Sgaw Karen Common Bible © Bible Society of Myanmar, 1992.