Imilimo 5
5
E Ananiya nu Safira
1Kwalinji umuntu wumwi wino izina lyakwe walinji we Ananiya, wino umuchi witwanga ilyakwe Safira. Akazya insawo yawo yimwi, 2ukuwa afunchizya indalama zimwi azisyala azyakwe, numuchinye wamanyile, atwala indalama zimwi kuwapostile. 3Peter amunena ati, Ananiya, Ngamuno chani chino waleka Satana winjila mumwezo wako ukuti uwawipa uwufi ku Muzimu Mwimichile pakufunchizya indalama zimwi zino wazanile kwevino walinji navyo? 4Pano wachilinji ukukazya insawo yako vyalinji avyako, napano wakazya indalama zyalinji azyako. Ngafwandi amuno chani, chino wayipanzizye mumwezo wako ukuti uchite chonye-choo? Utawifile awantu-ukuwa we Leza! 5Ala Ananiya wivwa amazwinye yayo apona ichikazile, afwa; nawonsi wane wivwile chochonye intete aziwalema. 6Ngapano awalumendo awaya mwenemo, awavwimbilichizya ichala, awamusenda awaya awamuzika.
7Akula kwela kwapita impindi ntichi. umuchi aya ayinjila, atamanyile chino chaponile. 8Peter amunena ati, Nena, Wuzye zyonye-zyoo ampela azili ndalama zino mwapochelezile nuwakwako kunsawo yinu yino mwakazizye?
Atolelela ati, Azyonye-zyoo.
9Achaleka Peter amunena ati, Ngamuno chani chino wewe ponga numwakwako mwapanzinie ukwelezya Umuzimu wa Mfumu? Awantu wane wafuma mukuzika wakwako wachili wali pamulyango, nawenye wandi wakusende. 10Napaponapapo apona pamanama yakwe Peter afwa. Awalumendo awinjila mwenemo awazana afwile, achaleka awamusenda awaya awamuzika pambali numulume. 11Iklezia lyonsi nawantu wanji wane wavwile chochonye awawa nintete.
Ivyamayele nivizungusyo
12Ivyamayele nivizungusyo vivule avilanga vikuchitwa muwantu nawapostile. Awasuwizi wonsi wawungananga iwumba lyonga mwipembo lyakwe Solomoni. 13Awantu wanji awavye watayanga kukuyisanzya kuwasuwizi, chingatenga awantu wawawanzyanga. 14Ukuwa awantu wavule wayisanzyanga kuwasuwizi—awonsi nawanachi wano wasuwizile mu Mfumu. 15Muno amilimo yino awapostile wachitanga, awantu awatwala awalwale mumisolo awawalambalika pavitala, alyakuti pano Peter akupita, ichizyungani chakwe chiwile wamwi. 16Amawumba yawantu ayaya kweneko ayafuma mutwaya tuna twaliwilizya Yerusalemu, awatwala awalwale wawo wane walwile imizimu miwipe; awapozwa wonsi.
Awayimvya awapostile
17Ukuwa simapepo mukulu nawonsi wane walinji nawe, awamupanda wawa Saduki, awachitila awapostile uwuzuwa: awapanzyania ichakuwachita. 18Awalema awapostile awawiyalila muvingololo. 19Ukuwa uwusikunye wowo umungeli wa Mfumu aya ayiyula ivisakati vyang'anda yavingololo, afumizya awapostile kunzi, awanena ati, 20Yanji mukimilile mung'anda yakupepela, mukanene awantu vyonsi ivyawumi wupyanye woo. 21Awapostile awatontela amazwi yano umungeli wawanenile, akula kwacha awinjila mung'anda yakwe Leza awatalika ukusambilizya.
E simapepo mukulu nawonsi wane walinji nawe awita wakapanzya wawa Yuda wonsi ukuti wakawungane; nga awakomelezya ukufumya awapostile mung'anda yavingololo watwalwe kuno wasongo wawungine. 22Ukuwa awala awasilikali waya kweneko, awaya awazan a awapostile nawamwi mung'anda yavingololo: achaleka awaya awalongola kwiwungwe. Awati, 23Tulile pano twafika pang'anda yavingololo twazana apiyale nawakalindilila wali pazyampongolo; ukuwa tulile pano twiyula ivisakati twazana mukasi musi wumwi! 24Ala musika mukulu wakwe wakalindilila wang'anda yakwe Leza nawasimapepo wakulu wivwa chochonye, awazunguka chino chaponezile awapostile. 25Ngapano akuya wumwi aya awanena ati, Teyelezyani! Awantu wane mwiyalizile mung'anda yavingololo wawo wimilile mung'anda yakwe Leza wakusambilizya awantu! 26Nga musika nawantu wakwe awaya awasenda awapostile awawanyosya. Ukuwa nanti kuwapatichizya, muno watinanga wakuti nche awantu wangawapola namawe.
27Awala wawatwala awawimilika pankolelo piwumba, nga simapepo mukulu awawawuzya amawuzyo. 28Ati, Twawachinyintizizye nkaninye ukuti mutize mukasambilizyange mwizina lyamuntu wee, ukuwa silolani chino mwachita! Ukusambilizya kwinu kwakwila mwe Yerusalemu wensi, mukasi muti asweswenye twaleka Yesu wukomwa!
29E Peter nawapostile wawuye awatolelela awati, Twazipila ukutontela Leza, awantu pole. 30E Leza wakwe watata wazyulupuzile Yesu, pano mwamukoma mwamupamantila pawuchingane. 31Leza wamuzyulupuzile amuwika kwikasa lyakwe ilyandilo ukuti wenankolelo swinya Katula, ukuletela awa Israeli ulongo ukuti watontolokwe ngawize watetelwe kuluwembu lwawo. 32Sweswenye swewakalola kuvintunye vyoo—sweswenye nu Muzimu Mwimichile, chino achawila chakwe Leza kwewano wakamutontela.
33Ukuwa alila iwumba lyakwe wakapanzya wivwa wowonye achiwapantila kunsingo awafulichilwa kutaluvile awapanzyania ukuti wakome awapostile. 34Ukuwa wumwi uwamwiwumba lyawo, umu Falisi wino witwanga ilyakwe Gamalieli, umusambilizya wamasundo wino wachindisilwe nawantu wonsi, ayimilila mwiwumba. Akomelezya ukuti awapostile wafumile panzi, 35nga anena iwumba ati, Mwe wa Israeli, chenjelani kuvyawantunye waa kwechino mukasi muwachite. 36Kali Teuda wakatusile, ayichita kuwuntu nkaninye; nche nawantu imyanda yini (400) awamukonka. Ukuwa akomwa, nawonsi wane wamukonsile awasalangana, nachino watalisile ukuchita achilala. 37Swinya pansizi pamuntunye wee kwakatusile Yuda uwa ku Galileya mumanda yakuwalikwa impendwa yawantu; awantu wamwi awamukonka, nawenye akomwa nawano wamukonsile wonsi awasalangana. 38Achaleka kanonzi pamulandu woo, nkuwasochela, mutize muchite awantunye waa ichiwipe chimwi. Lekani wawange, amuno ndi umulimo wuno wakuchita awawuntu, wandi wuvulunganike; 39ukuwa ndi wafuma kwe Leza mwandi mupotwe. Amuno nche pamwi mungalanga mukulwisya Leza!
Iwumba alizumilizya ilango lyakwe Gamalieli. 40Awita awapostile awinjila, awawavyapula, awawachinyintizya ukuti watize wavwanjila swinya mwizina lyakwe Yesu; nga awawataya awapita. 41Awapostile awasya iwumba, mbali nichimwemwe amuno Leza walesile awakwelengulilwa muno alizina lyakwe Yesu. 42Amanda yonsi mung'anda yakwe Leza namutwaya twawantu awalanga wakusambilizya nukuwizya Ilandwe Zima ilyakwe Yesu e Mesaya.
Одоогоор Сонгогдсон:
Imilimo 5: WWN82
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Chinamwanga Bible © United Bible Societies, 1981.