Imilimo 6
6
Wakavwa munenulambali
1Pansizi, pano ukuvula kwawasambilizi akonjelezya, akupona impokoto pakasi pawa Yuda wane wavwanganga ichi Griki, nga nawa Yudanye awenecho. Awa Yuda wane wavwanganga ichi Griki awakwinuluka awati awanachi wawo awafwilwe awalume wakwiwililwa mukwa nkanwa ivyakulya vyawanda nuwanda. 2Achaleka awapostile, ikumi nawawili awita iwumba lyonsi ilyawasambilizi awawanena awati, Chisi achizima kwakwe sweswe ukulechelezya ukuwizya izwi lyakwe Leza ukuti sweswenye aswewantu tuwasunga indalama. 3Achaleka, aleni fwandi wanawitu, musole awantu munenulambali mwakwe mwemwe wane wizula nu Muzimu Mwimichile swinya wali ninjelu, awano tuwalasike pamulimonye woo. 4Ukuwa swenji tulemasye kumapepo nakumulimo wakuwizya.
5Iwumba lyonsi alisechela namazwi yano awapostile welenginie; achaleka awapostile awasola Stefano. umuntu wisuwilo wino wizula nu Muzimu Mwimichile, awasola nu Filipu, nu Prokorasi, Nikanora, Timoni, Paramena, nga nu Nikolasi, ikandi lino lyafumile ku Antioki wane wakonsile ichipepelwe cha chiYuda. 6Iwumba alitwala wanye-waa kuwapostile, awawapepela mbali nukuwika amakasa yawo pewoliwo.
7Ngapano amazwi yakwe Leza ayalanga yakunyama. Nukuvula kwawasambilizi akonjezya nkaninye mwe Yerusalemu, numupanda wukulu uwakwe wasimapepo awapochelela isuwilo.
Awalema Stefano
8Ngapano Stefano wino wapefilwe nkaninye, nu Leza amupa namaka,
awachita ivyamayele nivizungusyo vikulu muwantu. 9Ukuwa awantu wamwi awamuvulungania; wawonye walinji mwiwumba lyang'anda yakupepela ya Wanangwa (avino Iyitwanga), muno mwalinji awa Yuda wane wafumile ku Kureni na ku Alekizanderia. Wawonye apaliponga na wa Yuda wane wafumile ku Silisia na mwe Asia awapanzyania nu Stefano. 10Ukuwa Umuzimu awupa Stefano injelu zino walanga ndiwavwanga awasowa nichakuchita. 11Ngapano awalipa awantu wamwi ivilipwa vyamunkama ukuti wawati, Twivwile akuvwanjila Musa nu Leza amazwi yamisulo! 12Ngapano awavundula awantu, nawasongo, nawasambilizya wamasundo. Awaya kwe Stefano, awamulema, awamutwala kwiwungwe. 13Awimika wakalola wawufi awakumulongola ivyawufi. Awawati, Umuntu wee, akavwanjila ing'anda yitu iyakwe Leza uwonzo mbali nukukwelengula amasundo yakwe Musa. 14Amuno twamwivwile akuti e Yesu-nye wee uwakwe Nazareti alimongolania ing'anda yakwe Leza apilule nimyata yonsi yino yafumile kwe Musa! 15Wonsi wane wisile mwiwungwe awapanga Stefano naminso ukuwa awalola kuno impumi yakwe yawa ngati ampumi yamungeli.
Одоогоор Сонгогдсон:
Imilimo 6: WWN82
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Chinamwanga Bible © United Bible Societies, 1981.