Markus 12
12
Isus At Fafaskudanan sa sik Tagbilug Daga ay sat Tagtanud
(Mat. 21:33-46; Lukas 20:9-19)
1Ay Isus gfoyung sik ngay fafaskudanan sa sangay taw te, “E sik mangama natanum sik ngay wat ubas sat gamasun. Ay kanya naalad at tanuman, ay naali sasad daga at fagturisan buwadan, ay anggan naawat sik fagbantayan sanya. Ay nafatanud at tanuman sa sik ngay tagtanud ay nalo wan sa sik talun ngayayu. 2Ay nu ndasug wa sis fanrabasan, ka fag tagbilug nasugu at fanuguwan at sadi sat ngay tagtanud at tanuman laman nanbul si anya fag afud. 3Ay roro at ngay tagtanud nagamat ka fag fanuguwan, ay nafalang anya, ay nafalo yud e ubanan buwadan. 4Ay at tagbilug gdog yay nasugu sadi yak fanuguwan. Ay at ngay tagtanud nafalang at alfuyu ay nafalingun anya. 5Ay at tagbilug gdog yay fiya nasugu sadi ya fiyak fanuguwan. Ay at ngay tagtanud nafate wan. Ay ngayu yay saman ka fag tulu tagbilug nasugu, at tiba at nasugu nafalang, ay at tiba nafate. 6Ay at tagbilug e sadi yak taw, at fakesugun wa at baguwama. Ay nasugu at baguwama. Fakatanyaun, gamatangan te, ‘Labon gumalang ku baguwama.’ 7Ay roro at ngay tagtanud igsulitanan te, ‘Kanya wa takadasug at fagfonan ban daga. Bastam, nanfate watam anya laman antam wa ban at daga.’ 8Nu katanya, kanya nagamat ka fag baguwama ay nafate, ay naukas at bilug sas day tanuman wat ubas.”
9Isus nalong te, “Tain ban at tagbilug tanuman at fagbulun? Kanya nanlinggat wa fiya ka fag ngay tagtanud ay nanfate. Ay nanfatanud yay ban at tanuman sa tibak tagtanud. 10Go yam natap at marirukan sis Diyus at longan te,
‘Dewa at ngay takawat bale inlimata ka fag batu at fangawat bale,
katsi kanya tuwa fag batu at famatvngvd fagdaul at bale.
11Katanya tam Fun Diyus at fagbulun.
Ay nu nalag tam, madulawan dawdaw.’#12:11 Danyu 118:22-23. ”
12Ay ngay Udyu at ngay tagmagurang kaumsig nan-gamat Isus, anway nasaful te, “Itam wa siring at fagfatungulun at fafaskudanan.” Dewa katanya, ka fag ngay taw Udyu kalimu way sanya fag ngay taw. Ay nu katanya, nalo wan.
Go Masine manga nu Gfon Buwis sas Talun Ruma at Fun fiya fiya?
(Mat. 22:15-22; Lukas 20:20-26)
13Ay taw Udyu at ngay tagmagurang nasugu tibak Parisiyu ay anggan Erudes at ngay taw, laman nanfaskud Isus te, go sumalan at longan. 14Ay ka fag ngay taw nu ndasug, nalong sas Isus te, “Em Takamoyung, nasaful wami te, matuyan am longan. Ay di o e filian taw, ay am foyungan Diyus tuwa at ugali. Go manga sik taw nu nafon tuwa at buwis sas talun Ruma at fun fiya fiya, go katanya manga gfaning wa Muisis at longan? Ay go yaya?” 15Isus nasaful ka fag ngay taw at amatanganan te, gfanluk way. Ay katanya wayay, Isus nabalus te, “Taw ro ay fagfaskudun angku? Foni angku sik singku, nanfalag aw ayu.” 16Ay kanya nafon sik singku. Ay Isus nainto te, “Sinu at ke aninu ay at ke rirukan iste fag singku?” Ay ka fag ngay taw nabalus te, “Tam fun fiya fiya.” 17Ay Isus nalong te, “Nu katanya, foni sas fun tagsis fun. Ay foni sas Diyus tagsis Diyus.” Ay fagayu taw nadulawan daw sa at longan.
Go at Kinkate Gdog yay Gleleg?
(Mat. 22:23-33; Lukas 20:27-40)
18Sik fulan taw at ngayan taw Sadusiyu gafanud te, sik taw at kinkate wa ban gdog gleleg. Ka fag ngay taw Sadusiyu nkakbang sas Isus laman nanginto. Ay glong te, 19“Takamoyung, ebi Muisis nariruk sa antam te, sik mangama nu nkate wan, ay wa nke unga si at mangena, at masine at kinkate fadugsay fag mangama adaduwai yap sa ebi ataw at fadugsay mangena. Laman umke unga yay bilang sa ebi ataw at fadugsay at unga. 20Ebi e sik fituk mangama dugsayan. Ay at turungana nke mangena wan. Ay ka fag mangama nkate wan, wa nke unga. 21Ay sit daga tv fag fadugsay indaduwa yay fiya sanya fag mangena. Ay inkate yay fiya, wa nke unga. Ay katanya yangay anggan sat fatuluk fadugsay. 22Ay ka fag fituk sisiyan nasugfunanan wa namangenaan ka fag mangena. Ay fagayu sisiyan wa nke unga, ay inkate wan. Ay bandi anggan ka fag mangena nkate wan. 23Ay go gina ban fagayu taw gdog gleleg, sinu ban at ke mangena anway fag fituk sisiyan namangenaan wa anya?”
24Ay Isus nalong sa ka fag ngay taw Sadusiyu te, “Go wam gsaful te, at fanlonganan ay fagsalanun, wam nasaful at marirukan sis Diyus at longan ay at fagmadaragangun? 25Anway gina nadog gleleg, wa ban e gdaduwaan. Fagayu ban kata way Diyus at ngay tagfabarita sas banwa. 26Ay sa baliwas taw nu gdog yay gleleg, go yam natap Muisis at Fafil sa baliwas Diyus nu gelongan sa anya, siginan sik fun kayu sirut kalabe. Ginanya Diyus iglong te, ‘Aw wan Abrayam, ay Isaak, ay Akub at Diyus.’ 27Bundi at matean fag ngay taw at Diyus, antuwa tagleleg fag ngay taw at Diyus. Nasalan wam dawdaw.”
Diyus At Longan at Tiba Tungud
(Mat. 22:34-40; Lukas 10:25-28)
28Ay sik tagfoyung Muisis at Suguwan indasug, ay nadungug ka fag ngay taw nu garingangan. Ay ka fag tagfoyung inkakbang anway nasaful te, matuyan Isus at famalus. Ay kanya ginto sas Isus te, “Inday Muisis at longan at tiba tungud?” 29Ay Isus nabalus te, “Katatuy at tiba tungud at longan te, ‘Dungugani taw Israel. Tam Fun tam Diyus, kanya way fagsadi. 30Ay esugi am Fun am Diyus sas fagdaul am fakaumsigun. Ay sas fagdaul am amatanganan. Ay sas fagdaul am fagsafulun. Ay sas fagdaul am fagmabitsugun.’ 31Ay sit daga tv fag longan katatuy te, ‘Esugi am iba katvngvdi nu kesug o emu. We tibak longan iglabi kanya fag duwa.’ ” 32Ay ka fag tagfoyung nalong yangay sas Isus te, “Em Takamoyung, gurungan wa fiya am longan te, Diyus sadi way, we tiba. Kanya way fagsadi. 33Ay nu kesug wo tam Diyus sas fagdaul am fakaumsigun, ay sas fagdaul am amatanganan, ay sas fagdaul am fagmabitsugun, ay nu kesug wo am iba katvngvd nu kesug o emu, kanya amasine yap sa at fagbatasun fag anyun ay tiba yak anyun.” 34Ay Isus nu nasaful te, mamatanganan tuwa ka fag tagfoyung at longan, glong sa anya te, “Makbang wo nu gakafulun o sas Diyus at fagmagurangan taw.” Ay siginan ginanya we taw ganangintoun sas Isus nus di sadik fagintoun.
Sinu Tam Diyus at Nafili fag Fun?
(Mat. 22:41-46; Lukas 20:41-44)
35Ay Isus gina gfoyung sis Diyus bale, nainto sa tiba te, “Taw ro ngay tagfoyung Muisis at Suguwan at fagnalongun te, ‘Diyus at nafili fag Fun siginan way Dabid at kadagdagan?’ 36Dabid wa fiya at nalong gina at Masine fag Falad at nafaamatanganan anya te,
‘Tam Fun Diyus nalong sa ku Fun te,
Malunggungi sas faglunggungan taglabi mauseganan si ku day tigyangan,
anggan aw gfatsa am daga fagmadaragangun am ngay fabarangyan.’#12:36 Danyu 110:1.
37Taw ro fun Dabid fagnafangayanun Diyus at nafili fag Fun te, ‘Ku Fun,’ nu fun Dabid way ngap at kadagdagan?”
Isus Nafatagak sa sangay Tagfoyung Muisis at Suguwan
(Mat. 23:1-36; Lukas 11:37-54; 20:45-47)
Ay at ngay taw kaumsig dawdaw gdungugan Isus at longan. 38Ay Isus igfoyung te, “Tagaki siginan ngay tagfoyung Muisis at Suguwan, anway kanya gina glo, kaumsig nu ngaba at balukas. Ay nu glo sa tuwa swa taw laman at ngay taw at nafablang anya, gseg anya. 39Ay manga at fakaumsigun si tuwa tiba tungud fag faglunggungan nus nganday nu ndasug fag bale fakafulan. Ay manga gina e fagmafulun at fakaumsigun si tuwas fagunaan fag faglunggungan. 40Ay manga gfamin way burangday at fagagbilugun. Ay manga dewa gfalugo nu gdarangin, sik famalagan way. Umdasug way ban sa anya at matvngvd fag faurianan.”
Sik Burangday at Anyun
(Lukas 21:1-4)
41Ay Isus malunggung sas Diyus bale sis day fagsuwadan singku. Fakatanyaun, gulit ngay taw nu gsuwad at singku sas fagsuwadan. Ngayuk mabalan fag ngay taw nasuwad ngayuk singku. 42Ay sik yud e kwa fag burangday fag mangena ndasug, ay nasuwad yangay duwak salafi. 43Ay Isus nagewan at ngay tagadal ay nalong te, “Matuyan iglong aw ayu te, kanya at yud e kwa fag burangday at nasuwad glabi yay sa tiba fagayu at nasuwad sas fagsuwadan singku. 44Anway si tiba at nafon fagngayuun at labi wan. Ay roro sanya fag burangday dewa yud ngayu at nafon, kayunya wan at singku, anggan wa at fasad famul fakonun.”
Одоогоор Сонгогдсон:
Markus 12: TAWEAST
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Copyright © 2023 by OMF International, Philippines