Markus 13
13
Umrasras ban Diyus Bale
(Mat. 24:1-2; Lukas 21:5-6)
1Gina Isus nalaklo siginans Diyus bale, at tagadal at sadi glong anya te, “Em Takamoyung, linggati. Agbvt nin fag ngay batu at fangawat Diyus bale. Ay masine dawdaw nin fag bale at ngay afud.” 2Ay Isus igbalus te, “Nalag wo ngaro sanya fag ngay afud. Roro wa ban e batu magamut nus di sadi. Fagayu umrufa wan.”
Umdasug ban at Mataka ay at Nanfauri
(Mat. 24:3-14; Lukas 21:7-19)
3Ay gina Isus malunggung sis Bugsul Ulibu, sis alungudan Diyus bale, Pedru, ay Santiagu, ay Uan, ay anggan Andres inkakbang sas Isus gina gsesadian ay ginto te, 4“Foyungi emi te, seduge ban nu mgurungan aro am ngay nafoyung emi? Ay setain ban em fagsafulan te, gakagurunganun wan?”
5Ay Isus nabalus sa fag ngay mangama te, “Tagaki siginan at ngay tagfanluk laman di ban am malukan. 6Anway ngayu bank taw at kumdasug taglong ban te, ‘Aw wan Diyus at nafili fag Fun.’ Ay ngayu ban at malukan. 7Ay dewa ban am e dungganan e gbarangyan makbang ayu, ay ate gbarangyan sa sangay talun, lag kalimu. Umgurungan wa ban fiya takatanya, ay dewa katanya, bunya ginanya at fakatabuwan. 8Anway tibak talun ban at ngay taw at fagfabarangyanun tibak talun yangay at ngay taw. Ay sik fun at ngay taw at fagfabarangyanun sik fun yangay at ngay taw. Ay sa ban tibak talun e faleleg ban. Ay sa tibak talun at taw kalunus ban dawdaw. Katanya at fagsigadan yay at ngay mataka. Kata sik mangena nu gafasalugun at ngenge ay gamatang yay ayu daw.
9“Tagaki ay fatvngvdi ay amatanganan, anway e tumaban ban ayu sas fagfasinean fanlonganan fag bale. Ay e malang ban ayu sa sangay taw Udyu at ngay bale fakafulan. Anway gafanud am sa angku, e tumaban ban ayu sa sangay gubernadur ay sa sangay fun. Ay ginanya wan at fasakan te, laman moyung ban am at matuyan fag longan sanya fag ngay taw. 10Ay taguna, e moyung yay ban at Masine fag Barita sas fagayu talun at ngay taw bagu umdasug at fakatabuwan. 11Ay dewa ban e nataban ayu, ay e minto ayu, lag am gafanawa te, tain ro ay famalus. Longi nus nga setaw ay amatanganan ginanya. Anway bunwa am tagelongan, at Masine fag Falad wan. 12Ay ginanya ban fag lungud, at fadugsay tumaban at fadugsay sa tiba, laman fate anya. Ay katanya yangay, at tama tumaban at unga sa tiba, laman fate anya. Ay anggan at ngay unga kamabo at magurang ay igfafate anya. 13Ay fagayu taw kalimata ayu, teway gafanud am sa angku. Ay roro ngap nus nga sinu at nasungatan anggan sas fakatabuwan fag ngay menit, umlangfe wa fiya.”
Mason fag Mafurat
(Mat. 24:15-28; Lukas 21:20-24)
14“Ay lumag ban am sik mason fag mafurat nu malindug sit yud nangus at faglindugan. (At tagtap, asafuli tuwa at masuwad.) Ginanya ban, fagayu taw tagsis talun Udiya, lagyui sa sangay muyud. 15Ay sik taw nut siwas tungud ugun bale, lag gsakbo sad bale laman nanbul nus nge wain sanya. 16Ay sik taw nut siwas gamasun, lag guli sat bale laman nanbul at balukas. 17Mafanyu ban dawdaw ngay tagfafiyon ay ngay tagfasusu ginanya fag ngay menit. 18Ay darangini tuwa te, laman nu glagyu am fag buknga bundi gina sis fanmoyanun. 19Anway ginanya ban, mason wa ban dawdaw fag ngay faurianan. Glabi yay fiya fiya ebi ginan fag ngay faurianan, siginan ebi Diyus nu kawat tam fagdaul daga, ay anggan katsi. Ay bandi ban wa gdog takatvngvd anya. 20Ay tam Fun Diyus nu dway ban fafungkuk ginanya fag ngay menit, fagayu tagleleg we sawad nus di sadi. Ay roro muwag. Tam Fun mafafafungkuk tuwa daw ka fag ngay menit, laman at ngay filian fag taw e fanambagun tuwa.
21“Ay ginanya ban, dewa e lumong ayu te, ‘Iste wan tam Fun Isus!’ ay ate ‘Sanya wan!’ lag gafanud, 22anway umsure wa ban ginanya at yud matuyan fag ngay fun ay at yud matuyan fag ngay taglong. Ay kanya ban gfasure at madulawan ay at madaragang fag ngay fagbulun, laman nanfanluk taw, dewa ro te, Diyus at ngay filian fag taw. 23Tagaki tuwa! Gfaguna akwa gfoyung ayu katsi at kumdasug ban.”
Taw at Baguwama nu Kadasug ban
(Mat. 24:29-31; Lukas 21:25-28)
24“Gina ban umlangfe ka fag ngay faurianan, tam menit umkarum wa ban. Ay tam magdanun sigon wa gdamlag. 25Ay ngay galeme umtong siginans banwa. Ay fagayu at ke fagmadaragangun sis banwa muwigan wa ban. 26Ay nu ntabu wan, fagayu taw lumag ban angku, Taw at Baguwama, nu kadasug aw sis ngay linyabu. Ay e fagmadaragangun aw dawdaw ay anggan e fagmasineun. 27Ay rodi sumugu aw ku ngay tagfabarita, laman nanfaful ku filian fag ngay taw siginans fagdaul daga, nus ngandaginan baliwa fag fungfung daga.”
Isus At Fafaskudanan sa sik Alibas
(Mat. 24:32-35; Lukas 21:29-33)
28“Amatangani at fafaskudanan sa sik alibas. At don nu karabas wan, ay at sanga nu malumak yay, nasaful wam te, gakasudyangun wan. 29Katanya yangay ban nu lumag am ku longan nu kagurungan. Sumaful wam te, gadasugun kwa dawdaw. 30Ay matuyan iglong aw ayu te, katsi fag ngay taw ya mkate, yap ngay umgurungan fagayu ku longan. 31Tam banwa ay tam daga e fakatabuwan way ban. Ay roro ku ngay longan fagayu wa ban e fakatabuwan faggugat.”
We Taw Sumaful te, Ginanya ban Isus nu Kadasug
(Mat. 24:36-44)
32“We taw gsaful te, ginanya ban fag menit ay ate fag lungud nu kadasug aw. Ay anggan at ngay tagfabarita sigon sas banwa wa gsaful. Ay anggan aw oma, Diyus at Baguwama, kwa gsaful, ku Mama way sesadi at tagsaful. 33Tagaki ay mafamasadani, anway wam nasaful te, ginanya ban fag lungud nu kadasug aw. 34Kata sik taw nu galoun ngayayu. Ay bagu lumo, nalong yay sat ngay fanuguwan at ngay fagbulun mandi. Ay anggan nasugu yangay sa at tagtanud sakbawan bale laman igtanud wa fiya. 35Ay katanya yangay anggan am, matagakani tuwa faggugat, anway wam nasaful te, ginanya ban tagbilug bale nu guli. Nu ndain sfafun wan. Ay nu ndain swa bilug yabi. Ay nu ndain sdaga kamenit. Ay nu ndain sbalabag wan. 36Labon manga umdasug daw ay lumag nu gtiyug am. 37Iglong aw sa ayu ay anggan sas fagayu taw te, Matagakani!”
Одоогоор Сонгогдсон:
Markus 13: TAWEAST
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Copyright © 2023 by OMF International, Philippines