Markus 15
15
E Nataban Isus sas Pilatu
(Mat. 27:1-2,11-14; Lukas 23:1-5; Uan 18:28-38)
1Ginas balabag sirut, ngay taganyun daul, ay taw Udyu at ngay tagmagurang, ay ngay tagfoyung Muisis at Suguwan, ay anggan fagayu Taw Udyu Tiba Tungud Tagmagurang inful ay igsulitanan. Ay rodi kanya nasiyuk Isus ay nataban sas Pilatu. 2Ay Pilatu nainto sas Isus te, “Go o wan taw Udyu at Fun?” Ay Isus nabalus te, “Kin wan, kata wa ngaro fiya am longan!” 3Ay at ngay taganyun daul gfatuyan te, “Ka fag taw ngayu wan at nafagbulun at mauri.” 4Ay Pilatu gdog yay nainto sas Isus te, “Tain am famalus? Ngayu wa unu am nafagbulun at mauri.” 5Ay Isus wa gbalus. Ay Pilatu gamatangan daw te, “Taw fakatanyaun?”
E Nafalfas Barabas ay e Gafateun Isus
(Mat. 27:15-26; Lukas 23:13-25; Uan 18:39–19:16)
6Gina e fagmafulun sa baliwas Tagfabarita nu Glangfe, Pilatu at ugali faggugat igfalfas sadik kinsungsung, nus nga sinu ngay taw at fakaumsigun. 7Ginanya, at sadi at masungsungan Barabas. At faginsungsungun, anway kanya ay at ngay ufud nafamabo sa sangay tagfangguna ay ngayuk taw at nafate. 8Ay ngayuk taw at kinkakbang sas Pilatu ay glong te, “Kata ebi ataw gugat am ugali, falfasi sadik masungsungan.” 9Ay Pilatu nainto sa ka fag ngay taw te, “Go kaumsig am nu gfalfas aw sa ayu taw Udyu at Fun?” 10Pilatu nasaful wa te, ngay taganyun daul at fagnantabanun Isus sa anya, anway te, galabian Isus at ngay fagbulun. 11Ay roro at ngay taganyun daul matvngvd nu naatul sa at ngay taw. Fakatanyaun, laman Pilatu gfalfas Barabas, ay bunwa Isus. 12Ay Pilatu gdog yay nainto sa sangay taw te, “Setain ro ku fagbulun sanya fag taw, ay nafangayan te, taw Udyu at Fun?” 13Ay at ngay taw nafanguroan dawdaw te, “Tuktuki wa anya sas salibagan kayu!” 14Ay Pilatu ginto te, “Taw at asalanan?” Ay kaugat yay at ngay taw nu guro te, “Tuktuki wa anya sas salibagan kayu!” 15Ay Pilatu at fagnafalfasun Barabas laman gfalukmeanan at ngay taw. Ay nu nafafusfus wa dawdaw Isus, nafataban wa anya sa sangay sundalu laman tumuktuk sas salibagan kayu.
Ngay Sundalu Gfanlamangan Isus
(Mat. 27:27-31; Uan 19:2-3)
16Ay at ngay sundalu nataban Isus sas Pilatu at bale daul. Ay nafaful yangay sanya sik ngay sundalu ayuwayu. 17Ay ka fag ngay sundalu nafasulun sas Isus sik balukas ngaba maubian. Ay nafabalulang sik wat madugi ay nafasangboan sas Isus alfuyu. 18Ay gfanlamangan gseg sas Isus te, “Madaragang o, taw Udyu at Fun!” 19Ay nafusfus Isus at alfuyu sik ngay sigbo. Ay natufe anya. Ay natudan sas Isus at akbang kata nu gseg anya. 20Ay nu ntabu wan nu gfalingun Isus, ka fag ngay sundalu nabul Isus balukas at maubian siginan at bilug. Ay nafasulun aro ataw at balukas. Ay rodi nataban wa long Isus, laman nantuktuk sas salibagan kayu.
E Natuktuk wa Isus sas Salibagan Kayu
(Mat. 27:32-44; Lukas 23:26-43; Uan 19:17-27)
21Ay ka fag ngay sundalu gina si sangaba dalan nalag Simun, sik taw siginans fulan Sirene, nu guli siginan at gamasun. (Simun at duwa baguwama ngayan Aleandru ay Rufus.) Ay ka fag ngay sundalu nafabulun nafaubanan Isus at salibagan kayu sas Simun. 22Ay nataban Isus sa sik talun at ngayan Gulguta, at masuwad te, “Butul Alfuyu.” 23Ay nu ndasug wa sanya, nafon sas Isus sik safa fangaranug nafagamutan sik gamut at fangawat tanum mira#15:23 mira: labon famalyam at madik. laman di kadik ay ganini. Ay Isus wa nabul. 24Ay ka fag ngay sundalu natuktuk Isus sas salibagan kayu. Ay rodi naafudan wa Isus at ngay balukas, gina ntabu nu gfe fagsafulan te, dada ro sik afud. 25Ay ginanya nu gtuktuk Isus sas salibagan kayu, sis fasiyam sbalabag. 26Ay nafasit tungud alfuyu sik rirukan, sik fagsafulan Isus at asalanan te, “NGAY TAW UDYU AT FUN.” 27Ay ginanya e natuktuk ya duwak takamul sat salibagan kayu mandi, at sadi sis Isus siyun baliwa ay at sadi sit wala baliwa. [28Nu katanya, in-gurungan wan at marirukan sis Diyus Longan te, “E natap anya kata sik takamabo.”]
29Ay kayu at nadalan sanya, nu glinggat sas Isus igfabalitang way at mata, gfalingun Isus te, “E, o wan at nalong te, rumasras o Diyus bale, ay gdog yay o fiya mawat at kadugayan tuluk menit. 30Alfasi nu kin siginans salibagan kayu! Falangfei emu!” 31Ay anggan at ngay taganyun daul ay at ngay tagfoyung Muisis at Suguwan glodlongan igfalingun Isus te, “Kanya mafafalangfe tuwa nu tibak taw. Ay roro ngap wa mafafalangfe anya mandi! 32Ay kanya nu Diyus tuwa at nafili fag Fun, ay taw Israel at Fun, alfasi nu kin siginans salibagan kayu. Ay nu malfas di ro, ay nu nalag di tam, kin, bagu yay tam gafanud.” Ay anggan at kintuktuk fag duwama gfalingun yangay sas Isus.
Isus Inkate wan
(Mat. 27:45-56; Lukas 23:44-49; Uan 19:28-30)
33Ay gina swa bilug menit, inkarum way sigad sanya fag talun fagdaul, anggan kabat sfatulu sfafun. 34Ay nu sfatulu wa sfafun, Isus nauro yay dawdaw te, “Elui, Elui. Lama sabaktani.” At masuwad te, “Ku Diyus, ku Diyus. Taw ro am fagnaubunun angku?” 35Ay ngay taw tagsanya nu nadungug at longan, nalong te, “Dungugani. Kanya guro yay ebi ebi fag taglong at ngayan Elyas.” 36Ay rodi sik taw natarung ay nafasurung sik fanrarus sad mamam mayat. Ay nasalod ka fag fanrarus sas fungfung kayu sirut laman nanfasupsup sas Isus. Ay ka fag ama nalong sa tiba te, “Gfanya yay tam te, go Elyas umdasug yay ro nanfalfas manga anya.” 37Ay Isus nauro dawdaw, ay naengasan wa taguyan.
38Ay ginanya, at fandingding fag falefe sis Diyus bale in-girat siginan at tungud anggan wa sat daga. 39Ay fun at ngay sundalu malindug sis alungudan Isus. Ay nalag wa fiya Isus nu na-engasan taguyan. Ay nalong te, “Matuyan wa fiya te, kanya Diyus at Baguwama!” 40Ay sanya yangay sik ngay mangena gbantay sit dayu sirut. Ay sanya yangay Maria sik taw Magdala, ay Maria, Santiagu ay Use at tina, ay anggan Salume. 41Ay kanya fag ngay mangena ebi at natarabang Isus gina sis talun Galiliya. Ay sanya yangay tibak mangena at naalo Isus sas Erusalem.
Use Nalibing Isus
(Mat. 27:57-61; Lukas 23:50-56; Uan 19:38-42)
42Gakayabiun wan, ay ginanya Kamasadan fag Menit, at masuwad te, at fadogan ban fag menit Fakamatoun fag Menit. 43Nu katanya, Use, sik taw siginans fulan Arimatiya, nananlag Pilatu laman nanget Isus at bilug dewa mapla kakbang anya. Use sik Udyu at sadi tagsulitanan daul, ay ngay taw galang tuwa anya. Ay kanya gfanya yangay Diyus nu gmagurang taw. 44Ay Pilatu nu nadungug, gamatangan te, “Sangay Isus inkate wan.” Nu katanya, kanya nagewan yay sik fun sundalu ay ginto te, “Go Isus inkate wan?” 45Ay Pilatu nu nasaful wa te, Isus inkate wan, nalong wa sas Use te, “Buli wan at bilug.” 46Ay ebi ataw Use e nasali sik masine fag falefe. Ay nu nafadaga wan, nasifig wa Isus at bilug sanya fag falefe, ay anggan nalibing sa sik faglibingan, sa ebi at nafarukung fag batu. Ay Use nafafulid sasad sakbawan sik batu daul at fandingding at sakbawan luwib. 47Ay Maria fag taw Magdala, ay Maria, Use at tina, nalag te, sanya nu glibing Isus.
Одоогоор Сонгогдсон:
Markus 15: TAWEAST
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Copyright © 2023 by OMF International, Philippines