Markus 16
16
Isus Gdog yay Gleleg
(Mat. 28:1-18; Lukas 24:1-12; Uan 20:1-10)
1Nu nalangfe wa at Fakamatoun fag Menit, Maria sik taw Magdala, ay Salume, ay Maria, Santiagu tina, nabili sik famabebanglu laman nanlo ay nanrarus Isus at bilug. 2Ay gina sbalabag sirut sis Linggu, nu bagu nsure at menit, ka fag ngay ina nalo sas faglibingan. 3Ay gina glo gsulitanan te, “Sinu ro tagfalu antam gfafulid at batu daul siginans sakbawan faglibingan?” 4Ay rodi nu nabantay, manlag di mafulidan wa gugat at fandingding sakbawan fag batu, dewa gbiya dawdaw. 5Ay ka fag ngay ina nu nasakbo wa sanya sad faglibingan, manlag di sanya sik baguwama malunggung sis siyun baliwa fag tigyangan. Ay malagsi ay ngaba at balukas. Ay ka fag ngay ina nlimu dawdaw. 6Ay ka fag baguwama nalong sanya fag ngay ina te, “Lag kalimu. Nasaful aw te, gsarap am Isus, sik taw Nasaret, ebi at kintuktuk sas salibagan kayu. Ay roro wa ste, anway kanya gdog yay gleleg. Bali wan linggati wan sa ebi at fagfatungkudan anya. 7Ay loi wan, foyungi sas Isus at ngay tagadal ay kaugat wan sas Pedru te, Isus gumuna wa ayu sas talun Galiliya. Sanya wan nu lumag am anya, gfaning ebi ataw at longan sa ayu.” 8Ay ka fag ngay ina mafali nu glaklo siginan sad faglibingan, anway kudkulugan ay gadulawan at nalag. Ay wa nafamansulit at ngay nalag teway kalimu dawdaw.
9[Ay gina slinggu sbalabag, gina Isus gdog gleleg, kanya nsure taguna sas Maria, sik taw Magdala. Ebi kanya at ke fituk mafurat fag falad, ay Isus naayan wan. 10Ay Maria nu nalag Isus, nalo wan laman nanfoyung sas Isus at ngay tagadal. Ginanya at ngay tagadal kabalu dawdaw ay guyway. 11Ay dewa katanya at ngay tagadal wa gafanud Maria at longan te, Isus gleleg wan ay nalag wa anya. 12Ay bandi, Isus insure yay sat tagadal at duwa, kaduge glo sat gamasun. Ay roro Isus wa kata ebi ataw. 13Ay ka fag duwama nu noli wa sas Erusalem nafoyung wa sa at tiba. Ay at tiba wa gafanud at longan.
14Ay bandi tv, Isus insure yay sat Nasugu fag Labi Sadi gina gfangon. Ay kanya nabaya at Labi Sadi, teway wa gafanud. Ay katvngvdan nu gafayudun, dewa at tiba nalag ay nafoyung te, Isus gleleg wan, wa gafanud. 15Ay Isus nasugu sat ngay tagadal te, “Loi wan sas fagdaul daga ay foyungi at Masine fag Barita sas fagayu taw. 16Sik taw nu gafanud ay nsurung, umlangfe ban. Ay sik taw nu dway gafanud, at fakadasugan sa ways ban faurianan. 17Katatuy at fagsafulan te, tagafanud sa angku: sa ku fagmadaragangun kanya mafaayan ban at ngay mafurat fag falad. Ay mafafaelongan ban sa tibak fanlong at yud nasaful. 18Ay dewa ban nated ngay ubyanun, ay dewa ban nainum sik fangkate, di mauri sat bilug. Ay nu nafatayuk ban at daluwap sat ke daylan, umfiya wan.”
E Naurug wa Isus sas banwa
(Lukas 24:50-53; Fagbulun 1:9-11)
19Tam Fun Isus nu ntabu wa nu gfoyung sat ngay tagadal, e naurug wa anya sas banwa, ay malunggung wa sanya sa tam Diyus at siyun baliwa fag day tigyangan. 20Ay at ngay tagadal nalo wan, ay nafoyung wa at Masine fag Barita sas fagayu talun. Ay tam Fun Isus natarabang anya fagayu laman gfagbulun sik ngay madulawan fag ngay fagbulun.]
Одоогоор Сонгогдсон:
Markus 16: TAWEAST
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Copyright © 2023 by OMF International, Philippines