1 Mose 2
2
1Bobo bumana vangulu zulu ayi ntoto ayi bibio bidi mu biawu. 2Mu lumbu kitsambudi, Nzambi wumanisa kisalu kikio kikasala. Mu lumbu kitsambudi wuvunda mu kisalu kiandi kikio kikasala. 3Nzambi wusakumuna lumbu kitsambudi ayi wubieka kiawu nlongo, bila mu lumbu beni wuvunda mu salu kikio ki Mvangi kikasala#2.3 Tala 2 Mos 20.11, Ebe 4.4,10.. 4Kiokio kikhulu ki nsamu wu phangulu zulu ayi ntoto.
Ndima Edeni
Mu thangu Yave Nzambi kavanga ntoto ayi zulu, 5va ntoto vasi kibela ko nti ayi biti bisi kukimenina ko mu tsi, bila Yave Nzambi kasi kukinokisina ko mvula va ntoto ayi vasi ba ko mutu wulenda kuna bima mu ntoto. 6Vayi mbungi wutombuka mu ntoto wubondikila ntoto wuwo.
7Yave Nzambi wubumba mutu mu fundu fundu di ntoto. Wuvemuna muphepe wumoyo mu mayilu mandi, ayi mutu wuyika muela widi wumoyo. 8Yave Nzambi wukuna ndima mu nsitu Edeni ku ndambu yintotukilanga thangu, muna katula mutu wu kavanga. 9Yave Nzambi wumenisa ntindu mimio mi minti, mikitoko mu tala ayi mimbote mu dia. Wutula va khati tsika nsitu nti wumoyo ayi nti wumvananga diela mu zabila mambote ayi mambi.
10Nzadi yitotuka mu nsitu Edeni ayi yibondikila ndima. Tona vana, yawu yivasuka mu ndambu ziya. 11Yithete yitedolo Pisoni: yawu yizungidi tsi yimvimba yi Havila yidi nolo, 12nolo yi tsi yoyo yidi yithalu, ayi nti bedeliumi widi maka matsudi lueki ayi tadi dithalu di onisi. 13Nzadi yinzole yitedolo Ngihoni, yawu yinzunganga tsi yimvimba yi Kusi#2.13 Tsi yi Kusi: Batu bankaka bankambilanga ti tsi yayi yiba ku Mezopotami. Bankaka phe bankambila ti tsi yoyo yiba ku wanda tsi yi Ngipiti ( Sudani voti Etiopia).. 14Nzadi yintatu yitedolo Tingele, yawu yinkumbanga ku ndambu yintotukilanga thangu yi Asilia. Nzadi yinya yitedolo Eufalata.
15Yave Nzambi wubonga mutu, wuntula mu tsola yidi mu nsitu Edeni muingi kasalanga ayi kakebanga yawu. 16Yave Nzambi wuvana thumunu kudi bakala: «Dia wuna dia makundi ma minti mimio midi mu nsitu, 17vayi kulendi ko dia makundi manti mamvananga diela mu zabila mambote ayi mambi, bila lumbu wela dia mawu, fua wela fua kaka.»
18Yave Nzambi wukamba: «Disi ko dimbote bakala kaba niandi veka, ndieka kumvangila nsadisi wumfuanane.» 19Mu ntoto Yave Nzambi wutatamana vanga mu fundu fundu bulu bibio bidi moyo binsitu ayi zinuni zizio zintilumukanga ku yilu ayi wubinata kudi mutu muingi kamona bue kakubivanina mazina. Kioso bulu kimbonga zina dikumvana mutu, diawu kafueti tedolongo. 20Bakala wuvana mazina kudi bulu bibio bidi moyo biyodama ayi binsitu ayi zinuni. Vayi kudi niandi veka kuisi ba ko nsadisi wumfuanane. 21Buna Yave Nzambi wubuisa bakala mu tulu tungolo beni, bu kaba wuleka, wubonga mvesi wu lubanzi ayi wuvingisa nsuni vaba mvesi. 22Mu mvesi wu lubanzi wu kabonga mu bakala, Yave Nzambi wuvanga nketo ayi wunata kudi bakala. 23Buna Bakala bukamona nketo, wuyamikina:
Tala buabu mvesi
Wu mimvesi miami,
Ayi nsuni wu nsuni ami.
Makatedolo nketo,
Bila bongolo mu bakala.
24Diawu bakala makabika se diandi ayi ngudi andi muingi kabundana ayi nketo andi ayi bawu bole baba nsuni wumosi.
25Vayi bakala ayi nketo baba pheni bawu babole ayi basi dimuena tsoni ko.
Одоогоор Сонгогдсон:
1 Mose 2: YOM-CD
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
©2024 Seed Company in coordination with Forum Communautaire des Traducteurs de la Bible et Alphabétisation