1 Mose 3
3
Bakala ayi nketo batotolo mu nsitu wu Edeni
1Buna nioka yilutila bukhita mu bulu bibio bi nsitu bivanga Yave Nzambi. Yiyuvula nketo: «Mu kedika Nzambi wulukembi: “Kadi dieno kadi dikundi di ndima?”» 2Nketo wuvutula kudi nioka: «Beto tulenda dia makundi ma minti midi mu ndima. 3Vayi mu matedi makundi ma nti widi va khati nsitu, Nzambi wutukembi: “Ka lulendi ku madia ko ayi ka lulendi ku masimba ko muingi luedi fua.”» 4Nioka yikamba kudi nketo: «Nana, lumfueno ko. 5Bila Nzambi zebi ti lumbu luela dia mawu, meso meno mela zibuka, ayi luela ba banga ba nzambi mu zaba mambote ayi mambi.»
6Nketo wumona ti makundi ma nti maba makitoko mu tala, mambote mu dia ayi mazolakana mu vana phisulu. Wubonga dikundi di nti wowo, wudia diawu, wutambika kudi bakala diandi wuba yandi va kimosi, yandi phe wudia diawu. 7Buna meso ma bawu bole mazibuka, bavisa ti pheni baba. Landila mambu momo, babonga meza ma nti kuyu mawu bakanga mu luketo banga minlele.
8Bawa phova Yave Nzambi bu kazieta mu nsitu mu masika. Nketo ayi bakala basuama va khati minti mi nsitu, muingi babika monika kudi Yave Nzambi. 9Buna Yave Nzambi wutela bakala ayi wunyuvula: «Kue widi?» 10Yandi wuvutula: «Nguilu phova aku mu ndima, mbueni tsisi, bila pheni ndidi, diawu tsuamini.» 11Vayi Yave Nzambi wunyuvula diaka: «Nani wukembi ti pheni widi? A bue ngeyo didi kuaku dikundi dinti di ndikukandikila mu dia?» 12Bakala wuvutula: «Nketo wuwupheni mu kala yami, niandi wupheni dikundi dinti wowo ayi ndidi diawu.»
13Yave Nzambi wukamba kudi nketo: «Bila mbi vangidi diambu diphila yayi?» Nketo wuvutula: «Nioka yiphunini#3.13 Tala 2 Kol 11.3, 1 Tim 2.14. diawu ndididi diawu.»
14Diawu Yave Nzambi kakambila nioka:
«Buvengi bobo, ngeyo
Singu fuiti singu kaka
Va khati ka bulu bibio bidi
Moyo ayi biyodama ayi binsitu
Ngeyo mawudiatilanga
Mu vumu kiaku
Bosi mawudianga fundu fundu
Lumbu bibio bizingu kiaku.
15Manditula kithatu va khati
Ka ngeyo ayi nketo,
Va khati ka nkuna aku
Ayi nkuna andi,
Niandi makakukosikisa ntu
Ayi ngeyo mawuntebila
Mu kikhoso ki tambi#3.15 Tala Nza 12.17..»
16Bosi Yave Nzambi wukamba diaka kudi nketo:
«Mandi buela zi phasi
Ziphuele bu widi mu buemba
Ayi mu mianga miphuele
Mawubutilanga.
Ayi zaba kuaku ti tsatu ziaku
Mazibanga kudi bakala diaku,
Ayi niandi makakuyalanga.»
17Bosi kembi kudi Adami: «Bu wilukidi phova nketo aku ayi didi kuaku dikundi dinti di ndikukandikila mu dia,
Ntoto wusingulu mu
Diambu diaku.
Mu thovokolo yi ngolo
Mawubakilanga bidia
Biaku mu zingu
Kiaku kimvimba.
18Ntoto
Mawukubutilanga zitsende
Ayi zitsolokoto,
Fuiti dianga kaka biti bi nsitu#3.18 Bibuku 17-18: Tala Ebe 6.8..
19Mawudianga bidia biaku
Mu diunga di mbulu aku,
Nate wela vutuka mu ntoto
Mu wubongo.
Bila widi fundu fundu,
Wela buela vutuka mu
Fundu fundu.»
20Buna Adami wuvana kudi nketo andi zina di Eva, bu dibangudulu: «“Wumoyo”», bila niandi ngudi yi babo badi moyo. 21Yave Nzambi wuvangila bakala ayi nketo andi minlele minkanda bibulu, wubavuika miawu. 22Buna Yave Nzambi wukamba: «Tala buabu! Mutu weka wumosi banga beto mu zaba mambote ayi mambi. Buabu bika tunkandika mu nonuna koko kuandi mu bonga dikundi di nti wumoyo muingi kadia diawu ayi kabika zinga mvu ka mvu#3.22 Mvu ka mvu: Tala Nza 22.14..» 23Buna Yave Nzambi wunkuka mu nsitu wuba mu Edeni muingi kakunanga mu ntoto mukabongo. 24Nzambi bu kakuka mutu, wutula ba keluba ku ndambu yintotukilanga thangu yi nsitu wuba mu Edeni ayi sabala kinlemanga, kinzungananga muamo mu tanina nzila nti wumoyo.
Одоогоор Сонгогдсон:
1 Mose 3: YOM-CD
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
©2024 Seed Company in coordination with Forum Communautaire des Traducteurs de la Bible et Alphabétisation