Genesis 21
21
Isaaᴋ inôlertoᴋ. Ismaêle aulartitaujoᴋ. Abraha Abimêlegelo angerᴋatigêkpuk.
1Nalekablo Sara issumagivâ, sorlo oᴋarame, taimailiorvigivlugo sorlo oᴋauseᴋarame.
2Saralo singailerpoᴋ ernermiglo ernivoᴋ Abrahamut inutoᴋauningane, nalliutome Gûdib oᴋautigijangane.
3Abrahablo ernine, Sarab erniarijanga, atserarpâ Isaamik.
4Abrahablo ernine Isaaᴋ kippivâ; uvloᴋalermat sittamaujortunik, sorlo Gûdib perᴋongmago.
5Abraha 100nik jâreᴋarpoᴋ erninga Isaaᴋ inôlermat.
6Saralo oᴋarpoᴋ: Gûdib ijûtautipânga, tussartut ilûnatik ijûtiginiarmanga.
7Amma oᴋarivoᴋ: Kia Abraha oᴋautigalloarᴋaûk, Sara amâmaktitsiniarmat? ernermik ernigama tâpsomunga inutoᴋauningane.
8Sorrusiarsuglo aglisilerpoᴋ amâmagungnairtitauvlunelo. Abrahalo nerrimâraksarsoarmik âᴋiksoivoᴋ taipsomane, Isaaᴋ amâmagungnairtitaungmat.
9Sarablo mallugivâ Hagarib Egiptenemiub erninga, erniarijanga Abrahamut, mittauteᴋartoᴋ.
10Abrahamullo oᴋarpoᴋ: Kivgaᴋ taimna erningalo ᴋennugikik, kivgab taipsoma erningata kingormgujiᴋatigijaksaringimago ernera Isaaᴋ.
11Oᴋautsille tamakkoa Abrahab nâmagingimarikpait ernine pitjutigivlugo.
12Gudible Abraha oᴋautivâ: (Oᴋausingit) nâmagituinakkit nukapiaᴋ kivgallo pivlugik. Sarab ᴋanoᴋ oᴋarvigingmatit, nippinga nâlengniarpat, kinguvângnik taijaujuksaujut Isaamit pijomârmatta.
13Kivgable erningatauᴋ inugasaksoangortitsomavara, igvit kinguvârigangne.
14Tagva Abraha uvlâkut makipoᴋ, taᴋoaksarlo imeᴋautillo imalik tigulugit illivait Hagarib tuinganut, nukapiarlo tunivâ tâpsomunga, aulartilugolo. Tagva aularpoᴋ saksârlunelo inuᴋangitome Bersêbab ᴋanitangane.
15Imeᴋarungnairmalle imeᴋautime, nukapiaᴋ ukpigait illangita atânut innangatipâ.
16Ailunelo ᴋargjub tupvingatut ᴋaningitigijomik, akkianut ingilerpoᴋ, oᴋarame: Nukapiab toᴋolerninga takolugo sapperpara. Akkianut ingilerpoᴋ, nipliadlarlunelo ᴋeavoᴋ.
17Tagva Gûdib nukapiab nippinga tussarpâ. Gûdiblo engelingata ᴋilangmit Hagare nipliavigivâ oᴋautilugo: Hagare, suvêt? Sivôraniarnak, Gûdib nukapiab nippinga tussarmago inninganit.
18Nikovilerit, nukapiarlo tiguvlugo aggangnut tessioruk, tâmna inugasaksoangortitsomagapko.
19Gûdiblo ijîgik uitipak takotilugo puilavingmik. Tagvunga imermik ᴋallusijartorpoᴋ imeᴋautimut, nukapiarlo imertipâ.
20Gûdiblo nukapiaᴋ illagivâ, tâmnalo perorpalliavoᴋ inuᴋangitome nunaᴋarlune, pittiktarnermiglo illisimatsiarpoᴋ.
21Inuᴋangitorlo Paran nunagivâ, anânangatalo Egiptenemit nuliaᴋartipâ.
22Nalliutome taipsomane Abimêlege oᴋarpoᴋ Abrahamut, Pikolelo, sorsuktuksarsoaᴋotingita angajoᴋângat, oᴋarlune: Gûdib illagivâtit piniarnerne tamaine.
23Tagva mâna Gûde tailugo angerviginga tamâne, uiverikleromatsanginavit uvamniglônêt ᴋitorngamniglônêt erngutamniglônêt, naglingnerle saᴋᴋertitara illingnut saᴋᴋertitaksarigangne uvamnuttauᴋ nunamullo tujormiangovigijarnut.
24Tagva Abraha oᴋarpoᴋ: Angeromavunga.
25Abrahablo Abimêlege inerterpâ imeᴋtarvik pivlugo, Abimêlegib kivgangita tigujangat aksorornermut.
26Abimêlegible kiovâ: Kina taimailiortoᴋ nallovara; igvillônêt tamattominga ᴋaujitilungilarma, uvangalônêt tussalungitara, uvlome kissiane.
27Tagva Abraha saukkanik tuktuvangniglo tigusivoᴋ tunivlugit Abimêlegemut, tamarmiglo angerᴋatigêkpuk.
28Abrahablo saukkat illangit, saugârsuit arnat sêpat, ingmigolingatipait.
29Tagva Abimêlege oᴋarpoᴋ Abrahamut: Suksauvât saugârsuit ukkoa sêpat ingmigolingatitatît?
30Kiovâle: Saugârsuit ukkoa sêpat aggamnit tigujaksarivatit, nallunaikutaksautilugit, uvanga imeᴋtarvik tamanna poagijarapko.
31Tamanna pivlugo nuna tamanna Bersêbamik taijauvoᴋ, tamarmik tagvane angervingmanik.
32Taimaglo angerᴋatigêmarikpuk Bersêbame. Tagva aularpuk Abimêlege Pikolelo, sorsuktuksarsoaᴋotingita angajoᴋângat, angerarlutiglo Filisterit nunanganut.
33Abrahale napârtoarsungmik illijivoᴋ Bersêbame, tagvanelo Nâlekab Gûdib issoᴋangitub attinga tuksiarvigivâ.
34Akkunillo tujormiangovoᴋ Filisterit nunangane.
Одоогоор Сонгогдсон:
Genesis 21: LIHB08
Тодруулга
Хуваалцах
Хувилах
Тодруулсан зүйлсээ бүх төхөөрөмждөө хадгалмаар байна уу? Бүртгүүлэх эсвэл нэвтэрнэ үү
Labrador Inuttitut Heritage Bible © Canadian Bible Society, 2008.