Johaneb 13
13
Jesub ge ǁîb ǁkhāǁkhāsabegu* di ǂaide ra ǁā
1Pasxaǁâudīb* nî tsoatsoas aiǃâb ge Jesuba, iri ǃhūbaiba xub nî ǁGûb ǃoa ǃgû ǃkhais dib go hā ǃkhaisa ge ǂan i. ǁÎb ge ǁîb di ǂhunuma khoena ge ǀnam i. ǁÎb ge ǁîna ǀunis kōse ge ǀnam i.
2ǃUiǂûs ǁaexa i ge ob ge ǁGâuaba* ǀnai Judab, Simon Iskariotǁîb ôab di ǂgaob ǃnâ Jesubab nî ǀapexū ǃkhais di ǂâisa ge ǂgā. 3Jesub ge ge ǂan i ǁGûb xab ge mâ xū-i hoa-i ǂama ǁkhāsiba māhe tsîb ge Eloba xu hā tsîb Elob ǃoa nî oa ǃkhaisa. 4Ob ge tāba xu khâi, ǂamsarab âba ǂgaeǂui, ǀomsenǃkhaiba ǁîb kamanab ai ǃgae, 5tsî ǁgam-e ǁāsenǃnâǃore-i ǃnâ ge ǂnâ. ǁNās khaoǃgâb ge ǁkhāǁkhāsabegu ǂaide ǁātsoatsoa tsî ǁîb kamanab ai ge hâ i ǀomsenǃkhaib ǀkha gere ǀomǂnâǂnâ. 6Tsî Jesub ge ǁîb tawa sī, ob ge Simon Petruba “ǃKhūtse, tare-i ǃaromats ti ǂaira ra ǁā ǂgao?” ti ge dî.
7Ob ge Jesuba ge ǃeream bi: “Sats ge nēsi ǁnâuǃā tide tare-i ǃaroma ta ǁnāsa ra dīsa, xawets ge ǀguitsē nî ǁnâuǃā.”
8Petrub ge ǁîb ǃoa ge mî: “Hî-î, tātsēs tsînats ge satsa ti ǂaira ǁā tide!”
Ob ge Jesuba ge ǃeream: “ǁĀ tsi tama ta ga i, ots ge ǃaruǀî ti ǃâ tama hâ.”
9Ob ge Simon Petruba ǁîba ǃoa ge mî: “ǃKhūtse, ti ǂaira ǀguira ose, xawe ti ǃomkha tsî danas tsîna ǁkhāti ǁā re.”
10Ob ge Jesuba ǁîb ǃoa ge mî: “Khoe-i ǁāsen hâ-i di hoaraga soros kom a ǃanu tsî i kom ǁāsen i nî ǃkhaisa ǂhâbasa tamao, ǂaira ǁāhes ǀguis ose. Tsî sago ge a ǃanu, xawe hoago ose.” 11Jesub ge tari-i xab nî ǀapexūhe ǃkhaisab ge ǂan i amaga “Hoatsama go ge ǃanu tama” ti ge mî.
12 #
Luk. 22:27
Tsî ǂaidi âga ǁātoa tsî ǂamsarab âba ana, tsîb ge tāb tawa ǁkhawa sī ǂnû tsî ǁîga ge dî: “ǁNâuǃā go ra tare-e ta goro dī ǃkhaisa? 13Sago ge tita ‘ǁKhāǁkhā-aotse’ tsî ‘ǃKhūtse’ ti ra ǂgai tsîs ge ǁnāsa a ǂhanu, ǁî ta a amaga. 14Tita, sago di ǃKhū tsî ǁKhāǁkhā-aota go sago di ǂaide ǁās ǁkhās khami go ge sago tsîna ǂaide nî ǁābagu. 15Dī go nîga ta go aiǁgau-e mā go, xuige tita goro dība go khami dī re. 16#Mat. 10:24; Luk. 6:40; Jhn. 15:20Amase, amase ta ra mîba go, ǃgāb ǁîb di ǀhonkhoe-i xa kai tamas ǁkhās khamib ge sîsabeba ǁîba ge sîb xa kai tama hâ. 17ǀKhaehe go ge hâ nēna go ga dīo.
18“Sago hoago xa ta ge mî tama; mâ ǀguib hoab hîa ta ge ǁhûiǂuiba ta ge ǃgâise a ǂan. Xawes ge xoas hîa ‘Tita ǀkha ra ti pere-e ǂûǀhaob ge ti ǃoagu nî dabasen’#Psa. 41:9 ti ra mîsa nî dīǀoaǀoahe. 19Nēsi ta ge nēna ra mîba go, î go nēn ga īo tita a Xristu* ǃkhaisa ǂgom. 20#Mat. 10:40; Mrk. 9:37; Luk. 9:48Amase, amase ta ra mîba go ti sîsabeba ra ǃkhōǃoa-i hoa-i ge tita ra ǃkhōǃoa tsî tita ra ǃkhōǃoa-i ge ti Îb, tita ge sîba ra ǃkhōǃoa.”
Jesub ge ǁîb di ǀapexūhesa ra aimûǀgaru
(Mateub 26:20-25; Markub 14:17-21; Lukab 22:21-23)
21Nē mîdeb ge mîtoas khaoǃgâb ge Jesuba ǃgamse gagas âb ǃnâ ǂkhîoǃnâ tsî ge ǀhûǀgui: “Amase, amase ta ra mîba go, ǀguib sago dib ge nî ǀapexū te!”
22O gu ge ǁkhāǁkhāsabega ge kōgu, taribab ra mî ǃkhaisa ra buruse. 23Jesub ǁkhāǁkhāsabegu di ǀguib, ǁîb xa ge kaise ǀnamhe ib ge ǁîb ai ge ǃgâsen. 24Simon Petrub ge ǁîba ge nape, tarib xab goro ǂâibasen ǃkhaisab nî dîse.
25Ob ge ǁîba Jesub tawa ǂnûǀgū tsî “ǃKhūtse, tariba ǁîba?” ti ge dî.
26Ob ge Jesuba ge mî: “ǁNāb, ǁîba ta pere-e ǀobe tsî nî māb ge.” Tsîb ge ǀobetoa, ob ge Judab, Simon Iskariotǁîb ôaba ge mā. 27Tsî pere-eb ra ǂûtoa hîab ge Satanna* ǁîb ǃnâ ge ǂgâ. Ob ge Jesuba ge mîba bi: “ǃNoeǃnoesen. Dīts ra-e nēsi dī!” 28ǀGuib âgu hîa ge tāb tawa ǂnôa i gu tsîn ge ge ǀū i, tare-eb ra Jesuba ǂâibasen ǃkhaisa. 29Judab ge mariǁgarusa ūhâ i amaga gu ge ǀnîga, Jesub ra ǁâudīb ǃaroma ǂhâbasana ǁamaǃgû kai tamas ka io ǀgâsana marina mā kai bi ti ge ǂâi hâ i.
30Tsî pereǃâro-e ū, tsîb ge ǁnātimîsi ge ǂoa. Tsî i ge ge tsuxu i.
ǀAsa mîmās
31Tsî Judab ge ǂoa, ob ge Jesuba ge mî: “Nēsib ge Khoen Ôab di ǂkhaisiba ra ǂhaiǂhaihe, tsîb ge Elob di ǂkhaisiba ǁîb ǃnâ-u nî ǂhaiǂhaihe. 32Elob di ǂkhaisib ga Khoen Ôab ǃnâ ǂhaiǂhaihe hâ, ob ge Eloba aitsama Khoen Ôaba nēsi nî ǂkhaiǂkhai. 33#Jhn. 7:34Ti ôago, ǂkhari ǁaero-i ǀgui-e ta ge sago ǀkha nî hâ. O go ge tita nî ôa; tsî Jodeǁîn ǃoa ta ge mî hâ i khami ta ge nēsi sago ǃoa ra mî: ‘Tita ra ǃgûpa du ge a sī ǁoa.’ 34#Jhn. 15:12-17; 1Jhn. 3:23; 2Jhn. 5O ta ge nēsi ǀasa mîmā-e ra mā du: ǀNamgu re. Tita ge ǀnam du i khami sadu tsîna ǀnamgu re. 35Sadu ǁîǃnābe ūbagu hâ ǀnammi aib ge ǃhūbaiba nî mûǂan, ti ǁkhāǁkhāsabedu a ǃkhaisa.”
Jesub ge Petrub xa ǀūxūhesa ra aimûǀgaru
(Mateub 26:31-35; Markub 14:27-31; Lukab 22:31-34)
36Ob ge Simon Petruba ǁîb ǃoa ge mî: “ǃKhūtse, mâǀîts kha ra ǃgû?”
Ob ge Jesuba ge ǃeream: “Tita ǀkhats ge nēsi a ǃgû ǁoa, xawets ge ega nî sao te.”
37“O tare-i ǃaroma ta nēsi a sao ǁoa, ǃKhūtse? Tita ge sats ǃaroma ti ûiba nî ǁguiba!” tib ge Petruba ge mî.
38Ob ge Jesuba ge ǃeream bi: “Tita ǃaromats sa ûiba nî ǁguiba? Amase, amase ta ra mîba tsi, anib nî ās aiǃâts ge satsa ǃnona ǃnāde nî ǀūxū te.”
Terpilih Sekarang Ini:
Johaneb 13: KKG20
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Khoekhoegowab Elobmîs © Bible Society in Namibia, 2020.