AkwaEfese 6
6
Ana nashemi
1Ana, mu yuvere ashemienu pa meho a Fumu, inene eyi po yo i na roera. 2“O remeke tata woe na mama woe,” athso thsiraerera thso kutanga ethsi thsi di no thsikumbwethzo ci, 3“ci nga enu i ku endere nawa no ku yoya thsikati thsothsire pa kaye.”
4Namwe mwashemi wakwerume, mwa anthzipithsa anenu komu mu wa kwamena. Unone mu wa rere ko ku wa kuturura neraerera eyi i tunda kwa Fumu.
Apika nañathsire
5Apika, mu yuvere añathsire wenu o pano pa kaye ko ku wa yapa no ku tutuma, mu wa kwamene ko mucima ofoci, eci dyodi nga mu kwamena Krisitu. 6Mwa kwama kengeyo pohuma ku wa roerithsa o kwa na mi tanekera, unone mu kwame kengeyo eci apika Krisitu, mu kwame eshima ya Nyambi ko micima thzenu thzothzihe. 7Mu kwame ko micima thzenu thzothzihe eci mwaa kwamena Fumu, kadi anu. 8Mu dimuke ci Fumu kenge a ku na pa muyambo munu no munu ku kwetu keyi yoiwa tu kwama, ikare mupika nji o kurukuruka.
9Añathsire, namwe mu tende kengeyo apikenu. Mwa wa kanya, mu dimuke ci momu widi wenu mu di no ñathsire wenu yofoci mu wiru, karo ka a wana mavwevwe.
Erwithsa ya Mukrisitu
10Ko ku manenena, mu tanare mwa Fumu no mukoro wenthzi oukuru. 11Mu cishupeke erwithsa yoihe ya Nyambi ci nga mu korope no ku tanara ku kandeka maperemeka oahe a shamaonga. 12Inene mvo ethzi tu rwa po kadi cingwa twaa thzi rwa nanu, unone twaa rwa nakwakutumina, yoikoro, okoro o kano kaye ko mirema, no mipepo thzothzikoro ethzi thzi di mu mandau o mu wiru.
13Mweyo, mu shimbe yoihe erwithsa ya Nyambi ci mwa ku twethse ku ciamwena thsikati ou thsa ku keya. Karo munyima thzo mvo kenge mwa ku thsiara shimbi mwa tanarera. 14Mweyo, mwimane no ku tanara. Oshemwa wikare mwiya wenu ou mu cianga mu mbunda, owawa wikare thsicandekithso thsenu thso pa miidi. 15Kwidyato mu vate ociroithsero ou u tunda ku Muthzimbu Ouwa o thsiyaro. 16Mwikati yoihe mu shimbe thsikandekithso thso thsitawo ethsi mu twethsa ku thzimithsa masho o ku yuuma oyu o Mumango. 17Kuyoyithsiwa kwikare thsikoko thsenu, karo mu shimbe mwere o Mupepo, adyo diywi dya Nyambi.
18Mu rombere mu Mupepo thsikati thsothsihe no mwitendahara yoihe. Mweyo mu mamere, karo mwikare no muooto oukuru no ku romberera akwakutawa wahe.
19Name mu ni romberere. Mu rombe Nyambi ci a ni pe maywi aa a na roera ci nga ni twethse ku tongonona nawa kondume diano dyeanekera ya Nyambi ci Muthzimbu Ouwa po wa Majuda nAnukenge. 20Mu madyenge ni di mukaci ko Muthzimbu Ouwa ko kwikara mwimaneni wa Nyambi. Mweyo, mu rombere ci ni tware ku rupara ku amba kondume, omu ni na roera ku ambera.
Kuvumenena ko mahurerero
21Tikike, muenthzetu oyu na shimiwa, karo aye ngamba wa Fumu o ku rurama kenge a ku na mi tongwera enu yoihe, ci mu dimuke edi ni na pinduka. 22Eyi ngeyi ni na mu tumena oko, ci nga mu dimuke edi tu di, karo ci nga naa mi tanarithse micima.
23Andengenu, thsiyaro thsikare nenu, karo Nyambi Tata no Fumu Yesu Krisitu a mi pe thsishimo no thsitawo. 24Thsihemo thsa Nyambi thsikare kwanu wahe awa na shimi Fumu wetu Yesu Krisitu ko thsishimo thso kukana ku pwa.
Terpilih Sekarang Ini:
AkwaEfese 6: mho
Highlight
Salin
Bandingkan
Kongsi
Ingin menyimpan sorotan merentas semua peranti anda? Mendaftar atau log masuk
©2023 The Seed Company