Máfìù 2
2
Mia lɛ́ o gó sɛ́lɛ́ lɛ́ e nyɛ́nɛ́ wɛ̀lɛ̀pìàa yía
1O Zízɛ̀ ye Bɛ́féléhɛ̃́ɛ̃̀ lɛ́ e kɛ Zùdíà‐sɛ̀lɛ̀ yía yí. E kɛ lúó lɛ́ Hɛ́lɔ̀ e kɛá sɛ́lɛ́ líé‐sí‐mì káa ká. Lɛ̀ e kɛ kília, mia lɛ́ ò sĩ̀ã́ã̀ŋèlè mɔ́ɔ̀ wɔ̃̀ yí dɔ sɛ̀ɛ, o gó sɛ́lɛ́ lɛ́ e kɛ nyɛ́nɛ́ wɛ̀lɛ̀pìàa yí, wáà lò Zùlúsàlɛ̀. 2O nu, wáà wɛ̃́ĩ́‐lɔ̀ɔ kɛ̀ weeá kélɛ̀, “Nɛ́fú lɛ́ wa ye, kɛ é kɛ Zúù‐mìà líé‐sí‐mì káa, lɛ mɛ́? Ko à mɔ́ɔ̀ sĩ̀ã́ã̀ŋèlè lɛ́ à dɔɔ̀ e kɛá lɛ̀í nyɛ́nɛ́ wɛ̀lɛ̀pìàa gɛ̃̀. Ko nu kɛɛ kó gbini à lɛ̀ɛ tã́ã̀.”
3Lɛ̀ sɛ́lɛ́ líé‐sí‐mì Hɛ́lɔ̀ e wɔ̃́ e kéa maa, à zò dɔɔ̀ e kɛá e gã̀ mɔ̀, ɛ̃́ɛ̃́ é kɛ bɛ̃̀ɛ̃ mia séĩ́ lɛ́ o kɛ Zùlúsàlɛ̀ káa, wɔ̃́ nɔ́ doóa kɛɛ̀ e kɛá o ká. 4Hɛ́lɔ̀ e sálà‐ɓò‐Wálà‐mɔ̀‐mìà kpànazɛ̀ séĩ́, ɛ̃́ɛ̃́ Wálà kii‐dɔ‐mìà séĩ́ pá o kíe mɔ̀, kɛ ó o kíe gɛ̃̀. Lɛ̀ e kɛ kília, e o wɛ̃́ĩ́‐lɔ̀ɔ kɛ kélɛ̀, “Mɛ́ɛ lɛ́ ò lo Kɛ́lɛ̀ìa yeè yi?”
5Wa gèe à lɛ̀ɛ, “Pɛ́lɛ lɛ́ ò si Bɛ́féléhɛ̃́ɛ̃̀ lɛ́ e Zùdíàa, lɛ́ ò lo à yeè à yía. Wɔ̃́ lɛ́ dɔ̀‐Wálà‐lé‐là‐mì a bɛ̃̀ɛ̃, gɛ̃̀ e ké.
6‘Bɛ́féléhɛ̃́ɛ̃̀, ɓí i ké, lɛ́ i Zùdíà‐sɛ̀lɛ̀ yía,
ɓi wá gbɛɛ ɓo mi lɛ́ dɔ‐mìà séĩ́ lɛ́ o Zùdíàa, o à mɔ̀ fìaa ká gbaa.
Ƃii mia líé‐sí‐mì lɛ́ɛ̀ lo góò i yí.
À ye lɛ́ è lo e yɛ́lɛ́ kɛɛ̀ m̀ mia nì, lɛ́ o Éézɛ̀lɛ̀‐mìà káa mɔ̀ɔ.’ ”
7Lɛ̀ e kɛ kília, Hɛ́lɔ̀ e gɔ̃à lɛ́ o gó nyɛ́nɛ́ wɛ̀lɛ̀pìàa, súo kɛ o doó lɛ̀ píà. E lúó kpó‐kpó lɛ́ sĩ̀ã́ã̀ŋèlèa e ɓíé à ká o làa, wɔ̃̀ yí dɔ o kɛ̀lɛ̀. 8E o vɔ gbaa Bɛ́féléhɛ̃́ɛ̃̀, áà gèè o lɛ̀ɛ, “Kà lo ká ka nyìɛ kpɔ́ nɛ́fúa wɛ̃́ĩ̀. Ká gɛ̃̀áa, kà à kɛ ḿ yí dɔ, kɛɛ ma bɛ̃̀ɛ̃ ḿ ló ḿ gbini à lɛ̀ɛ nɔ́ kíli.”
9Lɛ̀ o wɔ̃́ e kéa maa, o gó gbaa yí. Lɛ̀ o lóa, o sĩ̀ã́ã̀ŋèlè nɔ́ wa gɛ̃̀ nyɛ́nɛ́ wɛ̀lɛ̀pìàa gɛ̃̀ zeĩ́. E ló o líé bɔ̃̀ã̀ le, é tóá kíli é ɓɔá lɛ̀ lɛ́ nɛ́fúa e kɛ yía mɔ̀. Ɛ́ɛ̃́ à dɔɔ̀ e kɛá gbaa tã́ã̀ yi. 10Lɛ̀ lɛ́ o sĩ̀ã́ã̀ŋèlèa gɛ̃̀ɛ, o paà e kɛá géli ká yí gbùò zɛ̀. 11O wàà gbaa káa wì. O nɛ́fúa gɛ̃̀ e lòóò Melé kɛ̀lɛ̀. O káá gbaa o kpuò là, wáà gbìnì nɛ́fúa lɛ̀ɛ. O wà pɔɔ̀ lé ɓo, wáà nɔ̀‐lɛ̀ɛ‐pɛ̀ nɔ̀ à lɛ̀ɛ. Nɔ̀‐lɛ̀ɛ‐pɛ̀ e kília, e kɛ góò, wà pɔɔ̀ gĩĩ yiè zɛ̀, lɛ́ ò si fɛ́lɛ́ĩ́kĩsɛ̀ wà mɛ́ɛ̀a o ká.
12Wálà e lìè‐wè dɔ o lɛ̀ɛ mɛ̀ĩ̀ zɛɛ̀ yí kélɛ̀, yékɛ̀ ó ló o mɛ̀ĩ́ Hɛ́lɔ̀ píé. Lɛ̀ e kɛ kília, o zi gbɛɛ sí, o ló o pà.
O wàà, o ló Ízè
13Lɛ̀ gɔ̃àa o ló gbaa, ko Dàa‐mì là vɔ‐mì doó e ɓíé Zósɛ̀ là mɛ̀ĩ̀ zɛɛ̀ yí, áà gèè à lɛ̀ɛ, “Wɛ̀lɛ̀, í nɛ́fúa kpɔ́ e lòóò mɔ̀, kà ye nì ká wàà, ká ló Ízè. Kà kɛ yí é tóá kíli ḿ gèe ka lɛ̀ɛ ká wɛ̀lɛ̀ yi. Hɛ́lɔ̀ lɛ́ɛ̀ lo kɛɛ̀ nɛ́fúa naapìà kɛ á zɛ.”
14Zósɛ̀ e wɛ̀lɛ̀. E nɛ́fúa wà e lòóò o sí, o gó gbaa yí bĩ́míà, wáà lò Ízè. 15E tó gbaa yí, Hɛ́lɔ̀ e ga.
Wɔ̃́ nì e kéa kɛɛ̀ e kɛá, kɛɛ é wɔ̃́ lɛ́ ko Dàa‐mì a dà là dɔ̀‐lé‐là‐mì zò píé, lɛ́ a gèea, kɛ é kɛ wánà zɛ̀. Wɔ̃́ a gèea, gɛ̃̀ e ké. “M m Gbe súo kɛ, é gó Ízè.”
Nɔ́ɔ̀ɓé zɛ‐gã̀
16Lɛ̀ lɛ́ Hɛ́lɔ̀ a yí dɔ kélɛ̀ gɔ̃à lɛ́ o gó sɛ́lɛ́ lɛ́ e nyɛ́nɛ́ wɛ̀lɛ̀pìàa yía, waà à bèkɛ̀ ɓoa, wɔ̃́ a wàa kpànazɛ̀. A gèe là mia nì lɛ̀ɛ ó gɔ̃‐nɛ̀ séĩ́ lɛ́ à kɛ̀ɛ̀ aà kɛ pèèlɛ, ɛ̃́ɛ̃́ o yé o kɛ̀ɛ̀ lɛ̀ɛ́ ɓɔ nɛ́ pèèlɛ mɔ̀, lɛ́ o kɛ Bɛ́féléhɛ̃́ɛ̃̀ wà pɛ́lɛ kélé kélé lɛ́ e à sɔ́nɔ́ píéa yía, ó o zɛ. E wɔ̃́ e kéa kɛɛ̀ sí wɔ̃́ lɛ́ a ma gɔ̃àa lé, é gbɛ̃̀á lúó lɛ́ sĩ̀ã́ã̀ŋèlèa e ɓíé à ká o làa mɔ̀ɔ mɔ̀.
17Zí e kéa káa, wɔ̃́ lɛ́ dɔ̀‐Wálà‐lé‐là‐mì Zɛlèmáyà a gèea, e kɛá wánà zɛ̀. Wɔ̃́ a gèea, gɛ̃̀ e ké.
18“O pɛ dò vĩ ma Wélémà.
Pɛ vĩ e kília e kɛ gbóó‐wè wà mia gbɛ́ɛ́‐wè gágà ká.
Wélésɔ̀ lɛ gbóó ɓopìà là nɔ́ɔ̀ mɔ́ɔ̀ wɔ̃̀ mɔ̀.
Lɛ́ɛ̀ gbóó ɓo, tó làá zṹ ó nɛ̀ɛ‐nɛ́ɛ́,
ɓii o dò nɔ́ɔ fé wá gbaa ɓe.”
O gó Ízè
19Lɛ̀ Hɛ́lɔ̀ e gaa, ko Dàa‐mì là vɔ‐mì doó e ɓíé Zósɛ̀ là mɛ̀ĩ̀ zɛɛ̀ yí Ízè‐sɛ̀lɛ̀ yí, 20áà gèè à lɛ̀ɛ, “Wɛ̀lɛ̀, í nɛ́fúa kpɔ́ e lòóò mɔ̀, í ló o ká i mɛ̀ĩ́ Éézɛ̀lɛ̀. Ƃii mia lɛ́ o kɛ à kɛ‐zì naapìà ó nɛ́fúa zɛɛ, waà ga.” 21Lɛ̀ e kɛ kília, Zósɛ̀ e wɛ̀lɛ̀, e nɛ́fúa wà e lòóò o sí, e ló o ká Éézɛ̀lɛ̀.
22Lɛ̀ lɛ́ a ma kélɛ̀ Akàlíyà aà yà e dàa Hɛ́lɔ̀ yàlà mɔ̀, kɛ é kɛ sɛ́lɛ́ líé‐sí‐mì ká gbaa Zùdíàa, Zósɛ̀ e túó kɛ é e yàlà kṹ yi. À kɛ̀ ó lìè‐wè dɔ à lɛ̀ɛ mɛ̀ĩ̀ zɛɛ̀ yía, a mɔ́ɔ̀ ló ɓo Gálàlíì‐sɛ̀lɛ̀ yí. 23E e yàlà kṹ gbaa pɛ́lɛ lɛ́ ò si Názàlɛ̀ɛ yí. E kɛ kíli, kɛɛ wɔ̃́ lɛ́ dɔ̀‐Wálà‐lé‐là‐mìàa wa gèea, é kɛ wánà zɛ̀. Wɔ̃́ wa gèea, gɛ̃̀ e ké. “Óò lo à síì Názàlɛ̀ mi.”
လက္ရွိေရြးခ်ယ္ထားမွု
Máfìù 2: MNT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Mann New Testament © Bible Society in Liberia, 1978.