Máfìù 3
3
Zɔ̃̀ɔ̃́ mia bàtáì‐kɛ‐mì zì lòũ̀‐ɓo‐wè
(Máà 1.1-8; Lúù 3.1-18; Zɔ̃̀ɔ̃́ 1.19-28)
1Lúó e kília káa, Zɔ̃̀ɔ̃́ mia bàtáì‐kɛ‐mì e nu, áà wɔ̃́ gèè lòũ̀ ká yɛ̀í lɛ́ e kɛ Zùdíàa là. 2Wɔ̃́ a gèe lòũ̀ káa, gɛ̃̀ e ké. “Kà ka sɔ̃̀ɔ̃ yɔɔ mɛ́ vɔ̀ɔ. Ƃii Wálà lɛ́ e lɛ̀ía zì tò‐mia‐là nu‐lùò aà ɓɔ kɔ̀ɛ́.” 3Zɔ̃̀ɔ̃́ lɛ́ e kɛ mi lɛ́ dɔ̀‐Wálà‐lé‐là‐mì Ààzáyà e kɛ wɔ̃́ gèepìà, áà gbɛ̃̀ à mɔ̀ɔ káa. E kɛ à gèepìà kélɛ̀,
“Mi dò gbɛ́ɛ́‐wè lɛ́ɛ̀ dɔ yɛ̀í là, áà gbɛ̀ɛ̀ weeá kélɛ̀,
‘Kà zía pɛ̀ kɛ kɔa Dàa‐mì lɛ̀ɛ,
kà à kɛ zía é dɔ kpeĩ.’ ”
4Sɔ lɛ́ e kɛ Zɔ̃̀ɔ̃́ mɔ̀ɔ, à kɛɛ̀ e kɛá wìì lɛ́ ò si kĩ́ã́mòa, kɛì ká. Wìì‐kii‐ɓɛ̀lɛ̀ dɔɔ̀ e kɛá à gbĩĩ́. À zì ɓèlè‐pɛ̀ lɛ́ e kɛ pélé‐tòo‐tòò wà zɔ́ɔ́ nyɔ́nɔ́ o káa. 5Lúó e kília káa, mia lɛ́ ò go Zùlúsàlɛ̀ wà Zùdíà lɛ̀ séĩ́ mɔ̀, ɛ̃́ɛ̃́ o yé ò go sɛ́lɛ́ séĩ́ lɛ́ e kɛ Zɔ́dã̀‐yìì sɔ́nɔ́ɔ yí píéa, o kɛ gópìà yi, wáà lò Zɔ̃̀ɔ̃́ píé, 6wáà wèè o kɛ‐wɔ̃̀ yɔɔ mɔ̀, tó Zɔ̃̀ɔ̃́ áà o bàtáì kɛ̀ Zɔ́dã̀‐yìì bà.
7Kɛɛ lɛ̀ lɛ́ Zɔ̃̀ɔ̃́ e Fálásíì‐mìà ɛ̃́ɛ̃́ Sáyúsíì‐mìà búnùzɛ̀ gɛ̃̀, wáà nù à píé kɛ é o bàtáì kɛɛ, a gèe o lɛ̀ɛ, “Mɛ̀nɛ là nɔ́ɔ̀ ka ké ɓɛ. Dé a gèe ka lɛ̀ɛ ká wàà Wálà là wɔ̃́à‐wàa‐kɔ̀ lɛ́ è lo nuùa mɔ̀? 8Kà wɔ̃́ lɛ́ è lo à zɔ̃̀ɔ̃̀ kélɛ̀ kaà ka sɔ̃̀ɔ̃ yɔɔ mɛ́ vɔ̀ɔ kɛ. 9Yékɛ̀ ká gɛ̃̀ ɓɔ̀ɔ kélɛ̀ káà bɛ̀i ka dìè ɓoò wɔ̃́ yí yé kaà gèe kélɛ̀, ‘Éɓɔ́lɔ́hã́ã̀ lɛ ko dàa ye dàà káa ká.’ Ḿm̀ bɛ̀i à mɔ̀ ḿ gèe ka lɛ̀ɛ kélɛ̀, Wálà lɛ́ɛ̀ bɛ̀i à mɔ̀ é gɛ̀lɛ̀ nì e kéa sí, é o kɛ Éɓɔ́lɔ́hã́ã̀ sùu‐là‐mìà ká. 10Gbɔ̀ɔ lɛ́ è lo yílí kã́ã̀ e gáná yí kpó‐kpó mɔ̀ɔ, à pɛ̀ kɛɛ̀ lɛ. Yílí séĩ́ lɛ́ lɛ̀ɛ́ ló ɓaà e ɓɛɛ yiè káa, óò lo à kã́ã̀, tó wa dùò tíé yí. 11Ḿm̀ ka bàtáì kɛ̀ yíí ká, kɛ á zɔ̃̀ɔ̃̀ kélɛ̀ kaà ka sɔ̃̀ɔ̃ yɔɔ mɛ́ vɔ̀ɔ. Kɛɛ mi yé è lo tóò m ko mɔ̀ɔ, lɛ́ɛ̀ lo ka bàtáì kɛɛ̀ Gɛ̀ɛ̀ Púlú wà tíé o ká. À zì yíkɛ̀‐gágà‐kɔ̀ diè lɛ m zìa là. Ma wá bɛ̃̀ɛ̃ kpeĩ kɛɛ ḿ là bàá vũ. 12Là ɓu‐pìè‐pɛ̀ lɛ à kɛ̀lɛ̀, kɛ é ɓu séĩ́ pìè à ká. Lɛ́ɛ̀ lo là ɓu páà e kíe mɔ̀, tó a yà à yàlà bɛ̀ipìà. Kɛɛ lɛ́ɛ̀ lo ɓu‐tòlòa síì, a gélé tíé lɛ́ lɛ̀ɛ́ bɛ̀i númíàa ká.”
Zɔ̃̀ɔ̃́ là Zízɛ̀ bàtáì kɛpìà
(Máà 1.9-11; Lúù 3.21-22)
13Lɛ̀ e kɛ kília, Zízɛ̀ e gó Gálàlíì. E nu Zɔ̃̀ɔ̃́ píé Zɔ́dã̀‐yìì sɔ́nɔ́, kɛɛ Zɔ̃̀ɔ̃́ á bàtáì kɛ. 14Zɔ̃̀ɔ̃́ a kɛ‐zì naa kɛ é tèá Zízɛ̀ bàtáì kɛɛ̀ mɔ̀ weeá kélɛ̀, “Ƃi lɛ́ yee, ɓáá m bàtáì kɛɛ̀ɛ. Ye lɛ́ ɓi yee ì nu m píé ɓɛ.”
15Kɛɛ Zízɛ̀ a là nìɛ̀ weeá kélɛ̀, “Ì wéé à mɔ̀ é kɛ kíli. Ƃii zí e kéa káa, lɛ́ɛ̀ ko mɛ́ kũá kɛ kó wɔ̃́ kpeĩ séĩ́ lɛ́ Wálà à nàà kó kɛɛ kɛáa.”
Zɔ̃̀ɔ̃́ e wéé gbaa à mɔ̀. 16Lɛ̀ lɛ́ o nyɛ Zízɛ̀ bàtáì kɛɛ̀ mɔ̀ɔ, Zízɛ̀ e gó yíía bà. Ɛ́ɛ̃́ lɛ̀í lé ɓoò e kɛá à là. Ɛ́ɛ̃́ Zízɛ̀ e Wálà Gɛ̀ɛ̀ gɛ̃̀, áà nù tã́ã̀ kélɛ̀ tèŋè lɛ́ ɓe, áà yà à là. 17Lɛ̀ e kɛ kília, wéé dò e gó Wálà‐pà weeá kélɛ̀, “M zì lɔ̀‐kɛ̀á‐nɛ̀ lɛ́ e yía. M zò dàà lɛ à píé.”
လက္ရွိေရြးခ်ယ္ထားမွု
Máfìù 3: MNT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Mann New Testament © Bible Society in Liberia, 1978.