GIING'EETA 16
16
Hagari sea Shumwaheeli
1Aba damandida gatmooda Abramu was Sarayi miighwanyas diibiga. Abeeda gwandeawa huda was soomjeanda bea ng'eanyiida Misri siguura gheawungaaschi Hagari; 2hean gwayeesha Sarayi Abramu, “Ng'ula, niweadanaan NG'UTAMIIDA nyasooda diibiga; una mideawana huda gadiyeeda; gwadeepa danyas diibiga aba niny.” Hean gooleeysiit Abramu ghuuta Sarayi. 3Iimuchu nea niibiida Abramu ng'eanyiida Ganaani gweanyeew damanamughuush, ghwaat Sarayiheeda was gatmooda Abramu Hagari bea ng'eanyiida Misri nea hudaanyi bea gadiyeeda, amang'ata ghoadaw Abramu nea siyeadaanyi gil ghoah gatmoadaanyi. 4Hean gawa Abramu heeda Hagari, ak gagweayiit; ama muchu nea ghwadaah gideaba nigweayiit, gang'ula ak gafool. 5Ng'ata gwayeesha Sarayi Abramu, “Gagasa ng'asheanda muy isinnean aniini eesineey ang'iing'i! Geagoonyeey hudeanyu bea gadiyeeda ghoah gatmoadaang'u, iidu nea ghwadaah gideaba nigweayiit, hean gafoolan. Gagasa gooheeli NG'UTAMIIDA siida doabiiw aba aniini ea ang'iing'i!” 6Hean gwayeesha Abramu Sarayi, “Ng'ula, hudaang'u bea gadiyeeda gwanda geatingaagu; simana gidigasayi.” Hit gwasima Sarayi huda ng'asheega munyas, ak ghaghuudaada.
7Muchu ghwanyasa malaykajeanda NG'UTAMIIDA gheang'deenda aba dareapcheeda, gheang'deenda mida naweeda gal Ashuru. 8Ak gwayeesha, “Hagari, huda gadiyeeda bea Sarayi ang'iing'i gileabu yeenu ak gigali yeenu?” Ak gwayeesha huda, “Aniini ghaghuudaani heeda gatmooda siguura Sarayi.” 9Hean gwayeesha malaykajeanda NG'UTAMIIDA huda, “Biikta heedeaba gatmoodida ak gihuuwi soomjeandaanyi.” 10Ng'ata gwayeesha malaykajeanda NG'UTAMIIDA huda, “Gaydagoonyi jeacheenga saang'a manda siida jea ghoamu gwayiida.” 11Ng'ata gwayeesha malaykajeanda NG'UTAMIIDA huda, “Ng'ula, gaynyasa baleanda was baleanda; ak gayguureewana gheawungaaschi Shumwaheeli; aba gideaba niyiiy Ng'utamiida sawanadeadaang'u. 12Ak gaygoobiideata orjeedang'u digeeda dareabeeta, ak gaygwajaluudayi giliwas sih nea buuneeda gwajaluudayi niny; ak gaygwasheagiida buweadeagaaschi sean.” 13Hean gaguursa gheawunga NG'UTAMIIDA ghayi abalool niny, “Ang'iing'i guwoosi ASEETA ang'wearda;” aba gideaba gwayi, “Aba huumwa aniini naadaayi ASEETA ak geapteadi nea geawooschi majeek ak geawooschi majeek iing'ata deakteaba niny.” 14Iidu healadeedida geeguura Beer-lahai-roi; nea gwanda dageascheeda Gadeshi ea dea Beredi.
15Iimuchu gwajiilsa Hagari Abramu baleanda; ak gang'asa Abramu orjeedaanyi jih Hagari gheawunga siguura Shumwaheeli. 16Abeeda Abramu gaba gweanyeew seedam ea lah damanda jiilsa Hagari Abramu Shumwaheeli.
လက္ရွိေရြးခ်ယ္ထားမွု
GIING'EETA 16: BG15
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
The Bible in Datooga © Bible Society of Tanzania, 2015.