Mateu 24
24
Vinjikizo vyakusolola kwiza chaMwata
(Mako 13:1-23; Luka 21:5-24)
1Kaha omu Yesu apwile nakulovoka muTembele nakuya, tumbaji twenyi vapandamine kuli Ikiye nakumwinyikila tungiso yamazuvo aTembele.
2Oloze avambile ngwenyi, Vyosena evi munavimono, ngwetu? Mwamuchano nangumilweza ngwami, Kakweshi lilolwa limwe navakaseza halikwavoko hano, chakuzeneka kulyandumwina hamavu#24:2 Vyosena evi vyasolokele hamwaka waA.D. 70..
3Omu atwamine hapili yaMilive, tumbaji twenyi vapandamine kuli ikiye kwauka wavo nakwamba ngwavo, Tulweze, evi navikasoloka mwaka uka? Nyi chinjikizo muka nachikapwa chakutachikijilaho kwiza chove nakukuma changonde yino?
4Kaha Yesu avakumbulwile ngwenyi, Nyingililenunga kuchina nakukapwa umwe mwakamihungumwisa.
5Mwomwo vavavulu navakeza mulijina lyami nakwamba ngwavo, Yami Kulishitu, kaha navakahungumwisa vavavulu.
6Kaha namukevwa majita namangwavo amajita. Nyingililenunga, kanda namukalizakaminako, mwomwo evi kuvanga vikasoloke, oloze kukuma changonde eyi chichili kanda.
7Mwomwo lifuchi nalikafumbukila lifuchi likwavo, wangana naukafumbukila wangana ukwavo, kaha nakukapwa zala yakalombolombo namindenda kujingalila jeka najeka.
8Oloze vyosena evi navikapwa kaha kuputuka chamisongo yakusema.
9Halwola luze navakamihana kumavoko avaka-kumiyanjisa, navakamijiha, navakamihunga kuli vaka-mafuchi osena halijina lyami.
10Kaha haze vene, vavavulu navakaseza vyalufwelelo, nakulihana umwe namukwavo kumavoko avaka-kole, nakulihunga mwavo mwavo.
11Kaha nakukakatuka vaka-kulyongela upolofweto vavavulu nakuhungumwisa vavavulu.
12Kaha hakuvula chaupapwoki, zangi yavatu vavavulu nayikahola.
13Oloze ou mwakakakachila nakutwalililaho mukuunda palanga nakusongo#24:13 Hakuvuluka kusongo, nge ngwavo, kusongo yangonde yaluyando nalukeza shimbu kanda wangana waKulishitu hano hamavu., navakamuyovola#24:13 Kulwila echi chalifuchi lyavaIsalale kuli vaka-kole javo hakwiza chenyi hamavu Mwata Yesu Kulishitu..
14Kaha ou mujimbu wamwaza wawangana navakawambululanga hakaye hosena kupwa unjiho kumafuchi osena, numbanyi kukuma changonde chikeze.
15Shikaho omu namukamona muze mwajila munemana
Chize chaunyengwe chakunehesa ngundu,
ngana muze vahanjikile muli kapolofweto Ndanyele, (muka-kutanga chimulumbunukile),
16haze vene vaze navakapwa muYuleya vakachinyine kujipili.
17 Uze mwakapwa helu yazuvo akachine kaha, kanda akasuluka nakumbata víli muzuvo yenyiko,
18kaha uze mwakapwa kuwande kanda akakinduluka nakumbata chikovelo chenyi chachisukuko.
19Oloze luvinda lwavaze navakemita, navaze navakamwisanga hamakumbi aze!
20Lombenunga mangana kuchina chenu chikazeneke kupwa hangonde yachishika chipwe haSambata.
21Mwomwo haze nahakapwa luyando kana lwalunene, olwo kanda lyehi lupweko kufuma kukuputuka chakaye, palanga nakulelo, kaha kalweshi kwiza kukapwako chekako.
22Kaha nge kaveshi kukatepulula aze makumbiko, kakweshi mutu naumwe mwakayovokako. Oloze hali vaze vásakula, makumbi kana navakawatepulula.
23 Shikaho, haze vene nge umwe mwakamyamba ngwenyi, Talenu, Kulishitu ali kuno, chipwe ngwenyi, ali kuze, kanda namukachifwelelako.
24Mwomwo nakukalovoka vaka-kulyongela ukulishitu navaka-kulyongela upolofweto, navakalinga vinjikizo vyavinene navyakukomwesa, mangana nge chinahase, vakahungumwise navaze vasakula.
25Ivwenu, ngunamilwezevyo shimbu kanda visoloke.
26Shikaho, nge navakamyamba ngwavo, Talenu, ali mupambo, kanda namukayamoko. Chipwe ngwavo, Talenu, ali mutupete twamukachi kazuvo, kanda namukachifwelelako.
27Mwomwo ngana muze weji kuvesanga muveso kufuma kumututuko mbwe nakumulauko, mukiko nachikapwa kwiza chaMwanamutu.
28 Kweshokwo nakukapwa chivimbi, kwakuze navakakungulwila makuvi.
Kwiza chaMwanamutu
(Mako 13:24-31; Luka 21:25-31)
29Hahaze vene hakukuma chaluyando lwamakumbi aze, likumbi navakalilavisa, kakweji keshi kukalovola myejiko, vatanganyika navakahosomoka kufuma mwilu, kaha ngolo jamumelu navakajinyikisa.
30Haze vene chinjikizo chaMwanamutu nachikasoloka mwilu, kaha miyachi yavatu yahamavu yosena nayikayenga-yenga, kaha
Navakamona Mwanamutu áli nakwiza hamavwi amwilu
nangolo, naupahu waunene.
31 Kaha mwakatuma vangelo jenyi hakutezuka chaluneta, nakukungulula venyi ásakula kufuma kumitamba yosena yiwana#24:31 MuchiHelase ngwavo, Kufuma kujipeho josena jiwana., kufuma kusongo yimwe yalilu swi-i nakusongo yikwavo.
Chishimo chamukuyu
32Jino linangwilenu hachishimo chamukuyu. Heshoho nayivovela mitango yawo nakusokolokela, mweji kutachikizanga ngwenu ngonde yaliyena yili hakamwihi.
33Ngocho nayenu nawa, omu namukamona vyosena evi, katachikizenu ngwenu ali hakamwihi, kuvikolo vene.
34Mwamuchano nangumilweza ngwami, Chisemunwino chino kacheshi kukahitako, kuvanga vyosena evi vinasoloka.
35 Lilu namavu navikahita, oloze Mazu ami kaweshi kukahitako.
Naumwe wauchi atachikiza likumbi chipwe lwola luze
(Mako 13:32-37; Luka 17:26-36; 21:34-36)
36Oloze hakuvuluka likumbi kana chipwe lwola, naumwe wauchi navitachikiza, chipwe vangelo vamwilu chipwe MwanaKalunga, shina Ise kaha#24:36 Mwata wetu Yesu Kulishitu ali nakulivuluka Ivene, hakupwa Mwana waIvene Kalunga, kusakula likumbi lyakwiza chenyi, kachapandama kuli Ikiyeko..
37 Mwomwo ngana muze chapwile hamakumbi aNowa, mukiko nachikapwa nawa kwiza chaMwanamutu.
38Mwomwo ngana muze chapwile hamakumbi aze shimbu kanda livaji — valilenga nakunwa, vambachilenga, vahangishilenga mapwevo, palanga nakulikumbi lize engilile Nowa muwato,
39kaha kavatachikijileko palanga nomu lyejile livaji nakunongesa vosena, mukiko nachikapwa nawa kwiza chaMwanamutu.
40 Haze vene vatu vavali navakapwa kuwande. Umwe navakamumbatako, mukwavo navakamuseza.
41Mapwevo vavali navakapwa nakucheka tiliku kwakuchekela. Umwe navakamumbatako, mukwavo navakamuseza.
42Shikaho tonenunga, mwomwo kamwatachikijile likumbi mwakeza Mwata wenuko.
43 Oloze tachikizenu ngwenu, nge mwenyazuvo atachikijile chilo mweza mwíji, kachi atonene, kachi ketavishile zuvo yenyi vayipupeko.
44Shikaho nayenu nawa pwenunga muvakulizánga, mwomwo Mwanamutu mweza halwola munazeneka kutachikiza.
Ndungo wakuzeneka kushishika
(Luka 12:41-48)
45Kaha iya napu ndungo wakushishika, wamangana, ou kaka yenyi mwatongola kumulamina vangamba jenyi, nakuvahananga kulya halwola lwakutamo?
46Atokwa ndungo uze, navawana ali nakulingamo hakukinduluka chakaka yenyi.
47Mwamuchano nangumilweza ngwami, mwamutongola kupwa muka-kumulamina vyenyi vyosena.
48Oloze nge uze ndungo wamupi mwalyamba mumuchima wenyi ngwenyi, Kaka yami nazezama,
49kaha himwaputuka kuveta vakwavo vandungo nakulya nakunwa hamwe navitakwa,
50kaka yauze ndungo mweza halikumbi nazeneka kutachikiza, halwola nazeneka kwijiva,
51kaha mwamwipula vikote#24:51 MuchiHelase ngwavo, Mwamuvatula muvali. Echi chalumbunuka ngwavo kumuzangamisa mwamukalu., nakumuhaka hamukana wavaze vaka-kulyongela kwoloka, navakapwanga muze mwakulila jimbimbi nakulingenjunga kumazo.
လက္ရွိေရြးခ်ယ္ထားမွု
Mateu 24: LUE
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Bible Society of Zambia