Mateu 25
25
Chishimo chavajike likumi
1Haze vene wangana wamwilu navakaufwanyisa navajike vamapwevo likumi vaze vápwile kanda valimoneho lyehi namalunga, vambachile manongo avo nakuya nakusesa mwenya-mwenga.
2Vatanu vapwile vakuzeneka mangana, vatanu vamangana.
3Omu vaze vakuzeneka mangana vambachile manongo avo, kavambachile namajiko,
4oloze vaze vamangana vambachile jisaji jamaji hamwe namanongo avo.
5Hakushimbula chamwenya-mwenga, vosena vazeyele, kaha vayile mutulo.
6Oloze mukachi kaufuku kwapwile mutambi ngwavo, Mwenya-mwenga uze mweza! Lovokenu, mumusese!
7Kaha vaze vajike#25:7 MuchiHelase ngwavo, Vajike vamapwevo vaze kanda lyehi valimoneho namalunga. vosena likumi vahindukile nakuwahisa manongo avo.
8Jino vaze vakuzeneka mangana vambile vaze vamangana ngwavo, Tuhanenuko maji, mwomwo manongo etu ali nakujima.
9Oloze vaze vamangana vavakumbulwile ngwavo, Pamo katweshi kuwazukako. Yenu kuli vaka-kulanjisa mukalilanjile.
10Kaha shimbu vayile nakulanda, mwenya-mwenga ahetele, kaha vaze valizángile vengilile nenyi muchifupawenga, kaha kuchikolo vasokeleko.
11 Kufuma haze, vaze vajike#25:11 MuchiHelase ngwavo, Vajike vamapwevo vaze kanda lyehi valimoneho namalunga. vakwavo nawa vejile nakwamba ngwavo, Ove mwata, ove mwata, tusokolweleko mwane!
12Oloze avakumbulwile ngwenyi, Mwamuchano nangumilweza ngwami, Kangwamitachikizako!
13Shikaho tonenunga, mwomwo kamwatachikiza likumbi chipwe lwola mwakeza Mwanamutuko.
Chishimo chajitalende
14 Mwomwo kuputuka chawangana waKulishitu nachikapwa ngana mwamutu ápwile nakuya ungeji, uze ásanyikile vandungo jenyi nakuvasela vikumba vyenyi vamulaminevyo.
15Umwe amuhanyine jitalende#25:15 Tala ha18:24. jitanu, mukwavo jivali, mukwavo nawa yimwe, mutu himutu kutesa nauhashi wenyi. Hahaze vene ayile ungeji wenyi.
16Uze atambwile jitalende jitanu ayile nakujisekasana, kaha awanyinyineho jikwavo jitanu.
17Chochimwe nauze apwile najivali awanyinyineho jikwavo jivali.
18Oloze uze atambwile yimwe, ayile nakufula mumavu nakuswekamo luze lumbongo lwakaka yenyi.
19Jino omu hashimbwile chikuma, kaka yavaze vandungo ejile mangana vamulumbunwine omwo vazachishilile aze mali.
20Kaha uze átambwile jize jitalende jitanu apandamineko nakumuhanajo, nakuhakilaho jitalende jitanu nakwamba ngwenyi, Ove kaka, wanguhanyine jitalende jitanu. Tala, ngunawanyinaho jitalende jikwavo jitanu.
21Kaka yenyi amwambile ngwenyi, Unalingi kanawa ove ndungo wamwenemwene wakushishika. Unashishikila havyavindende, nangukulingisa kupwa umuka-kulama vyavivulu. Ingila mukuwahilila chakaka yove.
22Nauze wajitalende jivali nawa, apandamineko nakwamba ngwenyi, Ove kaka, wanguhanyine jitalende jivali. Tala, ngunawanyinaho nawa jitalende jivali.
23Kaka yenyi amwambile ngwenyi, Unalingi kanawa, ove ndungo wamwenemwene wakushishika. Unashishikila havyavindende, nangukulingisa kupwa umuka-kulama vyavivulu. Ingila mukuwahilila chakaka yove.
24Nauze átambwile yize talende yimwe nawa, apandamineko nakwamba ngwenyi, Ove kaka, ngwatachikijile ngwami, Umutu wamukalu, wéji kwahanga kuze kawakuvileko, nakukongola kuze kawapekwilileko.
25Shikaho, ngwevwile woma, kaha ngwayile nakusweka talende yove mumavu. Tambula talende yove eye-e!
26Oloze kaka yenyi amukumbulwile ngwenyi, Ove ndungo wamupi, ove muvwa! Kumana watachikijile ngwove ngweji kwahanga kuze kangwakuvileko nakukongola kuze kangwapekwilileko, nyi?!
27Watelele kuhana lumbongo lwami kuli vaka-nyambaulu, mangana hakwiza chami ngutambule lumbongo lwami nakalyapoko.
28Shikaho mutambulenu oyo talende, hanenu ou ali najitalende likumi.
29 Mwomwo weshowo áli navyo navakamuwezelako, kaha mwakapwa navyakulisala. Oloze ou keshi navyoko, chipwe chize áli nacho navakamutambulacho.
30Kaha ou ndungo wamokomoko mumbilenu mumilima yayinene chikuma. Muze namukapwanga kulila jimbimbi nakulingenjunga kumazo.
Ava navakengila muwangana
31 Omu mwakeza Mwanamutu muupahu wenyi navangelo vosena hamwe, mwakatwama halitanda lyenyi lyaupahu.
32Mafuchi osena navakawakungulwila kumeso enyi, kaha mwakahandula vatu vamwe kufuma muli vakwavo, ngana omu kafunga eji kuhandulanga mikoko kufuma muli vapembe.
33Kaha mwakahaka mikoko kulivoko lyenyi lyachilyo, oloze vapembe kuchimoswe.
34Kaha Mwangana mwakamba vaze vali kuchilyo ngwenyi, Twayenu, enu vakisula kuli Tata, swanenu wangana ou vámilongesela kufuma kukwala chihela chakaye.
35Mwomwo ngwapwile nazala, kaha mwanguhanyine kulya. Ngwapwile nalipwila, kaha mwanguhanyine vyakunwa. Ngwapwile ngungeji, kaha mwangutambwile.
36Ngwapwile uselesele#25:36 Uselesele wakufuma haluyanjisa. Yesu ali nakwinyika luyando navakamona vaYuleya hangonde yaluyando lwamakumbi akukuminyina., kaha mwanguvwikile. Ngwavijile, kaha mwangumenekelele. Ngwapwile mukamenga, kaha mwejile nakungutala.
37Kaha vaka-kwoloka navakamukumbulula ngwavo, Ove Mwata, mwaka uka twakumwene uli nazala numba tukuhane kulya, chipwe nalipwila numba tukuhane vyakunwa?
38Nyi mwaka uka twakumwene ungeji numba tukutambule, chipwe uselesele numba tukuvwike?
39Kaha nawa mwaka uka twakumwene uli nakuviza, chipwe uli mukamenga, numba twize nakukutala?
40Kaha Mwangana mwakavakumbulula ngwenyi, Mwamuchano nangumilweza ngwami, omu mwachilingile kuli umwe waava vandumbwami vakukuminamo chikuma, mwachilingile kuli Ami.
41Haze vene mwakamba vaze váli kuchimoswe ngwenyi, Fumenu kuli Ami enu vakwangula, yenu mukakahya kázeneka kukuma kaze válongesela liyavolo navangelo jenyi.
42Mwomwo ngwapwile nazala, oloze kamwanguhanyine kulyako. Ngwapwile nalipwila, oloze kamwanguhanyine vyakunwako.
43Ngwapwile ngungeji, oloze kamwangutambwileko. Ngwapwile uselesele, kaha kamwanguvwikileko. Ngwapwile nakuviza namukamenga, oloze kamwangumenekeleleko.
44Haze vene vakiko nawa navakamukumbulula ngwavo, Ove Mwata, mwaka uka twakumwene uli nazala, chipwe nalipwila, chipwe ungeji, chipwe uselesele, chipwe uli nakuviza, chipwe uli mukamenga, numba tuzeneke kukukafwa?
45Kaha mwakavakumbulula ngwenyi, Mwamuchano nangumilweza ngwami, omu mwazenekele kuchilinga kuli umwe waava vakukuminamo chikuma, kamwachilingile kuli Amiko.
46Kaha ava navaya mukuzangamisa cházeneka kukuma, oloze vaka-kwoloka kumwono wázeneka kukuma.
လက္ရွိေရြးခ်ယ္ထားမွု
Mateu 25: LUE
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Bible Society of Zambia