لوکا 10
10
لوبٹوگس ردونچودونّییس کالا زادس۔
1تے ستینگنے مسیح جان لوبٹوگس ردونچودونّییس لدامّا زادس یانگ کھونگون نییسنییس چوستے کھونگی سانگ سنگونلا کھونگ سکیودچیسچانّی ڈونگکھیر تانگ ناسّا تشانگمالا کالا زادس۔ 2حضرت عیسیٰ سی کھونگونلا مولس، ”ستونتھوگ چھینموجیگ رنگا چھوگچھوگ دوگ، اِین نانگ ستونتھوگ رنگاکھانّی لاسمی ما نیونگونجیگ مانے میدوگ۔ تیبویپھیا ستونتھوگی داگپو خُدا ستونتھوگ رنگاکھانّی لاسمی مانّگا کالا زادچیسلا دُعا چھوس۔ 3تا سونگ نگے کھیوجا شانگکوی ٹوا لوگو تسوگسلا لامچوگاد۔ 4کھوماگس یا جولا یا پابُو ماکھور، یانگ لامّا میگونلا لونثولین دُوگستے توس گودلا ماتانگ۔“
5”کھیوجا کھانگپاجیگی نانّگا چھاچیگ گومارانگ زیر، ’خُدے جیدے تے کھانگپابوا سالشیگ۔‘ 6تے کھانگپے نانّگا ژیدیچان میجیگ یودنا، خُدے جیدے کھوا سالین۔ کالتیس میدنا، تیبو کھیوجا سالّا زادِین۔ 7کھیوجا چی تانگکھانبو زین تھونگین تینّا کھانگپے نانّگا دوگ، چیازیرنا لاس چوکھانّی میا لاچھا تھوبچیس اوسپا اینوگ۔ کھانگپا چیگنے چیگّا ڈولین مادوگ۔“
8”ڈونگکھیرجیگّا لیبّاچیگ کھیوجا گاسوس چونا کھونگونی تانگکھانّی زانگون زو۔ 9تیرو یودکھانّی نادپاگون پھانچوگ یانگ کھونگونلا، ’خُدے گیالثید کھیوجے نیمو اینوگ‘ زیرتے شود۔ 10اِین نانگ ڈونگکھیرجیگی نانّگا لیبستے سوجیگیانگ کھیوجا گاسوس ماچونا، تے ڈونگکھیرّی لامیکا سونگ یانگ زیر، 11’نگاجے کانگپا جارکھانّی کھیوجے ڈونگکھیرّی تھالبابوانگ پھیستے نگاجے کھیوجاگون خُدے چھادپے پھیا بورتے اینکھانبو ستانّاد۔ تینیانگ ایبو ہاگوگوس۔ خُدے گیالثید نیمو اینوگ۔‘ 12نگے کھیوجا زیرّاد، خُدے لدامّا زادکھانّی جاگّا، سدُوؔم ڈونگکھیرّی می نگانپاگونّی سانگ تے ڈونگکھیرّی میگونلا چھادپا مانّگا ثانٹے پھوگین۔“
13”خُرازِین تانگ بیت صیداپا گُون کھیوجاگونلا تسامشیگی جیگسنانگ مانوگ۔ کالتیس کھیوجے نانّگا ستانکھانّی معجزہ ، صُور تانگ صیدا ڈونگکھیر نگانپاگونّی نانّگا ستانپینّا، کھونگونی دِیگپا سپانگستے گیودپا چوستے بُوری گونتے، گوگتھال یوگاین ردوگپو چوستے یودڈو۔ 14اِین نانگ خُدے ٹھیمسچادّی جاگّا، صُور تانگ صیدا ڈونگکھیرّی می نگانپاگونّی سانگ کھیوجا چھادپا مانّگا ثانٹے پھوگین۔ 15وا کفرنحُوم پاگون چی کھیوجا، سیوا تانگستے نامکھا تھینّا زادّانوگ سامّا راگا؟ مانے میتھین۔ کھیوجاگون نیالوے نانّگا پھانّگا زادِین۔“
16حضرت عیسیٰ سی کھونگی لوبٹوگس گونلا مولس، ”کھیوجے لون نیانکھانگونّی نگانگ نیانتے اینوگ، یانگ کھیوجے لون مانیانکھانگونّی نگانگ مانیانّا اینوگ۔ نگا مانیانکھانگونّی نگا کالا زادکھانبوا مانیانّا اینوگ۔“
17تینے ردونچودونّییسپو سکیدپو نیامپو لوگستے لیبتے زیرس، ”مسیح، نیرانگی مِنتخسی نانّگا، ردود تشانگمیانگ نگاجے کھانیانس۔“
18حضرت عیسیٰ سی کھونگونلا مولس، ”شیطان سکاملاگ تسوگسلا نامکھے نانگنے بودّالا نگے تھونگ۔ 19ستوس، نگے کھیوجاگونلا رُول تانگ دِیگپاراتسے#10:19 ہیندی سکادّی نانّگا بیدچھوا زیرّانوگ گُون کانگیوگا نانچیسّی وانگ یانگ نگاتانگونّی ڈاو شیطانی وانگ تشانگما میدکھان چوچیسّی کھیود تانگستے این یانگ کھیوجاگونلا سوجیگیانگ نودسکیال مینیان۔ 20ردودگون کھیوجے کھا نیانکھانبویکا گامو ماچو، اِین نانگ کھیوجاگونّی مینگ نامکھے نانّگا ڈِیستے اینکھانبویکا گامو چوس۔“
حضرت عیسیٰ سی یاب خُدا ستودپا پھولّا زادس۔
21تینّا توسلا حضرت عیسیٰ مسیح ہلژخمہ رُوح گیُودتے گاموے گنگستے مولس، ”نگے یاب نامکھا تانگ دُنیائی مسیح لے، نگے نیرانّگا ستودپا پھولّاد چیازیرنا نیرانگی ٹانگپو لامبو کھاسپا تانگ یونتانچانگونّے واستے، ٹھوگو ژوگس یودکھانگونلا سنگون چوگّا زادس۔ اونا یابلے تیزوگ زادچیسپوا نیرانگ تھوگستھاد۔“
22”نگے یاب خُدے وانگچھا تشانگما نگا ستادا زادتے این۔ یابّی مانے جانسوانگ بُوژا میشیس، یانگ بوتشے مانے جانسوانگ یاب میشیس، اِین نانگ نگے لدامکھانگونلا یاب سنگونچوگاین۔“
23تینے لوبٹوگسگون چھوگسلا گیورتے جانماگونلا تشور ماچوگّا مولس، ”نگے چوکھانگون تھونگکھانّی کھیوجے میگون برکت چان این۔ 24نگے کھیوجا لدینبا زیرّاد، کھیوجاگونلا تھونگکھان تانگ تشورکھانگون، سنگونمے پیغمبر تانگ گیالپو مانگپوجیگی تھونگچیس تانگ تشورچیسّی دودپا یودنانگ ماتھونّگا یانگ ماتشورّا اینپین۔“
سامریہ پا زانگپوے رومس۔
25شریعتی عالِم جیگ لانگستے حضرت عیسیٰ مسیح تشودلتاچیسلا ٹیس، ”لوبپونلے، تھامیدپے میتشے نورسکالّا تھوبچیسّی پھیا نگے چی چوگوس؟“
26حضرت عیسیٰ سی کھوا مولس، ”شریعتی سپیچھاگونّی نانّگا چی ڈِیازادتے دوگ۔ کھیرانگی تیگونّی نانگنے چی ہاگو؟“
27کھوے لانتانگس، ”مسیح خُدا سنینگ گانگپو، سیمس گانگپو، ستوبس گانگپو تانگ سامبا گانگپونے چیسپا چوس#10:27 شریعتی شوقبُو نیسپے 6۔ 5 ، یانگ رانّگا چوکھان ژوگس کھیرانگی کھییمتشیسپا چیسپا چوس۔“ #10:27 شریعتی شوقبُو تانگپوے 19۔ 18
28حضرت عیسیٰ سی کھوا مولس، ” کھیرانگی لان ٹانگپو تانگس۔ تا تینّا ژوگس چونا تھامیدپے میتشے تھوبین۔“
29کھوے کھورانگ شیسرابسچان اینکھانبو ستانچیسلا حضرت عیسیٰ سی ٹیس، ”نگے کھییمتشیس سو اینوگ؟“
30حضرت عیسیٰ سی رومس گیُودتے لانسالس، ”یہُودی پاجیگ یروشالیم نے تُھورلا یریحُو ا سونگ، کھوا لامّا چاگپے حملہ چوستے لجیرنیال چوس یانگ کھوا ثانٹے ردونگستے شیچیسلا بورس۔ 31تینّا لامنے یہُودی پے اِمام جیگ سونگ، یانگ کھو تھونّگاچیگ روگس چوے سانگ کھو لامی چھوگسنے سونگ۔ 32تینّا تسوگسلا بیت المقدِس سی نانّگا جابستوگ جوکھان لاوی پا می جیگ تیکا لیبتے کھو تھونّگاچیگ کھوانگ لامی چھوگسنے سونگ۔ 33اِین نانگ سامریہ پا بیسپاجیگ تیکا لیب یانگ کھوے پھوگکھانّی میبو تھونّگاچیگ کھویکا سنینگرجے سکییس۔ 34کھوے لدُونلا سونگتے سماکھاگون گیالچیسلا مارناگ تانگ رگونچھانگ لوگستے راس لاگمو ثیلس۔ تینے کھورانگی بونگبویکا سکیونتے بیسکھانّگا کھیرتے کھوا ستاستوگ چوس۔ 35ستینگماجاگپو کھوے بیسکھانگ ثولکھانبوا مولّی پینے نیس تانگستے، ’ای میبوا ستاستوگ چوس، ای سانگ مانّگا چھانا نگا لوگستے یونّگاچیگ کھیورانّگا تانگین‘ زیرس۔“
36”تے سومی ٹونے چاگپے حملہ چوکھان می بوے کھییمتشیسپابو کھیرانگی سو اینوگ سامّاراگ؟“
37شریعتی عالِم بوے لانتانگس، ”کھوا سنینگرجے ستانکھانبو۔“ حضرت عیسیٰ سی کھوا مولس، ”سونگتے تینّا ژوگس چوس۔“
حضرت عیسیٰ سی حضرت مریم تانگ مارتھے کھانگپا سکیودس۔
38حضرت عیسیٰ مسیح تانگ کھونگی لوبٹوگسگون یروشالیمّا سکیود زانے گامیولجیگّا لیب، تیرو مارتھا زیرکھانّی بوموجیگی کھونّگا کھورانگی کھانگپا گاسوس جْوس ۔ 39کھوے سترِنگمو حضرت مریم مسیح جابسّی لدُونلا دُوگستے کھونگی لابجاگونلا نیانّادپین۔ 40اِین نانگ حضرت عیسیٰ سی دونتانگ گیاسپا ڈالڈیگ چوچیسّی نانّگا مارتھا ایلتے لوس۔ کھو حضرت عیسیٰ سی یودسا یونگستے زیرس، ”مسیح لے، نگے سترِنگموے نگارانگ چیگپوا لاس تشانگما چو چوگکھانبوا سنانّگا سالّا میدّا؟ کھوا نگا یاتو چوس مولّانگ۔“
41اِین نانگ مسیح کھوا مولس، ”مارتھا، مارتھا، تے لاس مانگپوے پھیا کھیرانگی تشیرکھا چوستے کھیرانگ ایلدوگ۔ 42اِین نانگ لاس چیگ چیگ نی کھاگچان این یانگ حضرت مریم می تیبو لدامس، کھوے کانے تیبو سوانگ کوگستے کھیر مینیان۔“
လက္ရွိေရြးခ်ယ္ထားမွု
لوکا 10: LBJNT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Ladakhi Bible by The Love Fellowship is licensed under Creative Commons Attribution-ShareAlike 4.0 License.