لوکا 11
11
دُعا جوچیس لابّا زادس۔
1جاگشیگ حضرت عیسیٰ سی ناسّاجیگیکا دُعا چوادپین ، دُعا ژو تشارّاچیگ لوبٹوگس چیگی کھونّگا زیرس، ”مسیح لے، نگاجا دُعا جوچیس لابّا زادّانگ کازوگ یوحنّانی کھورانگی لوبٹوگس گونلا لابّا زادس۔“
2حضرت عیسیٰ سی کھونگونلا مولس، ”کھیوجے دُعا ژو زانے ایزوگ زیر،
’یابلے، نیرانّگا سروک یودکھان تشانگمے سیوا تھوبشیگ۔
نیرانگی گیالثید گیوگسپا لیبشیگ۔
3جاگدانگ نگاجا گھوسدومی کھارجی سالّا زاد۔
4نگاجے دِیگپا چوکھانگونلا مُعافی سالّا زاد،
چیاجونا نگاجے گیابگالّا دِیگپا چوکھان تشانگمالا
نگاچیانگ مُعافی تانّگاد۔‘“
تشودلینتے توسلا دِیگپا چوچیسنے نگاجا سکیوبّا زاد۔
5-6تینے کھونگی کھونگونلا رومسچیگ شادّا زادس، ”کھیوجا چیگ، کھورانگی دزاوے کھانگپا تشانپھیدلا سونگتے زیرنا ’دزاو جوجو نگا تاگی سوم سکیستے تونّگانگ، بیسّی نانّگا یودکھانّی نگے دزاوجیگ یونگسپا نگا کھوا زالا تانگچیس چانگ مید۔‘ 7تینے نانگکوگنے زیرس، ’نگا ناگس ماستان۔ گھو چوگتشار یانگ نگاتانگ نگے ٹھوگوگون مالتسے نانّگا ژوگستشار۔ نگے کھیورانّگا روگس چونیانچیس میراگ۔‘ 8نگے کھیوجا زیرّاد، دزاو اینچیسپوے کھوے لانگستے تاگی ماتانّگا، کھوے ٹھیل میدپا تونگ زیرین دُوگس پاسانگ کھو لانگستے کھوا گھوسدوم یودکھانبو تانگین۔“
9”تیبویپھیا نگے کھیوجا زیرّاد، جوین دوگ کھیوجا سالّا زادِین، ژالین دوگ کھیوجا تھوب چوگّا زادِین، گھو ردونگین دوگ پھیا زادِین۔ 10جوکھان تشانگمالا سالّا زادِین، ژالکھان تشانگمالا تھوبین، یانگ گھو ردونگکھان تشانگمالا پھیا زادِین۔“
11”کھیوجاگونّی ٹونے کا ابابوے رانگی بوتشے نیا تونگ زیرنا رُول تانگین؟ 12یا ٹھوگوی ٹھول تونگ زیرنا کھوا دِیگپاراتسے#11:12 ہیندی سکادّی نانّگا بیدچھوا زیرّانوگ تانگینّا؟ 13کھیوجاگون دِیگپاچان اِین نانگ رانگی ٹھوگوا پھانتھوگسچان تانگچیس شیسّادنا، کھیوجے نامکھا ژوگسکھانّی یابّی مانّگا پھانتھوگسچان ہلژخمہ رُوح، کھونّگا جُووا جوکھانگونلا میسالّا؟“
حضرت عیسیٰ تانگ ردودّی گوبا بیلزیبول۔
14حضرت عیسیٰ مسیح می ہانڈانگجیگنے ردود پھینّگا زادس۔ ردود پو بینّگاچیگ، ہانڈانگبوے سپیرا تانگس، یانگ میتشوگسپو ہالاس۔ 15اِین نانگ کھونگ کھاچیگی زیرس، ”بیلزیبول ردودگونّی گوبے کھوا ردودگون پھینگچیسّی کھیود تانگستے اینوگ۔“ 16جان کھاچیگی کھونّگا تشودلتاستے خُدے وانگچھا سالکھانبو تانتان چوچیسلا نامکھے ستاگس شیگ ستون زیرس۔
17کھونگونی سامبا نگانپابو حضرت عیسیٰ سی کھیینتے مولس، ”گیالثیدّی نانّگا یودکھانگون تھونتے مادوگنا تیبو میدکھان چھین، یانگ نانگتشانگسجیکّی میگون نولاین دوگنا تیبو جیگ این۔ 18کالتیس شیطانی کھورانّگا نولّادنا، تینے کھوے گیالثیدپو کازوگی لوسین؟ نگے تیبو زیرّاد، چیازیرنا کھیوجے، نگے ردودّی گوبا بیلزیبول گیُودتے ردودگون پھینگدوگ زیرّانوگ۔ 19کالتیس نگے ردودّی گوبا بیلزیبول گیُودتے ردودگون پھینّگادنا تینے کھیوجا ڈانگسکھانگونّی سو گیُودتے ردودگون پھینّگانوگ؟ تیبویپھیا کھونگونی کھیوجے زیرکھانبوا سکیون رجود چوین۔ 20اِین نانگ کالتیس نگے خُدے کھیود گیُودتے ردودگون پھینّگادنا تینے کھیوجیکا نامکھے گیالثید لیب تشارتے این۔ 21می شیدچانجیگی لاگچھا کھورتے رانگی کھار ثونگنا کھوے نورگون کو مینیان۔ 22اِین نانگ کھوے سانگ ستوبس چھیاجیگی کھوا نولتے پھامکالتے کھو سکیوبچیسلا لوکھیل یودکھانّی لاگچھاگون کوگستے کھوے نورگون کھیرین۔“
23”نگے چھوگسلا مانکھانگونّی نگا گیابگال چوانوگ، یانگ نگا نیامپو لاس چوستے ڈاسبو مالدومکھانگونّی، نگے لاسّی ڈاسبو یانچوگّانوگ۔
24میجیگی نانگنے ردود بینگتے ستینگنے، ردود چھو میدسا ریستونگی نانّگا کھورین آرام چوسے ناسّا ژالتیانگ ماتھوب پاسانگ، کھوے کھورانّگا زیرّانوگ، ’نگا بینگتے یونگکھانّی تینّا میی نانّگا لوگستے چھین۔‘ 25تیرو لیبّاچیگ، تے ناسّابو لاگمو لدوستے چیتشانگما رانگرانگی مالّا بورتے تھونگ۔ 26تینے کھو سونگتے کھورانگی سانگ مانّگا نگانپا جان ردود ردون کھیونگستے تینّا ناسّے نانّگا دُوگس۔ یانگ تے میی ناسلوگپو سنگونّی سانگ تھوا سونگ۔“
27حضرت عیسیٰ سی ای ژالتاگون مولین یود زانے میتشوگسّی ٹونے بوموچیگی کُوچو تانگین زیرس، ”نیرانگ لتامسکھان یانگ نیرانّگا آوما تانگکھانّی اما برکت چان این۔“
28حضرت عیسیٰ سی لانسالس، ”خُدے حُکم نیانتے تیگونّیکا لاگلین چوکھانگون مانّگا برکت چان این۔“
حضرت عیسیٰ سی ستاگس ستانچیسلا زیرس۔
29میتشوگسپو گیاسین سونگپا حضرت عیسیٰ سی مولس، ”ای میرابس نگانپے نگا نامکھے ستاگس ستون زیرّانوگ، اِین نانگ پیغمبر حضرت یُونسی ستاگس پو مانے کھونگونلا، یانگ ستاگس شیگ میستان۔ 30پیغمبر حضرت یُونس چونگکھانبو نینوہ پاگونّی پھیا خُدے کھو کالا زادکھانّی ستاگس شیگ اینپین، تینّا تسوگسلا اِبنِ آدم نیامپو چونگچیسچانبوانگ ای میرابسّی پھیا ستاگس شیگین۔“
31”ٹھیمسچادّی جاگّا لانگس زانے لو چھوگسّی گیالموے ای میرابسپوا چھادپا پھوگچیس اوسپا اینوگ زیرین چیازیرنا کھو گیالپو حضرت سُلیمانی شیسرابسّی سپیراگون نیانّالا ساچھا ما تھاگرینگنے یونگس، ستوسّانگ حضرت سُلیمانی سانگ ٹاگاجیگ داگسا ایکا یود۔ 32خُدے ٹھیمسچادّی جاگّا لانگس زانے نینوہ پاگونّیانگ ای میرابسپوا چھادپا پھوگچیس اوسپا اینوگ زیرین چیازیرنا کھونگونی حضرت یُونسی چھوسشادکھانبو نیانتے، گیودپا چوس، ستوسّانگ یونا سانگ ٹاگاجیگ داگسا ایکا یود۔“
خُدے ود۔
33”سوجیگیانگ اوت توگستے واستے یا گورموے یوگا مابورّا، نانّگا یونگکھان تشانگمے تھونگچیسلا ود ستاگس سیکا بورین۔“
34”کھیوجے میگ نی زوگسّی اوت پو این۔ میگپو کھامزانگ یودنا، کھیوجے لوس گانگپو اودّی گانگین، اِین نانگ میگپو کھامزانگ میدنا، کھیوجے لوس گانگپو مونڈیگی گانگین۔ 35تانتان چوسشیگ، کھیوجارانگی نانّگا اوت یود سامکھانبو نگوسپوا مونڈیگتا مانّا؟ 36تا کالتیس کھیوجے زوگسپو گانگپو اودّی گنگستے ، کھاگچیگّانگ مونڈیگی نانّگا مالوسنا، تینے کھیوجیکا اوت ٹاگپو پھوگکھان تسوگسلا کھیوجے زوگسپو گانگپو لدانگشان گیورین۔“
حضرت عیسیٰ سی شریعتی لابکھان گون لا سکیون رجود چوا زادس۔
37حضرت عیسیٰ مسیح جالتا مول تشارّاچیگ، فریسی پاجیگی کھونّگا کھورانگی کھانگپا دونتانّگا سکیود جْوس پا حضرت عیسیٰ سی سکیودتے چوگتسے لدُونلا ژوگس۔ 38اتا اپو ے لوگثول نانگجین چھاگ ماسیلّا کھونگ دونتانگ دونّا ژوگچیسپو تھونگتے فریسی پا ہالاس۔
39تینے مسیح کھوا مولس، ”کھیوجا فریسی پاگونّی کورے تانگ تھالّی پھیلوگپو لاگمو چوروگ، اِین نانگ کھیوجے نانگکوگپو نابسیمس تانگ رانگدودّی گنگستے دوگ۔ 40کھیوجا سامپا میدکھان گُون پھیلوگ زادکھانبوے نانگکوگپوانگ زادتے مانوگا؟ 41کھیوجے سنینگنے گھوسدوم یودکھانگونلا چینبا تونگ، تینے کھیوجا نانگکوگ تانگ پھیلوگ نییسکونے لاگمو تھیا زادِین۔“
42”فریسی پاگون، کھیوجا تسامشیگی جیگسپا مییونگ۔ کھیوجاگونّی ماسالا تابسکھانّی یونگو چھونگشوگی نانگنیانگ رچوکھاگ چیگتا پھولدوگپا، اِین نانگ اوسپے ٹھیمسچاد تانگ خُدا یاشا چوچیس گُونلا سنانّگا بورّا میدوگ۔ کھیوجے تے شریعت گونلا سنانّگا چوچیس ماتشاد یونگّوے رچوکھاگپوانگ خُدا پھولگوس۔“
43حضرت عیسیٰ سی مولس، ”فریسی پاگون، کھیوجا تسامشیگی جیگسپا مییونگ۔ کھیوجے مجلِسی نانّگا سیواچانّی ناسّا ژالّانوگ، یانگ ٹھومسّی نانّگا میگونّی کانے سیوا تھوبچیسلا تھادّانوگ۔ 44کھیوجاگونلا تسامشیگی جیگسپا مییونگ، کھیوجاگون ستاگس میدکھانّی رومکھانگ ژوگس اینوگ، تے تشیتو ناسّابو نگوماستوگپا میگون تیکا ڈولتے تشیتو گیورّانوگ۔“
45شریعتی عالِم گونّی ٹونیچیگی حضرت عیسیٰ سی زیرس، ”لوبپونلے، ایزوگ مولتے نیرانگی نگاجانگ ٹھیلبا چوس۔“
46حضرت عیسیٰ سی لانسالس، ” شریعتی عالِم گون کھیوجا تسامشیگی جیگسپا مییونگ، کھیوجاگونّی کھور مینیانچیسّی شریعتی کھورو لچینتے میگونلا کالّانوگ، اِین نانگ یاتو چوستے تیگون ستاگچیسلا کھورانگونّی دزیگوانگ سکانّگا تھادّا مانوگ۔
47کھیوجا تسامشیگی جیگسپا مییونگ۔ کھیوجے پیغمبر گونلا قبرستان سیگدوگ کاگون کھیوجے اتا اپو گونّی سادس۔ 48کھیوجے کھیوجارانگی اتا اپو گونّی چوسکھانگونلا کھاچھامستے گواہ تانگدوگ چیازیرنا کھونگونی پیغمبر گون سادس یانگ کھیوجے کھونگونی قبرستان سیگس۔ 49تیبوے جاستے خُدے کھونگرانگی شیسرابسّی نانّگا کھیوجے سکورلا مولس، ’نگے کھونگّونّیکا پیغمبر گون تانگ رسُول گُون کالین ، کھونگونی کھاچیگ ساداین یانگ کھاچیگّا ناگھسباردو ستانین۔‘ 50تیبویپھیا دُنیا چھاگسپانے پھارلا پیغمبر تشانگمے سروک لینکھانّی نیادگالبو اینّا میرابسپویکا پھوگین، 51حضرت ہابِیلی سادکھانّے تانگستے بیت المقدِس تانگ قُربان تانگسای پارلا سادکھانّی باراگیی بُوژا حضرت زکریے تشوگپا۔ نگے لدینبا زیرّاد، تے جونگکھان تشانگمے چھادپابو ای میرابسپویکا پھوگین۔“
52” شریعتی عالِم ، کھیوجا تسامشیگی جیگسپا مییونگ۔ کھیوجے خُدے شیشیسّی لامبو واستے بوردوگ، کھیوجارانگون تینانّگا چھا میدوگ ماتشاد تینانّگا چھین یودکھانگونلا گاگسکییل تانگدوگ۔“
53-54حضرت عیسیٰ سی تیکانے سکیود زانے شریعتی عالِم تانگ فریسی پا تشانگما ثو یونگس پاسانگ کھونّگا سکیونجان ٹیوا مانگپو ٹیستے کھونگ کھادچوگچیسّی سونڈوس چوس۔
လက္ရွိေရြးခ်ယ္ထားမွု
لوکا 11: LBJNT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
Ladakhi Bible by The Love Fellowship is licensed under Creative Commons Attribution-ShareAlike 4.0 License.