Luka 4
4
Nzə-tɨmbɨrha a kana Yesu ka kadawe
1Beetɨ ite mye ɗa Yesu batisɨmatə a gbɨnuwo Urdun, Pitɨ Ɗəmɗəmta Həmɨnpwa nee ɓwaa kan, Pitɨngɨn nə zəkan a kaake. 2Bətə bəwtə fwat Shetan Nzə-tɨmbɨrha ndi həme da pɨle ji-dwatə nee dɨ kanarən. A vor bətɨngɨn kat ndaa zɨmshe. Gə-angɨn myatə a gən kɨr-kɨr.
3Də Nzə-tɨmbɨrha a san, “Anda hyenə Nze da Həmɨnpwa, byeli ka faraa maa nda gəə buroditi.”
4Yesu a luwa a san atɨ, “Mye doro vor Malɨmtɨ Ɗəmɗəmtə atɨ, ‘Aa ka buroditə ɓəmbə ɓwaara ɓa nza ka myentə.’ ”#4.4 Naasə: Gɨraha 8.3.
5Beetɨ angɨn Nzə-tɨmbɨrha a zə ka Yesu a nə haa gbyalatə, də a hangɨn nda bɨlən həmnə vɨrate kat. 6Nda sa Yesu atɨ, “Piltɨ vɨratə kat ka fukasə hɨn ɓa vu, hɨnggi nə mye vitɨrən a tɨfa gə na və ma na dɨ mwo. 7Gə-angɨn na vu shingɨn hye kana kale-gbəətə.”
8Yesu a san atɨ, “Malɨmtɨ Ɗəmɗəmta Həmɨnpwa sa atɨ, ‘Ndi Həmɨmiye a Həmɨnpwatɨ dəw nə hiɗə hye ɓa kalan-gbəətə, sɨnə ɓəmbə hye ɓa koddən.’#4.8 Naasə: Gɨraha 6.13.”
9Də Nzə-tɨmbɨrha a mɨnaa zəkan a vor Urshelima, nda kangdən a nə fintɨ Shafe, nda san, “Anda hyenə Nze da Həmɨnpwa, saragə haa hye kangədə. 10Gə mye doro vor Malɨmtɨ Ɗəmɗəmtə atɨ,
“ ‘Ndi ɓa ɗɨkdə malyenye dan
təna kɨtta pepe.
11Tən ɓa mbalta a pwa
gə ɓe fukə njiya
mbwayinga a lyeb fara.’#4.11 Naasə: Dyemshe 91.11,12.”
12Yesu a luwa a san atɨ, “Malɨmtɨ Ɗəmɗəmta Həmɨnpwa sa atɨ, ‘Ɓe kana ndi Həmɨmiye a Həmɨnpwatɨ dəw.’#4.12 Naasə: Gɨraha 4.12.”
13Naya Nzə-tɨmbɨrha ɓe kana Yesu dɨ təfəgye som-som kat mbəə, nda ɗakan a muɗə ta kula a fərə.
Yesu a mɨnə Galili
(Matta 4.12-17; Markus 1.14-15)
14Beetɨ angɨn Yesu a mɨnə vor njiya Galili, gəta Pita Həmɨnpwa nee ɓwaa kan, le dan a ngguro a mbəgə hee. 15Nda tiya ta kəndəshe a vəni kəndəshe da Yawude, ɓwaare kat ta ɓondirən.
Mya kwo Yesu a Nazarat
(Matta 13.53-58; Markus 6.1-6)
16Yesu a zə vɨrasən Nazarat, a haa nda ndukodə. A fərə piyatɨ da Yawude, nda pɨrə vɨnə kəndəshe darən ɓətɨ nda duwa ɗa. Ite ndi ɓe maɗə kangə ɓa bəlshe, 17mya vən malɨmta kpale Ishaya a i sɨlara mya dɨ tɨfɨɗə. Nda pararə a pilarə, nda niyə a na haa ndi ɓa bələ. Nda tiya bəlshe atɨ,
18“Pitɨ da Həmɨnpwa nə ke,
gə ndi yaɓwari
gə na hiwa ji-poritə lə feme da Həmɨnpwa.
Nda lyanari gə na hiwa
myee nza vor gbərəwe atɨ,
kɨsawne mbəə,
myee weli mgban diingrən ɓa wonə,
myee a vor tənətə mgban
a ɗɨm piyatə,
19nda lama ka sate atɨ
fərə mbəha da Həmɨnpwa shi.”#4.19 Naasə: Ishaya 61.1-2.
20Nda tɨfɨggə malɨmtə a və ma dɨ nidə vɨnə kəndəshe a dɨ nza. Ɓwaare kat a pukən diingrən. 21Nda tiya satə sarən atɨ, “Supo ləməgyee hwuna kɨlə na bələ vor malɨmtə naa.”
22Də a hangɨn ɓwaare a tiya byele ta humwa Yesu, tən ta ɗa ndəle ka wule kormi fyeme dɨ dɨma dɨ kwaamɨngɨn. Təna sa, “Aa nze da Yusufu nə a ma?”
23Yesu a sarən, “Hɨn leyə atɨ hwun ɓa boyi la ɓwaare a mbadən səɗə atɨ, ‘Nzə-ɓwatə a ɓwaa nəngɨn ka nggume dan.’ Sə mgban hwuna dɨ boyi atɨ naa gwadə vɨrashi Nazarat ɓətɨ na gwadəha a Kafanawum.”
24Nda sarən, “Diyalə mya mbadən səɗə atɨ kpale tam ka fukatə a vɨrasən. 25Sə mgban a nzata kpala mya wa atɨ Iliya nggamse nee də hananang a vor Israila a ite haa a kpamə gə ɓoole aa njima a vor wantə mwaakɨn ka gbɨle, myatə a fuka kɨr-kɨr a vor njiyangɨn. 26Kat ka angɨn myaa lyen Iliya a haka iti nggamsati a vor Israila, shezə a haka nggamsate a Zarefat a vor njiya Sidon mya lyentən. 27Sə mgban, a nzata kpala mya wa atɨ Ilisha, ji-dagde nee furi-furi a vor Israila, kat ka angɨn myaa dɨmdə dagde dɨ sɨtɨ ama a vor Israila, Naaman nə ɓəmbə, dɨ njiya Siriya.”
28Myee kat a vɨnə kəndəshe ɓe kɨl ləngɨn, təna naa pas ka muune. 29Təna maɗə a omrən gə vor vɨnə kəndəshe a dɨmdən gə vor vɨratɨngɨn. Ta nggəltən a zəkan a haa mgbənge a beetɨ vɨratɨngɨn gə təna ləkədən a goha. 30A hangɨn Yesu a woyo wakasərən a dɨmə a muɗə.
Yesu a dɨmdə pɨla nzə-dwatə
(Markus 1.21-28)
31Beetɨ itɨngɨn, Yesu a pɨrə a muɗə a haa som a Kafanawum a vor njiya Galili. A fərə piyatɨ da Yawude nda pɨrə vɨnə kəndəshe ta kənərənshe. 32Təna ɗa ndəle ka wule Kənshe dan, gə a vor kəndəshe dan nda bɨlərən atɨ sɨnə ka gətə. 33A vor vɨnə kəndəshingɨn, ama nə də ka pɨla nzə-dwatə kan. Mangɨn a maddə kormɨngɨn a wa kawahəme a sa, 34“Ə'əi! Yesu dɨ Nazarat, mɨnə pedəm kəw hye ɓə shi ɓa tənəə denə? Di hɨn leera, hyenə Ma ɗəmɗəme da Həmɨnpwa.”
35Yesu a mgbaltən a gɨrarən, a san atɨ, “Gbə kwaamɨnga. Dɨmgə sɨsən!” Pɨla nzə-dwatɨngɨn a ɗongdə mangɨn a njiya a humwa ɓwaare kat, nda ɓə shee dɨmə a ɗakan asə aa gən.
36Ɓwaaree a hangɨn kat a ɗa ndəle, tən ta ɗiyəsə atɨ, “Ndo wule kəndəshinə 'ye? Ka gətə ka nyerətə nda dɨ gɨra pɨle ji-dwatə a dɨmdərən gə sɨtɨ ɓwaare.” 37Gə ləngɨn le da Yesu a ngguro a mbəgə njiya hangɨn kat.
Yesu a ngguro ɓwaare hananang gə ootə
(Matta 8.14-17; Markus 1.29-34)
38Yesu a ɗaka vɨnə kəndəshingɨn a muɗə hwoda shewtɨ Siman.#4.38 Siman tɨnə nə a Yesu a nggəɗən kwake atɨ Bitrus. Nda dɨ parə kote bi ka ootɨ haɓi kpalamye, təna nyisən a nda gwadə. 39Nda kangə nəngrə a dɨmdə ootɨngɨn, a hangɨn ngga maɗə dwat a vərən sɨzɨmtə.
40Ka kaade, fəre ɓe poro kpalam, mya payadə myee ka zərgi ootə som-som a shikarən a haka Yesu, nda parən hyeɗə-hyeɗə ka tɨfəngɨn, təna piyagə ootɨngɨn kat. 41Sə mgban pɨle ji-dwatə a dɨmgə sɨtɨ ɓwaare hananang ka kawahəme a kwaamɨngrən, tən ta sa atɨ, “Hyenə Nze da Həmɨnpwa.” Də Yesu a gɨra ji-dwatɨngɨn a kərərən byele, gə tən leerən atɨ sɨnə Ma Həmɨnpwa a Yaɓwarən.
42Ka haa kɨɗatə Yesu a maɗə dɨsərən a muɗə haa taa ama də. Ɓwaare a dɨmə a muɗə ɨlsən. Ite tən ɓe pan, tənaa mwa təna ɗakan nda muɗə a haa.
43Nda sarən, “Ɓə nza mbak-mbak na wudə ehee mgban a hiwa ka ləmə feme a nə həmne da Həmɨnpwa. Gə ləngɨn Həmɨnpwa a lyanari.” 44Gə-angɨn Yesu a pɨrə humwa ta hiwa ka lə feme da Həmɨnpwa a vəni kəndəshe a njiya Yawudiya.
လက္ရွိေရြးခ်ယ္ထားမွု
Luka 4: bcy
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.