Luke 10
10
Sa talai ira na tisaipeli e lewe vitusagavulu ko Jisu, me ra vunau ka kitaka na caka-mana e so, 1-16. Sa vakavulici ira me ra yalomalumalumu, 17-20. Sa reki ko Jisu e na vuku ni lewa i Tamana, 21-24. Sa vakavulica e dua na vu-ni-vunau, 25-37. Sa vunauci Marica, ka dokai Meri, 38-42.
1IA ni sa oti na veika o qo, sa qai lesia ko na Turaga e lewe vitusagavulu tani, ka talai ira me ra lako yarua e matana ki na veikoro kecega kei na veitikina sa via lako kina ko koya.
2O koya o qo sa kaya kina vei ira, E dina ni sa vakalewe na yabaki, a ra sa lewe lailai ga nai vakatau-ni-were; o koya mo dou qai masuti koya nai Taukei ni were, me tala yani e so nai vakatau-ni-were ki na nona were. 3Dou lako: raica, au sa talai kemudou yani me vaka na lami e na kedra maliwa na wolifa. 4Kakua ni kauta na taga i lavo, se na taga i kakana, se nai vava: ka kakua ni veikidavaki kaya e dua e na gau-ni-sala.
5Ia e na vale kecega dou sa curu kina, kaya mada eliu, Me vakacegui na vale o qo. 6Ia kevaka sa tiko kina na tamata sa yaga me vakacegui, ena toka vei koya na nomudou veivakacegui; ia kevaka e sega, ena lesu tale vei kemudou. 7Ia e na vale ko ya dou tiko kina, dou kania ka gunuva na veika era sa solia; ni sa dodonu me soli vua na tamata daucakacaka na kenai voli. Dou kakua ni veitokiyaki ki na veivale.
8Ia e na koro kecega dou curu kina, a ra sa vakacegui kemudou, dou kania na veika sa tau ki na matamudou: 9ka vakabulai ira na tauvi-mate era sa tiko kina, ka kaya vei ira, Sa volekati kemudou na matanitu ni Kalou. 10Ia na koro kecega dou sa curu kina, a ra sa sega ni vakacegui kemudou, dou lako ki na kena veisala, ka kaya, 11A kuvu-ni-soso ni nomudou koro, sa kabiti keimami, keimami sa quaraka tale vei kemudou; ia dou kila dina ga na ka o qo, ni sa volekati kemudou na matanitu ni Kalou. 12Ia kaʼu sa kaya vei kemudou, ni na ca vakalailai ko Sotoma e na siga ko ya, ena ca vakalevu na koro ko ya.
13E ca vei iko, Koresini! e ca vei iko, Peciseita! ia ke sa caka mai Teiri kei Saitoni na caka-mana ka caka vei kemudrau, ke rau sa veivutuni makawa, ka tiko sobu e nai sulu taqarotu kei na dravusa: 14ia ena ca vakalailai ko Teiri kei Saitoni e na veilewai, oi kemudrau, drau na ca vakalevu. 15O iko talega, Kaperinaumi, o sa laveti cake ki lomalagi, o na biu sobu ki etesi.
16O koya sa rogoci kemudou, sa rogoci au; ia ko koya sa beci kemudou, sa beci au; ia ko koya sa beci au, sa beci koya sa talai au mai.
17A ra sa tale mai ko ira na lewe vitusagavulu e na marau, ka kaya, Turaga, era sa guca vei keimami na tevoro, e na vuku ni yacamu. 18A sa kaya ko koya vei ira, Au a raici Satani ni sa lutu sobu mai lomalagi me vaka na liva. 19Raica, au sa solia vei kemudou na kaukauwa mo dou butuki ira loa na gata kei na batibasaga, ka mo dou rawa na kaukauwa kecega ni meca; ia ena sega sara e dua na ka me vakacacani kemudou. 20Ia dou kakua ni reki e na ka o qo, ni sa guca vei kemudou ko ira na yalo; ia ko koya o qo mo dou reki kina, ni sa volai na yacamudou mai lomalagi.
21E na tiki-ni-siga ko ya, sa reki sara kina ko Jisu e na yalona, ka kaya, Au sa vakavinavinaka vei iko, Tamaqu, na Turaga ni lomalagi kei vuravura, ni ko sa vunia na veika o qo vei ira navuku kei na yalomatua, o sa vakatakila ga vei ira na gone lalai: sa vakaoqo, Tamaqu, ni sa vinaka e matamu me vakaoqo. 22Sa solia mai vei au ko Tamaqu na ka kecega; ia ka sega e dua tale e kila se ko cei na Luvena, a Tamaqu duaduaga; se ko cei na Tamaqu, a Luvena duaduaga, kei koya sa vinakata kina ko na Luvena me vakatakilai koya.
23A sa vuki vei ira na tisaipeli, ka kaya lo, Sa kalougata na mata sa raica na veika dou sa raica; 24niʼu sa kaya vei kemudou, era lewe vuqa na parofita kei na tui era a via raica na veika dou sa raica, a ra a sega ni raica; me ra rogoca talega na veika dou sa rogoca, a ra a sega ni rogoca.
25Ka raica, sa dua na vu-ni-vunau sa tu cake, ka vakatovolei koya, ka taroga, Vakavuvuli, a cava meʼu kitaka meʼu rawata kina na bula tawa mudu? 26A sa kaya vua ko koya, A cava sa volai ena vunau? a cava ko sa wilika? 27A sa vosa ko koya, ka kaya, Mo lomani Jiova na nomu Kalou e na lomamu taucoko, kei na yalomu taucoko, kei na nomu kaukauwa taucoko, kei na nomu nanuma kecega; kei na kai nomu me vakataki iko. 28A sa kaya vua ko koya, O sa vosa vakadodonu; kitaka o qo, o na bula kina.
29Ia ko koya, ni sa via vakadonui koya, sa tarogi Jisu, O cei na kai noqu? 30A sa vosa ko Jisu, ka kaya, Sa dua na tamata sa lako sobu mai Jerusalemi ki Jeriko, a sa sika-botea na daubutako e so, a ra sa luvata tani na nonai sulu, ka vakamavoataka, ka lako tani, a ra biuta ka kolai mate. 31A sa lako walega mai e na sala ko ya e dua na bete; ia ni sa raica, sa lako vakatikitiki tani. 32Sa vaka talega kina e dua na luve i Levi, ni sa yaco ki na yasana ko ya, sa lako mai ka raica, a sa qai lako vakatikitiki tani. 33A sa dua na kai Samaria, ni sa lako voli, sa yaco vua; ia ni sa raica, sa lomana sara, 34a sa lako mai, ka vauca na nona vanua sa mavoa, ka livia kina na waiwai kei na waini, ka vakavodoka ki na nona manumanu, ka kauta ki na bure ni vulagi, ka karoni koya. 35Ia e na sabogibogi, ni sa lako tani, sa taura e rua nai lavo, ka solia vua nai taukei ni bure, ka kaya vua, Mo karoni koya; ia na ka tale ko na kuria, niʼu sa lako tale mai, au na sauma vei iko. 36Mo lewa mai, se ko cei vei iratou na lewe tolu o qo, sa kai nona ka sikabotei ira na daubutako? 37A sa kaya ko koya, O koya ga sa lomana. Sa qai kaya vua ko Jisu, Mo lako ko iko, ka kitaka vakakina.
38A sa yaco, ni ratou sa lako voli, sa curu ko koya ki na dua na koro lailai: a sa kauti koya ki na nona vale e dua na yalewa na yacana ko Marica. 39A sa dua na tacina na yacana ko Meri, sa tiko talega e na yava i Jisu, ka rogoca na nona vosa. 40Ia ko Marica sa veidreyaki, ni sa vakarau vakalevu; a sa lako mai, ka kaya, Turaga, o sa wele ga ni sa laivi au na taciqu meʼu vakarau duaduaga koi au? kaya mada vua me mai vukei au. 41A sa vosa ko Jisu, ka kaya vua, Marica, Marica, o sa lomaocaoca ka veivakananumayaki e na vuku ni ka e vuqa: 42ia ka sa dua bauga na ka e yaga: a sa digitaka ko Meri nai votavota vinaka, a ya ena sega ni kau tani vua.
လက္ရွိေရြးခ်ယ္ထားမွု
Luke 10: FIJ1864
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
First full Bible in the Fijian language © British and Foreign Bible Society, 1864.