Luke 11
11
Sa vakavulici ira na nona tisaipeli ko Jisu me ra daumasu, 1-13. Sa vakasava tani e dua na tevoro galu, 14-28. Sa vakavulici ira na tamata, ka vunauci ira na Farisi, kei ira na vu-ni-vola, kei ira na vu-ni-vunau, 29-54.
1A SA yaco, ni sa masu ko koya e na dua na yasana, ni sa qai tinia, sa kaya e dua na nona tisaipeli vei koya, Turaga, vakavulici keimami me keimami masu, me vaka sa vakavulici ira talega na nona tisaipeli ko Joni.
2A sa kaya vei ira ko koya, Ni dou sa masu, dou kaya, Tama i keimami mai lomalagi, Me vakarokorokotaki na yacamu. Me yaco na nomu lewa. Me caka na nomu veitalia e vuravura me vaka mai lomalagi. 3Solia mai vei keimami e na siga yadua na kakana e yaga vei keimami 4Ia kakua ni cudruvi keimami e na vuku ni neimami valavala ca: ni keimami sa sega talega ni cudruva e dua sa valavala ca vei keimami. Ia kakua ni kauti keimami ki na vere; ka vakabulai keimami mai na ca.
5A sa kaya ko koya vei ira, O cei vei kemudou kevaka sa dua na wekana, a sa lako vua e na lomaloma-ni-bogi, ka kaya vua, Na wekaqu, solia mai vei au meʼu taura e tolu nai buli madrai; 6ni sa dua na wekaqu sa curu mai vei au ni sa lako tu, ia ka sa sega e dua na ka vei au meʼu tauca e matana? 7Ena qai vosa ko koya mai vale, ka kaya, Kakua ni vakaocataki au; sa sogo tu na katuba, a keitou sa davo kei iratou na luvequ e nai mocemoce; au sa sega ni tu cake rawa meʼu solia vei iko. 8Au sa kaya vei kemudou, Kevaka e bese ni tu cake ka solia vua, e na vuku ni sa wekana; ia e na vuku ni sa cikeva tiko ko koya, ena tu cake ka solia na ka ena rauti koya. 9Au sa kaya talega vei kemudou, Dou kerekere, ka na soli vei kemudou; dou vakasaqara, ka dou na kunea; dou tukituki, ka na dolavi vei kemudou: 10ni sa rawata ko koya yadua sa kerekere; ka sa kunea ko koya sa vakasaqara; ia ena dolavi vua sa tukituki.
11Ko cei vei kemudou, kevaka sa kere madrai vua na tamana ko na gone, ena solia vua e dua na vatu? kevaka na ika, ena solia vua beka e dua na gata mei sosomi ni ika? 12se kevaka ena kere yaloka, ena solia beka vua e dua na batibasaga? 13Ia kevaka dou kila, koi kemudou sa yaloca, me solia na ka vinaka vei ira na luvemudou; sa qai dina vakalevu cake, ni na solia na Yalo Tabu ko koya na Tama vakalomalagi vei ira sa kerekere vua.
14A sa vakasava tani tiko e dua na tevoro ko koya, a sa galu. Ia ni sa lako tani na tevoro, sa vosa na galu; a sa kidacala ko ira e lewe vuqa. 15A sa kaya e so vei ira, Sa vakasavi ira na tevoro ko koya e na kaukauwa i Pielisipupi na nodra turaga na tevoro. 16Ia ka so tale, era sa vakatovolei koya, ka taroga e dua nai vakatakilakila mai lomalagi. 17Ia ko koya, ni sa kila na nodra nanuma, sa kaya vei ira, A matanitu yadua sa veisei vakai koya, ena vakarusai; ia na vale sa veisei vakai koya, ena bale: 18kevaka sa veisei vakai koya ko Satani, ena tu dei vakaevei na nona matanitu? ni dou sa kaya kaʼu sa vakasavi ira na tevoro e na kaukauwa i Pielisipupi. 19Ia kevaka kaʼu vakasavi ira na tevoro e na kaukauwa i Pielisipupi, era vakasava e na kaukauwa i cei ko ira na kai nomudou? o koya era na lewai kemudou kina ko ira o qo. 20Ia kevaka kaʼu vakasavi ira na tevoro e nai qaqalo ni Kalou, sa qai yaco dina mai vei kemudou na matanitu ni Kalou.
21Ni sa dua na qaqa sa vakaiyaragi tu sa vakatawa na nona vale, sa tu vinaka na nonai yaya: 22ia ni sa dua tani sa uasivi vei rau e na qaqa sa lako vakaivalu, ka rawai koya, sa kauta tani na nonai yaragi ni valu kecega sa vakararavi kina, a sa vota nai toki mai vua. 23O koya sa sega ni totaki au, sa to tani: ia ko koya sa sega ni kumuna vata vei au, sa duibiubiuta.
24Ni sa lako tani e na tamata na yalo tawa-savasava, sa daulako voli e na vanua dravuisiga me vakasaqara nai vakavakacegu: ia ni sa tawa kunea, sa daukaya, Au na lesu tale ki na noqu vale kaʼu a lako tani maikina: 25ia ni sa tadu, sa kunea ni sa tataviraki ka vakaiukuukutaki. 26Sa qai daulako ko koya, ka kauta vata kaya e lewe vitu tale na yalo sa uasivi vei koya e na ca; a ratou sa curuma ka tiko kina: a sa ca vakalevu emuri na tamata ko ya, ka ca vakalailai eliu.
27A sa yaco, ni sa vosa tiko vakaoqo, sa dua na yalewa maivei ira na lewe vuqa sa tabalaka cake na domona, ka kaya vua, Sa kalougata na kete ko a sucu maikina, kei na sucu ko a sucuma. 28A sa kaya ko koya, Ia ka sa kalougata vakalevu ko ira era sa rogoca na vosa ni Kalou, ka vakabauta.
29Ia ni ra sa soqoni vata na tamata ka veidrigidrigi, sa vakatekivu ko koya me kaya, Ai tabatamata ca o qo: era sa dauvakasaqara nai vakatakilakila; ia ena sega nai vakatakilakila me soli kina, a ya ga nai vakatakilakila i Jona na parofita. 30Ni vaka sai vakatakilakila ko Jona vei ira na kai Ninive, ena vaka talega kina na Luve ni tamata vei ira nai tabatamata o qo. 31Ena tu cake na radi ni ceva ka vakadinadinataka na nodra cala nai tabatamata o qo, e na veilewai; ni ka lako mai ko koya mai na yasana vakayawa sara e vuravura me rogoca na vuku i Solomoni; ka raica, sa dua eke sa uasivi cake vei Solomoni. 32Era na tu cake na kai Ninive, ka vakadinadinataka na nodra cala nai tabatamata o qo, e na veilewai; ni ra sa veivutuni e na vuku ni vunau i Jona; ka raica, sa dua eke sa uasivi cake vei Jona.
33Sa sega e dua sa vakacaudreva na cina, me laʼki vakatikora e na tikina vuni, se e ruku ni vakarau ni sila, e na kenai tutu ga, me ra raica na kena rarama ko ira sa curu mai. 34Ia na cina ni yago na mata: ia sa rarama kina na yagomu taucoko, kevaka e vinaka na matamu; ia kevaka e ca, sa butobuto kina na yagomu taucoko. 35O koya mo qai vakaraica de sa butobuto mai na rarama sa tu e lomamu. 36O koya o qo, kevaka sa rarama na yagomu taucoko, ka sega na tikina sa butobuto, ena rarama kece sara, me vaka ni sa cinavi iko na cina sa caudre vinaka sara.
37Ia ni sa vosa tiko ko koya, sa sureti koya e dua na Farisi me rau kana kaya e nai vakasigalevu: sa qai curu ko koya, ka tiko sobu me kana. 38Ia ni sa raica ko na Farisi, sa kidacala ni sa vakasigalevu ko koya ka sega ni vuluvulu mada eliu. 39Sa qai kaya na Turaga vei koya, Oi kemudou na Farisi, dou sa qai dauvakasavasavataka na bilo kei na dari etaudaku, ia na lomamudou sa sinai e na daubutako kei nai valavala ca. 40A yalowai koi kemudou, e sega beka ni cakava na tikina eloma ko koya sa cakava na tikina etaudaku? 41Ia mo dou solia na ka ni loloma me vaka dou sa rawata, ka raica, ena savasava vei kemudou na ka kecega. 42Ia e ca vei kemudou, na Farisi! ni dou sa solia nai katini ni botebotekoro, kei na co vakaoqo kecega, ia na lewa dodonu kei na loloma ni Kalou dou sa biuta laivi ga; o qo e kilikili kei kemudou me kitaka, me kakua talega ni biu na veika ko ya. 43E ca vei kemudou, na Farisi! ni dou sa dauvinakata nai tikotiko ni qase e na veivale ni lotu, kei na veikidavaki e na veirara ni veivoli. 44E ca vei kemudou, na vu-ni-vola kei na Farisi, na dauveivakaisini! ni dou sa vaka na veibulubulu sa tawa rairai, ka sa lako voli ko ira na tamata e deladra ka tawa kila.
45Sa qai vosa e dua na vu-ni-vunau vei koya, ka kaya, Vakavuvuli, ni ko sa vosa vakaoqo ko sa beitaki keitou talega. 46Sa qai kaya ko koya, E ca vei kemudou talega, na vu-ni-vunau! ni dou sa vakaocataki ira na tamata e nai colacola e dredre sara ni colati, ia dou sa sega ni tara nai colacola ko ya e na dua na nomudoui qaqalo. 47E ca vei kemudou! ni dou sa tara na nodra veivale ni bulubulu na parofita, a sa vakamatei ira ko ira na nomudou qase. 48E dina ya ni dou sa tukuni kemudou ni dou sa vinakata na nodrai valavala na nomudou qase; ni ra a vakamatei ira, ka dou sa tara na veivale ni nodrai bulubulu. 49O koya o qo sa kaya kina na vuku ni Kalou, Au na tala vei ira e so na parofita kei nai apositolo, ia e so vei ira era na vakamatea ka vakacacana: 50me ra tarogi kina nai tabatamata o qo, e na kedra dra na parofita kecega ka vakadavei mai nai vakatekivu kei vuravura; 51mai na dra i Epeli ka yaco ki na dra i Sakaria, o koya ka vakamatei e na tadrua ni cabocabo-ni-madrali kei na vale ni soro; au sa kaya vakaidina vei kemudou, Ena tarogi kina nai tabatamata o qo. 52E ca vei kemudou, na vu-ni-vunau! ni dou sa kauta tani nai dola ni ka vuku: dou sa sega ni curu kina koi kemudou, ia dou sa tarovi ira talega era sa curu tiko kina.
53Ia ni sa kaya tiko vei ira ko koya na veika o qo, sa vakatekivu me cikeva vakalevu na kere vosa vua ko ira na vu-ni-vola kei ira na Farisi me vuqa na ka me kaya; 54a ra sa lawakitaka, a ra sa qara me ra taura e dua na ka mai na gusuna, me ra vakau-cacataki koya kina.
လက္ရွိေရြးခ်ယ္ထားမွု
Luke 11: FIJ1864
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
First full Bible in the Fijian language © British and Foreign Bible Society, 1864.