متّانین رئوایت 7
7
حؤکم اله‌مه‌یئن
1حؤکم اله‌مه‌یئن، سئزه ده حؤکم اولماز. 2چونکی نه حؤکم ائنن موحاکئمه الئیه‌سئز، اونونان دا موحاکئمه اولوناجاقسیز؛ و هانسی اؤلچی ائنن اؤلچه‌سئز، او اؤلچی ائنن ده سئزه اؤلچوله‌جک. 3نه اوچون قارداشینین گؤزونده‌کی چؤپی گؤرورسَن، آمّا اؤز گؤزونده‌کی آغاج کؤتوهونی سِچمئرسن؟! 4اؤز گؤزونده اولان آغاج کؤتوهونی گؤرمه‌دئیئن حالدا، نجه قارداشینا دئیه‌بئلرسن: ”قارداش، قوی گؤزونده‌کی چؤپی چیخاردیم؟!“ 5ای ائکی اوزلی! اَوّل آغاج کؤتوهونی اؤز گؤزوندن چیخارت، او زامان آیدین گؤررسن کی، چؤپی قارداشینین گؤزوندن نجه چیخارداسان.
6موقدّس سایدیغیز شیلری ائتلره ورمه‌یئن و مئروارئلرئزی دونوزلارین قاباغینا آتمایین، اولمایا کی اولاری آیاقلاری آلتیندا پایمال اله‌سئنلر و دؤنوب سئزی ده پارچالاسینلار.
تاریدان ائسته‌یئن
7ائسته‌یئن، سئزه ورئله‌جک؛ آختارین، تاپاجاقسیز؛ قاپینی دؤیون، سئزه آچیلاجاق. 8چونکی هر ائسته‌ین آلیر، آختاران تاپیر و قاپینی دؤیَنه، آچیلیر. 9سئزدن کئم وار کی، اوغلی اوندان چؤرک ائسته‌سه، اونا داش ورسئن؟! 10و یا بالیق ائسته‌سه، اونا ائلان ورسئن؟! 11ائندی اگر سئز کی شرورسوز، بئلئرسئز کی نجه اؤولادلاریزا یاخشی هدئیّهلری وره سئز، نه قدر آرتیق، گؤیده کی آتاز اوندان ائسته‌یَنلره یاخشی شیلر وره‌جک. 12بونا گؤره، آداملار ائنان اِله رفتار اله‌یئن کی، ائسته‌یئرسئز اولار دا سئز ائنن اله رفتار اله‌سئنلر. چونکی تؤورات و پیغمبرلرئن یازیلاری بودور.
دار قاپی، گنئش قاپی
13دار قاپیدان ائچه ری گئرئن؛ چونکی هلاکته آپاران قاپی گنئش و یول اِنلی دئر؛ بو قاپیدان گئرنلر چوخدور. 14حیاتا آپاران قاپی دار و یول اِنسئزدئر؛ بو یولی تاپانلار آزدیرلار.
آغاج و میوه‌سی
15یالان اولان پیغمبرلردن اؤزوزی اوزاق ساخلایین کی، یانیزا قویون جئلدئنده گلئرلر، آمّا باطئنده وحشی قورددورلار. 16سئز اولاری میوه‌لرئندن تانییاجاقسیز. مگر تئکانلاردان اوزوم و گَوَندن انجئر دَررلر؟! 17بوجور دا، هر یاخشی آغاج یاخشی میوه ورَر؛ آمّا پئس آغاج پئس میوه گتئرر. 18یاخشی آغاج پئس میوه وره‌بئلمز؛ پئس آغاج دا یاخشی میوه وره‌بئلمز. 19یاخشی میوه ورمه‌ین هر آغاج کسئلر و اودا آتیلار. 20بله ده، یالان اولان پیغمبرلری میوه‌لرئندن تانییاجاقسیز.
21منه ”یارب، یارب“ دئین هرکس گؤیلرئن پادشاهلیغینا گئرمیه‌جک. اورایا آنجاق او آداملار گئره‌جکلر کی، گؤیده‌کی آتامین ائراده‌سئنه عمل اله‌یئرلر. 22او گونده بئر چوخی منه دئیه‌جک: ”یارب، یارب، مگر بئز سنئن آدیندا نبئلئک اله‌مه‌دئک؟! مگر سنئن آدیندا ائبلئس روحلاری ائنسانلارین ائچئندن قوومادیق؟! مگر سنئن آدیندا بئر چوخ مؤجوزه اله‌مه‌دئک؟!“ 23او زامان اولارا دئیه‌جه‌یم: ”من سئزی هچ واخت تانیمامیشام. مندن اوزاقلاشین، ای پئس ائش گؤرنلر.“
مؤحکم بونؤوره
24بله ده، منئم بو سؤزلرئمی کئم اشئدئب اولارا عمل اله‌سه، اونی او آغیلّی آداما بنزه‌دئرم کی، اِوئنی داش اوستونده تئکدی. 25یاغیش یاغدی، سللر گلدی، یللر اسدی و او اِوه هوجوم اله‌دی، آمّا اِو اوچمادی. چونکی بونؤوره‌سی داش اوستونده قویولموشدی. 26آمّا هر کس منئم بو سؤزلرئمی اِشئدئر و اولارا عمل اله‌مئر، بئر آغیلسیز آداما بنزه‌یئر کی، اِوئنی قوم اوستونده تئکدی. 27یاغیش یاغدی، سللر گلدی، یللر اسدی و او اِوه هوجوم اله‌دی، و اِو اوچدی و اونون خارابالیغی چوخ بؤیوک ائدی.»
28عئسا بو سؤزلری قورتاراندان سورا، خالق اونون تعلئمئندن مات قالمیشدی. 29چونکی عئسا اولارا تؤورات موعلّئملری کئمی یوخ، قودرت ائنن تعلئم ورئردی.
လက္ရွိေရြးခ်ယ္ထားမွု
متّانین رئوایت 7: CAB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
@ 2024 Korpu Company