متّانین رئوایت 6
6
صدقه ورمک
1دئقّت اله‌یئن کی، یاخشی عمللرئز خالقین گؤزی قاباغیندا، اؤزوزی اولارا گؤرسدمک اوچون اولماسین. چونکی اوندا گؤیلرده اولان آتازین یانیندا اجرئز اولمایاجاق.
2اونا گؤره، صدقه وردئیئن زامان، اونی شیپور ائنان جار چکمه، نجه کی، ائکی‌اوزلی آداملار، عئبادتگاهلاردا و کوچه‌لرده اله‌یئرلر، اله کی خالق اولاردان تعرئفله‌سئنلر. دوغروسونی سئزه دیئرم؛ اولار بوتون اجرلرئنی آلیبلار. 3آمّا سن، صدقه وردئیئن واخت، قویما سول الئن ساغ الئنئن نه اله‌دئیئنی بئلسئن. 4صدقن گئزلی اولسون؛ گئزلئنی گؤرن آتان دا سنه عوضئنی وره‌جک.
دوعا اله‌مک
5دوعا اله‌ینده ائکی‌اوزلی آداملار کئمئن اولما. چونکی اولار سِوئرلر کی، اؤزلرئنی آیری آداملارا گؤرسدمک اوچون، عئبادتگاهلاردا و کوچه‌لرئن آغزیندا دوروب، دوعا اله‌سئنلر. دوغروسونی سئزه دیئرم؛ اولار بوتون اجرلرئنی آلیبلار. 6آمّا سن، دوعا اله‌دئیئن واخت، اؤز اوتاغینا گئر، قاپینی باغلا و گؤزلردن گئزلی اولان آتانا دوعا اله. گئزلئنی گؤرن آتان دا سنه عوضئنی وره‌جک.
7دوعا اله‌دئیئن واخت، بوتپرستلر کئمئن بوش سؤزلر دمه؛ چونکی اولار اله گومان اله‌یئرلر کی، سؤزلرئنئن چوخلوغونا گؤره دوعالاری اشئدئله‌جک. 8سئز اولارا اوخشامایین؛ چونکی آتاز سئزئن نه‌لره مؤحتاج اولدوغوزی، اوندان ائستمه‌دن قاباق، بئلئر.
9بونون اوچون بله دوعا اله‌یئن:
ای گؤیلرده اولان آتامیز،
سنئن آدین موقدّس اولسون.
10سنئن پادشاهلیغین گلسئن.
سنئن ائسته دئیئن، گؤیده اولدوغی کئمی،
یرده ده اولسون.
11گونده لئک چؤره یئمئزی بو گون بئزه ور.
12و بئزئم بورجلاریمیزی بئزه باغیشلا،
نجه کی، بئز ده، بئزه بورجلی اولان هر آدامی باغیشلاییریق.
13و بئزی ائمتاحانا چَکمه،
بلکی شردن خئلاص اله.
چونکی سلطنت، قودرت و جلال ابده کئمی سنئندئر. آمئن.
14چونکی اگر سئز ائنسانلارین تقصئرلرئنی باغیشلایاسیز، گؤیلرده اولان آتاز دا سئزی باغیشلار. 15آمّا اگر ائنسانلارین تقصئرلرئنی باغیشلامایاسیز، آتاز دا سئزئن تقصئرلرئزی باغیشلاماز.
اوروج
16اوروج توتدوغوز زامان ائکی‌اوزلی آداملار کئمی قاشقاباقلی گزمه‌یئن؛ چونکی اولار، اوزلرئنی دیئشئرلر کی خالقا اوروج اولدوقلارینی گؤرسده‌لر. دوغروسونی سئزه دیئرم؛ اولار بوتون اجرلرئنی آلیبلار. 17آمّا سن، اوروج توتدوغون واخت، باشینا یاغ سورت و اوزونی یو؛ 18اله کی، آداملارا یوخ، گؤزلردن گئزلی اولان آتانا اوروجلی گؤرونه‌سن. و گئزلئنی گؤرن آتان دا سنه عوضئنی وره‌جک.
گؤیده خزئنه‌لر
19یِر اوزونده اؤزوزه خزئنه‌لر ییغمایین؛ اوردا بئد و پاس اولاری محو اله‌ر؛ و اوغرولار اورانی یاریب، اوغورلارلار. 20بلکی اؤزوزه گؤیده خزئنه‌لر حاضیرلایین، اوردا کی نه بئد، نه پاس وورار؛ نه ده اوغرولار اورانی یاریب اوغورلارلار. 21چونکی سئزئن خزئنه‌ز هاردا اولسا، اوره‌یئزده اله اوردا اولاجاق.
22گؤز بدنئن چیراغی دیر؛ اونا گؤره، گؤزون سالئم اولسا، سنئن بوتون بدنئن ائشیق ائنان دولی اولار. 23آمّا اگر گؤزون پئس اولسا، سنئن بوتون بدنئن قارانلیق ائنان دولی اولار. پس اگر او ائشیق کی سنده‌دئر قارانلیق اولسا، او قارانلیق نه بؤیوکدور!
24هچ کئم ائکی اربابا قوللوق الئیه‌بئلمز؛ چونکی یا بئرئندن نئفرت اله‌یئب او بئرئسئنی سِوَر، یا دا بئرئنه وفالی قالیب، او بئرئسئنی حقئر سایار. هم تارییا هم ده پولا قوللوق الئیه‌بئلمزسئز.
نئگاران اولمایین
25«بونون اوچون سئزه دیئرم؛ اؤز حیاتیز اوچون نئگاران اولمایین کی، نه یئیه‌جکسئز و نه ائچه‌جکسئز، بدنئز اوچون ده نئگاران اولمایین کی، نه گئیه‌جکسيز. مگر جان یِمکدن، بدن ده پالتاردان آرتیق دِیئل؟! 26گؤیون قوشلارینا باخین؛ اولار نه اکئرلر، نه بئچئرلر، نه ده آنبارلارا ییغیرلار. آمّا گئنه ده، گؤیده اولان آتاز اولارین روزی سئنی ورئر. مگر سئز اولاردان چوخ ارزئشلی دِیئلسئز؟! 27سئزلردن کئم وار کی، نئگاران اولماق ائنان بئر ساعات عؤمرونه آرتیرا بئلسئن؟!
28نه اوچون پالتاردان اؤتری نئگاران اولورسوز؟ زَمی زانباقلارینین نجه بؤیودوکلرئنه باخین؛ نه زحمت چکئرلر، نه ده ائپلئک اَیئرئرلر. 29آمّا گئنه سئزه دیئرم کی، حتّا سولیمان پادشاه دا، بوتون جلالیندا بولاردان بئری کئمی گیئنمه‌دی. 30پس اگر تاری، بو گون چؤلده اولان اوتی کی، صاباح اوجاغا آتیلیر بِله گیئندئرئر، آیا سئزی داها آرتیق گیئندئرمیه‌جک، ای آز ائمانلی‌لار؟!
31بونا گؤره ده ”نه یئیه‌جه‌یئک؟“، ”نه ائچه‌جه‌یئک؟“، ”نه گئیه‌جه‌یئک؟“ دیئب، نئگاران اولمایین. 32چونکی بوتون بوتپرستلر بو شیلرئن دالیسیجا قاچیرلار؛ و سئزئن گؤیده کی آتاز بو شیلره مؤحتاج اولدوغوزی بئلئر. 33آمّا سئز اوّل تارینین پادشاهلیغی و اونون عدالتی دالیسیجا اولون، او واخت بو شیلر سئزه ورئله‌جک. 34بونا گؤره، صاباح اوچون نئگاران اولمایین؛ چونکی صاباحکی گونون اؤزی اوچون، نئگارانچیلیغی اولاجاق. هر گونون اؤزی اوچون چتئنلئکی وار.
လက္ရွိေရြးခ်ယ္ထားမွု
متّانین رئوایت 6: CAB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
@ 2024 Korpu Company