متّانین رئوایت 5
5
حقئقی شادلیق
1عئسا جاماعاتی گؤرن زامان داغا چیخیب، اوردا اوتوردی. شاگئردلری ده یانینا گلدئلر. 2و اولارا تعلئم ورمه‌یه باشلاییب، ددی:
3«خوش روحدا یوخسول اولانلارین حالینا،
چونکی گؤیون پادشاهلیغی
اولاریندیر.
4خوش یاسلی اولانلارین حالینا،
چونکی اولار تسلّی تاپاجاقلار.
5خوش حلئملرئن حالینا،
چونکی اولار یری مئراث
آلاجاقلار.
6خوش صالحلئیه
آج و سوسوز اولانلارین حالینا،
چونکی اولار دویاجاقلار.
7خوش رحم اله‌ینلرئن حالینا،
چونکی اولارا رحم اولوناجاق.
8خوش اوره‌یی تمئز اولانلارین حالینا،
چونکی اولار تارینی گؤره‌جکلر.
9خوش باریشی ساخلایانلارین حالینا،
چونکی اولارا تارینین اوغوللاری
دیئله‌جک.
10خوش او آداملارین حالینا کی، صالحلئک اوچون سئتم چکئرلر،
چونکی گؤیون پادشاهلیغی اولاریندیر.
11خوش سئزئن حالیزا او زامان کی، خالق منه گؤره سئزه یامان دیئب، عذاب ورئرلر، و سئزه هر جور بؤهتان وورورلار. 12سوئنئن و شادلیق اله‌یئن، چونکی گؤیده، اَجرئز بؤیوکدور. اونا گؤره کی، سئزدن قاباقکی پیغمبرلره ده بله عذاب ورئبلر.
دوز و نور
13سئز یر اوزونون دوزوسوز. آمّا اگر دوز دادینی اَلدن ورسه، اونی نه جور گئنه شور اله‌مک اولار؟ آرتیق هچ بئر شیه فایداسی اولماز، مگر اشئیه آتیلیب، ائنسانلارین آیاقلاری آلتیندا پایمال اولا.
14سئز دونیانین نوروسوز. داغ اوستونده قورولان شهر گئزلی قالا بئلمز. 15هچ کس، چیراق یاندیریب، اونی قابین آلتینا قویماز. چیراقدانا قویار کی، اِوده اولانلارین هامیسینا ائشیق ورسئن. 16بله ده قویون سئزئن نوروز ائنسانلارین حوضوروندا اله شاخسین کی، یاخشی عمللرئزی گؤرسونلر و گؤیده‌کی آتازا حمد اله‌سئنلر.
تؤوراتین حؤکملرئنئن یرئنه یتئشمه سی
17گومان اله‌مه‌یئن کی، من تؤورات کئتابین و یا پیغمبرلرئن یازیلارینی پوزماغا گلمئشم؛ پوزماق اوچون یوخ، تاماملاماق اوچون گلمئشم. 18چونکی دوغروسونی سئزه دیئرم، گؤی و یِر آرادان گده‌نه کئمی، شرئعتدن بئر هَمزه و یا نؤقطه بله یوخ اولمایاجاق، اله کی، هامیسی یرئنه یتئشسئن. 19بونا گؤره، هرکس بو لاپ کئچئک حرفلردن بئرئنی پوزسا و بله اله‌مه‌یی ائنسانلارا اؤیرتسه، گؤیون پادشاهلیغیندا او، لاپ کئچئک ساییلاجاق. آمّا هرکس اولارا عمل اله‌یئب اؤیرتسه، گؤیون پادشاهلیغیندا بؤیوک ساییلاجاق. 20چونکی سئزه دیئرم کی، اگر سئزئن صالحلئیئز تؤورات موعلّئملری و فرئسئلرئن صالحلئیئندن آرتیق اولماسا، گؤیون پادشاهلیغینا اصلا گئرمیه‌جکسئز.
آدام اؤلدورمک
21اشئدئبسئز کی، قدئم زامانلارین خالقینا دیئلئب: ”آدام اؤلدورمه، کئم آدام اؤلدورسه، گَرَک موحاکئمه اولا.“ 22آمّا من سئزه دیئرم؛ کئم قارداشینا سببسئز حئرصلَنسه، گَرَک موحاکئمه اولا. و کئم قارداشینا آخماق دسه، مئلّت محکمه‌سئنئن قاباغیندا خاطاکار اولار. و کئم ”سن، ای آخماق“ دسه، جهنّم اودونا موستحق اولار. 23بونا گؤره، قوربانینی قوربانگاهدا تقدئم اله‌دئیئن واخت، یادینا دوشسه کی، قارداشینین سندن بئر شئکایتی وار، 24قوربانینی اوردا قوربانگاهین یانیندا قوی. اوّل گت قارداشین ائنان باریش و اوندان سورا گل، قوربانینی تقدئم اله. 25سندن شئکایت اله‌ین آدام ائنان، اله او واخت کی اونونان محکمه یولونداسان تِز باریش، اولمایا کی سنی حاکئمه تاپشیرا، حاکئم ده سنی زئندانبانین اَلئنه وره، زئندانبان دا سنی زئندانا سالا. 26دوغروسونی سنه دیئرم کی، آخیر قارا پولونی ورمه‌یه‌نه قدر، زئنداندان چیخمایاجاقسان!
زئنا و بوشانما
27اشئدئبسئز کی، دیئلئب: ”زئنا اله‌مه!“ 28آمّا من سئزه دیئرم: هر کس بئر آروادا شهوت ائنن باخسا، ائله او آندا اوره‌یئنده اونونان زئنا اله‌مئش اولور. 29اگر صاغ گؤزون سنی پئس یولا چکسه، اونی چیخارت و اؤزوندن آت گتسئن. چونکی سنئن اوچون عوضولرئندن بئرئنئن یوخ اولماسی، بوتون بدنئنئن جهنّمه آتیلماسیندان داها یاخشی‌دیر. 30اگر صاغ الئن سنی پئس یولا چکسه، اونی کس و آت گتسئن. چونکی سنئن اوچون عوضولرئندن بئرئنئن یوخ اولماسی، بوتون بدنئنئن جهنّمه آتیلماسیندان چوخ یاخشی‌دیر.
بوشانما
31اشئدئبسئز کی، دیئلئب: ”کئم آروادینی بوشاسا، اونا بوشانما کاغیذی ورسئن!“ 32آمّا من سئزه دیئرم، هرکس کی، آروادینی زئنادان باشقا، آیری بئر سببه گؤره بوشاسا، اونی زئنایا سالیر. هر کس ده اَرئندن بوشانان آرواد ائنان اِولَنسه زئنا اله‌یئر.
آند ائچمک
33گئنه، اشئدئبسئز کی، قدئم زامانلارین آداملارینا دیئلئب: ”یالان یره آند ائچمه، بلکی ربّه ائچدئیئن آندلاری یرئنه یتئر!“ 34آمّا من سئزه دیئرم: هچ واخت آند ائچمه‌یئن؛ نه گؤیه، چونکی او، تارینین تختی‌دئر، 35نه یره، چونکی اونون آیاقلاری اوچون آیاق‌‌آلتی‌دیر، نه ده اورشلئم شهرئنه، چونکی او، بؤیوک پادشاهین شهری‌دئر. 36باشیزا دا آند ائچمه‌یئن، چونکی بئر دنه ده اولسا، توکوزی آغ و یا قارا الئیه بئلمزسئز. 37آنجاق ”بَلئز، بلی“ اولسون و ”خِیرئز، خیر“؛ بوندان آرتیغی شرئردندئر.
گؤزه گؤز، دئشه دئش
38اشئدئبسئز کی، دیئلئب: ”گؤزه گؤز، دئشه دئش.“ 39آمّا من سئزه دیئرم: شرئر آدامین قاباغیندا موقاوئمت اله‌مه‌یئن. کئم اوزوزون صاغ طرفئنه وورسا، او بئری طرفئنی ده چوئرئن. 40و اگر بئری محکمه‌یه گدئب، کؤینه‌یئزی آلماق ائسته‌سه، اونا اوست پالتاریزی دا ورئن. 41کئم سنی بئر آغاج یول گتمه‌یه زور اله‌سه، اونونان ائکی آغاج گت. 42هر کس یالواریب سندن بئر شی ائسته‌سه اونا ور و سندن بورج ائسته‌ینه اوز چوئرمه.
دوشمنلرئزی سوئن
43اشئدئبسئز کی، دیئلئب: ”اؤز قونشونی سِو و دوشمنئندن نئفرت اله.“ 44آمّا من سئزه دیئرم: دوشمنلرئزی سوئن و سئزی ائنجئدئب، اذئیّت ورنلر اوچون برکت دوعاسی اله‌یئن، 45اله کی گؤیده اولان آتازین اوغوللاری اولاسیز. چونکی او، اؤز گون ائشیغینی هم پئس آداملارین، هم ده یاخشی آداملارین اوستونه سالیر. یاغیشینی دا هم صالح آداملارین، هم ده پئس آداملارین اوستونه یاغدیریر. 46اگر سئزی سِونلَری سِوه سئز، سئزه نه اجری اولاجاق؟! مگر باج ییغانلار دا بله اله‌مئرلر؟! 47و اگر آنجاق اؤز قارداشلاریزی سالاملایاسیز، سئزه نه اجری وار؟! مگر بوتپرستلر ده اله اله‌مئرلر؟! 48بونون اوچون، گؤیده‌کی آتاز کئمی، سئز ده کامئل اولون.
လက္ရွိေရြးခ်ယ္ထားမွု
متّانین رئوایت 5: CAB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
@ 2024 Korpu Company